HE SORKAR HNUAIAH HIAN MIPUITE KAN THLA A MUANG: LALRUATKIMA

Mizo National Front

General Headquarters

Mizoram : Aizawl

Press Release

HE SORKAR HNUAIAH HIAN MIPUITE KAN THLA A MUANG: LALRUATKIMA

Vawiin (30.1.2021) hian MNYF General Hqrs. intlawhchhuah programme Dinthar Local Council House-ah neih a ni a. He hun hi Pu Lalruatkima Minister, MNF Adviser ni bawkin a hmanpui.

Pu Lalruatkima chuan thusawiin, “He sorkarah hian tihfuh loh langsar tak kan nei lo a, he sorkar hnuaiah hian mipuite kan thla a muang hle a ni. Ration-ah buhfai a hnianghnar a, chana leh chini chenin ration-ah sem a ni a. Ram hruaitute an huaisen avangin mipuite an huaisen a, ramriah pawh hma kan sawn a ni. Kawng hrang hrangah Sorkar-in a phak ang tawkin hna a thawk mek zel a ni,” a ti a. “Ram neituin neitu thinlung pua ram leh mipuite min hruai hnuah, Covid hripui nuai karah pawh hmasawnna a kal chak hle a ni,” a ti a. AMC inthlanah pawh mipuiin MNF kutah sorkarna an pek ngei a rin thu a sawi bawk.

Pu Lalruatkima chuan, “Congress sorkar khan bawlhhlawh paih motor cheng nuai 8 man vel nuai 22 vel bawrin an lei a. An lei to uchhuak hle. Congress sorkar-in nuai 100 chuangin incinerator an siam a, tun thlengin hman tlak lovin a awm ringawt mai a ni.  Khangte kha mipuite hian kan la hrereng a, tuna bawlhhlawh paih dan siam thar an sawi pawh hi mipuiin awih har kan ti hle a ni,” a ti bawk.

He inkhawm hi Pu Lalduhawma, MNYF Block Vice President-in a kaihruai a ni. 

(LALLENMAWIA JONGTE)

Secretary

Media & Publicity Dept.

Mizo National Front

Memo No.MNF/Media/02/2021/157

Dt.30.01.2021.

CONGRESS AN TLUCHHE TAWH, ZPM PAWH AN ORIGINAL SIZE TIAT LEK AN NI: MNF PRESIDENT

  

Mizo National Front

General Headquarters : Mizoram : Aizawl

 Press Release

CONGRESS AN TLUCHHE TAWH, ZPM PAWH AN ORIGINAL SIZE TIAT LEK AN NI: MNF PRESIDENT

Vawiin ni 30.01.2021 Inrinni chawhma dar 11 hian MNF Pesident leh Chief Minister Pu Zoramthanga chuan MNF Party AMC Election Manifesto leh MNF Party Website tlangzarhna a nei a. Congress party chu an tluchhe vek tawh a, ZPM pawh an original size tiat lek an ni tih a sawi. Tlangzarhna inkhawmah hian MNF President Pu Zoramthanga chuan thusawiin, “AMC inthlan hi a naran lo, Mizoram mipui hmun thuma thena hmun khat awmna leh mithiam zawk awmkhawmna a nih avangin election lo awm tur hi a pawimawh em em a ni, ” a ti a.

Aizawl Municipal Corporation chu a tirah municipal council tiin MNF-in bul an tih a sawi a, “Keini hi a neitu kan ni a, midangte chu vai party lo pem lut an ni. Keini chuan a takin hna kan thawk ang. Sorkarna siam ngei pawh kan inring,” a ti. “AMC inthlana chak kan inrin chhan chu MLA 2018 inthlanah thawm na ber chu ZPM an ni. ‘Keini chu kohhran thawhpui leh kohhran hi kan unit,’ an ti. Sorkar siam an inrin avangin Chief Ministerial candidate hial an nei a nih kha. MNF leh Congress ten chief minister candidate kan nei ve ngai lo. Anni chu CM candidate tiin an inhampuar a, mipui thenkhat pawhin tak tak emaw an ti. “MLA inthlan result a lo chhuah meuh chuan MLA 8 an nei a (tunah 7). CM Candidate kha khawiah nge? Sakeibaknei anga inthuam vun chhungah Sabengtung a lo awm reng a, chu chu mipuiin hriain MLA by election, VC/LC, Autonomous District Council-ah MNF kan chak em em a. LADC ah phei chuan ZPM-in seat an la lo mai pawh a ni lo, an chuh ve ngam lo hrim hrim. Mipui hian an hrechiang tawh em em, party zuih turte chu an zuih telh telh a nih hi. AMC inthlan tur kan en hian MNF kan sorkar ngei kan ring a ni.

Pu Zoramthanga chuan MNF history bultan dan ropui lo tak te, rambuaia an luh dan te, remna lo awm tak dante sawiin, “Election kan fight thut a, MLA 24 neiin kan sorkar nghal a. Kan zei loh lutuk avangin Pathianin tawk a tia kum khat leh a chanve chauhah President’s rule-ah min dah a. Pu Denga’n Governor hnenah president’s rule-a min dah chhan a zawhna chu, ‘Nakinah kan hrilh ang che u’ an tih kha vawiin thlengin min la chhang lo,” a ti. “A hnuah Pathianin kum sawm min sorkar tir leh a. A hnuah Congress kum sawm bawk. Congress kha Delhi ah an la lian em em a, Mizoramah pawh an la lian. A hnuah an tla chhe ta a. Zoram Congress pawhin zu an han zuar tak taka an tlachhe ve ta a, tun dinhmunah phei chuan artelukawn thei dinhmunah an ding ta a ni. Hei vang hian inthlan awm apiangah kan chak ta em em a ni. Pathian leh kan ram tia kan kal ngat ngat hi Pathianin malsawm tlak a ti a, kum 60 min hruai thleng a ni.

