Mizo National Front
General Headquarters
Mizoram : Aizawl

Press Release

RAJYA SABHA MP PU K.VANLALVENA’N THANGRAM CULTURAL MEET A HMANPUI

Ni 25.2.2020, Ningani hian Thangram Indigenous Peoples’ Movement huaihawtin Thangram Cultural Meet, Muolmawi, Assam-ah neih a ni. He hun hi Pu K Vanlalvena MP Rajya Sabha-in khuallian niin a hmanpui.

He hunah hian Pu K Vanlalvena chuan thusawiin, “Culture hi phuahchawp leh siamchawp a ni lo va; ṭawng te, hnam te hi Pathian din a ni. Chuvangin, kan hnam hi kan ngaihluin kan vawnghim tlat tur a ni. Kan hnam hi humhim kan duh tak tak a nih chuan kan culture hi kan humhim a ngai a. Kan culture hi kan hnam min identify-tu a nih avangin kan vawnghim tlat tur a ni,” a ti.

Mizoram Rajya Sabha MP chuan, “Chhinlung chhuak Zofate hi India ramah pawh State hrang hrangah ṭhendarhin kan awm a. Khawvel ram dang Burma leh Bangladesh-ahte pawh kan awm bawk a. Hmun hrang hrang, tlang hrang hranga awmte hi thinlungin kan inhmangaih tur a ni. Zofate rorelna pakhat hnuaia awm hi kan duh em em a, chutih laiin kan inhmangaih tawn si loh chuan kan inngeih chuang lovang. Rorelna pakhat hnuaia awm hi kan tlin lo thei a ni. Chuvangin, kan inhmangaih tur a ni. Kan inhmangaihna zawk hian rorelna pakhat hnuaia awm min tichak tur a ni. Kan inhmangaih phawt ang a, rorelna pakhat hnuaiah chuan kan la awm ngei ang tih ka ring a ni,” a ti bawk.

Pu K.Vena chuan, an thilphutte tharum hmanga nawr lo turin mipuite a chah a. “Pathianin rem a ruat hunah chuan rorelna pakhat hnuaiah kan la awm em em ang. Pathian ring ula, Pathian duhzawng ti ula, tumahin an dal zo lovang che u. Huaisenna dik lo hmangin he hnam hi kan hruai tur a ni lo. Khawvel mithmuha kan dinpui ngam, tharum tel lova beihna hi lo kalpui zel rawh u. Pathian hun ruat a thlen hunah chuan he hnam kalsiam hi tumahin an dal theih a ni lo,” a ti.

Pu K Vanlalvena chuan, “Pathianin he hnam tan hian goal a nei a, a chanchinṭha hril tur leh humhim turin min duh a. Amah kan hriat hmain min lo hria a ni. Pathianin a hun a tihah chuan khawvelin min dang zo lovang,” a ti.

Pu K.Vanlalvena chuan Thangram Indigenous Peoples’ Movement-in hetiang hun an buatsaih chu lawmawm a tih thu a sawi bawk.

Thangram Culture Meet-ah hian Zohnahthlak chi peng hrang hrang – Chorei, Hrangkhawl, Ranglong, Molsom leh Kaipeng-te an kalkhawm a. He hunah hian Zohnathlak chi peng hrang hrangte’n hnam lam entirin mithiam thlanchhuahte’n thusawina hun an hmang bawk a ni.

Rajya Sabha MP hi Pu BN Thangpuia, Lai Autononous District Council Deputy Chairman leh MNF hotute’n an ṭawiawm a ni.

(LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/02/2021/198
Dt.25.02.2021.

Mizo National Front
General Headquarters
Mizoram : Aizawl

Press Release

PU ZORAMTHANGA MIZOTE TAN PA NIH A TLING

“Khawchhak unaute duat taka dawngsawng turin kan inbuatsaih”
– Pu Zoramthanga
Chief Minister

Mizoram Chief Minister Pu Zoramthanga chuan, “Myanmar rama sipai sawrkar avanga mipuiin harsatna tawka Mizorama loh theih lohnaa an rawn tlanchhia a nih chuan kan sawrkar chuan theihtawpa lo dawnsawn kan tum a ni,” a ti.

