PU K VENA’N MYANMAR REFUGEE TLAWH

Mizo National Front
General Headquarters
Mizoram : Aizawl

Press Release

PU K VENA’N MYANMAR REFUGEE TLAWH

Nimin Dt 12.4.2021 Thawhtanni khan Rajya Sabha MP Pu K.Vanlalvena chuan Serchhip District Lungkawlh khuaa Myanmar raltlan awm mekte chu tlawhin an dinhmunte a zawtfiah. Lungkawlh Refugee Committee hruaituten Pu K Vena hi an lo dawngsawng a ni.

Lungkawlhah hian Myanmar refugee-te engemaw zat lo thleng thlain Aizawl leh hmun dangah an insawn deuh vek tawh a. Rawn thleng thar mi 13 an awm leh mek a. Tahan, Leisen leh Dawn khua atangtea lokal niin Zohnahthlak Civilian vek an ni. Tin, N.Vanlaiphaiah pawh mahni chhungte belin refugee 20 vel an awm mek bawk a ni.

Pu K.Vena hian ni 8.4.2021 khan Aizawl Falkland venga Refugee camp a lo tlawh tawh bawk a ni.

(B LALHMANGAIHZUALA)
Joint Secretary
Media & Publicity Dept.
Mizo National Front
Memo No.MNF/Media/02/2021/227
Dt.13.04.2021.

HEALTH MINISTER HOVIN LENGPUI AIRPORT HEALTH DEPARTMENT OFFICIAL-TEN TLAWH

Mizo National Front
General Headquarters
Mizoram : Aizawl

Press Releas

HEALTH MINISTER HOVIN LENGPUI AIRPORT HEALTH DEPARTMENT OFFICIAL-TEN TLAWH

Vawiin April ni 10, 2021 (Inrinni) hian Health Minister Dr.R.Lalthangliana chuan Covid lo hluar thar leh thut chungchangah Department Official-te hruaiin State dang atanga luhka Lengpui Airport-a hma an lo lak dante enfiahin a tlawh a. Health Minister Dr.R. Lalthangliana chuan, “Hetia Covid vei hi kan pun leh zel chuan Aizawl khawpui lailia kan neih sa Random Sampling Test (Kiosk) – Bawngkawn South, Chawlhhmun leh Dinthar bakah hmun li velah neih belh tha ka ti a. Thawhtanni lo awm tur hian chawhnu dar 1:00-ah Health Minister kaihhruainain Health Department Official-te nen Secretariat Conference Hall-ah hmalak dan rel a, Meeting neih leh phawt ni se,” a ti a. Lengpui hmuna Positive an lo dahna te, Thlawhna a lo tuma Passengers-te Covid an lo test dante a enfiah bawk. Thawktuten karleh atang chuan Thlawhna lian 4 (pali) vel an lo tum chuan mi 500 aia tlem lo an lo thlen chuan Duty-te an indaihloh tur thu an sawi chu a puitu a tirh theih thu a hrilh. Lengpui to Aizawlah hian TAXI Service 58 a awm a, hengho hian Minister hi lo hmuin, TAXI hmaah passenger phurh loh a, a hnunga 3 chuantir an duh thute an lo thlen a, Passengers-te bungrua pawh Passenger-ten hlang se an duh thu an hrilh a. Minister chuan an lo enfel tur thu a hrilh. TAXI puten Vaccine lak an dil chu, tun dinhmunah kum 45 chin chauh an la pek thu a hrilh bawk.

Health Miniter hian Lengpui PHC-a Covid Care Centre a tlawh nghal a. Health Minister hi Pu Lalramnghaka, IAS, Special Secretary, Health, Dr.Lalchungnunga, Director, DHS, Dr.Eric Zomawia, Mission Director, NHM, Dr.Pachuau Lalmalsawma, State Nodal Officer, IDSP, Dr.Zorinsangi SNO Training, DHS-ten an tawiawm a ni.

Vawiin 11:00am khan Mc.Cabe Hall, Aijal Club-ah ‘2nd Annual Conference of Association of Surgeons of Mizoram (ASM)’ hun hman a ni a. Presidential Address chu Dr.Saia Chenkual chuan pein, Dr.Lalrinsiama’n Secretary report a pe a, Dr.C.Lalhmangaihzuala’n Financial report a pe bawk.

He huna khuallian Dr.R.Lalthangliana, Health Minister chuan thusawiin, “Covid hi kan hriat tirh atang khan ngaihtuahna hman thiam a harsa a, Europe ram ropui tak takah an inphum ruih ruih a, a damdawi leh invenna a la awm si lo a. Mahse, Mizo Kristian ram kan ni tih hi ka rilruah a lo lian hmasa ber a, Kohhran pawl, NGO, Medical Team-te tangrual ila tih kha ka rilruah a lian ber a. Task Force pawh kan din hma hle a nih kha. Tin, Mizoramin Border kan neih hi km 700 chuang a ni a, hengahte leh Airport-ahte hian Zopa thiamna ngaihtuahna hmangin lo duty thata lo inven hna kan thawk ta a nih kha. Tichuan, kan vaiin ngaihtuahna kan seng a, kan Chief Mnister, Minister/MLA zawng zawng, Sorkar department, Kohhran leh NGO-te, Opposition Party thlengin theihtawpin kan tangrual tha a, kan thawhho thatna chu Pathianin mal a sawm ta niin ka hria. Kan chhuan leh chawimawi tur chu Pathian chauh a ni a, keia mimal pawh hi fakna tur chhete mah ka awm lo, min fak ngai reng reng suh u,” a ti a. Dr.Thangtea chuan,” Vawiina ASM hoin in thil tum hi tha ka ti em em a, kan taksa kan vawn thata kan vawn thianghlim hi a pawimawh em em a. Vanduaina leh Accident thil chu awm hran mahse, a tui tui kan ngaina a, kan duh a, chu chu kan hrisel nan a pawi ta thin a ni. A tui apiang kan ei leh in thin hi bansan tum ang u. Kan ei leh in kan fimkhur loh avangin zai tur kan tam phah tih i hre reng ang u. Keia ngaihtuahna atang chuan Service zawng zawngah hian Health Services hi a pawimawh ber a, a chhan chu, Pathianin duh taka a siam mihring taksa hi a ngai hlu a ni. Vawiina hetiang hun hlu tak kan hmanna hian rah tha tak a chhuah ka bei sei a ni,” a ti bawk.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/225.
Dt.10.04.2021.