Pu Zorama chuan engatinge Congress hi an chhiat tak, President pawh thlang thei lova an awm? An President rei ber chu Sonia Gandhi a ni. Ani kha Chirstian a ni a, a fapa Rahula tan lord krishna hnenah malsawmna a dil a. A kaihhruai lai ngeiin Congress chu an chhe ta vek a. He lamah pawh zu an zawrh avangin tundin leh ngaihna a awm tawh lo, a ti.

ZPM party chungchangah: An hruaitute chu inthlan dawn apianga symbol thlak ngai an ni a. An hotupa phei chu a awm tawhna party zat hi thaw lova sawi theih a ni lo. Hming pawh an phuah hraw hle thin a. CM Candidate, Secretary General, Val Upa Council, General Secretary neiin, OB chungah Leader nen inkulh rup mah sela, baloon hampuar hawlh thep ang maiin an original size tiat lekah an lo awm ta a, thli beng lohna lama lehkha chaih tum ang chauh an ni, MNF President chuan a ti bawk. Manifesto leh Website tlangzarhna inkhawm hi MNF Sr. Vice President leh Dy CM Pu Tawnluia’n a kaihruai a. Election Manifesto sawihawnna Er. R. Rohmingliana, Member Secretary NCC-in a nei a. Website sawihawnna Pu T. Lalhmachhuana, GS-in a nei a. MNF Vice President Pu Vanlalzawma pawhin thutawi a sawi bawk a ni.

(MALSAWMPUIA RALTE)

Joint SecretaryMedia & Publicity Dept

.Mizo National Front

Memo No.MNF/Media/02/2021/156Dt.30.01.2021.

CONGRESS KUTAH SORKARNA KAN DAH LEH A NIH CHUAN KAN TISUAL NAWN LEH DAWN TIHNA A NI: LALRUATKIMA

Mizo National Front
General Headquarters
Mizoram : Aizawl

Press Release

CONGRESS KUTAH SORKARNA KAN DAH LEH A NIH CHUAN KAN TISUAL NAWN LEH DAWN TIHNA A NI: LALRUATKIMA

Vawiin hian Republic Veng YMA Committee Room-ah Ward XVII MNF campaign Committee buatsaihin campaign hun hman a ni a. He hun hi Pu Lalruatkima Minister-in a hmanpui a ni.
Pu RKA chuan thusawiin, “Congress kutah rorelna kan dah leh a nih chuan mipuite’n kan tisual nawn leh dawn tihna a ni,” a ti.

Pu Lalruatkima chuan thusawiin, “2018 velah khan Zoram hi a mangang a, tlawmngai pawl leh kohhran an ṭawngṭai. Zu zawrh avangin mi tam tak an thi a, hmeithai leh fahrah kan pung nasa hle a ni. Gas a harsa, kawng a chhe em em a, mipui kan rum tak meuh a ni. Chutah MNF kan sorkar veleh zu zawrh tihtawp nghal a ni a, gas a lo awlsam ta hle a, Zoram dung tluan kawng pawh a ṭha ta hle a ni,” a ti. MPCC President-in tlawmngai pawl leh kohhran duh loh zawng tih an tum tawh loh thu a sawi chungchangah, Pu Ruatkima chuan, “A nih tur ang a nih vek hnu, a pawi tur ang a pawi vek hnua sim tum chu a tlai mang e aw. A inngaihtuah harh har mah mah a ni,” a ti.

MNF Adviser chuan, “Neutral tan MNF vote loh chhan tur a la awm lo. Sorkar hmalakna hrang hrangte a lungawithlak hle a ni. Covid hripui do thuah nise, Pathianin kan hotute finna a pe a. Tlawmngai pawl leh Kohhrante nen ṭangrualin kan bei a, Covid vei tlem ber leh thi tlem ber State kan ni hial a ni,” a ti. “Pathianin Pu Zoramthanga sorkar hi hriak a thihin mal a sawm hle a ni,” a ti bawk.

Ward XVII MNF Candidate Pu David Zohmangaiha pawhin thu a sawi a, State-a sorkar mek hnehnai thei thlangtling turin Ward mipuite a ngen a ni.

He hun hi Pu Lalthangmawia Vice Chairman, Republic Veng Local Council-in a kaihruai a ni.

(LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/02/2021/155
Dt.29.01.2021.

Hripui leng karah sorkar hmasain an hnuchhawn hmasawnna hna kan thawk tel pah reng- Vice President, MNF:

Mizo National FrontGeneral HeadquartersMizoram :Aizawl

Press Release

Hripui leng karah sorkar hmasain an hnuchhawn hmasawnna hna kan thawk tel pah reng- Vice President, MNF:

Vawiin ni 29.1.2021 dar 11:00am khan MNF Vice President Pu Lalthlenglina chuan Buang khua a tlawh a, Buang khuaa inkhawmna neihah hian thusawiin, “Politics hi thlir thiam a ngai a, chak chang, chak loh chang a awm a, keini Nationalism Party chuan kan hmaa Serchhip bial bye election lo awm turah pawh hian Rulling tha chhawr thiam a, chakna la ngei tura hma kan lak a ngai a ni. Candidate tur rawn lang tan zingah mahni Huana tui ru duh, a awmna Party apianga awm rei thei lo, hmanhmawh riauna nei, Pawl 12-a thu kim tawh, Party tin luhkaa etang vek tawh, tumahin chhuak rawh an tih pawh ni lo, ama thua chhuak zel a ni a; Pu Lalduhawma hi Congress-ah te khan la awm reng se, Pu Lalzirliana minister zat, MNF-ah khan la awm zel nise, Pu Tawnluia minister zat ni ve daih tawh tur a ni. Tin, Independent MLA ni chung siin, India Constitution zahawm tak bawhchhia a, Speaker-in ti tawh lo tura a hrilhruk fo hnu pawha an Office-a mithar lawmluta hun a hman luih zel hnuin, kan MLA 12-ten hreh tak chungin, India Constitution bawhchhiaa thil a tihluih zel avanga zualko ta an ni a. Pu Duhawma hi a khawngaihthlak a, kei pawhin ka khawngaih, Mahse, Dan bawhchhetute hi khawngaiha ngaihdam theih an nih miau si loh avangin, a chungah Dan lekkawh a ni ta mai zawk tih hi kan hriat chian a tul,” a ti.

