HEALTH MINISTER-IN COVID SECOND WAVE HMACHHAWN MEK LEH THIRD WAVE ATAN LO INVÊN LÂWKNA TURIN ZMC TLAWH

Mizo National Front
General Headquarters
Mizoram : Aizawl

PRESS RELEASE

HEALTH MINISTER-IN COVID SECOND WAVE HMACHHAWN MEK LEH THIRD WAVE ATAN LO INVEN LAWKNA TURIN ZMC TLAWH

Dated, Aizawl, 29th, May, 2021 (Inrinni) :- Health Minister, Dr.R.Lalthangliana chuan nimin tlai dar 5:30pm vel khan tuna Covid Second Wave kan hmachhawn mek leh Third Wave lo thleng thut thei chungchanga Zoram Medical College (ZMC) lamah lo inbuatsaihna tha zawk kan neih theih nan a hmunhma a tlawh a, inbuatsaihna chi hrang hrang tha zawk kan neih theih nan hmalak dan tur ngaihtuahho a ni a. Hospital-a hman tur Transformer lian leh Diesel Generator lian dahna tur laih mek te, Zoram Medical College-a Oxygen Generating Plant siam thar 200 LPM kar khat liamtaa bun fel tawh a tlawh leh a, hei bakah Mizoram dinhmun thlirin hmanhmawh taka Oxygen Generating Plant dang pakhat bunna tur hmunhma siam mek a tlawh nghal bawk. Hei hi 300LPM bunna tur niin, a dung metre 7, a vang 7 metre leh a san zawng feet 5 leh a chanve tur a ni. Hnathawktute chu a rang thei ang bera thawk zo turin a chah nghal. Minister chuan Morgue House pawh mumal taka siam a duh thu leh Oxygen siamna hmun hi Hospital nen a inhlat tur a nih loh thu a sawi. Hemi hnu hian ZMC Director Office-ah Covid Second Wave kan hmachhawn mek leh Third Wave lo thleng thut thei dinhmunah Covid veite enkawlna hmunpui ber ZMC lamin inbuatsaihna tha zawk an neih theihna tura hmalak dan kawng hrang hrang an sawihozui nghal a ni.

He hunah hian Health Minister chuan thusawiin, “Covid vei kan pun belh zel avangin Secondary ICU pawh 50 atanga 60 vel awm thei se, kan pun dan azirin ngaihtuah belh zel ang u. ICU pangngai 34 bakah Third Wave lo thleng leh thut thei atan 25 dang kan lo buatsaih lawk a ngai a ni. Pathian avang chauhin Mizoram hi Covid avanga thihnaah North East State-a dinhmun ziaawm berah kan la ding mek a, thihna chungchangah kan rate a la hniam ber hi Pathian khawngaihna vang a ni. Tun dinhmunah North East State-ah Assam-ah mi 3088, Tripura-ah 482, Manipur-ah 761, Meghalaya-ah 544, Arunachal Pradesh-ah 109, Nagaland-ah 343, Sikkim-ah 243 leh Mizoramah mi 35-in Covid vangin nunna kan chan tawh a ni. Mizoram anga Sorkar, NGO, Task Force, Kohhran leh mi chitin reng thawhhona tha hi khawvel hmun dangah a awm ve ka ring lo. A lawmawm em em a ni. Mahse, kan chhuan ber tur leh kan chawimawi ber tur chu Pathian chauh a ni a, bang lovin tawngtai chhunzawm zel ang u. Tin, chaw man ba neuh neuh sawi awm thin hi pek nghal zung zung ni se, a taka pawisa awm si, sorkar kalphunga hman nghal zung zung theih si lohte hi, ZMC lamin an mamawh huna hman nghal a nih theih nan Finance Department lam nen Thawhtanni chaw hnu dar 3:30pm khian ka Office-ah Meeting i nei ang u,” a ti bawk.

Health Minister hi Pu R.Lalramnghaka, IAS, Special Secretary, Health; Dr.John Zohmingthanga, Director, ZMC; Er H.Lalfakzuala Sr.EE, Health leh Official dangten an tawiawm a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/247
Dt.29.05.2021

COVID-19 Second Wave chungchanga Zoram mipui hnena Chief Minister thuchah (28.5.2021)

COVID-19 Second Wave chungchânga Zoram mipui hnêna Pu Zoramthanga,Chief Minister thuchah (28.5.2021)

Zoram mipui zawng zawng chibai ka buk a che u.

Hun rei tak chhung mipui hnenah thu sawi lovin Covid tihbuaina karah kan awm a. Covid thawhkhatna in min tihbuai hnuah tunah a thawh hnihna in min nuai leh a. A nasa zawk hle mai a, ni khatah a za telin, 100, 200, 300 chuang te kai thar awm chang kan nei. Min ti buai hle a ni. Mithiam ten a thawh thumna pawh lo kal leh thei a ni an ti a. A lo kal a nih pawhin chung atan chuan kan inbuatsaih ang a. Kan lo tawnhriat atangin thil tih dan tur eng emawzat chu lo thiam phah leh lo inzirlawk tawh angin lo in ngai ila, a tha awm e.

Vawiinah hian in hnena lawmthu sawi tur tam tak kan neih te hi sawi tha in ka hria a.