Mizoram State Assembly Budget Session neih meka Mizoram Larsap thusawi sawihonaah thusawiin Pu Zoramthanga chuan, “Mizoramin kan tihtheih chin a awm chuan India sawrkar pawh a theih chen chena lo tanpuia lo dawngsawng turin kan ngen dawn a. Myanmar atanga Democracy duh vanga lo tlanchhia chu duat taka lo dawngsawng turin Mizoram sawrkar chu a inbuatsaih reng a ni,” a ti a. Hetianga kan Mizo hnahthlakten harsatna an tawh laia Mizoram Chief Minister, Pu Zoramthanga’n an thlavang hauhva lo tuam hlawm tura a inpekna hi MNF chuan ropui a tiin, lawmawm a ti a. Pu Zoramthanga hi Mizote tan Pa nih a tling takzet a, MNF chuan thlamuanthlak a ti hle.

Ramri buaiah nise Chief Minister Pu Zoramthanga’n min hruai danah ‘Ram hruaitu lu ber a huaisen chuan mipui kan huaisen mai’ tia sawi a lo awm tawh a. Ram leh hnam neitu tak tak thinlungpua min hruaitu Pu Zoramthanga chuan, Myanmar lama kan Mizopuite harsatna tawh mek chungchangah thlavang hauhna thu a rawn sawichhuak leh ta hi MNF chuan lawmawm a tiin a chhuang hle.

(B.LALHMANGAIHZUALA)
Joint Secretary
Media & Publicity Dept.
Mizo National Front
Memo No.MNF/Media/02/2021/197
Dt.25.02.2021.

Mizo National Front
General Headquarters
Mizoram : Aizawl

Press Release

MNWF-IN AN HMEICHHEPUI TLINGTE AN CHAWIMAWI

“CM Pu Zoramthanga sorkar hian danglam zarin AMC din kan tum a ni”
– Dr.R.Lalthangliana

Vawiin ni 24.02.2021 (Nilaini) hian Mizo National Woman Front (MNWF) Headquaters chuan Mizo Hnam Run-ah AMC 2021 inthlana MNF aṭanga Hmeichhe tling tharte, 2020 Local Council inthlana MNWF Hqrs hruaitu Local Council-a tlingte lawmpuina leh Padma Shree dawngtu Pi B. Sangkhumi chawimawina hun an hmang. He hun hi Dr.R.Lalthangliana, Health Minister-in hmanpuiin thu a sawi.

Dr. R.Lalthangliana chuan, “Zofate Jerusalem hi nasa taka chawikan kan duh a, sorkar hmasakah khan khawpui dang kan zir chiantir vek hnuah, AMC hi MNF hmalaknaa din leh puitling a ni. Kan CM Pu Zoramthanga hmalaknain UD&PA pawh dinthar a ni a, hemi 2 dintu (Chief Architect) hi kan ni. Tun ṭumah hian AMC thar kan din dawn; AMC leh UDPA hringtu ngei MNF kan sorkar a, Chief Minister Pu Zoramthanga sorkar hian danglam zarin AMC din kan tum a ni. MNF AMC Councillor tling tharte leh a bik takin MNF Hmeichhia tlingtharte ka lawmpui em em che u a ni,” a ti a. Theihtawp chhuah turin a sawm nghal a. Tling zo ta lote pawh beidawng lova theihtawp chhuahzui turin a fuih bawk.

Pu Lalthlengliana, Vice President MNF pawhin thu sawiin, MNWF-in an MNF hmeichhe candidate tlingtharte lawmpuina hun an hmang chu lawmawm a tih thu a sawi a, “Nuhoin inzirtir uar ula ka duh chu, hmeichhiaten Zoram hi in hruai thei a ni tih hi a ni. Khawvel hmun tam takah hmeichhe ropui tak tak an lo chhuak a. Mipa pawhin kan phak loh leh tluk loh an lo inlan zel ta a. Hmeichhe ngaihsan lohna ram ni ṭhin India ram pawh a inherrem zel a. Chutiangin Mizoramah Corporation-ah te, Local Council leh Village Council-ahte hmeichhe tan reserve seat a lo awm ta a. Hei hian nasa takin hmeichhia a chawikang zel dawn a ni.
Zirna lamah nise hmeichhia an thiam tawh zawk a, nakinah chuan CM hmeichhia pawh kan la nei thei ang tih a rinawm. MHIP aṭangte leh YMA aṭanga ram siam tum pawh a ṭha e, mahse ram roreltu a nih rih loh avangin ram inrelbawlna kawngah hian hmeichhiaten tel zel in tum a ngai tawh a ni. AMC inthlana tlingzo ta lote pawh party angin kan ngaihlu che u a, in inpekna kan hre reng dawn a ni,” a ti.