PU ZAWMA THLANG TLINGIN RULLING BIAL LO NI NGEI ANG CHE U – K.Lalrinliana

Mizo National Front
General Headquarters
Mizoram : Aizawl

Press Release

PU ZAWMA THLANG TLINGIN RULLING BIAL LO NI NGEI ANG CHE U : K.Lalrinliana: Supply Minister

Vawiin April ni 08, 2021 (Ningani) hian Thenzawl Bazar Venga Joint YMA Hall, ‘Mizo National Women Front (MNWF) Serchhip West Block Conference vawi 1-na leh Political Training’ neih a ni a. Khuallian Pu K.Lalrinliana, MNF Adviser, Supply Minister ni bawk chuan, “Vawiinah MNWF-ten hetiang hun tha tak inbuatsaih hi lawmawm ka ti a, rah tha tak a chhuah ngei pawh ka beisei a ni. Helai bial hi ka pa nau Er.K.Thangzuala chu MNF ticket-a lo thlantlin tawhna a ni a, ka mikhual lo hle a ni. Pathian tihmi leh mi chhuanawm chhungkua atanga lo seilian Pu Vanlalzawma hi Serchhip bial tan chuan a duhawm dawn hle a. Amah Pu Zawma hi MP a nih atang khan Mizoram mipuiin MP Fund tangkaizia kan hre ve tan a ni. Vawiinah Bye Election a lo awm hlauh hi Serchhip bial tan malsawmna nasa tak a nih ka beisei a. Serchhip, Thenzawl leh a chhehvel mipui hian Opposition bial in nih duh ka ring tawh lo; Pu Zawma thlangtlingin Rulling bial lo ni ngei ang che u. He laia Congress ticket-a ding ve Pu Tlansanga hi MNF thalai President a nih laia Pu Hawla na taka bei thintu kha a ni. Pu Duhoma lah MNF hruaitu lawk em em lo nih tawh a ni bawk. An pahnih hian MNF chhungkua atanga lo chuang chhuak ve ve tawh an ni a. MNF atanga Pu Duhoma chhuah chhan hi MNF President-ah a tlin loh vang a ni a, Pu Tlansanga pawh Candidate a chan loh vang a ni tih pawh kan hre theuh ang. A mihring mihrinnaah chuan kan thiante leh mifel tak ve ve an ni. MNF chu kumin hi kan Diamond Jubilee kum a ni a, Congress chu National Party an ni a, mahse Mizoramah chuan Party dang Diamond Jubilee hmang thei tur an awm ve lo. MNF hi a din tirh atang khan lawmna te, hlimnate kan nei fo tawh thin a ni. Pu Duhoma hi chu Party hrang hrang a din nasa tawh em em a, eng Jubilee mah a lawm ve thei ngaiin ka ring lo,” a ti.

“MLA thlan hnuhnung bera MNF a sorkar chhan kha Pathian remruat a ni a tih loh theih loh, Pathian min hruaina vang chauha sorkar kan ni. Khami hnu atang khan Mizorama inthlanna kan neih tawhna reng rengah MNF chu kan la chak mar pat zel a, tun tum Bye Election-ah pawh chakna kan nei leh ngei ang tih ka ring tlat a ni. Pathianin min hruai chhung zawng chuan min dotute lianin an thawm na hle mahse; hnehna kan chang ngei ang, ” Pu K.Lalrinliana, MNF Adviser chuan a ti bawk.

Khualzahawm Pu Vanlalzawma, MNF Official Candidate pawhin, “Tuna kan bye election neih turah hian theihtawpin hma la zel a. Women Front-ten hetiang hun hlu tak in buatsaih hi lawmawm ka ti hle a, thawktu zawng zawngten tun hun reilote awmah hian kan theih ang tawkin hma la chhunzawm zel ang u.Nakin lawkah hnehna kan chang ngei dawn tih ring ngam ang u. Nu-ho in hmalakna zawng zawngah lawmthu ka sawi a, pa-ho leh thalaiten theitawp min chhuahpuinaah ka lawm hle bawk a. Ministers/MLA-te leh General Headquarters chungah lawmthu ka sawi bawk a ni,” a ti.

He hun hi Pi K.Lalrengpuii, President MNWF Hqrs.-in a kaihruai a, Pi Vanlalrengpuii Vice President, MNWF Headquarters chuan lawmthu sawiin hun a khar.

Pu K.Lalrinliana hi MLA pathum Pu Ramthanmawia, Dr.Vanlaltanpuia, Dr.ZR.Thiamsanga-te bakah MNF General Headquarters atangin Pu C.Lalrammawia, Adviser, Pu Dawngliana Adviser leh hruaitu dang thahnem takin an tawiawm a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/224
Dt.08.04.2021.

SPEAKER PU RINA’N ARUNACHAL LEH ASSAM A TLAWH

Mizo National Front:Β  General Headquarters :Β  Mizoram : Aizawl

Press Release

SPEAKER PU RINA’N ARUNACHAL LEH ASSAM A TLAWH

Dan lova ramria lut ru chungchangah hmalak an relNi 06.04.2021 chawhnu khan Mizoram Legislative Assembly Speaker Pu Lalrinliana Sailo chuan Arunachal Pradesh Assembly Secretariat a tlawh a. Arunachal Pradesh-in National E-Vidhan Application (NEVA) a lo kalpui dan chu NEVA mithiamte leh official-te nen chipchiar taka zirhona an nei a. Pu Rina Sailo hi Arunachal Pradesh Legislative Assembly Secretary Pu Kago Habung-a hoten an lo dawngsawng a ni.