1) A hmasa berah chuan kan daktawr, nurse, health department a thawktu dang te, anmahni pui tura in volunteer a kal zawng zawng te leh a dang, frontline a awm zawng zawngte hi in thil tih ropui tak avang hian lawmthu ka sawi a. A then chu damloh phah, covid hri kai phah te pawh in awm tih ka hria. In inpekna hi ropui kan ti a ni.

2) A pahnihnaah chuan kan Village leh Local Task Force-te chungah lawmthu ka sawi a. Tunah chuan a hma kuma ramri a fur chhe kara duty te a ngai ta lo deuh hlek a. Amaherawhchu mahni vengah leh mahni khuaah a tulna apiangah kan task force te hi kan innghahna ber – ei leh bar thu a ni emaw, discipline kalpui thu ah a ni emaw, kawng inkawhhmuh thu a ni emaw, damlo harsate sawngbawl dan leh kalpui dan zawng zawngah te kan innghat a. In hah zia kan hria a, chuvang chuan mipuite aiawhin in chungah lawmthu ka sawi tak meuh a ni.

3) Sawrkar hnathawkte hi office a kal lo theilo te an awm in, khuahkhirhna avanga office theilo an awm bawk a. A tulna apiangah covid dona kawngah kan in detail nawk nawk hlawm a ni a. In hna pangngai in thawh bakah tih tak zeta covid dona a in thawhnaah lawmthu kan sawi bawk a ni.

4) Mahni in volunteer, nurse an ni emaw, daktawr an ni emaw, zirna thiam bik te nei leh mi dang dang, damlo enkawl tura inpe te, mahni chhungte leh mahni chhung nilo pawh enkawl tura inpe te nen, a ropui ka ti hle a. In pawimawh in, in entawn tlakin, hnam dang lakah pawh in chhuanawm tak zet a ni.

5) A dawt leh ah chuan mipui hnenah lawmthu ka sawi duh a. Mahni thenawmte ngaihtuahin, a thenin mahni thlai tharte inpe in, a veng veng in, a khua khua ten kan inpe in kan in supply hlawm a. Hnam dang ten min hmu se mak leh mawi an tih tur kan hmu tam em em. Lawmthu ka sawi a ni. Kan CCCC leh covid enkawlna hmun hrang hranga enkawl dan chungchangah fak tur a tam hle a. ‘Kan kohhran in kan tum ang, kan vengin kan tum ang, kan chhungin kan tum ang’, kan ti ngat ngat te hi a ropui ka ti hle a, theihtawpin chhunzawm zel thei ila a duhawm hle a ni.

6) COVID Fund atana CM Relief Fund ah kohhran, pawl hrang hrang, mimal, sawrkar hnathawk leh MLA te’n thahnemngai takin an rawn thawh hi a ropui ka ti a. Rin aia tam an thawh hlawm a; Zoram pawn atang thlenga thawhtute an awm hian kan tanrualna a tilang a. Pawisa thawhtute zawng zawng chungah lawmthu ka sawi takzet a ni.

7) Kan sawrkarin sum thu a harsatna kan tawhte hi min hriatpui tha ka ti a. Budget-ah nikum leh kum hmasa lam ami en chungin ‘kumin chu heti zat hi kan hmu thei ang chu maw’ kan tih, budget estimate (rinthu) a ni a budget chu. Kan han pharh a, ‘heti zat hi hman theih turin han pass phawt ang’ tiin kan pass a. Khami kha a pangngai ah chuan a sual tam ngailo thin a. Amaherawhchu, he COVID lo thlen chinah hi chuan khawvel pumpui, India ram, Mizoram, a buai ta vek mai a. India rama tax lakkhawm, sum lakluh percentage a lo hniam ta a. Chumi percentage ang zel chu state-ah an sem thin si a. Chu percentage hniam ta chu central sawrkar thiamloh pawh a nilo a. State thaimloh pawh nilo vin, hripui avangin kan pawisa lakluh theih a tlem ta vek a ni a; kan pawisa dawn tur pawh a tlem phah ta a ni. Nikum kalta kum 2020-21 budget a kan hmuh tura kan ngaih, kan pass hnan ah khan sawrkar laipuiin a tum ang sum an lakkhawm theihloh avangin kan hmuh tura kan dah atangin cheng vaibelchhe sang leh zanga vel kan hmuh tak loh phah a ni.

Kumin financial year thar te ah hian World Bank hun tawp nen a lo innang a. Khata kan state in kan tum let ve na, kan pek ngei ngei tur kha vaibelchhe sawmsarih a hlawmpui a pekchhuah a ngai a. Chu mai bakah chuan tun hma kum sawm kalta a Mizoram state in a leiba eng eng emaw, tlingkhawm a neih, pek ngei ngei ngai ta vaibelchhe 150 kan pek ngai a awm a, kan pe leh ta bawk a ni. Tichuan kumina kan rinloh a kan pek tak leh nikuma kan hmuh tura kan rin, kan hmuh tak loh zawng zawng belhkhawm chu a tam ta hle a. Development chu sawiloh, kan tui leh kan electric, kan kawng thalo siam ngei ngei ngai te, covid kan dona te, chung zawng zawng bakah sawrkar hnathawk hlawh te kan la pe thei zel hi a lawmawm tak zet a, Pathian puihna kan dawng a ni.

