LUNGLEI NORTH BIALAH MNF V/C THAR A PIANG LEH

Mizo National Front
General Headquarters
Mizoram : Aizawl

Press Release

LUNGLEI NORTH BIALAH MNF V/C THAR A PIANG LEH

Nimin Dt. 27th April, 2021 (Thawhlehni) khan Ramlaitui khuaah MNF VC thar siam a ni. Ramlaitui khuaah hian ZPM VC, President nilai Pu K. Rochungnunga chuan MNF a zawm tak avangin MNF VC thar hi siam a ni ta a ni. Tun tum hi Lunglei North bial chhungah ZPM VC thiat a, MNF VC siam a nih hi tum thum a thlenna a ni ta a ni.

MNF zawm ta VCP Pu K. Rochungnunga chuan thusawiin, “Lunglei North Bialtu MLA Dr.Vanlaltanpuia hnathawh ka thlir hian mi chak tak a ni tih ka hria a, mirethei chunga a ngilneihzia ka hmu a; miretheite ngaihsak mi, miharsa zawkte ban phak MLA a ni tih ka hmu chiang a. Ramlaitui khua pawh hian nasa zawka hma a sawn ka beisei tlat a.Tupawh MLA nise, hetiang baka tha an awm chuang lo tih ka hria. Kum 2023 MLA Election lo awm leh turah pawh hian hneh taka chakna a chan leh ngei ka ring tlat a. Chuvangin kan MLA, Dr.Vanlaltanpuia hi zuitlak a nihzia ka hriat hian MNF Party ka zawm ta a ni,” a ti.

Dr.Vanlaltanpuia MLA, MYC Chiarman hian bial a fannaah hian Lunglei ‘N’ chhunga mi Zotlang, Serkawn, Zohnuai leh a chhehvela ramkang thelhna hmun tlawhin mipui thlamuan tur leh an tawrhnate hnem turin a thawk chhuak a. Dr. Vanlaltanpuia chuan, Lunglei khawchhung hmun hrang hranga kang tuartu veng hrang hrang leh Lunglei mipuite a tawrhpui thu sawiin, “Chief Minister zahawm tak leh chak tak Pu Zoramthanga hmalakna a, Mizoramaa vawikhatna atan Helicopter hmanga kang thelh hna ka bial chhunga thawh a ni thei hi a lawmawm ka ti hle a. Khua leh tuite ngaihsak mi leh mipuite tawrhna hrthiamtu Chief Minister kan nei hi kan vannei hle a, mipuite pawh an thla a muang hle a ni,” a ti.

“Tin, kangmei pawh thelh mih thawkhat a ni ta bawk a. Kangthelh tura tha leh zung sengtute chungah lawmthu ka sawi a, ‘Mutmu tuah hman lo leh chaw eipuar hman lova kangthelh tura an tha leh zung sengtu mimal leh pawl hrang hrang te, NGO@-te leh a bikin Tuichawi Motor-ten a thlawna tui an chawite kha hmuh a nuamin, a lawmawm tak zet a ni,” a ti bawk. Lunglei DC Kulothungan, IAS leh Officials-te chungah an inpekna avangin lawmthu a sawi bawk a ni.

Hetih rual hian Dr. Vanlaltanpuia chuan a bialchhunga kangmei avanga hliam tuarte Pu Lalzuia Serkawn leh R. Lalhmingliana-te a kan nghal a, Rs 1000/- ve ve a pe a. Tin, damlo a kan zingah hian Serkawn Ramzotlanga mi Pi Laltluangi, W/o C. Dokhuma chu Rs 20,000/- a pe bawk a, Mualthuam North-ah Lalremruati, W/o Zoliana, Lungpawp chu Rs 10,000-in a kan bawk. Pukpui khuaa miharsate chhungkaw 2 (pahnih)-te hnenah Insakna turin Rs 32500/- ve ve a pe nghal bawk. Tin, Kanghmun South khaw mi Covid-19 avanga Delhi-a boral Nl. Lalhlunpuiite chhungkua chu tlawh nghalin an mangannate a thlamuan a, Delhi lama thuneitute leh Mizo Welfare hotute be pawp nghalin a ruang Mizorama lak chhuah dan tur a buaipui sak nghal bawk a ni. Tun dinhmunah hian paper works-te buaipui mek niin a ruang hi Mizorama lakchhuah ngei theih pawh a beiseiawm hle.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/239
Dt.28.04.2021