NEVA hi dan siamna hmanrua tichak tura duan a ni a. Paper hmang lova information inpek tawnna remchang niin ram puma State legislature zawng zawng inthlunzawmna tur a ni a. Arunachal Pradesh hi National E-Vidhan Application hmang hmasa State pali zingah an tel a ni.

Mizoram Assembly Speaker Pu Rinliana Sailo hi ni 03.04.2021 khan Assam Legislative Assembly Speaker Hitendra Nath Goswami nen inkawmin NEVA chungchang hi an lo sawi dun tawh bawk a. Assam Speaker Pu Goswami chuan Mizoram Legislative Assembly-in National E-Vidhan Application atana proposal an thehluh chu a lo hmu tawh tih a sawi a, Mizoram Assembly chuan an hmuh ve ngei a rin thu a sawi a ni.Pu Goswami chuan tun dinhmunah NEVA hi Orissa leh Himachal Pradesh bakah, Kerela leh Goa State Legislative Assembly-ten hma an lak tawh thu a sawi bawk a. Heng State-te hian engemaw chen (partial-in) NEVA an hman mek tawh thu a sawi bawk a ni.Speaker pahnih inkawmnaah hian Bangladesh leh a chhehvel atanga ram dang mi, a ruka lo lut thin chungchang an sawi bawk a. Assam Speaker chuan Bangladesh atanga Assam-a lo lut ru an tam thu sawiin, heng dan lova lo lut rute chungchanga hmalakna turin State pahnih Speaker-te chuan Mizoram leh Assam State Chief Minister-te hnenah thlen ve ve ni se, hmalak dan tur proposal siam tha an tih thu an sawi dun bawk a ni.Speaker Pu Rina Sailo hian ni 05.04.2021 khan Arunachal khawpui Itanagar-a SYNOD Mission Field-a awmte a tlawh bawk a. Field Secretary Rev. Sangtea hovin inkawmhona neiin, Mission Field tanpuina a hlan nghal bawk a ni.

(B.LALHMANGAIHZUALA)

Joint Secretary

Media & Publicity Dept.

Mizo National Front

Memo No.MNF/Media/02/2021/223Dt.07.04.2021.

PRESS STATEMENT OF MNF VICE PRESIDENT PU LALTHLENGLIANA

PRESS STATEMENT OF MNF VICE PRESIDENT
PU LALTHLENGLIANA
Serchhip Press Club on 07.04.2021 @ 1:00 pm

Β 

Vawiina MNF Press Conference ngai pawimawha media mi lokal zawng zawngte MNF General Hqrs. aiawhin chibai ka buk a che u.

Inthlan puan hma khan helai hmunah hian ni 28.02.2021 khan Press Conference kan lo nei tawh a. Inthlan puan hnuah boruak hrang hrangin min chim takah hian mipuiten thudik an hriat tulin kan hria a, chu’ng thudik sawi tur chuan vawiin hian Press Conference kan ko ta a ni. Serchhip bial Bye Election chu kan lo nei dawn ta a. Candidate paruk (6) lai kan nei ta niin a lang. Mipuiten kan tana tha ber tur kan ngaihtuah thiam theih nan, keini MNF Party chuan uluk taka kan ngaihtuah hnuah Pu Vanlalzawma, MNF Vice President hi Serchhip bial tana tha ber tura ngaiin kan rawn dah ta a ni.

Kan Candidate parukte hi party tinin mi tha tak leh fel taka an ngaih an dahte an ni a. Mi fel tak pawh hi an awmnain a zir miau loh si chuan an felna hman theih lohin a awm thin. Hemi avang hian mipuiten kan ngaituahna kan hman uluk a ngai takzet a. Serchhip bial mipui zawng zawngte vawiina ka thu leh hla hi ngun taka min ngaihthlak saka min ngaituahzui sak turin ka ngen che u a ni.

I. Congress Party Candidate Pu PC Laltlansanga hi mi fel tak, MNF-a a awm lai pawha hruaitu zinga kan dah a ni a. Mahse tuna a awmna party hi chu bihchian a ngai khawp mai. Congress Party hi A.O.Hume-a’n kum 1885-a a din, policy pawh uluk taka duangin Nehru-a hovin the four pillar an tih – Democracy, Socialism, Secularism leh Non-alignment tia innghat an ni a. Hneh taka India rama sorkar thin kha an lo tlachhe ta hle a, tunah chuan Lok Sabha MP 543 awmnaah MP 50 chauh an nei ta a, an tlakchhiat dan hi rapthlak tak a ni. Chutih rualin hmanni lawkah an President-te nufa chenna Delhi khawpui – MLA 70 awmnaah Congress an NIL thak a. Sorkar hnathawk bang Arvind Kejriwal-a hote an sorkar a nih kha.

North East-a hneh taka rorel thin kha khawi State-ah mah NE-ah rorelna an chang zo ta lova, a bik takin Mizoramah Congress-in kum nga chhung MLA 32 neiin rorel an lo rel a. A hnuah MLA 34 neiin sorkarna an chelhzui a. An sorkar lai khan Pathian leh Kohhran duh loh ber – Zu an zuar a. Hemi avang hian kan nula tlangval tam takin nunna an chan a, hmeithai chhungkua tam tak siamin kan Pastor-te mithi vui tam ber chu ruihtheih thil vanga nunna chan an ni deuh zel a nih kha. Chuvangin, MLA 34 nei kha, MLA 5 chauh neiin an tlahniam ta a, Nano Car-a leng tawk chauh an ni ta. Hengte avang hian VC inthlanah pawh, Aizawla Press Conference-a ka lo sawi tawh angin, mipuiah harhna nasa tak a thleng a. Zoram pumpuiah VC 88% kan la a, Local Council 89% kan la leh bawk a. Harsatna leh hri leng karah Zoram mipuiten MNF hi innghahna tlak nia an hriat avangin hetiang hian Vote-in an lantir a ni. AMC kan inthlang leh a, Seat 19-ah Congress Party chuan Seat 2 an la ve a, two-wheeler-a inphur tawk chiah a ni.