Keimahni tualchhungah theihtawpin covid do turin tan kan la a. Sawrkara kan senso hi a tam zia chu health department in an sum hman atangin kanhre thei ang a. Kan mamawh ang ang covid do na atan hian a tul apiang kan hmang a, loh theih loh in a in sak ngai te, khawl lei ngai te, ei man pek ngai te, inthiar kualna leh adang hrang hrang tan vaibelchhe tel tam kan hmang a ni. Nitin hian kan pawisa beih te uluk taka chik in, a mawngnawi kan hai a. Heihi state tinte tih a ni a, central pawhin an tihna chin a awm ve. Engpawh ni se, tun hrileng avanga harsatna hi ramin, khawvelin kan tawh a ni a. Damkhawchhuah kan vaiin khawvel pum, India ram leh state tin te kan tum a ni.

8) Development tur hi chu sum chu tih ngaihna a awmlo a, amaherawhchu central atangin tawp ringawt lovin kawng laihna tur/ in sakna tur/ mipui inkhawlhfakna tur hrang hrang tuk lawk rawn pek an nei a. Chung sum an rawn pek chu an rawn pek chhan ah chiah bak chuan thil dangah chuan a hman theihloh a ni. Work order a tul leh kan pe a, sanction a tul leh kan sanction a. Amaherawhchu kan state sum chhungah chuan in thar pawimawh zual sakna tur, kawng thar laihna tur thar te chu a tih hleihtheih rihlo a ni.

9) Awle, kan harsatna tawh karah hian mipui ten hriatthiamna thui tak neiin, phun pawh phun lovin tan kan la tlnag vek hi a lawmawm ka ti a ni. Chumi karah chuan nidangah kan hriat ngailoh harsatna, vawk hri leng nasa tak kan tawng leh bawk a. Thingtlang leh khawpuiah kan buai phah hle a ni a. Chumi atan chuan pawisa engemaw zat pawh kan inseng a. Tin, kumin chu khua a thal a, kangmei nasa takin a chhuak chur chur mai bawk a. Air force te pawn an helicopter nen an theih tawk tawkin min rawn thelhpui bawk a. Chutah khaw kheng leh tui harsa in vawiin thlengin min han nuai bawk a. Chubakah kan thenawm ram Myanmar buaina avanga harsatna hrang hrang tawkte an awm a. Chutah chuan mipuite entawn tlak takin, mawi tak leh ropui takin kan unaute chungah hma kan la a, harsatna kara a eng mawi tak lantirtu an ni. Sawrkar pawhin theihtawpin central sawrkarah kan thlen a, anni pawh an rawn chet hun a awm kan beisei a ni. Mipuite harsatna karah hian theihtawpa tang tlang turin ka ngen che u a. Kan in luahtu, kan dawr luahtute pawh hriatthiamna nen lan indawr a, kan inpawhfan hram hram a pawimawh a ni. Puihna hi Central sawrkar atang pawhin tanpuina kan dawng bawk a. Oxygen leh covid beihna tur hrang hrang kan dawng a. A tul ang zelin a hunah Pathian in min pe a, ram pawn atang pawhin kan dawng thin in, kan dawn belh zel pawh kan beisei a, A ropui kan ti a ni.

Ka thu tawp ber atan chuan Pathian tanpuina chauh lo chuan he hri do hi tih theih a nilo a. Pathian hnenah he hripui laka kan himna tur hmanrua kan neih theih nan dil ila. Pathianin kan hnenah sawi duh enge a neih tih hriat tumin kan beng chhi ila. Keimahni tan, ram dang tan, khawvel tan tawngtaiin hma i la ang u. Lei leh vana thuneitu hnenah kan dil anga, tawk a tih hunah hnehna min la puansak ang tih ring chungin theihtawpin, mimal, kohhran leh ram pumin i tawngtai ang u tih ka chah duh che u a ni.

In vaiin chibai ka buk a che u.

Ka lawm e.

MNF-IN LAWMTHU SAWI

Mizo National Front
General Headquarters
Mizoram : Aizawl

Press Release

MNF-IN LAWMTHU SAWI

Dated, Aizawl, 15th, May, 2021(Inrinni) :- Kum 2019 atangin Novel Corona Virus (Covid-19) chuan khawvel a tibuai a, khawvel ram ropui ber ber pawh an mangang takzet a, he hri hi mi tam takin an thihpui ruih ruih a, India ram pawh dinhmun thalo takah kan ding mek a, Mizoram pawh kum khat chuang fe kan buai zo ta. Sorkar Office a kal mumal thei lo a, sumdawnna hmun a kal thei lo a, sikul leh Biakin thlengin khar a ngai a ni. Veng tam tak Containtment Area-ah puangin ram pumin Total Lockdown kan hmachhawn mek a ni.

Hetih lai hian hun khirh leh hun harsaa Mizoram kaihruai tura Pathian ruat Chief Minister Pu Zoramthanga kaihhruai MNF Ministry chuan theihtawp chhuahin ram leh mipui tan hma a la zel a. Chief Minister Pu Zoramthanga, Health Minister Dr.R.Lalthangliana, Minister-te, MLA-te leh MNF AMC Councillors-ten an bial theuh leh ram pum tana an inpekna leh thawhrimna hi MNF chuan lawmawm a tiin a chhuang takzet a. Health Care lama thawktu te, Police Department-a thawktu te, Department hrang hranga thawktu te, ZMC/Covid Care Centre (CCC)/Community Covid Care Centre (4C/CCCC) hrang hranga thawktu te, Task Force hrang hrang Duty-te, Covid dona tura CM Relief Fund-a thahnem ngai taka thawhlawm thawh thintu te, kohhran hrang hrang leh Kohhranhote thawhhona leh tanrual thatna achungah MNF chuan lawmthu a sawi takzet a ni. Mipui mimir tinte pawhin sorkar hmalakna kan tawiawm tha a, an dan siamte zawmin kan zah thiamte a lawmawm em em a ni. Mipui kan him theihna tura thawktu hrang hrangte tan leh hripui a kian theih nan bang lova tawngtai zel turin MNF chuan Zoram mipui a sawm takzet a ni.