MNF Vice President Pu Thlenga chuan, “Pu Lalduhawma hi tu tan mah a hnawk hran lo, a maha hnawk ber chu Pu Duhawma hi a ni. A dang tha zawk tur buaipui hian a phi buai reng a ni,” a ti. Pu Thlenga chuan, “Pathian hian Mizoramin harsatna a tawh apiang hian, Pu Zoramthanga kaihhruai hi rorel turin a ruat zel a, tun tum Covid 19 Hripui leng karah pawh sum awm ang angin, kawng kan siam a, hripui leng karah pawh sorkar hmasain a hnuchhawn hmasawnna hna kan thawk tel pah reng tho a, Congress-in an lo hnuchhawn mai mai kha hma thar lakna hmuh theihin a awm ta. Pathian malsawmna ropui tak dawngin, kan ding chhuak mek a ni, Pathian hian kawng laklawhah min hnutchhiah dawn lo, Zoramthar hi a piang ngei pawh kan beisei,” a ti bawk.

Vawiin 29.1.2021 vek hian MNF Vice President Pu Lalthlengliana chuan Thenzawla Party hrang hrang atangin mi 67 MNF-ah a lawmlut a. Lawmluhna inkhawm hi Thenzawl Jt.YMA Hall-ah Social distancing zawm thlap a neih a ni a, hall khat tlatin mipui an kalkhawm a. He inkhawm hi Serchhip West Block President Pu Vanlalzawna’n a kaihruai a, Vice President Pu Thlenga hi MNF General Headquarters atangin General Secretary pali, Pu Ngurzamlova, Pu Lalropuia Pachuau, Pu R.Lalthansanga leh Pu Saihnuna-te bakah, Secretary leh Joint Secretary engemaw zatin an tawiawm a ni.Mithar lawmluhna neiin Pu Lalthlengliana chuan, “Serchhip bial hian ngaihtuahna fim tak hmanga he bye election kan hmachhawn mek hi ngaihtuah turin ka duh che u a. Chutiang ngaihtuahna neia vawiina MNF rawn zawm tharte hi lawm takin MNF-ah ka lawmlut che u a. Vawiin atang hian tih tur pawimawh tak, MNF tana sengkhawm hna thawk turin ka chah che u a. MLA Bye Election kan neih turah pawh theihtawp chhuah turin ka chah che u a ni. Rulling MLA nei ngei turin tan in lak ka beisei a ni,” a ti.

(F.LALBIAKZAMA)

Secretary

Media & Publicity Dept.

Mizo National Front Memo No.MNF/Media/02/2021/154Dt.29.01.2021.

MIZORAMA SIPAITE UMCHHUAH VEK KAN TUM : CM ZORAMTHANGA

Mizo National Front
General Headquarters
Mizoram : Aizawl

Press Release

MIZORAMA SIPAITE UMCHHUAH VEK KAN TUM : CM ZORAMTHANGA

Chief Minister Pu Zoramthanga chuan Aizawl khawpuia Assam Rilfles-te chu an chhuak thuai dawn tiin Covid 19 vangin an insawn tur a khaihlak avangin February thla hian chhuak fel vek tura nawr an nih thu a sawi.

Vawiin Dt. 28.01.2021 chawhnu dar 2 khan Ramhlun South YMA Hall-ah Chief Minister Pu Zoramthanga chuan AMC Ward No IV MNF Campaign hawnna leh Manifesto tlangzarhna hun a nei a, MNF-ah mi thar 83 a lawmlut bawk. Inkhawm hi Aizawl N-II Block MNF President Pu Vanlaldika’n a kaihruai a, Ward IV Candidate Pu Laltlanzova pawhin thusawina hun a nei bawk.

Assam Rifles chungchangah Chief Minister Pu Zoramthanga chuan February 2021 chhungin Zokhawsanga pem vek turin nawr an nih thu leh za rual vel an insawn tawh thu a sawi a. AR hotute pawhin phei an duh tawh hle a, an inbuatsaih mek tih a sawi. “Keini sorkar lam pawh kan inbuatsaih mek a, Aizawl mai ni lo, Mizoram hmun danga kan ram min chhuhtu sipaite pawh umchhuah vek kan tum a. Hei hi Prime Minister leh Union Home Minister pawh ka sawipui tawh,” a ti bawk.

Mizoram tan Pathian remruat dan sawiin, “Mizo nationalism hi thisena baptist a duh avangin rambuaiah kan lut tih a sawi a. Pu Denga tih a ni lo a, Pu Chaliha thinlung a ti a tlat a, rambuaiah kan lut ta a ni,” a ti.

“October hian MNF kum 60 kan tling dawn, MNF paltlang kawng hi a namai lo hle a. Delhi-ah MNF a ral dawn an ti. Laldenga a awm loh chuan engmah an ni lo, an ti. Pathianin MNF a hruai zel, Pu Denga a liam tawh, Pu Zorama pawh a la liam ang, Varparh Arsi hi a eng zual zel ang. MNF thuthlung chu ‘Pathian leh kan ram tan’ tih a ni, Pathianin mal a sawma kum 60 kan lo thleng ta a ni,” a ti a.

MNF President Pu Zoramthanga chuan, an opposition rek vanglai takin MNF-ah leader duh khawp lohna leh harsatna namenlo an tawh dante, MNF ‘N’ a lo pian hial dan a sawi a. Nimahsela kum 1998-ah Pathian remruat a lo thleng a, kum sawm sorkar lo an siam dan te, Delhi lama Congress la len lutuk avanga kum sawm dang opposition-a MNF awm dan te, kum 2018-ah two third majority neia MNF kaihthawhleh dan a sawi.

“Kan sorkar hnuah MP inthlan kan nei a, election code of conduct-in rei tak min phuar a. A hnuah Covid 19 a lo lang leh a, kan sorkar hnathawh tak tak hi thla riat chauh a la niin ka hria,” tiin, MLA inthlanah khan ZPM-ten kohhran unit-a hmangin chief ministerial canditate hial an nei a. Mahsela Pathianin MNF tan hun a ruat avangin sorkar ngelnghet kan siam a. By election, VC/LC, LADC inthlanah MNF kan chak hle a ti bawk.

