Serchhip bial mipuiten an tih tur an hriat a, rual an pawl ngei ka ring – Dr.R.Lalthangliana Minister

Mizo National Front
General Headquarters
Mizoram : Aizawl

Press Release

Serchhip bial mipuiten an tih tur an hriat a, rual an pawl ngei ka ring – Dr.R.Lalthangliana
Minister

Vawiin March ni 31, 2021 (Nilaini) hian New Serchhip YMA Hall-ah ‘MNWF Serchhip East Block Conference vawi 1-na leh Political Training’ neih a ni a. Khuallian Dr.R.Lalthangliana, MNF Adviser, Health Minister ni bawk chuan, “Vawiin hi Election Campaign-a lokal ka nih avangin sorkar hmalak mek leh hmachhawpte sawi a rem lova, amaherawh chu, hripuiin nasa takin khawvel, India leh Mizoram min nuai a. Europe-ah phei chuan ICU leh Hospital-in a daih lo a, a huhovin an inphum tup tup mai a ni. India-ah pawh mi nuaihnih dawn kan thi a ni. Kum khat awrh kan sorkarin Covid-in keini pawh min nuai ve a. Thawktu hrang hrangte kan la la hman si lo a, chuti chunga keini ram himna chhan chu engkimtithei Pathian vang a ni. Pathianin mal min sawm dawn hian kan tih ve tur a awm a, Leader tha em em Chief Minister Pathianin min pe a, kan CM hian kan sum mamawhna zawng zawngah phal takin min pe zel thin a ni. A hnuaiah keini a hmanrua Health Department-te, Ministers, MLA-te, Department hrang hrang, Kohhran, Task Force hrang hrangte leh mimal tinte thawhhona a tha a. Covid do chungchangah hian khawvel leh India ramah Mizoram hi a titha ber kan niin ka hria,” a ti.

Minister Dr.R.Lalthangliana chuan, “Tuna Serchhip biala MLA By-Election lo awm chhan hi thil fello a awm vang a ni a. Assembly Speaker-in uluk takin Dan leh hrai a zirchian hnuah hetianga inthlan that hi a lo ngai ta a ni. Kan Candidate Pu Vanlalzawma hi an chhungkuaa kohhran mi, midangte tana rawngbawl thin chhungkua an ni. Amah hi Shillong-a lehkha kan zir laia, MSU President hmasa ber ka nih laia kan OB tangkai tak a ni a. CYMA President ni tawhin Lok Sabha MP pawh a zawna term hnih tling thei a ni. MLA term khat hneh takin a tling leh a, tunah kan Party-ah Vice President a ni. Kum 2 leh thla 4 vel kan sorkar chhung hian Sinlung Hills, Lok Sabha, V/C, L/C, LADC, AMC-ahte hneh takin kan sorkar tawh a, tuna kan inthlan tur hi a vawi 7-na tur a ni a, number 7 hi MNF number a ni. Tun tumah hian Serchhip bial mipuiten an tih tur an hriat a, rual an pawl ngei ka ring. By-Election hi Rulling Quota a ni thin a, rualpawl bial nih hi a fuh ber a ni. Kum 1998-2003 inkar khan Congress Party-in a thu chauha an hnutchhiah Serchhip leh District dang 4 fuke kima siamtu kan ni a. DRDA, DIET leh thil hrang hranga District tihlawhtlingtu chu kan Chief Minister zahawm tak Pu Zoramthanga sorkar a ni tih i hrereng ang u,” a ti bawk.

Khualzahawm Pu Vanlalzawma, MNF Official Candidate pawhin, “Vawiin dar 11 vel khan Candidate ka nih chungchangah Scrutiny kan nei zo fel a, engkim a clear fel a, tunah chuan Candidate tak tak ka ni ve ta a ni. Tun tum kan inthlan Campaign mekah hian Unit level atanga General Headquarters, Minister-te leh MLA rualte kan tangrual tha hle a, kan thawhhona a thain Pathian leh mipui zarah tlin ngei pawh kan inbeisei a ni. Thuhnuai rawlh leh inngaitlawm tak chungin hma i la zel ang u,” a ti.

He hun hi Pi K.Lalrengpuii, President MNWF Hqrs. chuan a kaihruai a, Pi Vanlalrengpuii Vice President, MNWF Headquarters chuan lawmthusawiin hun a khar.

Hemi hnu hian Thenzawlah Political Training hi neih leh nghal a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/216
Dt.31.03.2021.