Tun hi hnam anga kan tanrual hun a ni a, thawktu hrang hrangten mutmu pawh tuah hman lovin, a thima var pawh thlu lovin mipui kan him theih nan hna an thawk reng a, hetih lai hian thawktute tihsual palh lo chang ran a, mahni Party hamthatna tura thu lo veivir chingte an awm ve thin a ni a, an thu ngaihdan tawk lo thiam tur leh hetianga tih chingte pawh hian ti tawh lo se MNF chuan a duh takzet bawk a ni. Sawisel awm chu a awm thei e, chutih rual erawh chuan a nazawnga pir tur zawngte thu leh hla hi chu ngaihdan tawk i thiam ang u. Sorkar thupek kan zawm that a, thawktute leh mipui kan tanrual that zel chuan he hripui hi Pathian zarah kan do hneh thuai ang a, nunphung pangngaiin kan la kal leh thuai ang tih hi MNF chuan a beisei tlat a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/246
Dt.15.05.2021

MUALLUNGTHU VC-TEN MUALLUNGTHU RAM ZMC TAN AN PE

Mizo National Front
General Headquarters
Mizoram : Aizawl

Press Release

MUALLUNGTHU VC-TEN MUALLUNGTHU RAM ZMC TAN AN PE

Vawiin May ni 14th, 2021(Zirtawpni) hian Muallungthu VC-te chuan Muallungthu Primary School leh Middle School ram bakah Mauphir ram tin 50 hmun vela zau chu Zoram Medical College (ZMC) tan an pe a, an pekna lehkha hi Health Minister Dr.R.Lalthangliana hnenah an hlan a ni. Middle School leh Primary School hi hmun danga sak a ngaih dawn avangin Muallungthu khawtlang hruaitute hian Health Minister hnenah sak sak an dil a, Health Minister chuan tihhlawhtlinsak an phu thu sawiin theihtawpa hmalakpui a tum thu a sawi a ni.

Dr.Thangtea chuan, “Health Department-in ram kan zawn ruk reng laiin, hetiang ram zau tak hriselna lam ngaihtuah avanga Muallungthu khawtlang hruaituten ZMC an pe hi a lawmawm hle a, VC leh khawtlang hruaitute chungah lawmthu ka sawi tak meuh a, a hmalatu Prof.F.Lalnunmawia MLA chungah pawh lawmthu ka sawi nghal a ni,” a ti. Health Minister hian ZMC Laboratory-a thawkte leh ICU-a thawkte tan thlai leh thei thahnem tak a pe nghal a ni.

Hemi hnu hian Dr.R.Lalthangliana hian ZMC tlawh leh nghalin, “ZMC-a thawkte an positive avangin hun rei vak lo chu hna a kal chak thei lo a, Catholic lam hotupa ka bia a, Montford Principal pawh ka bia a, ZMC-a thawktute awmna turin Montfort School chu kan dil a, min phalsak a, kan lawm hle a ni. Heta tan hian khuma phah tur bialtu MLA Prof.F.Lalnunmawia chuan Mattress 40 zet a pe a, a chungah lawmthu ka sawi nghal a ni. Tuna kan Covid hi chu a nasat em avangin Commitee chu la awm chiah lo mahse, kan dinhmun thlirin kar leh lam pawh Lockdown hi kan la chhunzawm zel a ngaiin ka ring a, mahse, MOT thu thu a ni. Covid chungchangah chuan engkim hi tih nghal zung zung a ngai a, vawiina tih tur hi naktuka khek chi a ni ve lo,” a ti bawk.

Non-Government Hospital Medical Operational Team-te chuan ZMC-a hman tur Oxygen Regulator 27 zet chu Health Minister awm laiin an pe nghal a ni.

He hunah hian MOT Chairman Dr.ZR.Thiamsanga MLA, Prof.F.Lalnunmawia, MLA, Pu R.Lalramnghaka, Special Secretary Health, Dr.John Zohmingthanga ZMC Director-te pawhin thu an sawi bawk.

Health Minister hi Dr.ZR.Thiamsanga, MOT Chairman, Prof.F.Lalnunmawia bialtu MLA, Pu R. Lalramnghaka Special Secretary Health, Er.H.Lalfakzuala, Senior EE Health Department, Dr John Zohmingthanga Director ZMC leh mi pawimawh dangten an tawiawm a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/245
Dt.14.05.2021

Chief Minister Pu Zoramthanga’n Horticulture department kaltlanga a hmalakna Lengteng bial aṭanga dawnfawh thar Aizawlah a lo thleng ta

Mizo National Front
General Headquarters
Mizoram : Aizawl

Press Release

 

Chief Minister Pu Zoramthanga’n Horticulture department kaltlanga a hmalakna Lengteng bial atanga dawnfawh thar Aizawlah a lo thleng ta

12th May,2021 : Lengteng bial Ngopa, Lamzawl leh Pawlranga hlawhtling taka chhungkaw 24-in Tuiphal leh Tuithil leileta an dawnfawh thar chuan lockdown karah Aizawl a lo thleng ta.

