Mizo National Front
General Headquarters
Mizoram : Aizawl

Press Release

REMNA NI VAWI 35-NA

Aizawl 28th June, 2021 : June ni 30,2021 hian India leh MNF-in Inremna an ziahfel ni ‘REMNA NI VAWI 35-NA’ champha kan lo thleng leh dawn ta a. Kum dang anga boruak zalen chu nise MNF chuan rampum huapa ropui taka lawm pawh a duh hle a, mahse tun Covid hripui avanga kan in-Lockdown bakah, sorkarin SOP-te siama kan zawm tlan vek a la ngaih rih tlat avangin, tun tum chu kan duh angin huau huau zawnga lawm a rem dawn lo tih kan inhriattir a ni.

Hetiang a lo nih tak siah chuan MNF chuan engmah loa kalliam tir mai a remti lo a. Mahni awmhmun theuh atanga Remna ni vawi 35-na puala hun kan lo hman theuh theih nan TV lamah programme buatsaih a ni dawn a, Sorkar lam atangin Chief Minister zahawm tak Pu Zoramthanga’n Remna Ni thuchah a sawi ang a, MNF atangin party aiawhin Treasurer Pu K.Vanlalauva’n Remna Ni vawi 35-na thuchah a sawi bawk ang. Hei hi ‘Farewell to Arm’ film tihchhuahin a zui chhunzawm dawn a ni.

Chief Minister Pu Zoramthanga’n Rema Ni vawi 35-na puala thuchah a sawi hi AIR FM ZOAWI leh Primary channel-ah dar 7:05 pm-ah ve ve tihchhuah a nih dawn bakah, DDK-ah ni 30.6.2021 dar 5:05 pm-ah tihchhuah a ni dawn a. LPS-ah LPS I channel-ah dar 5:30 pm leh LPS 10-ah dar 7:30 pm-ahte tihchhuah a ni ang a, CM Thuchah sawi hi Zonet chuan Zawlbuk channel-ah ni 30.6.2021 dar 5:30 pm leh dar 9:30 pm-ah tihchhuah a ni ang a, Zonet Bawhbel-ah dar 7:30 pm-ah tihchhuah a ni bawk ang.

Pu K.Vanlalauva MNF Treasurer-in Remna Ni Vawi 35-na thuchah a sawi chu LPS-ah chuan vawihnih, ni 29 & 30.6.2021 zan dar 8:00-ah ve ve LPS 10 Channel-ah tihchhuah a ni dawn a.

Zonet-ah pawh Pu K.Vanlalauva thuchah sawi tho hi vawihnih, ni 29 & 30.6.2021 zan dar 8:00-ah ve ve Bawhbel Channel-ah tihchhuah a ni ang.

Kan nihna dik tak, Mizo i nih theihnghilh lo la, i ram leh hnam humhalh tlatna thinlung pu chungin, mahni awmna hmun theuhah TV-a Remna Ni Vawi 35-na puala thuchah leh film chhuahte hi thinlung taka lo thlir theuh turin mi zawng zawng kan sawm che u a ni.

(LALTHANZUALA HNAMTE)
General Secretary,
Media & Publicity Dept.
Mizo National Front
Memo No.MNF/Media/02/2021/257
Dt.28.6.2021.

Mizo National Front
General Headquarter
Mizoram : Aizawl

Press Release

MNF-IN ADVISER BORAL A SÛN

Dated Aizawl, 27th, June, 2021(Sunday) :- Vawiina kan thlah liam tak Pu C. Lalngaizuala, (83) Venghlui, MNF General Headquarters Adviser ni mek chu, Cancer natna avangin nimin ni 26.06.2021 (2:45 p.m.) khan chatuan ram min pan san ta a. Vawiin ni 27.6.2021 dar 12:00 (noon) khan Venghlui Central Hall-ah vui a ni.

Pu C. Lalngaizuala hi kum 1999 khan Agriculture Joint Director-in a pension a, kum 2010 khan P.C.Party atangin Pu Lalhmingthanga Ex-Minister-te nen MNF an rawn zawm a, Vanapa Hall-ah ropui taka lawmluh an ni a, Adviser-ah ruat a ni. Mizo Hnam Run Chhung Inkhawm-ah hunserh hmang fo thintu a ni a, a chang chuan a bika thusawi tura sawm a ni thin a, a boral thleng hian MNF General Headquarters Adviser a ni. A nupui, fapa 2 leh fanu 2 a kalsan a ni.