Kan sawi tak angin, India ram leh North East pumpuiah an dinhmun hetiang hi a ni a. Mizoramah Pathian leh Kohhran duh loh zawng an ti ngei tih hriat nan an President zahawm tak Pu Lal Thanhawla leh a nau Pu Patea-ten β€˜Kan lo sorkar leh a nih chuan Pathian leh Kohhran duh loh zu kan zuar tawh lo ang,’ an tih khan Pathian leh Kohhran duh loh an lo ti ngei tih an nemnghet a ni. Tuna an MLA naupang tak pakhat ho hi chuan Congress Party hi an indawmkan leh ka va ring lo em! Heta thil lo lang leh mipuiten kan hriat tur chu – Pu Tlansanga hi fel hle mah sela, lo thlangtling ta pawh ni ula India ramah tunge a zuk dawr ve ang? Congress-in State/UT 36-ah pathumah chauh sorkarna an siam a. Chungte chu em ni a zuk dawr ang? Mizoramah pawh an dinhmun in hria e. Thil tithei lo tur chu Serchhip bial mipui hian an hnawl ngamte pawh a tul tawh zawk lo maw?

II. Serchhip bialah hian Serchhip khaw tlangval Pu Lalhriatrenga Chhangte a ding ve a. Ani hi a lo chhuah tirh khan ka beiseina a sang khawp a. A nationalist viau dawnin hriatna ka nei hman bawk a. Mahsela, beisei loh takin a’n BJP thut mai hi ka mang a ti-ang ru deuh a. Central lamah chuan BJP an chak viau pawh a lo ni thei e, amaherawh chu, Mizoramah BJP chu ‘a ngeih lohna hmuna thingphun’ ang chauh a ni a. Pu Hriata hi a thiamnate a ropui tehlul nen, a hman tangkaina theihna hmunah awm se tha ka va ti em!

III. ZPM Party chuan Pu Lalduhoma an candidate a lo ni a. He bye election kan neih turah hian thu leh hla titamtu ber pawh a ni. Kan han sawi ve deuh a nih pawhin mipuiten beng in dawh thiam turah kan ngai. An Candidate Pu Duhoma hi hun reilote chhunga ama party din bakah party tina lo tel kim tawh a ni a. IPS bansana Mizoram politics-a a rawn luh khan Congress hi India ram siam nan leh Zoram siam nan a tha ber tiin, β€˜Zoramah Congress tichak turin ka lo chhuak a ni,’ a ti a. Reiloteah Congress President a ni ta hial a. Reiloteah bawk a thu ber ni chungin Congress a chhuahsan a. β€˜Congress-te chu Ganges luia min baptis tumtute vek an lo ni,’ tiin a beizui a. Congress for Democracy a din a, a chang leh Congress for Peace a ti thul. Congress MP ni chunga Congress a beih tak avangin MP tih loh tur a ti a. Kum 1985-a ama telnaa dan an pass anti defection law a bawhchhiat tak avangin kum 1988-ah MP atangin paih a ni ta a ni.

Tichuan, MNU a din leh a, hei hi reiloteah namthluin Brig T. Sailo nen Democratic Party (DP) an din leh a. Pu Thena nen an thawhho theih tak loh avangin Janata Pary din a tum leh a. Pu Thena’n a din khalh avangin a thiah tawh MNU chu a tungding leh a. Chuta tang chuan MNF Party a rawn zawm ta a ni.

Amah lawmluhna Zarkawta a thusawi chu – Riakmaw sava angin Zoram dung leh vangah ka’n thlawk kual a. PC-ah riakmaw ka ti a, a rem lova, Congress-ah riakmaw ka ti a, a rem lova, MNF thingthiang kungah ka rawn fu ta a ni, a ti. Amaherawh chu, reiloteah President nihna a chuh a, vote sang chuanga Pu Zoramthanga a hneh loh hnuah, mi thenkhat chhuahpuiin MNF β€˜N’ a din ta a ni. Hemi hnu hian ZNP a din leh ta a. Hemi hnu hian ZPM-ah inchhunglutin ZNP a chhuahsan leh ta a ni.

Pu Duhoma hian tuna ZPM-a a thawhpui mekte chungchang a lo sawi thin dan chu – ‘Lo pawh vat peih lo, hlo pawh thlo peih lo, buh lak dawna tlam em nena rawn inphurchhuak ve ngawt thin’ tia a lo sawi thinte kha an ni. Tuna an acting president ngei pawh hi pawl mumal nei lovin he bialah ngei hian a rawn ding tawh a. Vote 93 lai in lo hmuhtir nghe nghe kha. Ani hian ECI-ah bye election sawn hlat an rawt, tiin dawtin min puh tih hrechiangtu in ni. A thusawi hi thutaka in lo laksak loh avangin lawmthu ka sawi a ni. Hengho hi amah Pu Duhoma sawi angin, ‘Perhpawngin ruahsur dawnin vung an chhuah thin’ a tihte kha an ni.

District Council hunlai atangin politics-a inbeihna nasa tak tak hi kan hriain kan lo ngaithla tawh thin a. ZPM-a an hotu Rev. K.Thanzauva thusawite kha kan la hriat ngai loh a ni. Serchhipa inthlanna lo awm tur hi ‘Pathian ringtute leh Setana pawl inbeihna’ tiin a sawi a nih kha. Hetiang taka inbeihna tenawm hi Mizoramah a la awm ngai lo a ni. Hetiang hian em ni Zoram mipuite hi kalphung thar min zirtir an tum? A hmaa ka lo sawi tawh ang khan Pu Duhoma’n dan phuahchawp hmanga paih angin a insawi leh thin hi, dan phuahchawp hmang hian India ram khawi State mahin MLA ban theihna an nei lova, Parliament pawhin MP ban theihna an nei hek lo. Amah pawh tela dan siam ngei a bawhchhiat luih tlat avangin, chu dan hmang ngei chuan ban a ni. Tun hnuah chuan mipui bum zawngin thu sawi tawh lo se kan duh takzet a ni. Amah ngei pawhin independent-a ding leh danglam bik anga insawiin, Val Upa Council hmaah thutiam la eng ang mah sela, Independent MLA a nihna a bo chuang lo. Hei hi Serchhip bial mipuiten i chhinchhiah tlat ang u.