YMA HI KAN HNAM KHAIDINGTU A NI : LALRUATKIMA

Mizo National Front
General Headquarters
Mizoram : Aizawl

Press Release

Vantawng Group YMA Conference hman a ni

YMA HI KAN HNAM KHAIDINGTU A NI : LALRUATKIMA

Vawiin (31.03.2021) hian Vantawng Group YMA Conference vawi 24-na chu Victory School, Thenzawl Vengthlangah hman a ni a. He hun hi Pu Lalruatkima, Ex-General Secretary CYMA; MNF Adviser chuan khuallian niin a hmanpui.

He hunah hian Pu Lalruatkima chuan thusawiin, “YMA hian faina leh changkanna mai bakah hmasawnna nasa tak he hnam hi min thlen a. Mizo hnam tan sawi mai sen lohvin YMA hi a hlu takzet a ni,” a ti a. “YMA chuan ‘ṭanpui ngaite ṭanpui’ tih thuvawnah kan nei a. A sur a sa hnuaiah, zan tairekah pawh YMA chuan ṭanpui ngaite a ṭanpui ṭhin a. Kan hnam khaidingtu, mirethei leh hausate thliar lo pawl a ni a, YMA hi tlawmngai pawl a ni satliah lova, kan hnam lungphum kan innghahna a ni,” a ti.

Pu Lalruatkima chuan, “YMA hi awm ta lo se hmeithai leh pachhiate tan a manganthlak hle dawn a ni. YMA chu mitin ta a ni a, Kohhran leh Party a sawi lo. Chimrala kan awm lohna tur te, kan environment humhalh tur te, zirna lama hma kan sawn zelna turah te, faina lamahte hma kan la zel a. Zoram dung leh vang heti taka a lo fai chhan pawh hi YMA hmalakna vang a ni. Kan hnam chhiat ṭhatah YMA hian thuk takin mawh kan phur a, YMA member zawng zawngte kan ṭan mar reng a ngai a ni,” a ti bawk.

CYMA General Secretary hlui chuan ram leh hnam humhalh nan fa nei tam turin YMA member kalkhawmte a chah a. “Tuna kan awm danah hi chuan kum 50 a ral leh chuan Mizote hi kan tlem hle ang tih a hlauhawm a. Mizo mipate innghahna tlak ni tura kan ṭan a, kan inenlet a ngai. Mizo nulate pawh hnam dang fa hring lo hram turin ka ngen a che u,” a ti a. Zirna chungchang sawiin, “Khawvel hian chak takin hma a sawn a, chu hmasawnna chuan min nuai ve zel a. Mizote pawhin ṭan kan lak nasat lehzual a ngai hle a, zirna kan uar chhoh tulh tulh a ngai a ni. Central Service lamah kan lut tlem ta hle a, Mizorama sorkar hnathawk lian hnam dang an tam tulh tulh lo thei lo a ni. Chuvangin, zirna lamah nasa lehzuala ṭan kan lak a ngai a ni,” a ti.

“YMA hi Mizo hnam darthlalang a ni a, Mizo hnam humhimtu a ni bawk a ni. Engtik niah emaw chuan Zofa ṭhendarha awmte hi rorelna pakhat hnuaiah kan la awm dawn a, chumi tur chuan kan inruahman zel a ngai a ni,” Pu Lalruatkima chuan a ti bawk.

He hun Pu Chawngsangliana, President Vantawng Group YMA-in a kaihruai a ni.

Vantawng Group YMA-ah hian Kanghmun South, Buangpui, Neihloh, Zote South leh Thenzawl Branch pakuate an tel a ni.

(LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/02/2021/215
Dt.31.03.2021.