Ngopaa North Eastern Farmers’ Union(NEFU)-te kaihhruaina hnuaia Horticulture department nena tangkawpa an chin a ni a. Pum 65000 vel an thar a ni.

Dawnfawh ching tura kuthnathawktuten hmalak an tumna hi bialtu MLA Pu L.Thangmawia an hriattir a, ani hian Chief Minister leh Agriculture Minister hnenah thlen nghalin department lam nena tihho theih apiangah hma lo la tura CM-in a tih angin hma a lakpui ta a. Horticulture department hian a chi a pek mai bakah a chin dan tur leh harsatna an tawh hun apiangah mithiamte tir chhovin hlawhtling taka thar chhuah a lo ni ta a ni.

A hralh hunlai tak hi Lockdown lai a nih avangin a thartute rilru a buai hle a, hetih lai hian sawrkarin kawng dapsakin Deputy Commissioner, Saitual District-in a hmun ngeia tlawhin kawng a zawnsak a. Horticulture department-in District hrang hranga zawrh dan tur thuneitute nena inberawn chungin an buaipui chhunzawm nghal a. An chungah kuthnathawktute an lawm hle.

Tunah hian trip 2 a rawn thleng tawh a. Hei hi Aizawl leh Serchhipa hralh turin department-in hma an la a, a remchan dan anga district dangahte pawh thuneitute nen inberawn chung zelin ngaihtuahna an sen chhunzawm mek a ni. Kuthnathawktuten hlawhtling taka an chin theih nana theihtawp chhuahpuitu leh lockdown kara an hah man an tel theih nana buaipui chhunzawm zeltu Horticulture department chungah lawmthu an sawi mawlh mawlh a.

Aizawl bikah hian bazar phalni ni 13.5.2021(Ningani) hian Horticulture office-ah zawrhchhuah a ni ang.

Mizorama thar ngei dawnfawh hi tlawmngaia lo leisak turin kuthnathawktute aiawhin bialtu MLA Pu L.Thangmawia chuan Zoram mipuite a ngen a, he an dawnfawh thar hi ni 10.5.2021 khan ZMC-a thawktute hnenah a thartute aiawhin a lo hlan tawh bawk.

(V.L.KROSSHNEHZOVA)
Secretary
Media & Publicity Dept.
Mizo National Front
Memo No.MNF/Media/02/2021/244
Dt.12.05.2021.

EXE. COUNCILLOR PU TLANZOVA’N CCC BAWLHHLAWH PAIH DAN A HMUNAH A EN

Mizo National Front
General Headquarters
Mizoram : Aizawl

Press Release

EXE. COUNCILLOR PU TLANZOVA’N CCC BAWLHHLAWH PAIH DAN A HMUNAH A EN

Ni 12.05.2021 (Nilaini) hian Pu Laltlanzova Khiangte, Executive Councillor i/c Solid Waste Management chuan SAI Hostel, Mission Vengthlanga Covid Care Centre (CCC) bawlhhlawh lakkhawm dan a hmunah tlawhin a enpui a. Aizawl khawpui faina kawnga AMC hmalak dan leh Covid hripui kara hna an thawh dante a sawi a. Tunlai politics inchirhthehna karah, “Politics-ah chuan bawlhhlawh a thianghlim ber,” a ti.

Pu Tlanzova chuan Aizawl Municipal Corporation-in Local Council nen tang tlanga PPP Mode hmanga Aizawl khawpui bawlhhlawh lakkhawm hna an thawh bakah, Covid-19 dona kawngah theihtawp chhuahin hma an lak mek thu a sawi a. “Heng centre hrang hrang bawlhhlawh atanga hripui inkai chhawn a nih lohna tura H&FW Deptt-in bawlhhlawh sawngbawl dan tur inkaihhruaina (SOP) a siam chu centre enkawltuten tha taka an zawm a ngai,” a ti.

Pu Laltlanzova chuan: Bawlhhlawh lahawmtuten ngaih ngam taka CCC bawlhhlawhte an lakkhawm theih nan centre enkawltute mawhphurhna AMC-in a duan ngai pawimawh turin a chah a. Quarantine Centre leh CCC/4C bawlhhlawhte chu ni tin a hrang zelin garbage bag-a khung tur te, disinfectant kah vek tur a nih thu leh darkar 72 hnuah chauh bawlhhlawh hi motor-in a la thin tur a nih thu a sawi bawk.

Exe Councillor chuan, tunah hian Community Quarantine Centre (CQF) 88, Covid Care Centre (CCC)/Paid CCC 9, Community Covid Care Centre (CCCC/4C) 11 leh Paid Quarantine Facility (Hotel/Homestay) 18-te bawlhhlawh lakkhawm leh paih hna a thawh mek thu leh bawlhhlawh lakkhawm nan hian AMC motor pali (4) bakah mimal motor man chawia hawh (hire) a ni bawk, a ti a. Aizawl khawpui bawlhhlawh thenfai chu hna hautak leh hna pawimawh a nih angin politics thilah pawh bawlhhlawh sawngbawl chu hna thianghlim ber nia a hriat thu a sawi a, “Politics-ah chuan bawlhlawh a thianghlim ber,” a ti a. Mission Vengthlang CCC tan Pu Laltlanzova Khiangte hian face mask thahnem tak a pe bawk a ni.