CM HMALÂKNA AVANGA TIHHLAWHTLIN A NI

Mizo National Front
General Headquarters
Mizoram : Aizawl

Press Release

CM HMALAKNA AVANGA TIHHLAWHTLIN A NI

Ni 26.4.2021 (Thawhtanni)-a Mizorama la thleng ngai lo, a vawikhatna – Indian Airforce Helicopter hmanga Mizoram chhim lama kang thelh a ni thei ta mai chuan Mizoram hmun tinah titi a luah hneh hle a, he thilthleng chungchangah hian sawinawi phet tumna leh a titu-ah midang tute emaw tih ni anga thu lo thehdarha thangthat lak lo tumte pawh an awm niawma hriat a ni. Mahse a ni lo, hei hi kan Chief Minister chak tak leh thiltithei tak Pu Zoramthanga hmalakna avang liau liaua tihhlawhtlin a ni tih hi mipui hriatah MNF-in kan puang a ni.

Hemi chungchanga thudik tak chu hetiang a ni – Ni 25.4.2021-ah khan Adviser to the President Pu Rosangzuala leh IAF Group Captain Akheto-te inbiakna atangin Pu Rosangzuala hian CM chu thurawn a pe a, chawhnu dar 2:00 velah khan Chief Minister Pu Zoramthanga hian Indian Airforce Group Captain Akheto chu a be ta nghal a, Group Captain Akheto hian kang thelh nan IAF Helicopter hman chu thiltihtheih a nih thu leh an state Nagaland ram kangah pawh IAF Helicopter hi kang thelh nan lo hman a nih tawh thu CM hi a lo hrilh a ni. Group Captain Akheto chuan helicopter hman theih turin a dah hrantir nghal thu CM hi a hrilh nghal bawk.

Chief Minister Pu Zoramthanga chuan Chief Secretary be nghalin, chumi hnuah CM hian CS hi Group Captain Akheto a biaktir leh bakah, Home Secretary leh Lunglei DC-te nen inbetawn tlangin an sawiho ta a. Chief Secretary hian CM thuin Official letter a siam ta nghal a, lehkha chu a zuk thawnthla ta nghal a, ni 25.4.2021 vek tlai dar 4 vel khan Sorkar laipui Ministry of Defence chuan Official-in phalna a rawn pe ta nghal mai a ni. Hetiang hi thil nih dan dik tak chu a ni. Inhnial buai nana lo hman vakna turah MNF chuan a ngai lo. Chief Minister Pu Zoramthanga’n thangthat a khum tur lo sawinawi a, sawipelh talh lo tumtute hian sawizui tawh lo se kan ti.

Rikrum thil thleng leh buaina kan tawh chungchangah thuneitute ngaih pawimawh Chief Minister chak tak leh thiltithei Pu Zoramthanga kan nei hi MNF chuan chhuanawm kan tiin innghahna tlakah kan ngai a ni.

(K.ZOTHANKHUMA)
Joint Secretary,
Media & Publicity Dept.
Mizo National Front
Memo No.MNF/Media/02/2021/238
Dt.27.04.2021.

AIZAWL SOUTH III BIALTU MLA HOVIN CHAMRINGA LEI KHI CHAT ENFIAH A NI

Mizo National Front
General Headquarters
Mizoram : Aizawl

Press Release

AIZAWL SOUTH III BIALTU MLA HOVIN CHAMRINGA LEI KHI CHAT ENFIAH A NI

Aizawl 27th April 2021 : Nimin khan Chamring khuaa Lei khi chat chu Bialtu MLA Prof. F. Lalnunmawia hovin Geological Society of Mizoram (GSM), Mizoram University, Govt. Zirtiri Residential Science College Geologist leh DM&R Senior Consultant-ten a hmunah an zirchiang a.
Geologist-te chuan he lei khi hi mihring chet velna avanga thleng niin an ngai a, thilmak danglam engmah a awm lo niin an sawi.

Lei khi awmna hmun hi mual hmun rem tak a ni chunga hetianga a khik tak vakna chhan hi mihringin kawng laih leh insakna atana leilung an khawih chet leh lung khi (joints), helai mual a dung zawng leh vang zawnga lo awm sate vanga che ta niin Geologist-te chuan an sawi.