A vuinaah hian MNF Party aiawhin MNF Treasurer, Pu K.Vanlalauva’n a ruang chungah pangpar a dah a, thusawina hun a hmang bawk.

MNF chuan Pu C.Lalngaizuala’n min boral san ta mai hi hun lo kan tiin, kan ui takzet a, a kalsan tak a nupui faunaute chu Pathianin thlamuana awmpui zel turin kan duhsak takzet a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/256
Dt.27.06.2021

Mizo National Front
General Headquarters
Mizoram : Aizawl.

Press Release

Thingtlang/Zokhaw mipui, Aizawl khawpui tana luang chhuakte chungah MNF-in lawmthu sawi

Dated, Aizawl, June, 24th, 2021 (Ningani) :- Covid-19 avangin, Mizoram, a bikin AMC huam chhung chu thla hnih chuang zet khauh takin kan inkharkhip tawh a. Aizawl mipuiten kan chawhmeh hrang hrang chawkluhna chu thingtlang/zokhua leh phai lam atangin a ni thin a. Hripui avangin chawhmeh hrang hrang lo lut tur pawh hun rei tak dan chah a lo ni reng tawh bawk. Aizawl mipuiten tuktin/zantin a tel lova kan khawsak theih loh, thlai hnah leh thlai rah chi hrang hrangte chu Total Lockdown vangin hun engemaw chen chu hmuh a lo harsa ta em em a, hmuh theih chhun pawh a let engemaw zatin, man to uchuak tak maia lei a lo ngai ta thin a, Aizawl mipui tan pawh khawsak a harsat phah hle a, tawrh zawh rual a ni ta lo.

Hetih lai hian Mizo Kristian ringtu tha dik tak, zonun zemawi, tlawmngaihna leh midangte tanpui thin, ‘sem sem dam dam ei bil thi thi’ ti a, ‘dam leh tlang khatah, thih leh ruam khatah’ kan piputen an lo tih thin kha, a taka Mizoten kan la vawng nung zel tih hriatna chu thingtlang/zokhaw mipuite atangin a lo lang chhuak ta zawih zawih mai a ni. Hma lam hun thlira sum leh pai an tuak vena tur, an eibel ber leh an dam khawchhuahna tura an innghahna lian ber, nitin a sur a sa hnuaiah thlansa phul kaia kawla ni chhuak chhiarin hah thi kula an lo thawh chhuah thlai hnah leh thlai rah hrang hrangte chu, Aizawl mipui chhuanchhama awm mai turte an lainat avangin, sum leh pai hlawkna awm hauh lova, uilo leh phal tak maia an rawn luan chhuahtir ruih ruih avangin an chungah MNF chu a lawm takzet a ni. Thingtlang lamten Aizawl mipui an hmangaihna avanga an thawhrim rah phur tak maia an rawn luan chhuahtirte chu, Aizawl veng hrang hranga LLTF Duty-te kaltlangin rualkhai takin duhsak leh thliar bik pawh awm lovin a thlawna sem a lo ni ta chur chur hi, an chungah MNF chuan lawmthu a sawi takzet zet a ni.

Mahni Mizo-puite chunga duhsakna, lainatna leh khawngaihna lantirtu thingtlang/zokhaw mite hi a let tam taka hlawkna dawng zel tur leh Pathian malsawmna nasa taka dawng theuh turin MNF chuan a duhsak takzet bawk a ni.

Kan chunga roreltu leh engkim tithei kan Pathian chuan hetiang reng hian min awmtir lo ang a, hripui laka kan thawven hun a la thlentir thuai ang tih hi kan tawngtaina a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/255
Dt.24.06.2021.

Mizo National Front
General Headquarters
Mizoram : Aizawl

Press Release

COVID-19 HRILENG HI MNF SORKAR-IN MIMAL SUM SIAM NAN A HMANG LO. ZPM-TE HIAN DAWT THU HMANGA LAMTANG SIAM TUM HI SIMIN MIPUI HNENAH NGAIHDAM DIL RAWH SE

Dated, Aizawl, 18th June, 2021 (Zirtawpni) :- MNF chuan Mizoram sorkarin COVID-19 dona kawnga hmanraw pawimawh Thermal Camera leh Ambulance a lei chungchanga ZPM Legislature Party-ten dawt thu hmanga Press Release siama an beihna chungchangah hetiang hian Zoram mipui hriat atan thuchhuah kan siam a ni.