AMC hian nikum 2020 khan Aizawl khawpui chhung veng hrang hranga LLTF-te hnenah sum fai bakah hmanrua leh mamawhtute tan chhawmdawlna a pe chhuak a. Vantlang hmun pawimawh leh Sawrkar Office pawimawhte disinfectant hmangin a kap thianghlim ṭhin bawk.

Nikum chhung khan CQF 186, GQF 22 leh Paid QF/Hotel 7-te bawlhhlawh lakhawmin fimkhur takin a tiral thin a. Heng bawlhhlawh senghawi nan hian Rs nuai 20 vel sen a ni a. Kumin 2021 hian hripui vei kan tam chhoh zel avangin nikum lam aiin sum sen hi a tam ngei a rinawm.

SAI Hostel CCC tlawhnaah hian AMC Jt. Commissioner Pu H. Lalhmingthanga pawhin thusawiin, covid hrileng kara bawlhhlawh khawn a hautak dan leh mipuite lam atanga harsatna awm dan te, mipuite nen thawhhona tha neih a tul tih a sawi a. Ward XIV Councillor Pi Ramthanzauvi pawhin thutawi a sawi.

Pu Tlanzova hi AMC Ward VI Councillor John Zosangliana Ralte leh Ex Councillor Pu Lalhmingmawia-te bakah, Mission Vengthlang LC Chairman & Member leh AMC Staff-ten an tawiawm bawk a ni.

(MALSAWMPUIA RALTE)
Joint Secretary
Media & Publicity Dept.
Mizo National Front
Memo No.MNF/Media/02/2021/243
Dt.12.05.2021.

THEIHTAWP CHHUAHTU CHU PHED MINISTER LEH PHE DEPARTMENT

Mizo National Front
General Headquarters
Mizoram : Aizawl

Press Release

THEIHTAWP CHHUAHTU CHU PHED MINISTER LEH PHE DEPARTMENT

10th May, 2021 : Kan hriat ṭheuh angin Aizawl chawmtu Tlawng lui hi furah a lian em em a, ṭhalah a kam leh nasa ṭhin hle. Fur tui lian nu but but karah leh ṭhal va êk char lai pawha Aizawl mipui nuai 4 vel tui mamawh chu a pangngai deuh reng a ni a. Hei vang hian kum tluanin Aizawl pumping scheme phase 1 leh phase 2 hian nitin tui (Raw Water) litre nuai 35 vel Tlawng lui PHE tuikhuah aṭanga hip chhuakin tui litre nuai 10 vel tuitihthianghlimna, transmission loss leh pump efficiency 72%-a tui hman pen a lo ni a, Aizawl khawpuiah nitin tuithianghlim litre nuai 25 vel a pe chhuak reng a ni.

Amaherawh chu, kumin 2021 ṭhalah hian kum dang zawng aiin Tlawng lui tui a tlem a, a tlem lai ber April ni 19-ah Tlawnga tui luang chu nikhatah litre nuai 31.46 chauh a lo ni ta a, chu chu Aizawl mamawh aia tlem a ni. April ni 19 leh April ni 30 inkarah Tlawng lui tui luang aia Aizawl tana hip chhuah a tam zawk vang hian zawi zawiin PHE Tlawng tuikhuah chu a phai hret hret a. Amaherawh chu, ruah lo sur zeuh zeuh ta leh April ni 30 tlaia ruah tam tham tak a sur tak avangin May ni 1 aṭang chuan Tlawng tui a lo tam leh ta a. May ni 1 aṭangin hip chhuah sen lovin tuikhuahah pawh a luang liam leh ta a ni. May ni 1 nia Tlawng lui tui tam lam hi litre nuai 71.263 lai a ni leh ta tih PHED hotute hnen atanga hriat a ni.

Tlawng lui tui a tlem zual chhung, April ni 19 aṭanga April ni 30 chhung hian Serlui tui hi a kang chat lo chauh a, Tui Pump-na Phase1-in tui pump khawp a neih loh avangin, Phase 2 hian a chawm kawp ta a, chuvang chuan khawpui chhungah pawh harsatna lutuk thleng lovin tluang taka tui sem reng a ni thei zawk a ni.

Tlawng tui awm zat uluk taka vil reng a, tui tlem chhung pawha Aizawl mamawh zualpui phuhru tura tui renchem dan ruahmanna ṭha tak siam theitu PHE Minister leh a department engineer -te hi an fakawm takzet a ni.

Mihring tih theih piah lam khawkhen vanga Tlawng tui a tlem lai leh Aizawl tui mamawh pe zel tura chhun/zan zawma thawktuten rim taka hna an thawh laia an harsatnate a hmuna enpui ve duh si lova, ruahtui tlak hnu leh Tlawnga tui a tam leh hnu May ni 7-a Congress ṭhalaiten sawisel tur ringawt zawnga thlate la a, Tlawng lui tuikhuah an tlawh leh thudik ziktluak lo an vawrhdarh hi an hriat chian loh vang a ni a. An thiltih duh dan hi a Mizo zia lo hle a. Hetianga tiduhtute hi sawisel tur ringawt zawng, mahni leh mahni ineichhe mek an ni a, Vai ram politik hri chhe kai nghet tawhte tihawm tawk chauh an ti duh ta zel mai hi an demawm takzet a ni.