HEALTH MINISTER-IN MAMIT DISTRICT-A PHC LEH SUB-CENRE HRANG HRANG TLAWH

Mizo National Front
Genral Headquarters
Mizoram : Aizawl

Press Release

HEALTH MINISTER-IN MAMIT DISTRICT-A PHC LEH SUB-CENRE HRANG HRANG TLAWH

Vawiin March ni 29, 2021 ( Thawhtanni) hian Dr.R.Lalthangliana,Health Minister chuan Ailawng Sub-Centre, PHC Reiek enfiahin PHC Reiek Building thar Cheng nuai 200 chuang senga sak mek chu a en nghal a, thawktute chu uluk taka sa tur leh a chak thei ang bera sa turin a hrilh. Health Minister chuan, “A bikin thingtlang lama Sub-Centre zawng zawngte hi kum 2023 ral hmaa Upgrade hman vek kan tum a. Staff Nurse, Health Worker leh IVth Grade mamawh in thlente hi Covid-in min tihbuai zel loh chuan a theih ang anga hnawhkhah kan tum zel a ni. Quarters mamawh hrang hrang in sawite hi kum thar Project-ah thuntel kan lo tum ang. Tin, MNF sorkarah chuan Health Sub-Centre leh PHC-te chu sorkar hmasa Congress ai chuan damdawi lam an dawng tha hlawm hle a ni,” a ti a. Minister hian Reiek PHC-ah hian damdawi hrang hrang, Face Mask, Hand Sanitizer-te chu Reiek PHC, Ailawng leh W.Lungdar Sub-Centre-te tan a pe nghal a. Reiek khaw kang tanpui nan VC hnenah tangka fai a hlan nghal bawk.

Hemi hnu hian W.Lundar Sub-Centre, Hreichuk Sub-Centre, Lungphun Sub-Centre, Kanghmun PHC-te a tlawh leh a, Building leh thawktute dinhmunte a enfiah a ni. Dr.R.Lalthangliana chuan, “Aspirational District in nih angin India ramah a titha ber pahnihna in ni tawh a, pakhatna ni thei turin tan lo la ang che u. Aspirational District in nih angin thil tam tak in dawng tawh a. Mamit District Hospital Crore 17 man sak mek a ni a. Sub-Centre leh Staffs Quarters engemaw zat sak mek a ni a. Bolero PickUp 11 ka vai liam tawh a, Ambulance 7 leh Two Wheeler Ambulance thlengin pek in ni tawh. Henglai Area hi Bangladesh nen kan insumdawntawnna turah a kipui in ni dawn a. He lam atang hian an mamawh Sawhthing, Balhla, Aieng leh Cubic Lung thlengin supply tur kan neih a ngai a. A bikin Agricuture leh Horticulture lamah tan in lak hle a ngai ang. Keini chuan an hnen atangin Textile, Garments, Plastic leh mamawh hrang hrang kan chawlut dawn a ni,” a ti.

Bialtu MLA Pu Lalrintluanga Sailo pawhin, “Doctor leh thawktu hrang hrangte hi tun ai hian tan lo la zual sauh sauh ang che u. Damdawi inchawh chungchangah te, nau neih chungchangah pawh tun dinhmun aia tha hian hma lo la ang che u, in hmalak dan hi kan lo thlir zel dawn che u a ni,” a ti bawk.

Hemi hnu hian Health Minister hian Chungtlang, Rulpuihlim, Tuahzawl leh Rawpuichhip PHC leh Sub-Centre dinhmunte enfiahin a tlawh leh nghal bawk a ni.

Health Minister hi Pu Lalrintluanga Sailo MLA, Dy.Chief Whip, Govt.of Mizoram, Pu Lalramnghaka, IAS, Health Secretary, Dr.F.Lallianhlira, Principal Director, Health & Family Welfare, Pi Lalzepuii Joint Director, Health &Family Welfare, Health Department EE leh Health department Official dangten an tawiawm a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/213
29.03.2021.

MNF CANDIDATE PU VANLALZAWMA’N NOMINATION A FILE FEL TA

Mizo National Front
General Headquarters
Aizawl : Mizoram

Press Release

MNF CANDIDATE PU VANLALZAWMA’N NOMINATION A FILE FEL TA

Vawiin (26.3.2021) hian MNF Official Candidate Pu Vanlalzawma chuan 26- Serchhip (ST) Assembly Constituency-a By-Election-a chuh turin Returning Officer Kumar Abhishek, IAS hnenah Nomination a file a.
MNF Vice President Pu Vanlalzawma chuan Mizoram laili Serchhip leh Thenzawl chhehvel, Mizoram tana pawimawh tak hi kan Chief Minister pawhin a ngai pawimawh hle a. Tun ṭum By-Election-ah hian hotute duhsakna changin, Pathian leh mipui zarah tlin ngei pawh ka inbeisei a ti.

Pu Vanlalzawma’n Nomination a file-naah hian Pu K. Lalthawmmawia, National Core Committee, Pu C Lalrinsanga, Adviser, Dr. K. Beichhua Adviser leh MNF General Headquarters hruaitu engemaw zatin an ṭawiawm a ni.