ZPM Party office-ah ngei ZPM-a a lawmluhte hi an tam lutuk. He thil hi ti fo lo tur leh action lak theih a nih thu Speaker pawhin a hrilh a. Kan MLA 12-te pawhin dan zahawmna humhim turin Speaker hnenah lo enfiah teh an ti mai a ni. Hei hi Pu Duha Ukilte pawhin Court-a kalpui chi-ah an ngai lo a, dana thiamchan theih a ni lo tih an hriat avangin mipui court an ti ta a. Mipui court hi khawiah mah a awm ngai lo. A tan thiamthu sawina tur a awm loh avangin mipuite hmaah mi khawngaih dawng zawnga dan siamtute leh a chunga dan anga action latute thudik lova puhin he bialah hian a rawn insawi khawngaihtlak mai a ni. A chungah dan lova thiltih ni tak tak se, rorelna Court-ah ngei a khing tur a ni dawn lawm ni?

Party hrang hrang a awm tawhnaa Pu Duhoma thusawi tawh zawng zawng hi rannungah chang se, zem khatah khungkhawm ta ila, sa inang lo vek awmkhawm an nih dawn avangin thih thlengin an insual luih luih awm asin.

A hmaa kan lo sawi tawh angin, Mizoram politics-a a rawn luh tirh atangin amah chhe taka beitute an awm ngai pawh ka hre lo. Party tin hian dinhmun ropui tak kan lo pe vek zel a. Politician chu a hun leh hmun azirin mi hnuaia kan awm chang a awm a, mahni’n kan rel chang a awm. A ngai reng hi hotu a nih theih loh. Duh hun huna change (tihdanglam) a tum thinna hi amahah hian turtu a awm a. A tana hnawk ber chu amaha amah hi a ni a, amaha amah hian engmah a nghahtir thei lo a ni. Congress-ah khan awm reng ta se, a lal rei khawp ang. MNF-ah khan awm reng ta se, a lal rei viau bawk ang. Chutiang ti hman lova siamtu chu amaha amah tho a ni. ‘Ka chuanna motor a accident dawn chuan keimah ka zuang thla thin’ a ti a. A chuanna motor-te chu accident lovin an sorkar zel a. Amah zawk hi a accident-a a sil-awng zel zawk a ni.

IV. Lawm thusawina leh ngenna: Kan ramah hripui avanga lockdown runpui a awm lai khan, Serchhip bial mipuiten a thlawna chawhmeh khati zozai min rawn pekte kha Aizawl khawpui hian kan hre reng a, kan theihnghilh lo. Kan party aiawhin lawmthu ka sawi duh a ni. Pathian leh kan ram tan tia, thisen tam tak seng a, martar thleng pawha lo beitu – MNF Party chuan he bial tan hian Pu Vanlalzawma kan duh ber a. An chhungkua, a nu leh pa, a unaute zawng zawng pawh mi fel leh thiamna lamah pawh mipui chunglam chhungkua an ni. Amah hi ram leh hnam rawngbawlna kawngah tawnhriat tam tak nei a ni a, Central YMA President a lo ni tawh, MP term hnih leh MLA ni tawh bawk a ni.

He bialah hian tihtur tam tak a awm tih kan hria a. Kum 10 chuang Chief Minister bial ni chunga heti khawpa in hnufum hi na kan tihpui tawh che u a ni. Pu Zawma hi in lo thlangtling a nih chuan MNF General Hqrs. chuan a hmalakna tinrengah kan tawiawm tlat dawn a. Chuvangin ram lailia awm leh lehkhathiam tamna Serchhip bial mipuite hian khawngaih takin MNF Official Candidate hi lo thlangtling hram turin ka ngen che u a ni._

Issued by Media & Publicity Department,

MNF General Headquarters,

Mizoram: Aizawl_

KHAW PAHNIHA ZPM VC-TEN MNF ZAWMIN MNF VC THAR SIAM

Mizo National Front
General Headquarters
Mizoram : Aizawl

Press Release

KHAW PAHNIHA ZPM VC-TEN MNF ZAWMIN MNF VC THAR SIAM

Serchhip MLA Bye Election neihna tur bial thenawm chiah Lunglei North bial, Zohnuai leh Phaileng South-a Village Council, ZPM sorkarna ve vete chu MNF-ah inletin, MNF VC thar an piantir ve ve ta a ni. Zohnuaiah hian VC Member 5 awmin ZPM Member 2-te chuan MNF zawmin, MNF Member 1 awm sa nen VC thar an siam a. Phaileng South-ah hian VC Member 3 awmin ZPM leh Congress ticket-a thlantlinte chuan MNF zawmin MNF VC thar an siam bawk. April ni 1, 2021 khan DLAO Office Lungleiah heng mite hian hming an sign fel tawh a ni.Ti hian Lunglei North huam chhunga VC 22 awmah MNF-in Sorkarna 13 a nei ta a, Congress Party-in VC 5 leh ZPM-In VC 4 an nei mek a ni.

Bialtu MLA Dr.Vanlaltanpuia, MYC Chairman pawhin lawmthu sawiin, “Chief Minister chak tak Pu Zoramthanga kaihhruai Party, MNF chu mipuiin an rin tawkzia an tilang mek zel a, ZPM, Congress leh Party dang atangin ‘Pathian leh kan ram tan’ titu Party MNF-ah an lo lut zel a, a fing hmasa apiangin MNF Party-a luh an intihhmuh a ni. Covid-19 hripuiin khawvel ram zawng zawng a tibuai a, sorkar ropui tak takte pawh an mangangin an hmalakna hrang hrang a tikhaihlak deuh vek a, heti chung hian Pu Zoramthanga kaihhruai sorkar chuan mualpho lovin theihtawpa hma lain hna a thawk reng a. Hripui avanga kan tun dinhmun hi Congress emaw, ZPM sorkar chu ni ta se, Zoram chu kan mualpho hle ang,” a ti.