(V.L.KROSSHNEHZOVA)
Secretary
Media & Publicity Dept.
Mizo National Front
Memo No.MNF/Media/02/2021/242
Dt.10.05.2021.

HEALTH MINISTER-IN COVID VEITE ENKAWLNA TUR HMUN DAP ZELIN, COVID DAMLOTE ENKAWL DAN TUR MEETING NEIHPUI

Mizo National Front
General Headquarters
Mizoram : Aizawl

Press Release

HEALTH MINISTER-IN COVID VEITE ENKAWLNA TUR HMUN DAP ZELIN, COVID DAMLOTE ENKAWL DAN TUR MEETING NEIHPUI

Vawiin May ni 5, 2021 (Nilaini) hian Health Minister Dr.R.Lalthangliana chuan Covid vei thar lo pung zelah Covid veite enkawlna hmun tur dap kual zelin, MINECO hmuna Mizoram Rural Bank, Head Office sak thar chu Covid Care Centre (CCC) emaw, Community Covid Care Centre (CCCC) atan a en a, he building hi floor 7 laia sang niin, inthiarna, tui leh electric lam pawh duhthusamin a nuam a, Health Minister chuan Covid veite enkawl nan lak ngei a duh thu a sawi a ni. Tuikual South-a Agriculture Directorate building pawh en nghalin, he building hi chu a hlui tawh em avangin mihring chenna atan a tlak lovang a ti. Health Minister hi MOT Chairman, Dr.ZR.Thiamsanga MLA, CE, PHE, Zone-1, CE, PWD, CMO (E) leh Official dangten an tawiawm a ni.

Dr.R.Lalthangliana chuan thusawiin, “Covid hi Mizoramah Aizawl khawpui hi a hluarna ber anih avangin CCC emaw CCCC kan dap belh zel a, Medical Team thlengin ngaihtuah belh zel an ngai a, MKHC-te nen pawh kan indawr zel a ni. Damlo serious bik tan Oxygen leh Ventilator-ah tan kan la zel bawk a, kan Chief Minister pawhin kawng tinrengah hriatthiamna sang tak a nei zel a, kan mamawh kan thlente chu min pawmsak zel a, kan lawm hle a ni. CM Relief Fund-ah mimal leh pawlho an lo pen chhuak zel a, Mizo nun ‘thian chhan thih ngam’ kan nihna a lo lang zel a ni. Kan thawhho thatna hi Pathianin mal min sawm ngei ngei ang tih ka ring tlat a ni. Lungruala inpumkhatna leh tawngtaina nena kan beih chuan kan ram hian chhiatna rapthlak lutuk tawng lovin kan him thei ang,” a ti a.

“Nikum lam aiin Covid do hmalaknaah nasa taka tan kan lak a ngai a. A tul tawpkhawk loah chuan tumah zin chhuak lo ila, ram pawnah phei chuan i zin rih lo tawp ang u. January to March chho vel khan kan lo inthlahdah hman a, inkhawmte kan phal a, puanven i sawichhing ang u. Tunah hian Kanhmun, Vairengte, Myanmar nen kan inrina hrang hrang, Manipur ramri thlengin theihtawp chhuahin kan inveng uluk hle a, kan Police leh Task Force-te hmalakna pawh chhuanawm ka ti takzet a ni,” Health Minister chuan a ti bawk.

Hemi hnu chawhnu 1:30pm hian Health Minister hovin Secretariat Conference Hall-ah Physician Doctor-te Covid damlote enkawl dan tur chungchangah Meeting a neihpui leh a. Meeting-ah hian Chief Secretary, Health Special Secretary, Health Department Official-te leh ZMC lam hotute an tel bawk. Health Minister chuan hetiang hi kan boruak a nih tak avangin Covid vei damlote damdawi chawh dan/pek dan chungchangte hi kan ngaihtuah uluk a ngai hle a, Covid hi a damdawi tak tak chu awm lo mahse, tuilum in leh tuna damdawi kan inchawh dante hi thawktute kan inhrilh hriat a, sawiho tul ka ti a ni, a ti a. He hunah hian Doctor-te chuan damlo dinhmuna zira damdawi an pek dan hrang hrangte an sawi a, a tlangpuiin symtomatic nei, khawsik nei, zunthlum leh thisen sang neite chu tunah hian ZMC lamah kan la phei tlangpui an ti. Civil Hospital leh Non Government Hospital thuneitute pawhin damlo an admit dawnin RAgT Test an neih vek thu te, a awmpuitute pawh an test vek thu an sawi a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/241
Dt.05.05.2021.

SERCHHIP BIAL BYE ELECTION-AH MNF PARTY-IN HMASAWN NASA

Mizo National Front
General Headquarters
Mizoram : Aizawl

Press Release

SERCHHIP BIAL BYE ELECTION-AH MNF PARTY-IN HMASAWN NASA

Aizawl the 3rd, May, 2021 : – Nimin khan 26-Serchhip (ST) A/C bye election vote chhiar a ni a, ZPM Official Candidate Pu Lalduhoma chu thlantlin a ni. Chief Minister Pu Zoramthanga kaihhruai State ralmuangah inthlanna fel leh thianghlim tak nei a, vote chhiar zawh thlenga buaina leh harsatna a awm lo hi MNF chuan lawmawm a ti a, chutih rualin MNF Official Candidate Pu Vanlalzawma tling zo ta lo erawh MNF chuan pawi a ti hle a, amah duhsaka lo vote-tu zawng zawngte bakah, thlantlin a nih theih nana tha leh zung, ngaihtuahna zawng zawng sengtute chungah MNF chuan lawmthu a sawi a, Serchhip bial hmasawnna tura thlantlin a ni ta lo hi MNF chuan pawi a ti takzet a ni. Election buaipuitu Official-te leh venhim hnathawktu Police zawng zawngte chungah MNF chuan lawmthu a sawi nghal bawk a ni.