ZPM Legislature Party Press Realease No.2021/3 Dated 17th June 2021-a a tarlan, NEC atanga sum dawn, Thermal Camera leh Ambulance pathum lei chungchangah mimal sum siam tumna awm anga diklo taka MNF sorkar a puhna hi keini MNF chuan pawi kan tiin an tizahthlak kan tihpui takzet a. A hmasain ZPM Legislature Party-te hian lalna leh thuneihna chan zawh loh avanga dawt hmanga mipuite thluak suk sak leh, hetiang zawnga lamtang zawn an chin thin hi sim se MNF chuan a duh a ni.

COVID-19 thawhkhatnain Mizoram a lo thlen hma atangin Mizoram sorkar chuan theih ang angin remruatna a lo kalpui tawh a. Mizoram sorkar chuan Lengpui Airport leh sorkar hmun pawimawh bakah Authorised Check Point-ahte a rang thei ang bera buna hman nghal a nih theih nan hmanhmawh takin Thermal Camera lei nan tender pawh a ko nghal a. Quotations hi Firm 3 (pathum)-te hnen atangin dawn a ni bawk.

ZPM Press Release-in a tarlan Thermal Camera pali (4) tih hi Pali ni lovin Panga (5) Indoor Thermal Camera pakhat leh Outdoor Thermal Camera pali, a vaiin Thermal Camera panga lei a ni zawk. Tin, Indoor Thermal Camera kan tih, Hikvision Bullet Thermal camera- Fever detection (DS-2TD1217B-3/PA+ DS-2809ZJ)-in a hmanraw kalpui heng, PoE Switch (Network & Power), Tripod (camera stand), Workstation (Lenovo laptop V145)-te hi Company Rate pangngaiah chuan Rs. 900,000/- lai ni mahse, a aia man tlawmin Thermal Camera pakhat man atan hian Rs.820,050/- sen a ni zawk bawk. Hei bakah hian Outdoor Thermal Camera pakhat man hi Rs. 8,16,550/- zel niin a zavaia sum sen zat chu Rs.40,86,250/- a ni.

Thermal & Optical Bi-Spectrum ngat phei chu India ramah Delhi, Bangalore leh Thiruvananthapuram Airport-te dawtah a nei thei Airport palina kan nih bakah India hmarchhak State zinga Thermal & Optical Bi-spectrum Camera nei hmasa ber kan ni hial a nih kha. Tunah hian Indoor thermal camera pakhat hi Lengpui Airport-ah tangkai taka hman mek a ni a. Outdoor Thermal Camera-te hi Bairabi leh Vairengte-ah tangkai taka hman mek a ni bawk.

Tin, Ambulance chungchang pawh hi hetiang hi thil awmzia a ni. NEC hnuai atang hian Tata Winger Ambulance pathum lei a ni a. Pakhat man hi Rs.15,52,500/- a ni a, a pathum hian Rs. 46,57,500/- sen a ni. Ram pumpuia BS4 tihtawp a nih lai, BS6 hman tan tirh te laia lei a ni a. Heng Motor hi an lian thain Covid patient dinhmun tha vak lo thlenga phur thei tur, thuam phuisui theih tur leh Basic Life Support/ Advanced Life Support dah a ngaih pawha leng thei tura ngaih an ni. Heng ruahmannate hi State Level Task Force kaltlanga Proper Procedure felfai tak nena lei vek a ni. COVID-19 hrileng dona atana Ambulance lei chungchang hi Vehicle Purchase Board, Mizorama State Health Society, Health & Family Welfare Department-in Health Secretary Chairman-na hnuaia 12th May, 2020 (2:00 PM)-a meeting-in a pawmpui niin Thermal Camera hi Task Group on Medicine and Medical Equipment Meeting, Health Secretary Chairman-na hnuaia 13th May, 2020 (1:00PM)-a neihin a pawmpui a ni bawk.
Hri leng dona kawngah Pu Zoramthanga kaihhruai MNF sorkarin Pathian rawn chung zela a ram mipuite himna tura theihtawp a chhuah lai karah, ZPM Legislature Party-ten muangleia mawng hung chunga dawt thu puarpawleng hmanga mipui bumna an la chhakchhuak duh cheu mai hi keini MNF chuan kan dem takzet a. He hrileng hi mahni sahmim tihpuarna hun remchang atana lo hman a malsawm lo tih hi Pathian Leh Kan Ram Tan titu MNF sorkar hian a theihnghilh lo tih hi ZPM-ho hian lo hre tawh rawh se.