Lunglei North-ah hian hmasawnna lian tham tak tak thawh mek zel a ni a. MZU South Campus dahna turah, class lo tan lawkna tur Mizoram Engineering College hmun tur pawh chei thuai tum a ni a, Science Centre leh Digital Planetarium chu Zohnuaiah sak mek a ni a, School Building engemaw zat sak mek a ni bawk. Tui Pump la nei lo khua zawng zawngte pawh JJM scheme hmanga pek vek tum a ni a. Hnahthial District-ah Chhipphir tlangdung khaw thenkhat dah a nih avangin inkalpawhna tur kawngpui thar pawh laih tum a ni. Aizawl Thenzawl Lunglei (ATL Road) paltlang bial a nih angin kawngpui pawh siamthat mek a ni bawk. Hengte avang hian Bialtu MLA Dr. Vanlaltanpuia chungah pawh mipuiten rinna an nghat nasa hle a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/222.
Dt.06.04.2021.

Serchhip bial tihmasawn tur hian MLA fund a tawk lo. Department Fund-pui, sorkar fund-pui hnuhchhuah a ngai

Mizo National Front
General Headquarters
Aizawl : Mizoram

Press Release

Serchhip bial tihmasawn tur hian MLA fund a tawk lo. Department Fund-pui, sorkar fund-pui hnuhchhuah a ngai

  • Robert Romawia Royte

Vawiin April 5,2021, Thawhtanni hian Serchhip Hmar Veng Hall-ah Veng pali – Hmar Veng, Bazar Veng, Chanmari Veng leh Field Venga MNF party hotuten Political training an nei a. He hun hi Pu Robert Romawia Royte, MNF Adviser chuan a hmanpui. Pu Robert Romawia chuan, “Tun inthlan tur hi kum 2018-a MLA inthlan ang kha a ni lo. Khatih lai kha chuan Kohhran pawltin, NGO leh political party tinin ‘khawi party nge sorkar dawn tih tuman kan hre lo!’. Tunah chuan April ni 17-a vote thlak ni leh thlak hnu thlengin Pu Zoramthanga hi Chief Minister a la nizui zel dawn tih kan hre vek. Chuvangin Serchhip mipuite hi kan fing tawh turah ka ngai. Hneh takin he bialah hian MNF party-in chakna kan chan hi ka ring em em a ni. A chhan chu 2018 angin CM tur nge tur lo khaikhina vote thlak a ngai tawh lo. Unit pawh nei lo, unit a ngai lo, Movement hi thlangtling ang titute hun a liam tawh.

Mizoram-ah District Headquarters 11 a awm mek a. Heng zinga District Headquarters 10-te chuan Bialtu MLA-ah Rulling party mi an nei. Serchhip chiah hian opposition MLA a nei zuai a, tunah hian rulling party MLA neiha hmasawnna chak taka kalpui thei turin Remchanna rangkachak (golden chance) in nei mek a ni.

Tunlai khawvelah urban development a pawimawh a, Mizorama District capital dang 10-ah Ruling Bialtute tanlaknain hmasawnna kawng an zawh suau suau a ni. Serchhip bial tihmasawn tur hian MLA fund a tawk lo, MLA fund chauha thuneitu chu kan khawpkham lovang. Sorkar lam tang bialtu, Department Fund-pui, sorkar fund-puia thuneitu leh haichhuak theitu kan mamawh. Chutiang tithei tur kan Party banpui Pu Vanlalzawma hi lo thlangtling hram turin Serchhip bial mipuite ka ngen a ni.

Party dang pawhin chak turah min ngai vek a ni. Kum 2 lek sorkar kan la ni a, hripui leng karah pawh nasa takin hna kan thawk a ni. Pathian zarah Covid pawh a kiang zel ang a, chutih hunah chuan sorkar hmalakna pawhin par a chhuang ang. Zu zawrh kan titawp a, sikul kal hun pawh mipui duh danin kan sawn mai a, Sports Policy felfai kan siam a, Zohnahthlak inunau nan Unity Fest-te kan buatsaih a, Lok Ayukta kan din a, Tourism policy pawh kan siam leh mai. Kan sorkar hi Manifesto mila kal a ni. Kan Manifesto hlawhtling turin kan thawk zel a. SEDP pawh pilot project αΉ­an a ni tawh a, tunah hian ‘Pu Lala te, Pu Thanga te lam hawiin kan kalpui dawn’ a ni.
Serchhip bial tana MNF Manifesto hi Pu Zawma tihhlawhtlin tur mai a ni lo. CM Pu Zoramthanga te, Dy CM Pu Tawnluia te, Minister zawng zawngte tihhlawhtlin tur a ni. Sorkara thiltithei zawmpui peng nei lo Opposition MLA-te manifesto ai chuan Pu Vanlalzawma manifesto chu hlu zawk tak a ni,” a ti.

Pu Robert Romawia Royte, MNF Adviser hi Pu T. Lalhmachhuana, General Secretary, IT & Social Media leh Media & Publicity aiawhten an αΉ­awiawm.

(LALLIANZUALA FANAI)
Joint Secretary
Media & Publicity Dept.
Mizo National Front
Memo No.MNF/Media/02/2021/221
Dt.05.04.2021.

MNF SORKARAH WORLD BANK SUM TAM THAM TAK MIZORAMIN A DAWNG DAWN. CHIEF MINISTER LEH HEALTH MINISTER MNF-IN CHHUANG

Mizo National Front
General Headquarters
Mizoram : Aizawl

Press Release

MNF SORKARAH WORLD BANK SUM TAM THAM TAK MIZORAMIN A DAWNG DAWN. CHIEF MINISTER LEH HEALTH MINISTER MNF-IN CHHUANG

Dated, Aizawl, 5th, March, 2021 : Mizoram sorkar chuan theihtawp chhuaha World Bank hotute a dawr hnuah Mizoram Health Department tihchangtlunna tur Project pawimawh tak mai chu World Bank hotute leh Department of Economic Affairs, Ministry of Finance, Government of India chuan a rawn pawm ta a. Chu chu Mizoram Health Systems Strengthening Project (MHSSP) Project under World Bank tih a ni a, Health & Family Welfare Department hi Implementing Agency (a thawktu Department) a ni dawn a. Kum 5 chhunga thawh tur a ni a. US Dollar 40 Million man hu Project a ni. USD 32 Million (80%) hi World Bank-in a tum ang a, USD 8 million (20%) hi State-in a tum tur a ni. A rulh dan tur chu USD 32 Million atanga 90% hi Department of Economic Affairs (DEA), Ministry of Finance Government of India-in a rul ang a, a bak zawng 10% hi Mizoram sorkarin a rul ang.