Serchhip bial hi kum 40 dawn, kum 1998-2003-a MNF Candiate Pu K.Thangzuala (RIP) thlantlin a nih tih loh chu MNF la tlin ngai reng reng lohna bial a ni a. Inthlan hnuhnung ber kum 2018 khan ZPM-in vote 5481 hmuin, Congress-in vote 5071 an hmu a, MNF chuan vote 4313 hmuin pathumna kan ni. Tunah pathumna atanga pahnihnaa kan inhlangkai ta hi vote 1006 zeta kan pun belh vang a ni a, kum 2018 inthlana pakhatna leh pahnihna khan pathumna kha tunah hian min beihrawn ta a, tuna Congress-in vote 2486 an hloh tak kha ZPM-ah a kal ta mai niah MNF chuan a ngai.Chuti chung pawhin, kum 2018 inthlan atanga kum hnih chhung leka vote 1006 zeta MNF kan punbelh leh party inlungrualna leh thawhhona tha zawk kan neih phah ta hi MNF chuan lawmawm a tiin hmasawnna ropui takah a ngai a ni.

Bye election-ah hian Congress tlachhe nasa lutuk leh vote tlan darh nasa lutuk chu ZPM lamin an hlawkpui ta a, MNF chuan kan tlinloh phah taah kan ngai a, he inthlan result hian kum 2023 MLA General Election lo awm leh turah Serchhip bialah result duhawm zawk MNF-in a neih theihna tura Pathian remruatah MNF chuan a ngai a ni.

ZPM Party anga MLA Official Candidate hmasa ber leh thlantlin hmasa ber awmchhun, MLA atana lakluh mai tur Pu Lalduhoma hi MNF chuan duhsakna a hlan a, Dan bawhchhiat avanga paihthlaka awm Pu Lalduhoma hi, Serchhip bial mipuiin khawngaihna leh ngaihdamna sang tak hmangin a ban leh a kaizaah dawmkangin a thuthmun ngaiah an thuttir leh dawn ta a, inthlan dawn lai vela a campaign auhlate kha theihnghilh loin Serchhip bial mipui tan a MLA Fund mai bakah, Central lamah Serchhip bial hmasawnna atana sum hnukchhuak ngei turin MNF chuan Serchhip bial tan a beiseipui nghal bawk a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/240
Dt.03.05.2021.

LAWMTHU SAWINA

Mizo National Front
Serchhip Bye Election
Campaign Committee

Dated, Aizawl, 3rd,May,2021

LAWMTHU SAWINA

Nimin khan 26-Serchhip (ST) A/C bye election vote chhiar a ni a, ZPM Official Candidate Pu Lalduhoma chu thlantlin a lo ni ta a, MNF chuan duhsakna kan hlan nghal a. Chief Minister Pu Zoramthanga kaihhruai State ralmuangah inthlanna fel leh thianghlim tak nei a, vote chhiar zawh thlenga buaina leh harsatna a awm lo hi MNF Serchhip Bye Election Campaign Committee chuan lawmawm a ti.

Chutih rualin MNF Official Candidate Pu Vanlalzawma tling zo ta lo erawh MNF Serchhip Bye Election Campaign Committee chuan pawi a ti hle. Amah duhsaka lo vote-tu zawng zawngte bakah, thlantlin a nih theih nana tha leh zung, ngaihtuahna zawng zawng sengtute chungah MNF chuan lawmthu a sawi a, Serchhip bial hmasawnna tura rorel lai candidate ngei thlantlin a ni ta lo hi MNF chuan pawi a ti takzet a ni. Inthlanna felfai leh thianghlim neih theihna tura viltu MPF te, Election buaipuitu Official-te, venhim hnathawktu Police zawng zawngte chungah MNF Serchhip Bye Election Campaign Committee chuan lawmthu a sawi nghal bawk a ni.

Kum 2018 inthlan atanga kum hnih chhung lekah Serchhip biala vote 1006 zeta MNF kan punbelh bakah, party inlungrualna leh thawhhona tha zawk kan neih phah ta te hi MNF chuan lawmawm a tiin hmasawnna ropui takah a ngai a ni. MNF General Headquarters atanga Party hruaitute, ZDF(Zoram Decentralisation Front) atanga theihtawp chhuahtute, MNF Minority Cell hnuaia Gorkha Cell-te leh Serchhip bial chhunga MNF hruaitu Block, Unit leh Frontal-a rim taka thawka theihtawp chhuahtute thawhrah a ni. MNF Serchhip Bye Election Campaign Committee chuan lawmthu a sawi a, kan tling zo ta lo erawh chu Pathian remruatah i pawm thiam ang u.

sd/- (K.VANLALAUVA)
Chairman
Serchhip Bye Election
Campaign Committee
MNF Gen.Hqrs.
Aizawl : Mizoram