Chuvangin, hetiang dawtthu belhchiandawllo hi an pu Duhawma hova tawngvaihpui tawh lo tur leh sorkarna siamtu ram mipuite hnena ngaihdam dil ngei turin MNF chuan a phut tlat a ni.

(R.LALHMANGAIHA)
Secretary
Media & Publicity Dept.
Mizo National Front.
Memo No.MNF/Media/02/2021/254
Dt.18.06.2021.

Mizo National Front
General Headquarters
Mizoram : Aizawl

Press Release

PU L.THANGMAWIA’N COVID 2ND WAVE ATAN LEH 3RD WAVE LO THLENG THUT THEI INBUATSAIHNA ATAN NGOPA CHC MOTOR LEISAK

Aizawl 12th June,2021: Driver-ten him taka Covid veite an phurh theihna tur motor chu Ngopa CHC tan Lengteng bialtu MLA Pu L.Thangmawia’n a leisak.Ngopa CHC motor tur hi “Emergency Health Services” tih hming puttir niin Covid veite lungmuang taka Driver-ten an phurh theih nan a daidanna rintlak leh tha taka siam sak an ni a, vawiin ni 12.6.2021 hian hlan fel an ni a. He motor hi tangkai tak leh tluang taka hman a nih theih nan Rev.Vanlalsawma, Asst.Professor, Missionary Training College chuan tawngtaiin Pathian hnenah a hlan.

Ngopa CHC motor hlanna hun tawite buatsaih a chenna in Mission Vengthlanga neihah thusawiin Pu L.Thangmawia chuan, “Covid 2nd Wave leng mek chuan vanduaithlak takin Lengteng bialchhung a rawn lut a, tunah hian Kawlkulh leh Mimbungahte chuan containment zone-a puan hial ngai laite kan nei ve ta hial a, a chhe ber dawnin khaw dangahte he hri vei lo awmpalh ta ila, kan Medical team-ten an mamawh hmasak berte zinga mi chu Motor a ni. Hetih lai hian Ngopaa damlo phurhna motor hi kum sawm kaltaa lei, long run nana sit awm tak a ni tawh a, hei bakah hian Covid veite ngaihngam taka Driver-ten an phurh theih nana duan a ni lo a ni. Lengteng biala kan CHC neihchhun Ngopa CHC hian, covid 2nd wave mai bakah 3rd wave lo thleng thut thei atana inbuatsaih lawk nan motor fit tak pakhat tal a kawl a ngai a, tin, an motor neihsate pawh a theih anga MLA Fund hmanga repair sak an ni dawn bawk a, Lengteng bial mipuite pawhin MLA Fund kan hmanna hi min pawmpui ngei ka ring a ni,” a ti.

Pu L.Thangmawia chuan, Namenlova Khawvel leh Mizoramin hripui kan do mek laia politics-a hamthatna zawn nana ngaih theiha thiltih awm leh thin chu a tenawm hle tih sawiin, “Mizo mipuite he hripui kan do hneh hma chuan lungrual taka ke kan pen a ngai takzet a. Kei pawhin District Headquarters-a sample test tura kalpui nana thingtlang lam khuate tana a harsat leh hautakzia hriain, May thlatir khan Health Minister zahawm tak Dr.R.Lalthangliana a chenna inah ka hmu a, Ngopa CHC-a Truenat khawl bun theih a nih dawn chuan MLA Fund hmanga Truenat khawl ka lei theih thu ka thlen a. Minister zahawm tak hian mithiamte min zawhfiahsak nghalin a khawl lo leisak pawh ni ta ila, a behbawmah Truenat Lab tur cheibawl that mai bakah hmanraw hrang hrang cheng nuai 40 chuang man lai lei belh a ngaih thu leh Technician a mamawh dante min zawhfiahsak hnuah, henga thil tul dangte ka tihsak vek theih dawn rih loh avangin khawl hi ka lei ta lo a ni. Chuvangin Truenat a ni emaw, RT-PCR khawl a ni emaw, sawrkar hmalak mekna tichak tura lei a nih loh chuan a khawl ringawt ni lovin, a khawlin a kentel zawng zawng tihsak nghal zel ni thei se, chutiang a nih loh chuan sawrkarin a phak tawka theihtawp a chhuahna piah lamah sawrkar lu tihaitu a ni thei zawk a ni, a khawl ringawt lei hi chu Motor inleisak dawna a Engine ringawt inleisak hmasak ang chauh a ni,” a ti bawk.