Pu Zawma’n Nomination a file zawh hian Land Resources, Soil & Water Conservation Department a tlawh nghal a. Thawktute nen inkawmhoin, Department hmunhma an enkual bawk. Pu Zawma chuan Soil Department hi a len poh leh kuthnathawktute kan vannei dawn a, Soil Department chan hnuaia mi Kuhva pawh Zoram khawthlang lamah chuan sum lakluh nan an hmang nasa tawh a. Chutiangin Rubber te pawh Soil Department enkawl hnuaia mi a lo ni a. Chuvangin helamah hian ṭan lak a ngai lehzual zel dawn tih a lang a ni a ti.

(LALLIANZUALA FANAI)
Joint Secretary
Media & Publicity Dept.
Mizo National Front
Memo No.MNF/Media/02/2021/212
Dt.26.03.2021.

SAWRKAR HMUN HLU NA TAKA HUMHALH NGAM SPEAKER PU LALRINLIANA SAILO CHHUANAWM

Mizo National Front
General Headquarters
Mizoram : Aizawl

Press Release

SAWRKAR HMUN HLU NA TAKA HUMHALH NGAM SPEAKER PU LALRINLIANA SAILO CHHUANAWM

Mizoram Legislative Assembly Speaker Pu Lalrinliana Sailo-in sawrkar hmun hlu tak, kan Chief Minister lo ni tawhte, Pu Ch.Chhunga, Brig.T.Sailo, Pu Laldenga, Pu Lal Thanhawla leh Pu Zoramthanga-ten Chief Minister an nih laia Bangla (chenna) atana an lo hman tawh, Mizoram hmun hlu (heritage)atan hial pawha humhalh hial phu hliah hliah, sawrkar hnathawkten a tichhe zawnga kut an thlak mek na taka a humhalh ngam hi chhuanawm kan ti a, huaisen pawh kan ti hle.

Speaker Pu Lalrinliana Sailo hian a hma lamah pawh sawrkar department pakhat hotute hi hrethiam zelin ram hi thui tak, zau tak tawh a lo remtihpui tawh a. An sawia ‘Ni e, a tha alawm’ a lo tihpui zel a. Tuna an kutthlakna lai tak hi chu ’em ema’ ti ve tawhin, ti tawh lo turin a hrilh nawn mawlh mawlh a, chuti chungin engah mah ngai lo ang hrimin an tilui zel a, ti tawh lo tura vawi sawm chuang a hrilh hnuah pawh Speaker thu hi ngai pawimawh duh chuang loa an tihluih zel avangin, Mizoram tana hmun hlu humhalh a tul a tih mai bakah, Speaker zahawmna humhim a tul bawka a hriat avangin, officer-te hi koin a na takin a sawi ta a ni. CM Pu Ch.Chhunga phei kha chuan he bangla hi thengthaw nuam lo tiin ‘hetah hi chuan awm reng thei ni ila, ka damrei phah ngawt ang’ a lo tih, khawhawi nuam tak hmun ni thin hi tunah chuan Speaker-in a luah bedroom phei chu chhun leh zan zawma parda zar reng ngai khawpa thaw-i-pika dipdal a lo ni zo tawh a, tunah hetia department officer-ten sum chuangtlai bel ral nana hmun hlu tak tichhe zawnga hma an la hi MNF chuan tha a ti lo.

Congress (MPCC) hovin Press Release (MPCC/Media/PR-2021/16 dated Aizawl the 24th March,2021) hmanga Speaker Pu Lalrinliana Sailo an bei vak mai hi Congress-ho hian Pu Lalrinliana Sailo hi an party atanga MNF-a a awm ta hi chhe taka chhuah tumin an umzui bik hrim hrimah MNF chuan a ngai a ni. Hun kal tawhah pawh Pu Lalrinliana thiltih reng reng hi sawiselsakin an lo umzui fo tawh. Tun dinhmunah tak phei chuan, Congress-ho hian Vice President an ruat thar a, nasa takin an chhungkuaah buaina an nei mek a, chumi boruak tihreh (divert) nan chuan Pu Lalrinliana Sailo hi an bei leh ta mai tih hi MNF ngaihdan a ni.

(LALTHANZUALA HNAMTE)
General Secretary
Media & Publicity Dept.
Mizo National Front
Memo No.MNF/Media/02/2021/211
Dt.25.03.2021.