Chief Minister chuan: Serchhip Bialtu Pu Lalduhoma erawh chu a che ‘over’ deuh a, dan a bawhchhiat avangin Ekdom ZPM a nih phah ta a ni hi, a ti a. MLA atanga ban a nih chuan Court-a kal tum kha tunah mipui Court an ti leh a. Tunah hian pawl sawn nasa Pu Duhoma leh ZPM chu mipuiin an hrechiang tulh tulh a, an tlachhe tulh tulh niin a sawi a. MNF chu Pathianin ropuina leh sanna a pe lo, a remruatnain kan kal zel a ni, a ti.

Ward IV Candidate Pu Laltlanzova pawhin thusawiin, “Kum nga chhung rawngbawlna hun tha min pek tawh avangin ka lawm a. Tun AMC inthlan tura hun tha min pe leh hi ka lawm a, kan Ward tan theihtawp chhuaha hnathawh ka tum a ni,” a ti a. Ward IV chu AMC Ward hmasawn ber ni tura hmalak a tum thu a sawi.

MNF chu hun harsa atan Pathian ruat a ni tiin, Mautam lai hun leh tun hripui len hunahte hian kan hotute inpekna zarah lian lutuk awm lovin tun hi kan thleng, a ti a. Mizo tawh phawt chu hnam party – MNF-a tel tur nia a hriat thu a sawi bawk a ni.

Mi 83 MNF-a lawmluh tharte aiawhin Pu J.Zirkunga pawhin thutawi a sawi a. “Pakhat zela an kal bovin an kiam tual tual Congress Bhavan,” a ti a. “Kan hmun ruak chu Pu Zodintluanga leh a hoten hnawhkhah dan tur an lo dap mai ang,” tiin Congress party-ah kum 30 an awm tawh thu leh chanvo pawimawh tak tak chelh thin an nih thu a sawi bawk a ni.

(MALSAWMPUIA RALTE)
Joint Secretary
Media & Publicity Dept.
Mizo National Front
Memo No.MNF/Media/02/2021/151
Dt.28.01.2021.

MNF chu kan rek em em lai pawha min khaichhuak thin Chunglam thiltithei a awm : Dr.R.Lalthangliana Minister

Mizo National Front
General Headquarters
Mizoram : Aizawl

Press Release

MNF chu kan rek em em lai pawha min khaichhuak thin Chunglam thiltithei a awm

Dr.R.Lalthangliana Minister

Vawiin January ni 28th, 2021 (Ningani) hian MNF South Tuipui Block-1, Hnahthial-te chu Community Hall, Electric veng, Hnahthial-ah Political Training an nei a. He hun hi bialtu MLA, Dr.R.Lalthangliana Health Minister chuan a hman pui.

Khuallian Minister, Dr.R.Lalthangliana chuan he hunah hian thu a sawi a. “Kum 1986 June ni 30 khan Mizoramah remna leh muanna a lo thleng a, chumi hma daih 1970 chhoah Shillong-ah te, zilai hruaitu a khaipa ka lo ni ve tawh thin a, kum 1979-ah NESO-ah Founder zingah ka tel ve a, President-te ka lo ni tawh thin. Khatih hun lai atang tawh khan ka thinlungah Mizo Nationalism hi a lo intuhnghet tawh hle a ni. Kum 1986 khan Pu Denga rawtna angin MNF Organiser-ah mi 5 min lo dah a, 1987 State inthlan hmasa berah tuna Hnahthial bialah hian MNF ticket-in min dintir a, hmelhriat nei sa lovin, ni 13 chiah Campaign hmanin bial pawh ka fang chhuak zo hman lova, Vote 180 vel hmuin pahnihna niin ka tling zo ta lo a. A kum leh lawkah Lunglei lam bialah ka lo tling chho ve ta char char a ni. MNF hian hun khirhkhan leh hun harsa tam tak a lo paltlang tawh thin a. Tum khat chu Chhimtuipui leh Lunglei lam MLA bial 12 awmah keimah chiah MNF MLA awmin a lo khawhar thlak ve hle tawh thin a ni. Term hnihna Opposition-ah ka hman zawh hnuah kum 1998-ah MNF sokarah Cabinet Minister-ah ka lut chho ve nghal a ni. MNF chu kan rek em em lai pawha min khaichhuak thin chunglam thiltithei a awm a ni. Mautam hmasaah mualpho lutuk lovin Pathianin min hruai chhuak a, kha kha Forest Minister ka nih lai a ni. Covid vangin khawvel ram ropui berte pawh an thi nasa em em a, an mangang em em a ni. Covid-in min tibuai nasa a. Mizoram chu nikum 2020, January ni 30 khan Covid lo thlen hma tak takin lo inbuatsaih nan Meeting ka ko nghal a nih kha. India ramah Foreign ram nen indepah Mizoram chu checking point siam hmasa ber kan ni a, February-ah India rama Airport-ah Screening tihmasa ber kan ni a. CM hova inrawn khawmin March thla khan India rama Lockdown tihmasa ber kan ni bawk. Thi leh vei awm tlem berna ram kan ni hi kan that leh fel vang a ni lova, kan thawhhahna leh tanrualna Pathianin mal min sawm zawk a ni. Kan Covid dona chungchangah hian kan Chief Minister zahawm tak Pu Zoramthanga inpekna leh thil phalna hi a chhuanawm ka ti tak zet a, kan CM leh Minister-te thil tihthat hi sawi tam ula ka duh a ni,” a ti.