Pu L.Thangmawia chuan, “Hun harsa kan tawh laia Lengteng bial nula/tlangval 12 zette covid ral hmatawnga thawk tura an in-volunteer hi an chhuanawm hle a. Containment zone-a awm mekte tana Lengteng bial khaw hrang hrangte luanchhuahna hian min tilawm hle a. Covid donaa ral hmatawnga thawk mek (Frontline Worker) te, Manipur leh Myanmar ramria duty te, VLTF, Kohhran leh tlawmngai pawlte thawhrimna zawng zawngah lawmthu ka sawi a. He hripui donaah mihring lama kan tih theih tawk kan ti chungin, kan tih theih bakah he hripuiin min kiansan theih nan Pathian i au chhunzawm zel ang u,” a ti bawk.

Motor hlanna hun tawite buatsaih hi Mission Vengthlang LLTF-te leh MNF Gen.Hqrs hruaitu thenkhatten an tawiawm a ni.

(B.LALHMANGAIHZUALA)
Joint Secretary
Media & Publicity Dept.
Mizo National Front
Memo No.MNF/Media/02/2021/252
Dt.12.06.2021.

Mizo National Front
General Headquarters
Mizoram : Aizawl

Press Release

PU RUATKIMA’N A BIAL LLTF-AH ₹100000/- ṬHEUH LEH PPE HLAN

Vawiin Dt 10.6.2021 hian Pu Lalruatkima Minister chuan a bial Aizawl West II veng hrang hrang LLTF-te a tlawh. Minister hian a bial veng hrang hrang – Tuikual South, Tuikual North, Dinthar, Dawrpui Vengthar, Vaivakawn leh Kanan-ah te ₹1,00,000/- (nuai khat) leh PPE 10 ṭheuh a pe a ni. LLTF-te an.lawm hle. Pu RKA hian a hmain veng hrang hrang LLTF-te hnenah hian ₹110000/- (nuai khat leh sing khat) a lo sem tawh bawk.

Pu Ruatkima chuan thusawiin, “Khawvelin hun thim tak a tawk mek a. Khawvel kan buai mek a ni. He hun thim kan hmachhawn mek lai hian chhuanchham an awm ang tih hi sorkar chuan a hlau tak zet a ni. ‘Sem sem dam dam, eibil thi thi’ tih hi kan thupui ber ni zel rawh se,” a ti a. “Thingtlang lam kan unaute dinhmun a leh a lingin a zia deuh em aw, a tih theih a. Khawpui lamah chawhmeh tam tak an rawn thawn chur chur a, a ropui hle. Thingtlang lamah chuan hna an thawk thei a, ni 100 inhlawhna kan hmu ṭha em em a, a lawmawm takzet a ni,” a ti bawk.

Pu RKA chuan, “Kohhran, Sorkar leh tlawmngai pawl kan ṭangrual ṭha hle hi a lawmawm takzet a. LLTF/VLTF-te pawhin hma kan la ṭha thawkhatin ka hria a, hri dona kawngah hian Kohhran a inhawng nasa em em a, a lawmawm takzet a ni,” a ti.

Minister chuan, “Insawisel mai lovin, kan theihtawp chhuah ila, mawhphurhna nei lo pawhin ina tawm tlat hi kan mawhphurhna a ni tih hria ila a ṭha hle a ni. LLTF/VLTF-te tha tiṭhum zawnga social media thu a awm ṭhin hi a pawi ka ti hle. Insawisel kawngah hian insum deuh a ṭha em aw, chu ai chuan a ṭha lama infuihna hi ri tam se a duhawm hle,” a ti bawk.