SUPPLY MINISTER-IN KHAWHAI LEH BIATE GODOWN TLAWHIN BUHFAI DINHMUN A ENFIAH

Mizo National Front
General Headquarters
Mizoram : Aizawl

Press Release

SUPPLY MINISTER-IN KHAWHAI LEH BIATE GODOWN TLAWHIN BUHFAI DINHMUN A ENFIAH
Vawiin ni 24.3.2021 zing khan Supply Minister Pu K Lalrinliana chuan Khawhai Supply Godown sak mek chu a hmunah a enfiah a, tun dinhmuna Supply Godown-a buhfai awm zatte a enchiang nghal bawk. Godown Sak mek tawh chin chu tha a ti a, Supply Buhfai dinhmun chu thawktute hnen atanga report-a a lan danin kumin October, thla thleng daih tur ration Buhfai hi a awm mek a, Khawtlang VC-ten an lo dil belh nghal a, a lo ngaihtuah tur thu a hrilh a ni. Minister Pu Rintea hnenah hian Khawhai VC-ten Khawtlang mamawh hrang hrangte an lo thlen nghal bawk.

Khawhai atang hian Biate khuaah kal lehin, Biate-ah hian khawtlang leh YMA hruaituten an lo hmuak a, Biate khuain an mamawh chi hrang hrangte an lo thlen. Tuichang sangha an humhalhna hmuna Street light-te leh thildang mamawhte an sawipui a. Biate-a Supply Godown leh buhfai dinhmun a enfiah lehnghal bawk.

(B.LALHMANGAIHZUALA)
Joint Secretary
Media & Publicity Dept.
Mizo National Front
Memo No.MNF/Media/02/2021/210
Dt.24.03.2021.

PU ZAWMA’N MAUBAWK KANG TUARTE A TLAWH

Mizo National Front
General Headquarters
Mizoram : Aizawl

Press Release

PU ZAWMA’N MAUBAWK KANG TUARTE A TLAWH

Vawiin ni 23.03.2021 Thawhlehni chawhma hian MNF Vice President Pu Vanlalzawma chuan MLA term hmasaa a bial – Aizawl West-III huamchhung Maubawk Venga kangmei tuarte hmunhma tlawhin tanpuina a pe a. Maubawk Local Council Chairman Pu PC Lalawmpuia leh a thawhpuiten an tawiawm bawk a ni.

Pu Zawma chuan Maubawk Local Council House tlawhin Local Council Member-te nen inkawmhona hun an nei a. Kangmei tuar chhungkaw 20-te dinhmun leh tanpuina an dawn tawh dante an sawiho a. Tun dinhmun thlengin mimal leh pawl atangin Cheng nuai 30 vel tanpuina a lut tawh niin LC Chairman chuan a sawi a. Heng bakah hian Sorkar atanga SDRF tanpuina pek turte leh kangmei tuartute awm zel dan tur chungchang an sawi bawk.

Local Council House-a inkawmkhawmna an neih zawh hnu hian, Pu Vanlalzawma chuan kangmei chhuahna hmunhma a tlawh a. Hnatlangte in sakna hmun hrang hrang a tlawh hnuah, Maubawk LC Vice Chairman Pu H. Lalchangkima hnenah tanpuina pawisa fai a hlan ve nghal a. Local Council lam pawhin Pu Zawma chungah lawmthu an sawi a, fire department chunga an lawmzia thu an sawi lang bawk a ni.

(MALSAWMPUIA RALTE)
Joint Secretary
Media & Publicity Dept.
Mizo National Front
Memo No.MNF/Media/02/2021/209
Dt.23.03.2021.

MAYOR-IN DOOR TO DOOR BAWLHHLAWH KHAWN A HAWNG

Mizo National Front
General Headquarters
Mizoram : Aizawl

Press Release

MAYOR-IN DOOR TO DOOR BAWLHHLAWH KHAWN A HAWNG

Ni 20.03.2021 Inrinni chawhnu dar 2 hian Ramhlun South YMA Committee Room-ah AMC Mayor Pu Lalrinenga Sailo leh Executive Councillor Pu Laltlanzova Khiangte-ten Aizawl khawpui faina tur hmalakna thar an kalpui tur thu an puangzar a. AMC Mayor-in bawlhhlawh khawntu – casual worker-te kawr hak tur a tlangzarh nghal a ni.