MNWF Gen. Hqrs hian Covid-19 hrileng vanga harsatna tawk hmeichhia(hmeithai) Mi 57 hnenah ₹2000 ṭheuh an pe tawh a, Mirethei chenna (BSUP) Lawipu-a chengte hnenah buhfai, dal, alu-te an hlan tawh bawk. Tin, Lawngtlai khua nufa (covid positive) , nau hring ṭep nu 1, a pasalin a ṭhen tak chu ₹ 5000-in an ṭanpui bakah, CMRF-ah ₹85000 an hlan. Nikum Krismas dawn khan Orphanage Home 6-ah ₹10000 ṭheuh an pe bawk. Vawiin MNWF-ten hun an hmanah hian an member chatuan ram panta mi 6-te ralna thilpek an hlan nghal bawk a ni.

Lawmpuina leh Chawimawina hun hi Pi Vanlalrengpuiin MNWF Vice President-in a kaihruai a ni.

(LALLIANZUALA FANAI)
Joint Secretary
Media & Publicity Dept.
Mizo National Front
Memo No.MNF/Media/02/2021/196
Dt.23.02.2021.

Mizo National Front
General Headquarters
Mizoram : Aizawl

Press Release

MNF AMC COUNCILLOR THARTE LAWMNA HUN HMAN A NI

Vawiin ni 19.2.2021 (Zirtawpni) hian Aizawl Municipal Councillor thar lawmna hun Vanapa Hall-ah hman a ni a. He hun hi Pu Vanlalzawma Vice President-in a kaihruai a, Rev Lalzuithanga’n hunserh a hmang. MNF Party ticket-a Councillor tlingte pangpar hlanna hun hman a ni.

Pu Zoramthanga President chuan thusawiin, “Pathian leh kan ram tan, titu kan ni a, he thuthlung hi MNF chuan kan kalsan thiang lo. MNF party zinkawng hi thawnthu phuah thiam takin, phuah vannei lutuk an tih tura an phuah ang hialin, awihawm loh khawpa makin Pathianin min hruai a. Kan fel lohna tam tak awm mahse, Pathian leh kan ram tan tia enremna atana kan hman tlatna hi Pathianin kan felnaah a ruat a ni,” a ti a. “Hun hnuhnunga A chanchinṭha hril turin Pathianin he hnam hi min ruat a ni,” a ti bawk.

Chief Minister chuan Congress party chungchang sawiin, “An hotunu Italy atanga lokal, Roman Catholic Sonia Gandhi-i’n Tirrupathy-a a fapa Rahul-a tan Kristian-na phatsana Lord Krishna hnena malsawmna a dilsak atang khan Pathian pawi a sawi ni ngei tur a ni. Khata tang khan tlakchhiat lam an pan a, tun thlengin an la tlachhe chhunzawm chho ta zel a. Tunah engmah an ni tawh lo a. Khulama an khawvartui bur ber a tlukbuak tawh avangin helama a phita mai hi chu a ro zo ta a, dam reng theih ngaihna a awm ta lo a ni,” a ti a. Chutah helaiah chuan zu an zuar ta tluk tluk a, Congress party chu an zu zawrhin a tichhe vek tawh tih a sawi bawk.

MNF President chuan, ZPM chungchang sawiin, “ZPM lam hi an lian viau dawn emaw kan ti a, an thawm pawh a nasa a. Mahse, an tifuh hlei thei lo. ZPM chuan kalphung an tithar ngun lutuk a, vawi sawm vel bawr an party an thlak tawh a. Zoram mipuite hian tui anga nghet lo party kan lo duh lo a ni. Val Upa Council nge, President nge, Leader thu ber pawh a hriat tawh loh. An nghet lo a, kalphung an tithar zing lutuk a, anmahni zuitu mipui rilru pawh an tibuai zo tawh a ni,” a ti.