Bialtu MLA/Minister Pu Lalruatkima hi AMC Ward No.VIII Councillor Pu Lalfakzuala Chenkual leh MNF Block hruaituten an tawiawm a ni.

(LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/02/2021/251
Dt.10.06.2021.

Mizo National Front
General Headquarters
Mizoram : Aizawl

Press Release

COVID HRIPUI LENG KARAH PAWH SORKAR HI DEVELOPMENT HNATHAWHAH A THUTHLUANG MAI TUR A NI LO

Aizawl 7th June,2021 : Khawvel pumhuapin Covid 19 hripui a leng a, ram zawng zawng a tibuai a, harsatna namenlo a thlen mek a ni. Mizoram pawh he hripui hian min tuam mek a, sorkarin hripui dan chah tumin nasa taka insengsoin a bei mek a, kan in-Lockdown mek a ni.

Tunlai kan Lockdown boruak karah pawl thenkhat leh mi thenkhatten, sorkarin ram hmasawnna tura a hmalakna tihthuanawp tuma sawisawpin, a beidawng zawnga mipuite zirtirna thu an thehdarh chiam chiam a. Development Board-te thiat vek mai tur tih te, kan Subordinate Service Board (MSSSB) thiat mai tur tih te, raw chi supply tender pawh thiata tihtawp vek mai tur tih te, hmanna tur bik awm thil danga hman thianglo pawhpen theih loh han che hlek ti lo tura inkhapbeh tumna te leh sorkar che thei loa siam tum ang hrima a eng akima tihmualpho tumna ang hrima thu thehdarh a tam ta hle.

Hemi chungchangah hian hripui leng karah pawh nise, kan ram roreltu sorkar chuan hripui do hneh dan tur pawh a ngaihtuah ang a, a remchang thei apiangah ram development hna pawh a thawk tel zel tur a ni tih hi MNF ngaidan a ni. Fur ruah sur laia thingtuah tur neih tlem avanga kaiten leh sumhmunte thiata thingtuah atana hman mai rawttu leh buh chi tuh tura lo-a feh loh mai rawttute ang mai kan lo ni thei tih i inhria ang u.

State dangte pawhin harsatna karah a theih ang anga thawkin an bei hram hram tih hria ila, Sorkar laipui pawhin a theih ang ang hmasawnna hna thawh zel tumin hma a la hram hram zel a ni tih pawh hre bawk ila, thenawm ramte mithmuhah beidawng hmel kan put loh nan ngaihtuahna puitling tak nen inlungrualin hma i la zel zawk ang u. Covid hripui leng karah pawh Sorkar hi Development hnathawhah a thuthluang mai tur a ni lo tih hi MNF ngaidan a ni.

(LALTHANZUALA HNAMTE)
General Secretary
Media & Publicity Dept.
Mizo National Front
Memo No.MNF/Media/02/2021/249
Dt.07.06.2021.

Mizo National Front
General Headquarters
Mizoram : Aizawl

Press Release

HSLC RESULT FELFAI TAKA A CHHUAK A LAWMAWM

Mizoram Board of School Education (MBSE)-in High School Leaving Certificate (HSLC) 2021 result felfai tak a tichhuak thei hi MNF chuan lawmawm a ti hle a. Education Minister Pu Lalchhandama Ralte leh MBSE thawktute thawhrimnaah MNF chuan lawmthu a sawi a ni.

Covid 19 hripui leng karah India ram pum ang pawha state dang tam takin Exam an buatsaih theih loh lai leh result pawh nei mumal thei loa zirlai naupang leh an nu leh pate nasa taka an buai laia HSLC Result felfai tak kan nei thei hi a ropui a, Education Minister leh MBSE-a a thawhpuite hian chawimawi an phu hle.

Khawvelin hripui avanga hun harsa tak a tawhna kara HSLC Exam ṭha taka huaihawt thei a ni leh, Result felfai taka tihchhuah a ni ta hi Education Minister chak tak Pu Lalchhandama Ralte leh a team-te fakawm kan tiin kan lawmpui tak zet a ni.

Zirlai hlawhtlinna chang zawng zawngte thinlung takin kan lawmpui a. Hlawhtlinna chang ve rih lo zirlaite pawh rim lehzuala thawka beidawng lova hlawhtling ve ngei tura bei turin kan duhsak bawk a ni.

(LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/02/2021/248
Dt.3.05.2021.