AMC Mayor Pu Lalrinenga Sailo chuan bawlhhlawh sawngbawl ngaih pawimawh a tulzia a sawi a. Tun dinhmunah Aizawl pumpui tuam nghal thei lo mah se, Ramhlun South-ah pilot project angin kalpui a ni dawn, a ti a. AMC chuan bawlhhlawh sawngbawl chu priority an pe dawn tih a sawi.

“In Ward-ah Councillor tha tak, mi inpe zo tak in nei a. Kan bul a tanna hi a tha dawn hle a, a ropui pawh ka ti. AMC-in budget session kan la nei lova, chumi hmaa hetiang hmalakna ropui in nei thei hi AMC ang pawhin lawmthu ka sawi a ni,” Mayor chuan a ti.

Executive Councillor Pu Laltlanzova Khiangte chuan thusawiin, bawlhhlawh paih dan thar tur – door to door collection sawi hawnna a nei a. Tun AMC term thupui ber tur chu faina a ni, tiin, “Hei hi Mayor pawhin a puang tawh a ni,” a ti bawk.

Pu Laltlanzova Khiangte, AMC Executive Councillor, bawlhllhlawh paih lam changtu chuan, “Save Chite lui an tih rual hian lui hnar a fim a ngai angin Ramhlun South leh Laipuitlang kan fai hmasak a ngai. Fai tak tak tur chuan bawlhhlawh hi in tin atanga khawn a ngai. Hei hi ‘collection at source’ emaw ‘door to door collection of waste/garbage’ an ti a. Pu Gandhi-a hminga program lian ber swachh bharat kalpui a nih angin keini pawhin he programme thlawpna atan hian faina leh bawlhhlawh sawngbawlna kan kalpui uar dawn,” a ti.

Executive Councillor Pu Tlanzova chuan Aizawl khawpui enkawl faina turin Ramhlun South atangin bul tan a nih thu a sawi a. Bawlhhlawh paih dan tharah chuan point to point-in kalpui tur niin, in tina khawn (collection at source) a ni ang a. chhung tinten Rs 10 an chawi ang a, Casual worker-ten bawlhhlawh khawn hna an thawk dawn tih a sawi bawk a ni.

Ina bawlhhlawh khawn hawnna inkhawm hi Ramhlun South Local Council Chairman Pu K.Lalduhawma’n a kaihruai a, Ramhlun South Local Council, YMA, MUP leh MHIP aiawhte an tel bawk a ni.

(MALSAWMPUIA RALTE)
Joint Secretary
Media & Publicity Dept.
Mizo National Front
Memo No.MNF/Media/02/2021/208
Dt.20.03.2021.

Chunglam khian Ram hnukchhuak turin tui anga nghet lo a duh lo. Mi nghet, rintlâk party hi sorkar siam turin a duh’ – Zoramthanga

Mizo National Front
General Headquarters
Aizawl : Mizoram

Press Release

       ‘Chunglam khian Ram hnûkchhuak turin tui anga nghet lo a duh lo. Mi nghet, rintlak party hi sorkar siam turin a duh’ – Zoramthanga

      Vawiin March ni 19, 2021 Zirtawpni khan Pu Zoramthanga, MNF President chuan Lungleiah Mizo Hnam Run a hawng. Hnam Run hawn inkhawmah hian Minister-te, Pu C. Lalrinsanga, Pu Robert Romawia Royte leh MLA-te Pu Lawmawma Tochhawng, Dr. K. Pachhunga, Er.H. Lalzirliana-te’n an ṭawiawm. Lungleia Mizo Hnam Run hawn inkhawm hi Lunglei MNF Sub Hqrs. President Pu Thangrenga’n a kaihruai a ni.

     Lunglei Hnam Run hawngtu MNF President Pu Zoramthanga hian Lunglei leh a chhehvel khaw hrang hrang aṭangin MNF-a inpe thar mi 522 zet Mizo Hnam Party MNF-ah a lawmlut nghal bawk.

     MNF President Pu Zoramthanga chuan thusawiin, “Varparh Arsi a engzual zel a, tih ang khan hmun tin aṭangin kan kalkhawm zel a ni. Inthlanna apiangah majority lain MLA, MP, VC, LC, AMC leh District Council-ah chakna kan la a. Varparh arsi chu a engzual zel a ni tih kha a thleng mek a. Kumin hi kan Diamond Jubilee kum a ni a, MNF kan nih chuan kan Lunghlui a len hi a ṭul a. Politics thli chhiain a len darh tawhte pawh kalkhawm a hun ta. I kalkhawm sung sung mai ang u. Tun hi kalkhawm hun a ni, kan inchhir hauh lovang.