MNF President chuan, “Ram thuthlung, Lal thuthlung leh hnam thuthlung kan lo paltlang tawh a, Covid zawhah hian malsawmna period a lo chhuak dawn niin ka hria a. Chumi hunah chuan mipate kan thih zawih zawih loh nan nasa taka hmalak a, ruihhlo ngaite tidam tura nasa taka enkawl kan tum a. Lei chung leh lei hnuai malsawmna te, van boruak malsawmnate Lalpa’n min pe dawn niin ka hria,” a ti bawk.

Pu Tawnluia Sr Vice President pawhin thusawiin, “AMC mawhphurhna keng tlaka mipuiin MNF-te min ngai hi kan lawm em em a, mawhphurhna sang tak keng tlaka mipuiin duhsakna min pe hi kan lawm em em a ni,” a ti a. “Covid hripui karah inthlan ṭha taka huaihawt a ni thei hi a lawmawm ka ti hle a. State Election Commission chungah te, election a hlawhtlin theih nana tha leh zung hlantu zawng zawngte chungah kan lawm hle a. Dan leh thupek kengkawhtu te, MPF leh tlawmngai pawlte theihtawp chhuahnaah kan lawm tak meuh meuh a ni,” a ti.

MNF Senior Vice President chuan, “He sorkar thar piang hi mi zawng zawng ta, mi zawng zawng tana siam a ni tih hre reng turin mipuite ka ngen a. Tin, he hnehna hian MNF leadership hi mizoram mipuite hian kan la ring tawk tih a tilang a. 2018 inthlan aṭangin inthlan awm hrang hrangah mipuiten MNF hnehna min neihtir zel a, a lawmawm tak zet a ni,” a ti bawk. Pu Tawna chuan, ZPM leh Congress aṭanga thlantlin Councillor-te pawh MNF chuan a lawmpui tih a sawi a. “AMC hi sorkarin a thuam chak zual zel dawn a ni,” a ti bawk.

Pu Lalthlengliana, Vice President-in lawmthu sawina hun hmangin kalkhawmte a ṭin.

(LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/02/2021/195
Dt.19.02.2021.

Mizo National FrontGeneral Headquarters

Mizoram : Aizawl

Press Release

AIZAWL MIPUITE HNENA LAWMTHU SAWINA

Vawiin ni 18.2.2021-a Aizawl Municipal Corporation inthlan result puan takah Pathian leh mipui zarah MNF chuan seat 11 lain sorkarna a siam dawn ta a. Aizawl mipui vote thlaktu zawng zawngte chungah lawmthu kan sawi a, a bik takin MNF sorkar ring tawka vote hlu tak hlantute chungah lawmthu kan sawi tak meuh meuh a ni.AMC inthlana MNF-in hnehna a chang hi Pu Zoramthanga Chief Minister kaihhruaina hnuaia State sorkar chak tak, ding mek mipuiin an rin tawkzia lanna a ni tih kan hria a. He AMC sorkar MNF kaihhruai hi ṭha taka thlawp a, thawhpui turin Aizawl mipuite kan ngen tak meuh a ni.MNF Candidate tling ve zo ta lote kan tawrhpui hle a, engpawh lo nise, Pathian remruat zela pawm thiam turin rilru i siam theuh ang u tiin kan insawm a ni.

(LALLENMAWIA JONGTE)

SecretaryMedia & Publicity Dept

Mizo National Front

Memo No.MNF/Media/02/2021/194Dt.18.02.2021.

Mizo National Front
General Headquarters
Mizoram : Aizawl

Press Release

MNF DIAMOND JUBILLEE COMMITEE THUKHAWM
Thupui (Theme)
“Mizo Nationalism”

Vawiin ni 17.2.2021 (Thawhlehni) chhun dar 12:00-ah MNF Diamond Jubillee Committee chuan Mizo Hnam Run-ah a vawikhatna atan meeting an nei a, MNF din champha kum 60-na, 22nd October,2021-a lo thleng tur lawm dan tur an rel tan.

Meeting hian MNF Diamond Jubillee lo thleng turah hian thupui (Theme) neih tha an ti a. Tun huna mipuite leh thangthar lo awm leh zel turte thinlungah nghet taka a intuhthar leh zel theih nan Thupui (Theme) atan ‘Mizo Nationalism’ tih hman nise an ti.