“MNF hi tunhmain thih ngei ngeina turah pawh Pathianin a lo chhanhimin a lo hruaichhuak zel tawh thin a, Pathianin min hruai zel thin a ni. Covid hun harsa avang hian kan SEDP kalpui dan tur pawh a khaihlak phah nasa a, mahse, Covid hi Pathian zarah a ziaawm chho turah ngai ila, kan SEDP hmalakna leh hnathawh tur hi a la par chhuak nasa dawn chauh a ni. Kan ram khaichhuak tur hian tuna kan President Pu Zoramthanga hi a chhuanawm thlawt a, mi zui tlak tak a ni tih hre chiangtu ka ni a. MNF chuan Party hming kan la thlak ve lo a, Mizo Nationalism Lungphum a ni a, a nghetin a tlo a ni. Tute Party emaw anga nihna duh avanga hming thlak ve zung zung kan ni ve lo,” Dr.Thangtea chuan a ti bawk.

Pu Vanlalhnema, Adviser MNF General Headquarters leh General Headquarters atanga Resource Person Pu V.Lallungmuana hnen atangin thusawi ngaihthlak a ni bawk.

Pu C.Lalruatkima, Secy.South Tuipui Block-1 chuan inhmelhriattirna hun hmangin Pu C.Zoremsanga, Fin.Secy.S Tuipui Block-1 chuan Financial Report a pe a, Pu PC.Vanlalrema Jt Secy.chuan Block chhung Report a pe. Pu R.Lalbela, NCM chuan hunserh a hmang a, Pu J.Lalchhuana, President, S.Tuipui Block-1 chuan he hun hi kaihruaiin Pu B.Lalromawia, Vice President, S.Tuipui Block-1 chuan lawmthu sawiin hun a khar.

South Tuipui Block-1 Hnahthial te hian Chief Minister Pu Zoramthanga kaihhruai sorkarin Hnahthial District a pe leh chak taka kalpui mek lawmawm an tih thu te, bial hnufum tak ni thin Hnahthial bial chu a ngaihna hria Dr.R.Lalthangliana hmalakna vangin kawng hrang hrangah hma an sawn chak thu leh an chhuan thu te, bial nu leh pa nih tling an tih thu an sawi. Khawvel ram ropui ber te pawhin an manganpui em em Covid-19 hrileng karah Chief Minister leh Health Minister-te hmalakna avangin Mizoramin Pathian malsawmna kan dawn thu leh India rama hmala tha ber kan ni chu lawmawm an ti a, MNF chu sorkar rintlak tak a ni an ti. Kum 2023 MLA Inthlan lo awm turah Block President kaihhruainain lungrual taka hma an lak tur thu RESOLUTION siamin an tarlang. Resolution hi Pu VL.Liansanga, Secy.S.Tuipui Block-1 chuan a chhiarchhuak a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/149

State sorkar sum bawm zen thei tur MNF AMC vote tling turin mipuite kan ngen tak meuh a ni: Lalruatkima

Mizo National Front
General Headquarters
Mizoram : Aizawl

Press Release

State sorkar sum bawm zen thei tur MNF AMC vote tling turin mipuite kan ngen tak meuh a ni: Lalruatkima

Vawiin hian Khatla South YMA Hall-ah Khatla South MNF Unit huaihawtin AMC inthlan campaign hun hman a ni. He hunah hian Pu Lalruatkima, Adviser leh Minister ni bawk chuan a hmanpui a ni.

Pu Lalruatkima chuan thusawiin, “Sorkar chakna tel lo chuan AMC ṭha tak neih a har hle a. State sorkar chakna tel lo chuan thil tak tak AMC-ah tih a har chin a awm a. Ruling party hian tih theih tam tak a nei a ni. State sorkar sum bawm zen thei tur MNF AMC candidate-te vote turin mipuite kan ngen tak meuh a. Aizawl mipuiin sorkar nghet kan mamawh a, chu sorkar ngelnget siam tur chuan MNF a sorkar a ngai. AMC-ah hian Khawpui ralmuang, khawpui hmasawn, ministry nena ṭangkawp tur MNF a sorkar a ngai a ni,” a ti.

Pu Lalruatkima chuan, “Kan sorkar veleh mi tam tak thihna thlentu zu zawrh tih tawp nghal a ni a. Sikul kal hunbi thlak danglam a ni a, kawngchhe em em ṭhin pawh a lo ṭha ta hle a. Gas kan hnianghnar ta hle bawk a ni. Zirtirtu indaih lohna phuhruk turin zirtirtu ṭhahnem tak lak an ni bawk a ni,” a ti a. “Hripui a lo thleng a, kan mang a ang hle a ni. Chunglamin kan hotute finna a pe a, Kohhran leh tlawmngai pawlte nen ṭang hovin hri kan do a. India rama hri vei tlem ber leh thihpui tlem dinhmunah kan ding a ni,” a ti bawk.

Pu RKA chuan Congress party chungchang sawiin, “Congress Party chu Manager nei lo team ang mai a ni a, an phur lo em em mai a ni. An sorkar lai pawhin AMC-ah an sorkar zo lo a, an sorkar loh hnu phei chuan a ngaihna a awm lo,” a ti. ZPM chungchang sawiin, “Social media-ah an sorkar hmel ṭhin khawp mai. Fake account nen nasa takin social media-ah an bei a, chutianga sorkar theih a lo ni si lo. Kum 2018 aṭanga awm chauh si, inthlan apiangin an symbol an thlak a, hmingthlak tih velah chhun tur an nei ṭha bawk a, symbol an thlak reng ringawt mai a ni,” a ti bawk.

He inkhawm hian Pi Lalrinpuii Ward XIV MNF candidate pawhin thu a sawi a, voter 10 MNF-ah a lawmlut bawk.

Pu PC Ngurliantluanga, President Khatla South MNF Unit-in a kaihruai a ni.

(LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/02/2021/150
Dt.28.01.2021.

PRESS STATEMENT OF PU LALTHLENGLIANA, VICE PRESIDENT, MIZO NATIONAL FRONT

PRESS STATEMENT OF
PU LALTHLENGLIANA,
VICE PRESIDENT,
MIZO NATIONAL FRONT

On 28.02.2021
at Serchhip Press Club

MLA General Election 2018-ah MNF-in sorkarna kan chan hnuin December 15, 2018-ah sorkar lakluh a ni a. Kan Chief Minister zahawm tak Pu Zoramthanga’n hmun tam taka kawng chhe lutuk thinte kha a ngai pawimawh hle a. Pawisa awm ang angin kawng siam nghal a ni a. Hetiang taka hmalak a nih avang hian MP (Lok Sabha) inthlanah MNF Candidate chu hneh taka thlantlin a ni. Election Code of Conduct-in thla thum chhung zet min phuarzui a, chumi hnuah Covid-19 hripui a len avangin duh angin hma a lak theih loh a ni.