March ni 5, 2021 khan World Bank Office, New Delhi-ah Department of Economic Affairs (DEA) nen ‘Negotiation Meeting’ chu hlawhtling taka neiin, Loan Agreement-te Sign nghal a ni. Government of India (GOI) aiawhin Pu Hanish Chabbra, Director DEA, World Bank aiawhin Pu Bathula Amith Nagarai, Senior Operation Officer, World Bank leh Mizoram State aiawhin Dr.Eric Zomawia, Project Director, MHSSP-ten World Bank Office, New Delhi-ah Agreement hi an lo sign fel tawh a ni.

Hemi chungchangah hian Health Minister, Dr.R.Lalthangliana hian kum 2019-ah khan India rama World Bank Office lian ‘Country Director Office’ ah vawi hnih Meeting a zu neihpui tawh a. Nikum kumtir khan Washington DC-ah World Bank Headquarters hotute hnenah hemi chungchang tho hi a lo thlen tawh bawk a ni. A tirah a hlawhtlinna kan hmuh mai lohna chhan hi Covid-19 boruak vanga khawvel pum kan buai vang kha a ni. Mahse, tun hnai maia a hlawhtlinna tak tak kan hmu thei ta hi MNF chuan Health Minister, Dr.R.Lalthangliana hmalakna fakawm a tiin a chhuang takzet a, Hetiang sum tam tham, India pawisaa Cheng nuai 28000 zet hi tum khata sualchhuaha tihhlawhtlin harsa tak a ni a, hun duh rei deuh mahse, Covid boruak karah lehnghal he hlawhtlinna liantham tak hi MNF chuan ropui a ti.

Chief Minister Pu Zoramthanga leh Health Mininister Dr.R.Lalthangliana-te hian he ruahmanna hi lo thlirlawk hmasa dun vekin, Chief Minister remtihna nen thlapa Health Minister hian hmalakna hi kalpui ta a ni a. Chief Minister Pu Zoramthanga’n Mizoram sorkarin kan dolet vena tur, kan lo tum ve tur chungchangah pawh inhawng taka ngaihtuahna fing tak a hmang hi MNF chuan lawmawm a tiin a chhuang hle bawk a ni.

Hetianga sum tam tham, Mizoram tana chhenfakawm tham sual chhuak thei, a ngaihna hria Chief Minister Pu Zoramthanga leh Health Minister Dr.R.Lalthangliana-te hi MNF chuan a chhuangin, Mizoram tan thil ropui an tihhlawhtlin hi chhuanawm a ti a, fak phu a ti hle a ni.

Health Minister Dr.R.Lalthangliana pawhin he hlawhtlinnaah hian External Affairs chungah te, World Bank chungah te, Finance Department chungah te, Mizoram Chief Minister leh India sorkar chungah lawmthu a sawi bawk a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/220
Dt.05.04.2021.

MNF-IN LAWMLUH SPECIAL PROGRAM AN HMANG

Mizo National Front
General Headquarters
Mizoram : Aizawl

Press Release

MNF-IN LAWMLUH SPECIAL PROGRAM AN HMANG

Vawiin Inrinni ni 03.04.2021 chawhma dar 11 hian Mizo Hnam Runah ‘Lawmluh Special Program’ hman a ni a. MNF Vice President Pu Lalthlengliana chuan mi thar 120 lawmluhna a nei a. Hengte hi Chawlhhmun leh Tuivamita ZPM hruaitu pawimawh leh an thuihhruaite an ni a. Lawmluh zingah hian pensioner pawimawh tak tak mi pasarih (7) an tel bawk.

Mi thar 120 lawmluttu MNF Vice President Pu Lalthlengliana chuan thusawiin, Mizoram politics bihchian a pawimawh a ti a. Mi thusawi atanga ngaihdan siam mai chu thil fel lo a ni, a ti. India ram thlirin – Parliament seat 530 chuangah INC in seat 50 chauh an nei a. Delhi khawpuiah seat lak an nei lo. Sonia a lo upa ta a, tunah hian leader mumal an nei thei ta lo tih a sawi.

Zoramah pawh zu an zawrh avangin thihna a tam em em a. MLA 34 atangin MLA 5-ah an tla thla a. ‘Kan sorkar leh a nih chuan zu kan zuar tawh lo ang’ an ti hial a. Nano car-a leng tawk lek MLA an nei. AMC kan inthlanga 2wheeler-a leng tawk chiah Councillor an nei a nih hi. An leader a lo upa ve ta deuh a, hruaitu turah an buai hle a ni, a ti.

Serchhip by-election tur chungchang sawiin Pu Thlenga chuan, ZPM leader Pu Lalduhoma chuan dan a bawhchhiat thu leh MNF MLA 12-ten an hek nia sawi chu, “An hek a ni lova, India danpui vawnghim tura intiam an nih angin thutiamah an ding zawk a ni,” a ti.

“Pu Duhoma hi an khawngaih, kei pawhin ka khawngaih,” a ti a. Mi khawngaihthlak tak takte erawh chu mi rethei leh rualbanlote an ni. Hruaitu tha Gandhi-a leh Mother Teressa-te chu miten an khawngaih lova, an ngaisangin an zui zawk thin, Pu Thlenga chuan a ti.