GSM President Dr. J
Malsawma chuan, “Hetia lei khichat a awm hma, hun engemaw kalta aṭangin a chhak aṭang hian tui relhru tam tak a awm tawh niin a lang a, tunhma deuha leilung tlahniam (paleo-slides/depression) hnuhma pawh a awm nual a ni. Leilung/pialtlep inghahna leh a dawmtu ber insak nana laih chah a nih tak avangin leilung hi a kau zual hret hret a, a khi karah chuan boruak leh tui a lut zel a, a kara tlaklei lo awm bawk nen friction a tihniam a, zawi zawiin a kau zel a, tihian a lo khichat ta niin a lang. Leikhi chhak mualah hian khi kal riah (tensional cracks) engemaw zat a awm bawk a; leilung kaihhnawih bakah hian thing leh mau vah chereu hian a chetna turah hian tha a thawh ve thei bawk,” a ti.

Helai lei che siamrem leh veng tur chuan lung hlawm leh lei che tawh hi lak sawn a, a chhak lam che leh zel tur ven nan Reinforce Retaining Wall ṭha tawk tak siam a ngai dawn niin helai hmun tlawhtu GSM mithiamte chuan an sawi a, leilung khi huam chhunga lei che zat (Area & volume) an teh bawk a ni.

Aizawl South III Bialtu MLA hoa lei khi zirchianga GSM mithiam kalte hi Dr.J.Malsawma, Dr. Paul Lalnuntluanga, Dr.C.Zoramthara, Dr. C.Lalremruatfela leh Dr.Cory Lalbiakzuali-te an ni. Lei khi zirchiang tura mithiam kalte hi VC leh khawtlang hruaituten lo tawiawmin an lo dawngsawng a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/239
Dt.27.04.2021.

PU K.VANLALVENA MP-IN ZMC A THAWKTUTE LEH DAMLOTE TAN BAWNGHNUTE PE

Mizo National Front
General Headquarters
Mizoram : Aizawl

Press Release

PU K.VANLALVENA MP-IN ZMC A THAWKTUTE LEH DAMLOTE TAN BAWNGHNUTE PE

Vawiin April ni 26, 2021 (Thawhtanni) hian Mizoram Rajya Sabha MP Pu K.Vanlalvena chuan ZMC-a thawktute leh damlote tan Bawnghnute Yakult thahnem tak a pe.

Pu K.Vanlalvena MP chuan, “ZMC-ah hian Covid Patient enkawl lai an thahnem ber a, tunah pawh mi 100 chuang hret an awm mek a ni. Mizoram sorkar chuan kum khat lai ZMC hi Covid patient-te enkawl nan a lo hmang tawh a, Patient-te enkawl nan mai bakah Test nante an hmang thin a ni. ZMC-a Covid enkawl hna hi sorkar tan pawh a hautak a, kan tih theih tam lo mahse; Bawnghnute Yakult Bottle 1800, a Red Box thum leh a Blue Box khat hi damlote leh a enkawltute tan ka pe ve a ni. Kan sorkar hruaitu leh a bikin Health Department lama thawkte an rimin fakawm ka ti hle a ni. MP Fund-te kan la hmang thei si lo a, thil ropui tak ni lo mahse, hetiang bawnghnute hi zunthlum leh thisen sang neite tan pawh a tha em em a, lawm takin ka pe a ni,” a ti.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/237
Dt.26.04.2021

Pu P.C.Zoram Sangliana a awm ta lo. MNF chuan uiawm a tiin a sûn a, pawi a ti

Mizo National Front
General Headquarters
Mizoram : Aizawl

Press Release

 

Pu P.C.Zoram Sangliana a awm ta lo. MNF chuan uiawm a tiin a sun a, pawi a ti

Mizoram Politician lian zinga langsar leh hming nei tham Pu PC.Zoram Sangliana’n ni 24.4.2021 tlai dar 5:20-a Covid-19 leh a kaihhnawih natna avanga thihna kutvawtin mana kan lo chân ta mai MNF chuan pawi a tiin uiawm a ti a, a sun hle a ni. MNF chuan a kalsan tak a chhungte, a nupui, fanau, tu leh fate zawng Pathianin awmpuia thlamuan turin duhsakna kan hlan a ni.