  1. Ramri buaina: He hun harsat lai tak hian ramri buaina a lo thleng bawk a. Thinghlunah thlamte halin, huan thlai an chil darh a, Phaisen kawngte an rawn ping a, Mitdeli (Medili) Lui leh Saihapui V-ah buaina an rawn siam bawk a. Congress sorkar dawihzep tak hunlaia an duh duha kan zirlaite an vuaktir thin ang kha thleng ve lovin, kan CM-in huaisen taka hma a lakna zarah Mizo mipui duh danin ramri buai boruak thunun a ni. Kan police-te pawh buaina awm palh thulhah che nghal thei tura thupek an ni a. Hei hi Assam lam pawhin ngai ngam lovin an tawlhhnun phah a, kan police-te pawh hmalam panin an tawlh zel a. Hei hian ram venghim turin kan police-te chu huaisenna a pe bawk a ni.
  2. Tuikuk chungchang: Kum tam tak kan buaipui Tuikuk (Bru) unaute hian helna chawkchhuakin buaina an siam reng a. Anmahni thuin Voter 40,000 chuang Tripura-ah an lutthla a, a chhe thei ang berin Central-ah Mizote min hek a. Inthlan dawn apiangin phurhchhuah an ngai thin. Hei hi Zoram mipui leh NGO hrang hrangin kan duh lo em em a ni. Congress sorkar laia an vote bank a nih avangin, mipuiin duh lo hle mah ila engtin mah kan ti thei thin lo. Party pakhatin direct leh indirect-taka an hmanraw tangkai tak an lo ni bawk nen, Mizoram mipui tana hnawksak an ni reng thin a nih kha. Hemi chungchangah hian huaisen taka kan Chief Minister zahawm takin fing taka hma a lak avangin, Voter 40,000 chuang zet chu Tripura-ah Sorkar laipuiin a awm nghehtir ta a. Khangte kha Zoram mipuiin kan theihnghilh reng reng lo.
  3. Covid hripui: Covid-19 hripui leng kara kan Chief Minister hmalakna ropui tak avangin Lockdown pawh India ramah puang hmasa ber kan ni a. Kohhran leh NGO aiawhte bakah Task Force dinin thahnemngai takin hma an la a. Sorkar department mawhphurtu hrang hrangte hmalakna avangin India ramah Covid vei leh thi tlemna ber ram kan ni hial. Kan Chief Minister zahawm tak leh Zoram mipuiin malsawm tlaka hma an lak avangin Pathianin kan hmalaknate mal min sawm a ni.
  4. CM Relief Fund: India ram State danga an la tih ve ngai reng reng loh, Chief Minister Relief Fund hman dan chungchangah Chief Minister Pu Zoramthanga chuan Committee hran hlak siamin, NGO leh Kohhrante telin Chief Secretary Chairman-na hnuaiah langtlang taka kalpui a ni. He sum hman dan hi Kohhran leh YMA hruaitute pawh zawhfiah theih mai an nih laiin, mipuiin an rinhlelh theih nan ‘CM Relief Fund hmanna kan hre lo’ tia duh duha sawi tawk lah an bo lo. CM Relief Fund hmanna langtlang tak hi mi pangngai chin chuan an hre vek sa a ni.
  5. Mipuiin an ring tawk: MNF sorkar thil tihthat hrang hrang avang hian Pu Zoramthanga kaihhruai sorkar hi mipuiin an ring tawk a. Hengte avang hian Village Council 2020 inthlanah VC 59% leh Local Council-ah LC 86% lai seat kan la a. Lai Autonomous District Council (LADC) Election 2020-ah pawh Seat awm zawng zawng 25-ah Seat 20 zet MNF-in kan la a. Congress-in Seat 1 lain, BJP-in Seat 1 leh Independent-ten Seat 3 an la a ni. Kha leh chen lo sorkar tawh Congress Party chuan Independent seat thum lak zat pawh an la pha lo a ni.

PU LALDUHOMA HMELMA LIAN BER CHU AMAH THO A NI

MLA atanga Pu Lalduhoma ban a ni hi mi tam takin an khawngaih a, kei pawhin ka khawngaih khawp mai. Miten khawngaihthlak an tih fo thin chu dan bawhchhe lui tlat thinte hi an ni. Danin a phal loh tiluite hi dan anga hrem an nih hian miten an khawngaih thin. “A va pawi tak em! Hre reng chung hian engatinge maw dan a bawhchiat thin le? Ka khawngaih khawp mai,” an ti thin. Mahse, Mahatma Gandhi-te, Mother Teresa-te kha miin an khawngaih thu an sawi ngai lo, an faka an chawimawi zawk thin.

MP leh MLA-ten dan an bawhchhiata an hremna dan (Anti Defection Law, 1985) an siam lai khan Pu Lalduhoma hi he Dan pass-tu zinga mi a ni a. Chuti chung chuan kum 1988 khan MP atanga disqualify hmasak ber a ni. Pu Duhoma hi Mizorama Political Party-ah a awm kim ber tawh a, ama pawl din ngei pawh a thiat leh thin. A party din ngeiah pawh a leng chuang lo. MLA atanga disqualify a nih chhan hi thil dang vang ni lovin, Anti Defection Law a bawhchhiat vang liau liau a ni. Kum 1988-a Lok Sabha MP atanga bantir hmasak ber a nih ang khan, tun tumah pawh hian hre reng chunga a tihsual vanga ban a ni a. Pu Duhoma hi India ram pumpuiah Anti Defection Law dana vawihnih bantir hmasaber a ni.