   MNF hi hnam thinlunga innghat, Pathian leh kan ram tan tih thupuia neitu kan ni. MNF-a sulhnu lo nei tawh zawng zawngte i kalkhawm zel ang u. I thawk tlang ang u, he ram tan malsawmna ni turin kan thawk dawn.

   Chunglam khian Ram hnukchhuak turin tui anga nghet lo a duh lo. Mi nghet, rintlak party hi sorkar siam turin a duh. Mite pawhin an entawn sorkar dinchhuak turin kan thawk dawn a ni.

   Pathianin hun rei tak harsatna min paltlangtir a, kan sorkar aṭanga reiloteah Hripui lengin min tibuai a, nikum kha damloh kum a ni a, kuminah hi chuan kan dam-kawr kum kan hmang chho mek dawn ta niin a hriat tawh a. Pathianin min hruai zel ang a, in tinin malsawmna an chhar a, an dawn kan duh a ni.

   Party dang hi chu a nghing lai lai vek a ni. Hawh u, he ram malsawmna haichhuak tur hian Pathianin min hman a tumzia hi i hria ang u.

   Covid dona kawnga Kohhran leh NGO inpekna te, a thlawn vekin ramriah Mizo Tlangval Task Force-te an duty tih ka han hrilh chuan Prime Minister leh Home Minister-ten ‘Mizote chuan eng pawh an tithei ang’ tiin min chung en phah hial a ni.

   Khawchhak lam unaute kan rama raltlana an lo luh chuan kan tuamhlawm dawn tih ka sawi tawh a. Sorkar laipuiin ‘thawnlet rawh u’ an lo tih pawh chhangletin, nimin khan na takin sorkar laipui pawh lehkha ka thawn a. Kan inneih pawlh a, kan unaute an ni a, kan thawnlet thei lo; an lo luh chuan ei tur leh chenna kan ngaihtuahsak dawn a ni. Khawvelin China an huat lai taka Myanmar mipui, raltlante in phatsan mai chuan nakinah dem in hlawh mai ang ka ti hial a ni.

   Ram thuthlung, hnam thuthlung leh Lal thuthlung kan paltlang tawh a, malsawmna thuthlung kan paltlang dawn mek. Keini chuan Zoram malsawmna haichhuaka fatlum cheta kan chet hi chunglam khian a phal a ni. Chuvangin sorkarna min chelhtir a, hnam tinte entawn ni turin kan Pathian chuan min dah tlat a ni. Malsawmna kan dâwn tur hi in rin aiin a nasa dawn a ni,” a ti.

   Lunglei Hnam Run a hawn hnu hian Chief Minister, MNF President ni bawk Pu Zoramthanga hian Zobawka Residential Sports School sakna tur Lungphum a phum nghal bawk.

 

(LALLIANZUALA FANAI)
Joint Secretary
Media & Publicity Dept.
Mizo National Front
Memo No.MNF/Media/02/2021/207
Dt.19.03.2021.

ZPM PARTY-IN MLA AN NEI LO

Mizo National Front
General Headquarters
Mizoram : Aizawl

Press Release

ZPM PARTY-IN MLA AN NEI LO

Zoram Peoples’ Movement unaute hi a tirah Political Party ni lovin pawl paruk intelkhawm – allied front/electoral alliance an ni a, MLA Election 2018-ah Independent-in Seat 38 an chuh a, MLA Seat 7 an la. Inthlanpui zawh, kum khat leh a chanve hnu – Dt. 03.06.2019 atang khan Election Commission of India chuan Political Party angin a pawm ve chauh a ni.

MLA inthlan an chuh khan Independent Candidate vek an ni a. MLA pasarih (7) an neih hnuah Mizoram Legislative Assembly House legislature group affiliation atan Speaker hnenah Zoram Peoples’ Movement Legislature Party tia hming invuahin an dil a. Assembly Speaker-in an dilna hi Dt. 16.01.2019-ah pawmsakin Zoram Peoples’ Movement Legislature Party tiin hriat an lo ni ta a. Hemi rual hian legislature party dang – MNF, BJP, Congress Legislature Party-te pawh pawm nghal vek niin Assembly Bulletin Part-II ah tihchhuah a ni.