Pu P.C.Zoram Sangliana hi MLA-ah vawi 5, Tlungvel bialah vawi 3, Kolasib bialah vawi 2 thlantlin a lo ni tawh a, Congress Ministry-ah Minister of State leh Cabinet Minister lo ni tawh a ni a, tun dinhmunah MPCC Political Affairs Committee Member leh All India Congress Committee Member la ni lai mek a ni.

Ram leh hnam tana rawngbawltu leh Pathian rawngbawlna lamah pawh inpezo tak, nihna leh chanvo pawimawh tak tak chelh lai mek Pu P.C.Zoram Sangliana kan chân ta mai hi MNF chuan pawi kan ti a, uiawm kan tiin kan sûn a ni.

(THANGKIMA)
Secretary
Media & Publicity Dept.
Mizo National Front
Memo No.MNF/Media/02/2021/236
Dt.25.04.2021.

HEALTH MINISTER-IN LENGPUIA COVID VEI ENKAWLNA HMUN TLAWHIN AIRPORT A TLAWH NGHAL

Mizo National Front
General Headquarters
Mizoram : Aizawl

Press Release

HEALTH MINISTER-IN LENGPUIA COVID VEI ENKAWLNA HMUN TLAWHIN AIRPORT A TLAWH NGHA

Vawiin April ni 24, 2021 (Inrinni) hian Health Minister, Dr.R.Lalthangliana chuan State dang atanga khualzin mite luhkapui ber Lengpuiah Covid Positive an lo tam tak zel avangin ‘Government Middle School-1’, Covid enkawl nana mi 50 vel dah theihna tur chu a tlawh a, VC House-ah khawtlang hruaitute nen an inkawm a. Lengpuiah hian tunah Active Case 17 an nei mek a ni.

Health Minister chuan, “Vawiin chawhma dar 10 thleng kha chuan Covid Vaccine hi 299870 kan dawng tawh a, ni khatah mi singkhat aia tlem lo chu kan pek dan tlangpui a ni. Nimin thleng kha chuan mi 202975 Vaccine pek tawh an ni a, first dose la tawh chu mi 162463 an ni. India ram pumah 25% chauhin Vaccine an lak laiin, Mizoramah chuan Kum 45 chin chunglam pek tawh hi 41.83% a ni. Vaccine hi kum 45 chin chunglam chu a thlawnin pek zel an ni a, vaccine pek vanga taksaah harsatna nei report tun thleng hian kan la dawng lo a, chuvangin vaccine lak hi hlau lovin intihhmuh ang u. May ni 1 atang chuan kum 18 chin pe turin Central chuan ruahmanna a siamfel tawh a, hei hian man a nei mai thei a, Central-in ngaihtuahna a seng mek a, thuchiang nghah mek a ni. Oxygen chungchangah India ram hmun thenkhatah harsatna an tawk tih kan hria a, keini Mizoramah chuan tuna kan dinhmunah chuan harsatna lutuk kan nei dawn lovin ka hria. Private-a siamte an lo awm ve bawk nen Oxygen-ah Zoram mipui chi-ai lo turin ka chah a ni. Nimin khan Union Health Minister hnenah Vaccine mamawh thulhah min rawn pe zel turin ziakin ka thlen tawh bawk,” a ti.

Dr.Thangtea chuan, “Tun tum chu Covid hmasa ai khan Lengpui hi kan vanduai tlat mai a, Lengpuia kan Community Health Centre bulah hian Covid dahna kan neih hi 8 chauh a ni a. Building hran mah ni se, Damdawiin kalte tan a tihbaiawm a. 4C hming thar kan vuah a, Task Force-te enkawl turin Covid vei dahna atan Government Middle School-1 remchang insiamsak thei hi lawmawm ka ti hle a ni. Nikum kha chuan Lockdown kan puanin Covid kan kiam deuh a, tunah hi chuan kan Lockdown vangin a chain hi kan chhu chat mai rih lo,” a ti bawk.

Bialtu MLA Er.H.Lalzirliana pawhin, “Kan Health Minister hi a viak a tha hle a, lawmawm ka ti hle a ni. Covid-19 hi beisei loh ang takin India ram leh Mizoramah a hluar chho hle a. Keini Lengpui hi zin veivakte lo luhna ber a nih avangin a tuar berte zingah telin kan inkharkhip hial a ni. Covid hi mithiamte sawi dan chuan May thla hi a vanglai a ni chho dawn an la ti chauh mai a, inbuatsaihna tha tak nena hmachhawn hi kan tihtur chu a ni,” a ti bawk.