Independent Candidate danglam bik anga a insawi thin hi a dik lova, Independent Candidate danglam bik a awm ngai lo. Independent Candidate ni si khan ZPM tan sengkhawm hna a thawkzui zel a, a lawmluttu berah amah a la tangzui a ni. He party-ah hian membership fee a pek leh pek loh lam a ni lova, a chet dan hi ZPM party ngialngan dik tak a nih avangin Supreme Court thutlukna awm tawhsa angin paihthlak a ni mai zawk a. Hei hi initsikna leh inngeih lohna avang te, inhuphurhna avangte hian MLA atanga inban theihna dan a awm ngai lo a ni.

“Speaker-in min disqualify chuan Court-ah ka kal ang,” tiin a sawi thin a. Dan a bawhchhe ngeia Court-a kala a thiamchanna tur hi tuman an hmuhpui loh avangin ‘Mipui Court-ah ka kal ang’ a ti a. Keini chuan Court-ah kal se kan duh tih pawh mipui hmaah kan puang fo tawh a. Amah ngeiin “Technical-takin Independent Candidate ka ni,” a ti a. Independent Candidate a nih ang ngeiin Technical dan chuan a bantir zawk a ni. A nihna takah chuan mahni insawimawi nana Mipui Court tih fo hi chhuanlam tling a ni lova, mipui court hi a awm tak tak lo. Rorelna dik tak phochhuahna Court dik takah a kal ngam loh vang zawk a ni. Hei hi amah leh a Ukilten an hrechiang em em a ni.

Heng zawng zawng hi engvanga thleng nge? Political Party-a insawn hnem ber, mahni pawl din ngei pawh thiat tam bertu, miten an party-ah dinhmun pangngai tak pe a, duat taka an lo enkawl thin a ni a. Chanvo ropui tak tak nei chunga khawiah mah a awm nghet thei lo hi engvang nge? A chhan ber nia lang chu, ama tan tumah an hnawk lova, ama tan hian amah Pu Duhoma bawk hi a hnawk ber chu a ni.

Engmah a nghah hman loh avangin chunglam tan pawh malsawm ngaihna a awm lo. Chhuahlama a awm laiin malsawm tum se, tlaklamah a lo bung daih zel a. Congress-ah khan awm ta reng se, Pu Zira-te Minister zat hi a Minister tho ang. MNF-ah khan awm reng sela, Pu Tawna-te Minister zat hi a Minister tho ang. Engmah a nghah theih lohna chhan hi thil dang ni lovin, a buan hneh loh amaha amah vek hi a ni zel a ni.

Chuvangin hei hi Serchhip bial mipuiten in hriatchian a tul tak meuh meuh a ni. Tumah fak ve ngai lo, mi hruainaa awm thiam bawk lo. Mahni inti Super em em bawk hi kalphung thar min zirtir tura chu em ni? Political Party pawl 12 lai a lo zir tawh hi, a awm chhung reiloteah ama awmna party a tha ber vek a, a chhuahsan hnuah an chhe leh ber vek a. Heng kan sawi tak zawng zawng hi Zoram mipui leh a bik takin, Serchhip bial mipuiten hriatchian a hun ta khawp mai.


Issued by
Media & Publicity Department
MNF General Headquarters,
Mizoram : Aizawl.

LANGTLANG SORKAR DIN TURIN HMA KAN LA MEK

Mizo National Front

General Headquarters

Mizoram : Aizawl

Press Release

LANGTLANG SORKAR DIN TURIN HMA KAN LA MEK

– Robert Romawia Royte

Vawiin (27.1.2021) hian AMC Ward No XVII chuan Campaign Kickoff hun Republic Veng Community Hall No 2-ah an hmang a. He hun hi Pu Robert Romawia Royte, Sports Minister ; Pu H. Biakzauva MLA, Pu K. Liantlinga, Ex-MLA-te’n an hmanpui bawk.

Pu Robert Romawia Royte, Minister, Sports & Youth Services chuan thusawiin, “Ward XVII-in hetiang mi hmingtha, Zoram mipui hriat hlawh leh ringtu ṭha, Khawvel tlangsang ber chhipa Bible dahtu Candidate in nei hi a lawmawm takzet a ni,” a ti.

Minister chuan, “Serchhip bialah bye election a awm thuai dawn a, Party pakhat chuan AMC-a ZPM candidate kan vote chuan Serchhipah Pu Duhoma kan vote tihna a ni tiin campaign an ṭan a, a nuihzatthlak hle a ni.  ZPM chuan Pu Duhoma hming an chhuang a, keini MNF chuan LALPA hming a ni kan chhuan ni,” a ti.    

Pu Robert-a chuan, “Mi tam takin ‘MNF sorkar hian Lungphum chu hna berah an nei a, a tak a awm nge awm lo en ang u’ tiin min beih nan an hmang mek hlawm a, MNF sorkar chuan administrative approval awm loin Lung kan phum ngai lo. Kan hmuh tawh (sanction) atanga chhuta 50% pawh kan la phum hman lo zawk a ni. Hetianga min ringhleltute hian Sum lian  tham an hmuhchhuah ve ngai loh vang a ni a. Lungleiah hmun sawm pakhatah approval kan nei a, kan la phum hman lo vek.. Chutiangin Lawngtlai bialah pawh kan hmuh sa kan la phum hman lo.. Hna thawhna tur Lung kan phum vanga an tŭm zel dawn a nih chuan Kumin kum tluanin an tŭm dawn a ni. Keini MNF sorkar chuan Sum sanction tawh vek hnuah a ni Lung kan kan phum ni a ti a.

“Sorkar hmasaah khan Lung phum ngam lohna project an ngah lutuk. Tin, Lung phum tur sanction liantham an nei lo hrim hrim bawk. Congress hunlai khan Thingtlangah hna thawhte chu a awm fo: mahse, VC-ten sanction leh estimate hriat loh an ngah lutuk. Keini chuan Lung kan phum ang a, sanction leh estimate kan tarlang zel dawn a ni.

Langtlang sorkar din kan tiam a, chutiang tur chuan kan kal mek a ni,” Pu Robert-a chuan a ti bawk.