Tunah hian Pu Duhoma hi a chenna bial chhunga mipuiten an hrechiang tawh a. Heti zat MNF-ah an lo lut a nih hi. A thusawia a din lohzia leh pawl 12 a pass tawh avangin a dinhmun hi a hniam zel a. MNF-a a awm lai pawhin keini hi min nek chep ngat ngat thin. Party tan rinawm bera a inchhal ni vekah MNF ‘N’ a din nghal a nih kha. Mi engemaw tak a nih avangin amah hrechiang lova zuitu erawh a la nei ve zel a nih hi, Pu Thlenga chuan a ti.

Kan ram politics hi bihchian a ngai tak meuh a. MNF chuan ram leh hnam tan thisen chhuakin thangthar lo awm zel turte tan hma a hruai a. Vawiin thlengin kan hruaitute hian independent kan la duh ber. Kan mipuite ngenna avangin inremna kan siam mai zawk a ni. Kan ram tan kan bei zel dawn tiin, MNF Vice President chuan, “Hmanni lawka an pastor chhuan ber tawngkamte kha Mizoramin kan la hriat ngai loh a ni,” tiin, “Mizoram hi milemin an hruai kan remti ngai lo a ni,” a ti bawk.

Pensioner atanga lawmluh thar Pu Vanlalrengliana, Asst Commissioner END (Rtd) chuan thusawina hun a hmang a. Lawmluh aiawhin Pu H. Lalthantluanga pawhin: An awmna ZPM Party chu kalphung thar thlak zing lutuk leh symbol an thlak zin dan chu kal ngaihna hre lo awm dan niin a sawi a. Arsi en tlat chunga kal loh chu Heroda ina penbona leh buaina lian zawk thlenna a ni tiin Arsi symbol hmangtu – Pathian leh kan ram tan tiin, “MNF-ah kan lo hawkhawm ta a ni,” a ti.

Special Program kaihhruaitu MNF Treasurer Pu K. Vanlalauva pawhin hun tawpna siamin thutawi a sawi a. “Pu Duhoma’n dan phuahchawp hmanga ban anga a insawi hi – khawvel leh India ram khawiah mah parliament/assembly-ten dan phuahchawp an hmang ngai lo. Pu Duhoma an banna dan hi ama tel ngeia an siam a ni, hetianga thu a sawi mai hi khawvelin an hre zau tawlh tawlh ang a, mak an ti hle ang,” a ti.

Inkhawmah hian Adviser to CM Pu C. Lalramzauva’n hunserh a hmang a ni.

(MALSAWMPUIA RALTE)
Joint Secretary
Media & Publicity Dept.
Mizo National Front
Memo No.MNF/Media/02/2021/219
Dt.03.04.2021

SERCHHIP-AH MNF CAMPAIGN OFFICE HAWNG

Mizo National Front
General Headquarters
Mizoram : Aizawl

Press Release

SERCHHIP-AH MNF CAMPAIGN OFFICE HAWNG

‘Serchhip bialin Development lo thlang tling hram rawh u’

  • Lalruatkima

Vawiin ni 1.4.2021 hian Serchhip Hnam Run Building sak mekah Serchhip MNF campaign Office Pu Lalruatkima, MNF Adviser-in a hawng a. “Serchhip bial mipuite’n Development lo thlangtling turin ka ngen che u a ni,” a ti.

Pu Lalruatkima chuan, “MNF sorkar hmaa kan ram dinhmunte kan la hre reng a. A manganthlak takzet a ni. Zu zawrh avangin hmeithai leh fahrah an pung nasa em em a. Kohhran leh tlawmngai pawlte manganna chu tihtawp a lo ni ta a ni. Zu chhiah hmangin ram siam an tum a, keini chuan zu zawrh avanga retheih kan thlang a. Zu zawrh titawp ngam sorkar chu Pathianin mal a sawm chho mek zel a ni. Mipui huap sorkar a lo ding ta a, mipuiin a hlawkna kan tel mek a ni,” a ti.

Pu Ruatkima chuan, “Kum 2018 hnua inthlan kan hmachhawnah MNF kan la chak zel a. MP inthlan te, Sinlung Hills Council inthlan te, VC leh LC inthlan te, Lai District inthlan te, AMC inthlanahte kan chak vek a ni. He Pu Zoramthanga sorkar hi chung lamin mal min sawm a, kan chak zel a ni. Chung lamin mal min sawm lo se heng inthlanah hian kan chak lovang,” a ti a. “Serchhip bial mipuite kan vannei takzetin ka hria a. Opposition bial niin kum 2 chuang in awm a, hmasawnna chak tawk lo a awm thei a ni. Sorkarin opposition bial a hrek tihna a ni lo. Sawina tur dik address hre sa, bial tana sawitu an awm a ngai αΉ­hin a ni. Kan President-in Serchhip bial a ngaisakzia hriat nan kan miαΉ­ha ber he bialah hian kan rawn dintir a ni,” a ti a. “Ruling MLA neihna hun αΉ­ha in neih hi bawhpelh lo hram turin Serchhip bial mipuite ka ngen a ni,” a ti bawk.

Pu Lalruatkima chuan, “Serchhip biala hmasawnna hrang hrang thawk tur te, zawlpui ruama loneitute tana hna tak tak thawk tur te leh hmasawnna awmze nei tak tak kalpui turin Pu Vanlalzawma hi a tling tawk a. Theirah lo zar ni lovin, thei rah zara mi ngei lo turin lo inbuatsaih rawh u. Serchhip bial hian Development lo thlangtling hram turin ka ngen a che u,” a ti.

MNF Adviser chuan, “Kalphung thar zuar a, fel bika insawite MLA fund hman dante hi kan hre ve vek asin. NGO tute emaw hming hmangin an worker-te vekin hna an thawk a ni. Khawiah nge kalphung thar chu?” a ti bawk.

Pu Vanlalzawma Serchhip bial MNF candidate leh MNF Vice President pawhin thusawiin, “Pathian zarah he inthlanah hian hnehna kan chan ngei ka ring a. Serchhip bialah MNF VC tharte piangin MNF party zawm thar voter kan neih belh zel a, a lawmawm takzet a ni,” a ti.

He hun hi Pu Vanlalsiamthara Serchhip East Block President-in a kaihruai a ni.

(LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/02/2021/218
Dt.01.04.2021.