Health Minister hian Lengpui Task Force-te hi PPE hmanraw hrang hrang, face mask, hand sanitiser leh sum fai thahnem tak a pe a, Er.H.Lalzirliana pawh hian Task Force-te hi sum faiin a tanpui bawk.

Health Minister chuan Lengpui Airport chu tlawh nghalin, “Lengpui Airport hi kan fimkhur tawh em em a, Thlawhnaa lo haw apiangte uluk takin Ragt Test kan nei zel a, an result negative mahse, ni 7 chhung kan khunghrang a. Chumi hnuah RT-PCR kan ti leh a, chuta negative chauhte chu kan inchhuah zalen a ni. Thawh hnihna Covid hi a danglam a, thalai pawh a zuah lo a, kan fimkhur tlan hle a ngai a ni,” a ti bawk.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/235
Dt.24.04.2021

HEALTH MINISTER-IN COVID POSITIVE TAMNA VENG LLTF DUTY TLAWHIN, COVID DAMLO ENKAWLNA NEIH BELH CHUNGCHANGAH DEPARTMENT OFFICIAL-TE MEETING NEIHPUI LEH

Mizo National Front
General Headquarters
Mizoram : Aizawl

Press Release

HEALTH MINISTER-IN COVID POSITIVE TAMNA VENG LLTF DUTY TLAWHIN, COVID DAMLO ENKAWLNA NEIH BELH CHUNGCHANGAH DEPARTMENT OFFICIAL-TE MEETING NEIHPUI LEH

Vawiin April ni 22, 2021 (Ningani) zing kar khan Dr.R.Lalthangliana, Health & Family Welfare Minister chuan Aizawl veng hrang hranga Covid-19 Positive enkawl mek tam zualna veng hrang hrang- Kanan Veng, Dam Veng, Melthum leh Bethlehem Venga Local Level Task Force Committee-te Office chu tlawhin face mask, hand sanitiser leh duty hahhote thingpui in nan sum fai a hlan theuh bawk a ni. Kanan Vengah Active Case- 26, Home Quarantine-50, Dam Veng-ah Active Case-26 leh Home Quarantine-15, Melthumah Active Case-33, Home Quarantine lai chhungkaw 58 leh Bethlehem Vengah Active Case-21, Home Quarantine 29 an awm mek a ni.

Task Force-te hian harsatna an neih ber chu duh ang tawka Test (Ragt)/RT-PCR) lak zung zung theih loh, Test-na khaihlak leh zeuh thin chu Minister an lo hrilh a. Minister chuan Incharge Doctor lamte rawn tura lo hrilhin harsatna awm apiangah inthlahrung lova sawi zung zung turin a chah a. Task Force Duty-te pawhin Minister-in a hmun ngeiah a hriatpui zel a ni tih an hriatin thlamuanthlak an tih thu an lo hrilh. Minister chuan Duty-te hnenah tan la sauh sauh a, harh thar leh turin veng dang zawnga Duty-te pawh a duhthu a sawi nghal bawk. Thlamuang leh ngaihngam taka kan lo awm avanga kan lo inthlahdah hman viau tawh thu leh, tunah hian nasa zawka tan la leh a, kan muthlu tho harh a, theihtawp chhuah zel turin Task Focrce zawng zawng a duh thu a sawi bawk.

Vawiin chawhnu dar 1:30pm khan Health Minister hian Secretariat Conference Hall-ah Covid hrivei lo pung leh hluai chungchangah Community Quarantine Centre/Covid Care Centre ngaihtuah belhin Health Department-ho chu Meeting a neihpui leh a. Health Minister chuan, “Aizawl bik hi tunah Active Case 433 neiin kan sang fal hle a. Airport, Vairengte leh a lo luhna dang hi kan in-check uluk a ngai a ni.
Nimin khan Vaccine nuai khat a lo thleng a, a lo thlen belh zelna turin hma kan la mek a ni. Vawiina kan ngaihtuah ber tur chu Covid vei kan pun belh zel avangin damlote enkawlna hmunhma ngaihtuah belh a ni. Covid frontline-a thawkte hi chu sorkar danah vaccine lak la hun chiah lo mahse, a bika ngaihtuahsak hma ni se, ” a ti.