Thu belhchiandawl leh ngaihnawm, zirlaite leh research beitute tan thleng pawha tangkai tur thu infunkhawmna bu, Souvenir siam nise an ti a, MNF Diamond Jubillee Lungphun siam nise an ti bawk. MNF Diamond Jubillee lo thleng turah hian tul dang tam tak a awm dawn avangin, chungte buaipui tur bik Sub-Committee peng hrang hrang din nise an ti a, MNF Diamond Jubillee Committee hi ni 23.2.2021-ah a vawihnihna atan an thukhawm leh ang.

Meeting hi Committee Chairman Pu Vanlalzawma, MNF Vice President-in a kaihruai a, member-te an tel tha hle a, Vice Chairman Pu Lalthlengliana bakah, Deputy Speaker Er.Lalrinawma leh Minister pahnih, Pu Robert Romawia Royte leh Pu TJ Lalnuntluanga-te pawh he meeting-ah hian an tel a ni.

(LALTHANZUALA HNAMTE)
General Secretary
Media & Publicity Dept.
Mizo National Front
Memo No.MNF/Media/02/2021/193
Dt.17.02.2021.

Mizo National Front
General Headquarters
Mizoram : Aizawl

Press Release

Kalphung hlui kalpuitute kha an inhmukhawm thar mai a ni

• TJ Lalnuntluanga
  Minister

Nizan (13.2.2021) khan Pu TJ Lalnuntluanga Minister leh Pu Ramthanmawia MLA-te chuan Laipuitlang-ah AMC campaign neiin, Minister hian Mithar Voters 6 MNF-ah a lawm lut.

Pu TJ Lalnuntluanga Minister chuan “MNF Party hian kum 60 hnuah pawh zuih lam aiin arh lam kan la pan zel a ni. Pathian leh kan ram tan tih thuthlung vuantu kan nih avangin ngaihtuahna dik kan put a ngai a. Kan Hnam Pa Pu Laldenga’n Development hmasa ber chu Moral development hi a ni tih angin, kan moral kan siamdik phawt hi a ngai a ni. Hei hian hmasawnna tak tak min thlentir phah dawn a ni, ” a ti.

“December ni 15, 2028-a MNF sorkar a lo pian chiah atang khan, chhun leh zan pawh sawi loin kawng kan siam a, kan economy te a la that tawk loh avangin duhthusam erawh a ni nghal mai thei lo. Hma kan la zel dawn a, kan siam zel ang a, thingtlang thlengin vung kan chhuah zel dawn a ni. Nunau thlabara an awmna thin, zu chungchangah zu zawrh hi Cabinet Meeting hmasa berah tihtawp thu kan rel nghal a nih kha. Motor chhiah motor chhiah chungchangah nise, mipuite phurrit siamtu lifetime tax, Congress sorkarin kum 15 atan pek tut an lo tih chu Kan sorkar atanga thlahnihnaah kan siamtha nghal a ni,” a ti a.

“Congress Sorkar kha Zu chhiah leh Lifetime tax hmangin an lokal ngawr ngawr a ni. Keini chu kan Chief Minister zahawm takin nunau thlabara an awm ai chuan, kan thalaite an thih belh zel ai chuan, zu chhiah hmuh loh pawh a pawiti lo va. Mipuite harhsatna siamsak ai chuan lifetime tax pawh kan siamtha nghal mai a ni,” Pu Manuna chuan a ti.

“Sorkarna chang tur chuan Party ngelnghet a pawimawh, Mnf party hi chu tum mumal tak neiin Zoram pumhuapin kan kal a ni. ‘Issue base’-a kal ve mai mai lo ngaihdan ngelnghet nei hruaituin min hruai a. Election dawn apianga hming hran hran neia rawn inlar thiante nen kan party hi tehkhin chi kan ni lo. Issue base-in tunah pawh hian an then vel mai mai a, Mipuiin kan zawm dawn chauh a, an thu an lo thlak leh hman a, an flag rawng leh party symbol-te pawh an lo thlak leh hman thin. An chuh ber AMC kalphung pawh an hre chiang lo, Kalphung hlui kalpuitute kha an inhmukhawm thar mai a ni . MP-ah INC leh ZPM an thawkdun a, an hna ber chu kum khat pawh la tling tha thum lo atangin MNF sorkar sawichhiat a ni. Politics tharah insawichhiat viau hi mipuiin kan lo ei lem loh avangin an hlawhchham a ni. Kum 2019 MP election atanga lang chiang tak chu Hmasawnna lam aiin thuneihna chiah an duh tih hi a ni. An party politics hrichhia bawlhhlawh tak avangin Congress chu anmahni vaiho ngei pawhin an duh tawh lo. Central-ah phei chuan hruaitu mumal pawh an nei thei lo” Pu Manuna chuana ti bawk.