Zoram Peoples’ Movement Legislature Party tih a nih avangin ZPM hi Political Party an ni tihna a ni lova, Rule 4 Sub-No (3) of the Members of Mizoram Legislative Assembly (Disqualification on Ground of Defection) Rules, 1987 hnuaiah Assembly chhung inrelbawlna atan chauh Legislature Party/Group an din zawk a ni. A awmzia chu, Independent MLA-ten tum thuhmun neia intelkhawmin Assembly House-ah pawl (group) an insiam tihna a ni.

Tichuan, Zoram Peoples’ Movement (ZPM) hi Election Commission of India-in Dt. 03.06.2019 atang khan Political Party-a a pawm tak avangin Mizoram Legislative Assembly Speaker chuan Dt. 18.09.2019 khan legislature group hminga Zoram Peoples Movement tih chu hman chhunzawm zel a remchan loh thu a hrilh a. Tichuan, Dt. 20.01.2020 khan ZPM Legislature Party – Group Leader Pu Lalduhoma chuan Speaker hnenah Zo Peoples Movement Legislature Party din remtihna a dil a. A dil ang hian Dt. 05.02.2020 khan Assembly Speaker-in a pawmsak leh ta a ni.

Zo Peoples Movement Legislature Party-te hi Independent MLA vek an nih avangin legislature group hmingah Political Party hming an hmang thiang lo a. Amaherawhchu, ‘ZPM’ tih hming hrim hrim put zui zel an duh avangin ‘Zoram’ tih aiah ‘Zo’ tih hmangin ZPM hming an la awi nung chhunzawm ta zel a. Hei hian mipui bumna lian tak a thlen phah ta a ni.

ZPM tih hian – Zoram Peoples’ Movement (Politcal Party) leh Zo Peoples’ Movement Legislature Party tih hi ZPM tia lam ve ve theih a ni a. Hei hi ZPM mi leh saten tuna Independent MLA 6-te hi ZPM MLA anga ngai luiin mipui min bum ta a ni. ZPM Party hian MLA pakhatmah an nei lo a, an MLA emaw an tithe hi Independent MLA vek an ni a, Political Party an zawm thiang lo. Legislative Assembly-ah erawh chuan an group hming lamtawiah ‘ZPM’ tia lam ve theih tho turin Zo Peoples’ Movement Legislature Party nih an dil anga pawm an ni. Hei hian ZPM Party MLA an ni tihna a kawk lo. Inbumna remchang tak a ni.

Zoram Peoples Movement chu Political Party dik tak a ni a. Zo Peoples Movement tih erawh chu tuna Independent MLA-te legislature group hming invuah chawp a ni chauh zawk.

FACT FILE

Dt. 01.09.2017:
Pawl leh Party paruk intelkhawmten electoral alliance – Zoram Peoples Movement an din.

Dt. 07.11.2018:
MLA inthlanpui 2018 neih dawnah ZPM Candidate-ten Election Affidavit an file-ah Independent Candidate tih vekin an indah.

Dt. 16.01.2019:
Rule 4 Sub-No (3) of the Members of Mizoram Legislative Assembly (Disqualification on Ground of Defection) Rules, 1987 hnuaiah Assembly Speaker phalnain Assembly House/Party atan Zoram Peoples’ Movement Legislature Party tiin an indin (affiliate).

Dt. 03.07.2019:
Hemi ni atang hian Section 29A of the Representation of People’s Act , 1951 hnuaiah Election Commission of India (ECI) chuan Zoram People’s Movement chu Political Party-ah a pawm.

Dt. 19.08.2019:
Pu Lalduhoma’n ZPM an zawm thu leh a kaihhruai ZNP chu ZPM-ah a inchhung lut tih a puang.

Dt. 18.09.2019:
Assembly Speaker-in Legislature Group hminga Zoram Peoples Movement tih chu hman chhunzawm zel a remchan loh thu a hrilh.

Dt. 20.01.2020:
Zoram Peoples Movement Legislature Party group leader Pu Lalduhoma chuan Speaker hnenah ‘Zo Peoples Movement Legislature Party’ din remtihna a dil.

Dt. 05.02.2020:
Assembly Speaker-in Zo Peoples Movement Legislature Party din a remtihsak.

(MALSAWMPUIA RALTE)
Joint Secretary
Media & Publicity Dept.
Mizo National Front
Memo No.MNF/Media/02/2021/206
Dt.12.03.2021.