Meeting-ah hian ZMC leh BSUP Building kan hman mekte hi khum a full rih thu sawi a ni a, chhuak an awmin a tharin an luah khat leh nghal zel a ni. Community Quarantine Centre/Covid Care Centre hi kan inbuatsaih lawk nan kan neih tam a ngai hle a. Tunah inkhawm leh sikul kal a theih rih loh chhung hian Covid veite enkawl nan hmang thei ila, an ti a ni.

Meeting-ah hian kohhran inhawng thei apiangte hnenah an kohhran hmunhma hi Covid damlote enkawl dan tur chungchangah inrawnkhawmna neih ni se, tia ngenna siam a, heng hmunte hi bawlhhlawh paihna Motor luh theihna remchang awm theihna ni se, an ti. Heng covid damlote hi a enkawltu Doctor-te tan pawh enkawl a awlsam theih zawk nan hmun hrang hranga tlemte tea awm lovin, hmun khatah tam deuha indahkhawm hi a remchang a ni. Nikum nen chuan danglam tak kan ni tawh a, Case kan neih hi 98% Civilian kan ni tawh a, 2% chauh Paramilitary Force an ni tawh a, nikum kha chuan Force mi an tam zawk fo a ni. Case 71% hi Lengpui Airport atanga lo lut an ni. Kanhmun leh Zokhawthar atanga lo lutah 3% hi kan Case neih a ni a. Tuna Active Case 76% kan neih hi Aizawl mi an ni.

Meeting-ah hian MOT Chairman Dr.ZR.Thiamsanga MLA, AMC Mayor Pu Lalrinenga Sailo, Pu R.Lalramnghaka, Health Special Secretary, Director Health Services, Aizawl DC aiawh, AMC Commissioner, IMA aiawh, MKHC Chairman, Aizawl Local Council aiawh leh Official thahnem tak an tel.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/234
Dt.22.04.2021.

LAWMTHU SAWINA

Mizo National Front
General Headquarters
Mizoram : Aizawl

Press Release

LAWMTHU SAWINA

Serchhip bial bye election chu Pathian hruainain tluang taka zawh fel a lo ni ta a. Inthlan hlawhtlinna tura hun hlu tak, tha leh zung senga vote thlaktu, Serchhip bial mipui zawng zawngte chungah MNF chuan lawmthu kan sawi a. A bik takin kan Candidate Pu Vanlalzawma min vote puitu zawng zawngte chungah thinlung takin lawmthu kan sawi a ni.

Inthlanna felfai tak neih a nih theihna tura thawktu official zawng zawngte, dan leh thupek kawngkawhtute leh inthlanna thianghlim a awm theihna tura hmalatu, MPF chungah MNF chuan thinlung takin lawmthu kan sawi tak meuh a ni.

MNF Party-ah pawh nasa taka tan la a, campaign hun tawp thlenga theihtawp chhuahtu zawng zawngte chungah pawh MNF General Headquarters chuan lawmthu a sawi nghal bawk a ni.

(THANGKIMA)
Secretary
Media & Publicity Dept.
Mizo National Front
Memo No.MNF/Media/02/2021/233
Dt.20.04.2021.

Covid hrilêng kârah pawh Pu Zoramthanga kaihhruai sorkarin mipui mamawh hrang hrang a phuhru thei”

Mizo National Front
General Headquarters
Mizoram : Aizawl

0

“Covid hrileng karah pawh Pu Zoramthanga kaihhruai sorkarin mipui mamawh hrang hrang a phuhru thei”

  • Dr.Vanlaltanpuia, MLA
    Chairman, MYC

Dr.Vanlaltanpuia, MLA, Lunglei North bialtu, MYC Chairman ni bawk chuan April ni 12, 2021 atang khan a bial khaw hrang hrang a fang mek a, kar leh lo awm tur hian a bial chhung khaw hrang hrang fan chhuah hman a inbeisei.Nimin khan Pangzawl tlangdung khuate – Rawpui, Pangzawl, Thiltlang, Lungmawi, leh Phaileng South khuate a tlawh a. A bial fannaah hian miharsa leh retheite tan Tuizem Sintex 127+65 = 192 sem tawh a, Stocking Points pali- Pangzawl- 65, Chhipphir- 35, Haulawng- 127, Pukpui -90, a vaiin 309 lai a sem ang. Tum khata Mizorama Tuizem Sintex la sem tam ber tum niin Mizoram Record a la ni.