Pu Ramthanmawia MLA pawhin thusawiin, “Mihringa rinna nghah ai chuan Lalpaa innghah hi a tha zawk. Inthlannaa chak tur chuan thusawi thiam te, tawngkam thiamte hi a ni lo. Pathian leh kan ram tan tia Pathiana innghah hi a pawimawh ber a ni.
Pathian remruat chu tuma dal theih a ni lo. Tun hun hi MNF hun a ni a, Pu Zoramthanga kaihhruai MNF sorkar chu mipuite tan hmasawnna thawk tur leh hun harsaa Mizoram min khaichhuak turin Pathianin a thlang mek a ni. Chuvangin AMC-ah pawh Pathianin min sorkartir leh mai ang. Pathianin tun hun hi MNF hun atana a ruat miau avangin, tuma dal theih a ni lo ang .” a ti bawk.

He hun hi Laipuitlang AMC Campaign Committe Chairman Pu H. Lalmuana’n a kaihruai a, Minister hi MNYF thalai hruaitute leh AMC Ward III Campaign Committee-ten an tawiawm bawk.

(B.LALHMANGAIHZUALA)
Joint Secretary
Media & Publicity Dept.
Mizo National Front
Memo No.MNF/Media/02/2021/192
Dt.14.02.2021.

Mizo National Front
General Headquarters
Mizoram : Aizawl

Press Release

AIZAWL EAST-II MIPUIIN SORKAR LAI THAWHPUIA TAWIAWM DUHTU TUR COUNCILLOR KAN MAMAWH

-Robert Romawia Royte,Aizawl E-II Bialtu MLA.

Tukin ni 13.02.2021 zingkara Armed Veng South Hall kawta AMC Election campaign chu Pu Lawmawma Tochhawng Lunglei East MLA-in tawngtaina hun hmangin bul a tan a, Bialtu MLA & Minister Pu Robert Romawia Royte chuan thu sawizuiin, “Aizawl East-II Ward No.8 chhungah dawmkan leh khaichhuah ngai mi tam tak an la awm mek a, AMC leh state sorkar tangkawpa pheikhai rual taka hmalak a tul tak zet a ni,” a ti. Sports Minister chuan Aizawl East-II mipuite chu anmahni tana vote thlak tur an nih thusawiin, an tana hnemhnanpuiawm ber tur leh an khawtlang leh veng tana tangkai tur Ruling MNF Official Candidate Pi Malsawmthangi vote theuh turin mipuite a sawm a ni.

Sports Minister chuan, “CM leh Minister-te inhawng viau mahse opposition lam Councillor leh MLA-ten an biala thalaite leh miretheite mamawh an hnena an thlen ngai mang loh avangin an bial mipuiten an tuar thin a, Aizawl East-II mipuite chuan mipuite mamawh hotute hnena thlenpui duhtu ngei Bialtu Councillor tur i thlang tling ang u,” a ti bawk.

Minister chuan Ward No.8 MNF Candidate Pi Malsawmthangi leh Ward No.9 MNF Candidate Pi B.Lalawmpuii-te chu AMC Ward dangte ang thovin AMC Election lo awm turah an tlin ngei a rin thu a sawi a. A bial mipuite chu ngun taka ngaihtuahna hmanga MNF Candidate-te ngei vote turin a sawm a ni.

He hunah hian Dr. K.Pachhunga Lunglei South MLA leh Pu PC Lalhmingthanga Ex-Mayor-te bakah Ward No.8 MNF Official Candidate Pi Malsawmthangi-te pawhin thusawiin mipui vote an dil a ni.