Pu Robert-a chuan, “AMC inthlan lo awm turah chiang takin MNF-in sorkarna kan chang dawn. Chakna chhan tur point 100 vel kan nei, point 4 chiah ka tarlang ang. Citizenship Amendment Bill-in Mizoram a huam loh nan Joint NGO, Kohhran leh sorkar pawhin hma a la a. Kan Assembly house  hi CAB duh lohna pass hmasa ber kan ni bawk. Kohhran, Tlawmngai Pawl leh MNF sorkara kan Chief Minister hmalakna ang ngeiin Mizoram chu CAB-in a huam ta lo a nih kha,” a ti a.

“Tripura lama Bru-te awm nghet tura Kan CM hmalakna chuan rah ṭha a chhuah a. Sorkar laipuiin Mizo mipuite duh dan ang ngeiin Tripura-ah dah an ni ta. Congress sorkar khan hetiang hian hma a la ngam ngai lo. An ngaihtuah chhin lo hrim hrim . Heng Hlawhtlinna hi kan CM chetlakna rahchhuak vek a ni,” tiin a sawi a.

“Tin, Ramria buaina awm ṭhin chu Mizo mipuite duh dan ang ngeiin chinfel a lo ni ta. Sorkar hmasaah chuan ramri buaiah zirlai pawl leh mipui an hmatawng ṭhin. Pu Zoramthanga sorkar hnua ramri buaiah chuan sorkar chawm sipaite a hmatawngah an awm. Ram kan zauh deuh deuh a ni tih hre tute kan ni.

Covid-19 chungchangah pawh mipuiin thu kan awih em em. A chhan chu rin ngam tura State sorkarin hma a lak vang a ni. Mizo mipui Kristiante hian Zu zuar kan ngaisang lo, Zu zuar sorkar pawh kan ngaisang lo. Zuzuar chhungkua pawh kan ngaisang lo.. Vawiin thleng hian congress hian ‘zu zawrh kan sim ang’ tih an tum lo reng reng. Chuvangin anni chu engto thamah kan ruat lo  a ni,” a ti.

Pu Robert-a chuan, “Kan candidate lehlamte hian engtinnge Hall, khelmualte an sak ve ngawt ang. An Zawmpuite Pu Hawla te an va hmuin, Pu Sapdanga te inah kalin Vanglaini an va chhiar dâwn em ni? Secretariat-ah te hian a luh pawh an lut ngam dawn em ni? Chuvangin Zawmpui nei ngei hi Ward No XVII mipuite hian thlang chhuak turin ka ngen a che u,” tiin kalkhawm mipuite a sawm a ni.

Pu H. Biakzuava, MLA pawhin thu sawiin, “Unit-te an pawimawh ber a. E-roll aṭanga zirchiana vote thlak tur hriatchian hmasak te, hneh theih loh tur party dang hruaitute ina awm reng te, hmun dang aṭanga rawn hneh theitu tur an chhungkhat zawnchhuah te a ṭul’ tih sawiin fuihna a sawi.

Pu David Zohmangaiha, Ward No XVII MNF Candidate pawhin thu a sawi bawk.

Pu Laldawngliana, Campaign Committee Chairman-in a kaihruai a, Pu David Zohmangaiha, MNF candidate Ward No XVII-in thu a sawi bawk.

(LALLIANZUALA FANAI)

Joint Secretary,

Media & Publicity Dept.

Mizo National Front

Memo No.MNF/Media/02/2021/148

Dt.27.01.2021.

SOCIAL WELFARE MINISTER Dr.BEICHHUA-IN HLIMEN A TLAWH

Mizo National Front

General Headquarters

Mizoram : Aizawl

Press Release

SOCIAL WELFARE MINISTER Dr.BEICHHUA-IN HLINEN A TLAWH

Aizawl, Nilaini, 27th Jan, 2021: Social Welfare Minister Dr K. Beichhua chuan vawiin zing kar khan Hlimen a tlawh.

Hlimen Local House-ah khawtlang hruaitu: MUP, YMA, MHIP leh Local Council hruaitute nen inkhawmna hun an hmang a, NGO hruaitute chuan khawtlang mamawh hrang hrangte an thlen.

Dr Beichhua chuan khawtlang hruaituten an mamawh thlente chu Aizawl Municipal Corporation (AMC) inthlan Election Model Code of Conduct avangin tunah hian ‘ka tihsak ang che u’ tih theih a ni lo va, inthlan zawh hnu lamah enzuisak a tum thu a sawi.

Dr Beichhua chuan Aizawl khawpui chhung chu nasa takin hma a sawn tawh a, ram ruak te a tlem avangin hma tihsawn lehzualna tur a tlem tawh a, hei vang hian khawpui daifema awm, Hlimen ang te hi veng vannei tak an ni a ti a, hei vang hian sorkar atangin hmasawnna hailuh tur tam tak a awm a ni a ti.

Dr Beichhua chuan Hlimen chu huan thlai tharchhuak nasa an ni tih sawiin, economic road an mamawhnate pawh a hriatthiampui tih a sawi.

AH & Vety Minister ni bawk, Dr Beichhua chuan khawtlang hruaituten an rawn dil hma leh AMC Inthlan puan a nih hma daih tawhin Hlimen Rural Animal Health Centre chu Dispensary-a hlankai a ni tawh a ti a, a building sakthatna tur pawh sum awm vek tawh a ni, a ti.

Dr Beichhua chuan AMC Ward No. XIX (19) MNF official candidate Dr. Irene Lalruatkimi chu lehkhathiam leh a ngaihna hre mi a ni, a ti a,  chutiang a nih avangin khawtlang hruaina kawngah khawi atangin nge khawtlang tan malsawmna a luanluh theih tih ngaihtuah leh hmalam hun thlir thiam a pawimawh thu sawiin, MNF official candidate tan an khawngaihna a dilsak nghal.

Dr Beichhua hi bialtu MLA, Prof. F. Lalnunmawia, AMC Official candidate Dr Irene Lalruatkimi leh party miten an tawiawm.

(F.LALBIAKZAMA)

Secretary

Media & Publicity Dept.

Mizo National Front

Memo No.MNF/Media/02/2021/147

Dt.27.01.2021.