He Programme-ah hian Damlo natna khirh tuar, Serkawnah ₹ 100000, Rawpuiah ₹ 15000 leh Thiltlangah ₹ 15000-in a kan nghal a, Hmeithai leh mirethei insakna engemaw zat a pe nghal bawk. Pangzawl Games and Sports-ten Football leh Volleyball Tournament an buatsaih nan ₹100000 a pe a. Club leh Zone Sporting club hnenah Jersey, Football leh Net-te a pe bawk a ni.

Heng khuaahte hian Dr.Vanlaltanpuia chuan thusawiin, “Chief Minister Pu Zoramthanga kaihhruai sorkar hian mipui mamawh ch ihrang hrangte hi Covid hrileng karah pawh a phuhru thei zel a, Buhfai, Gas leh Oil-te pawh a tam em em reng a, Zoram mipuiin Pu Zoramthanga kaihhruai sorkar hi an ring tawk em em a ni. Kum 2018 General Election hnuah inthlanna hrang hrang, heng Sinlung Hills Dev Council/ Sialkal Range Dev Council, MP, VC/ Local Council, LADC, AMC. a vaiin MNF-in chakna kan chang zel a ni. Hemi awmzia chu he Ministry hi mipuiin min ring tawk tihna a ni. Serchhip Bial Bye Election naktuk maia neih turah pawh mipuiten MNF Official Candidate Pu Vanlalzawma chu hneh taka an thlantlin ngei ka ring. Ramri buaiah pawh MNF sorkar chu huai takin a tang a, kilometer chuang laiin ram kan luah belh a ni,” a ti a. Bial mipui hnenah mirethei leh pachhiate ban phak MLA nih ka tum a ni a ti a, bial mipui pawhin an thamuanpui hle a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/231
Dt.15.04.2021

ZIDCO-IN PU THLENGA AN CHAWIMAWI

Mizo National Front
General Headquarters
Mizoram : Aizawl

Press Release

ZIDCO-IN PU THLENGA AN CHAWIMAWI

Vawiin ni 13.04.2021 chawhma dar 11 khan ZIDCO Chairman leh MNF Vice President Pu Lalthlengliana chu ZIDCO Staff-ten chawimawina thuziak an hlan a. Chawimawina an hlan chhan chu Pu Thlenga hi ZIDCO hmunhma a tifeltu a nih bakah office building sa zotu a nih avang te, ZIDCO upgrade tura hmalatu a nih avang leh MNF Vice President a nih lawmpuina pual a ni bawk.

He hunah hian ZIDCO Chairman Pu Lalthlengliana chuan thusawiin, ZIDCO hnuaia thawktute inpumkhatna tha tak neia rawng an bawlhona chu chhuanawm a ti a. Beisei loh leh rin loh taka phu loh chawimawina a dawn avangin lawmthu a sawi a ni.

Pu Thlenga chuan ZIDCO-in nasa taka hma a sawn thu a sawi a. “Kan Chief Minister zahawm tak zarah hmalam kan pan mek zel,” tiin, “Kan zavaia tana pawimawh ber chu Pathian thuin hmangaihna chauh lo chu tuma engmah ba suh u, a tih angin i inhmangaih tlang theuh ang u. He thu hi kan department hian thuvawnah nei thei ila a lawmawm ngawt ang,” a ti.

ZIDCO upgrade chungchang sawiin, Zoram Industrial Development Corporation ni thin chu Zoram Infrastructure & Industrial Development Corporation tih a lo nih dan te. ZIDCO chu State PSU niin development khawih thei – Project lian tham siam te, supply leh sumdawnna engkim khawih theia tihlen (upgrade) a nih thu Pu Thlenga chuan a sawi bawk.

ZIDCO Chairman leh MNF Vice President Pu Lalthlengliana chawimawina inkhawm hi ZIDCO Managing Director & Special Secretary Pu Lalramsanga Sailo, IRS-in a kaihruai a. General Manager Pu Lalsangzuala’n hunserh a hmang bawk a ni.

(MALSAWMPUIA RALTE)
Joint Secretary
Media & Publicity Dept.
Mizo National Front
Memo No.MNF/Media/02/2021/229
Dt.13.04.2021.