Vawiin chawhma vek khan Govt Complex Bazar-a campaign-ah Pu Roberta chuan thusawiin, MNF Official Candidate Pi Chuauzikpuii chu vote turin mipuite a sawm a, Covid hripui avanga hun khirh tak Mizoramin a tawn mek lai leh NE State dangte thawm a reh thup lai pawhin CM nachang hre tak Pu Zoramthanga sum enkawl thiam vangin hmasawnna hna Zoram hmun hrang hrangah a kal mup mup reng a ni a ti.

(F.LALBIAKZAMA)
Secretary
Media & Publicity Dept.
Mizo National Front
Memo No.MNF/Media/02/2021/191
Dt.13.02.2021.

Mizo National Front
General Headquarters
Mizoram : Aizawl

Press Release

WARD NO 18 LEH 19-AH MITHAR VOTERS 398 MNF-AH LAWMLUT

Zoram enkawl turin keini ang mi tling lo tak tak te Pathianin min ruat a, Pathian remruat pawm tlangin, Amen-pui mai ang u: Dr K.Beichhua

Aizawl, Inrinni, 13th Feb, 2020: Aizawl Municipal Corporation (AMC) inthlanna atana inbuatsaihna kalchho mekah a hmawr bawk tan a ni tawh a, vawiin khan MNF Adviser leh Minister of State ni bawk, Dr. K. Beichhua chuan Ward No.18 leh 19-ah mithar voters 398 MNF party-ah a lawmlut.

Ward No. 18 lawmluh inkhawm, ITI Veng Volley Ball Court-a neihah party hrang hrang atangin chhungkaw 45, an vaiin Voters 126-te chu Dr. K. Beichhua chuan a lawmlut a ni.

Ward No 19 lawmluhna inkhawm Kulikawn YMA Hall-a neihah Dr.K. Beichhua chuan Kulikawn, Tlangnuam, Melthum, Hlimen leh Saikhamakawn atangin chhungkaw 92, voters 272 a lawmlut leh bawk.

Vawiina AMC Ward No. 18 leh Ward No.19-a MNF party-a mithar lawmluhte hi an vaiin chhungkaw 137, voters 398 an ni.

Lawmluhna inkhawmah MNF Adviser, Dr K. Beichhua chuan, “Zoram enkawl turin tun dinhmunah Pathianin Chief Minister Pu Zoramthanga leh a kaihhruaite hi a ruat mek a ni. ZPM emaw BJP emaw Congress unaute ruat an ni lo va, keini mi tling lo tak takte hi a ruat mek kan ni a, Pathian remruat hi pawm tlangin, Amen-pui ang u,” tiin a sawi.

Dr Beichhua chuan, COVID-19 hrileng karah Chief Minister leh a kaihhruai sorkar chuan theihtawp chhuahin Zoram mipuiin tan hma a la tih sawiin, ei leh bar te, eirawngbawlna gas-ahte mipuii harsatna lian kan tawk lova, Pathian min hruaina ropui tak a ni, a ti a.

Dr Beichhua chuan, Aizawl chu Zofate Jerusalem a ni a ti a, Aizawl hmel a chhiat chuan Zoram hmel a mawi thei lo, chuvangin Aizawl tihchangtlung zel kan duh a, veng laili laiah hmasawn duh mah ila, thil harsa tak a ni tawh a, ram awl a awm tawh lo, chutiang karah chuan Aizawl veng hmawr lama awmte hi tihhmasawn ngai zawk a ni, a ti a, chutianga chak taka ke an pen theih nan AMC Inthlanah MNF party official candidate-te lo titling theuh turin a ngen a ni.

Pu H. Biakzauva, MLA leh Vice Chairman Agriculture Board ni bawk pawhin thuchah sawiin, MNF party chu kum 1992 atanga a zawm atangin party belh tlak, Leader nei tha party a nihzia chiang takin a hmu tih a sawi.

Pu Biakzauva chuan party dangten AMC-ah ruling party lai thlan kher a ngai lo an tih chu thu belhchiandawllo a ni, a ti a, mahni sangawizawnpui emaw fate aia midang duhsak zawk an awm ngai lo, a ti. Chuvangin AMC piah lama state sorkar zen ngam tur chu MNF official candidate-te hi an ni, a ti.

Ward No.19 MNF official candidate Dr Irene Lalruatkimi pawhin Ward No. 19-ah hnathawh tur tam tak a hmu tih sawiin, MZU Associate Professor a nih angin a thawk thei lova, chuvangin AMC Councillor nih tuma rawn penchhuak a nih thu a sawi a ni.

Dr. Irene-i chuan MNF party chu Pathianin mal a sawm mek a ni tih sawiin, mithar pawh a pek belh zel a ni, a ti a, Ward No.19 mipuite chu an khawngaihna vote hlu tak pe theuh turin a ngen nghal.

Ward No.18 MNF official Candidate Pu Lalramnghaka Varte pawhin thu sawiin, khawtlangah Mizo hnam tan a ding zel dawn tih sawiin, hausak tuma politics luhchilh a ni lo tih a sawi bawk a, kan ram leh khawtlang tana thuk zawka ke pen zel a tum thu a sawi bawk.

(LALLIANZUALA FANAI)
Joint Secretary
Media & Publicity Dept.
Mizo National Front
Memo No.MNF/Media/02/2021/190
Dt.13.02.2021.

Mizo National Front
General Headquarters
Mizoram : Aizawl

Press Release

AIZAWLA HMASAWNNA RUHREL LIAN ZAWNG ZAWNG DEUH THAW HI MNF KUTCHHUAK A NI: LALRUATKIMA

Vawiin ni 13.2.2021 (Inrinni) hian Pu Lalruatkima chuan Dawrpui, Bethlehem Vengthlang, Tuikual South leh Vaivakawnahte AMC campaign hun a hmang. Heng hmunahte hian Pu Lalruatkima chuan thusawiin MNF sorkar chuan Aizawl khawpui hmasawnna turin hna a thawh nasat thu a sawi a ni.

Pu Lalruatkima chuan, Aizawl hmasawnna turin MNF-in hma a la nasa hle tih a sawi a. “Assam Rifle ram chhuhsakin New Capital Complex siam a ni a, Durtlang kawng nasa takin laih zau a ni a, Millenium Centre din te, Ch Saprawnga Truck Terminal te, Ch.Chhunga Bus Terminal te, Chaltlang kawngchho zauh mekte bakah sawi mai sen loh tam tak a awm a ni,” a ti a. “Sorkar hmasa huna veng hrang hrang inkalpawhna kawng chhe em em pawh tunah chuan a lo mam leh ta deuh vek a. Kawng siama khawtlang leh Kohhran hial hnatlan ngai kha MNF sorkarah chuan tihtawp a ni ta. Aizawla hmansawnna ruhrel lian tham kan hmuh zawng zawng hi MNF kutchhuak deuh vek a ni,” a ti bawk.

Pu RKA chuan, “Pu Laldenga hova reilote MNF sorkar a lo din pawh khan Chanmari aṭanga Ramhlun kawng zim em em ṭhin kha tihzauh a ni a. Venghlui leh Pachhunga College kawng te leh Veng chhung inkalpawh tawnna kawng tam tham tak siam a ni bawk a. CM hmasain, ‘khawpui aṭangin tumahin sipai an sawnchhuah ka hre ngai lo’ a ti a. MNF sorkar chuan Assam Rifle sawnchhuah tumin hma a la zel a. Assam Rifle-te sawn chhuak turin ruahmanna siam fel vek a ni tawh a, an chhuak ngei ngei dawn a ni. An chhuahsan hmun Lammual leh a chhehvel ṭangkai taka hmang turin ruahmanna pawh siam fel a ni leh mek a ni,” a ti bawk.

MNF adviser chuan, “MNF hian he Aizawl khawpui hi nasa takin a lo siam tawh a, nasa taka siam chhunzawm leh turin MNF hian AMC-ah thuneihna kan chan a ngai a ni,” a ti bawk.

MNF Adviser chuan, “In luahtute leh In luah tur neite inkara harsatna awm ṭhin hi sorkar chuan chinfel kan tum a. Duh hun huna In luahte hnawhchhuah awm ṭhin leh In luah man pe ṭha duh lo awm chungchanga harsatna chu chinfel kan tum a. The Mizoram Urban Areas Rent Control Act hmangin hma a la dawn a ni,” a ti a. “Aizawl khawpuiin harsatna a tawh hrang hrangte chingfel a, hmasawnna hna chak taka thawh a nih theih nan MNF lo vote vek turin mipuite ka sawm a ni,” a ti.

(LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/02/2021/189
Dt.13.02.2021.