Kan ram leh khawtlangin harsatna a tawhlai hian kan bulah miharsa zawk khaichhuah ngai an awm em tih ngun lehzualin i thlir ang u .

Mizo National Front
General Headquarters
Mizoram : Aizawl

PRESS RELEASE

Kan ram leh khawtlangin harsatna a tawhlai hian kan bulah miharsa zawk khaichhuah ngai an awm em tih ngun lehzualin i thlir ang u .

  • Lalchhandama Ralte, Minister

29th July, 2021 : School Education Minister leh Tuivawl bialtu MLA ni bawk Pu Lalchhandama Ralte chuan a bial chhung khaw hrang hranga Covid-19 hmuhchhuah belh zel a nih avangin mipui harsatna leh thlaphannate a hmun ngeia zirchiang tur leh a harsatnate enpui turin vawiin July ni 29 hian Tuivawl bial chhunga Covid-19 vei tam zualna Sakawrdai, Vaitin, Khawpuar leh Thingsat khuate tlawhin a kal a. Khawtlang hruaitu, Village Level Task Force (VLTF)-te nen khawtlanga hripui darh zel vendan tur leh inbuatsaihna hrang hrangte thlirin sawihona hun an nei nghal zel a ni.

Tuivawl bial chhung khaw hrang hrang a tlawhnaah hian Pu Chhantea chuan, “Kan beisei loh piah lamah khawvela hripui leng chuan kan bial chhung a rawn luhchilh ve ta zel a, ka bial mipuite in rilru a mangang tih ka hria a, in harsatna ţawmpui turin in kiangah ka awm reng dawn a ni. Covid-19 avanga harsatna kan tawh hi inrahbehtir lo ila, he harsatna hian kan khawtlang nunah inhmangaihna rawn parchhuahtir se tih hi ka duhthusam a ni”, a ti.

School Education Minister Pu Lalchhandama Ralte chuan, Engkim chunga thuneitu Pathian chakna rinchhan tlat tura a bial mipuite chahin, Mizoram sorkar pawhin Tuivawl bial mipuite tan a tih theihtawk a chhuahzel dawn thu a sawi a. Mipuite pawhin sorkarin kan himna tura inkaihhruaina hrang hrang a siamte chu thuawih taka lo zawm zel turin a ngen bawk a ni.

Pu Chhantea chuan, “Chief Minister Pu Zoramthanga kaihhruaina hnuaiah sorkar chuan hripui leng reh theihna tura theihtawp a chhuah mek laiin beisei loh piah lamah Mizoram chuan ramri chungchanga harsatna kan ţhenawm state Assam hnen aţangin kan nei chho leh ta zel a, ram mipuite’n ei leh bar chungchangah harsatna kan lo tawk deuh a nih pawhin Mizoram tan kan tawrhnaah ngaiin reilote chhung chu Mizo mipuite chhel taka awm turin ka ngen che u a ni,” a ti a. “Kan khawtlang leh ramin harsatna a tawh lai hian kan bulah miharsa zawk khaichhuah ngai an awm em tih ngun lehzuala kan thlir a ngai a ni,” a ti bawk.

Tuivawl bial chhunga Covid-19 positive tam zualna khaw pali (4) Sakawrdai, Vaitin, Khawpuar leh Thingsat khaw mipuite chu Pu Chhantea hian August thla chhunga Ration Buhfai a thlawna an dawn turin a khulsak dawn a. Hei bakah hian tualchhunga Nurse leh Health worker training chhuak volunteer-a inpe mi 8-te chu lawmman a tumsak tur thu a sawi bawk a ni.

Tuivawl bial chhung khaw hrang hrang a tlawhnaah hian Pu Chhantea chuan VLTF hruaitute hnenah sumfai ţhahnem tak, Handsanitizer leh Facemask, PPE set leh Damdawi ţhahnem tak khawtlang mipuite hnena sem turin a hlan bawk a ni.

(B.LALHMANGAIHZUALA)
Joint Secretary,
Media & Publicity Dept.
Mizo National Front
Memo No.MNF/Media/02/2021/268
Dt.29.7.2021.

MIZORAM SORKARIN ASSAM SORKAR CHÊT DAN NA TAKA A DEM TE, VAIRENGTE MIPUI LEH MIZORAM SORKAR CHÊT DAN LÂWMAWM KAN TI

Mizo National Front
General Headquarters
Mizoram : Aizawl

Press Release

MIZORAM SORKARIN ASSAM SORKAR CHET DAN NA TAKA A DEM TE, VAIRENGTE MIPUI LEH MIZORAM SORKAR CHET DAN LAWMAWM KAN TI

Dated, Aizawl, 27th, July, 2021 (Thawhlehni) :- Mizo National Front (MNF) chuan nimin July ni 26th 2021(Thawhtanni)-a kan ram chhung, Mizoram Police Duty Post, Vairengte Dai thlenga dan lova lo luta Central sorkarin Mizoram lama ramri veng tura a rawn dahte awmna, Mizoramin an awmna tur a sakte rawn luahluia Mizoram chhunga duty post rawn sak ve ringawt tuma Assam Police-te rawn chet dan chu thinur thlak a tiin na takin a dem a. Hetih lai hian mahni ram chhan nana huaisen taka hmelmate lo hmachhawntu Mizo pasaltha – Mizoram Police-te leh Vairengte mipui chet dan chu MNF chuan lawmawm a tiin chhuanawm a ti takzet a. Huaisen tak leh fing taka ralreltu Mizoram Chief Minister Pu Zoramthanga leh Home Minister Pu Lalchamliana-te hmalakna chu lawmawm a tiin MNF chuan a chhuang em em bawk a ni. Kum 20 zet rammu-a India pawh lo do ngam tawh Pu Zoramthanga kaihhruai MNF sorkar hi Mizoram sorkar kan hrawn tawh zawng zawngah ramri chungchanga hma la thui ngam ber leh huai ber, la kal thui ber a ni hi MNF chuan thlamuanthlak a ti hle bawk a ni.

Assam sorkar hian Mizoram nena ramri tihbuai a nei ang bawkin, hmarchhak State dang Meghalaya, Nagaland leh Arunachal Pradesh-te nen pawh ramri buai an nei mek bawk a, hetih lai hian Mizoram ramri bik hian tihbuai a tawk fo a, Assam sorkar chu kan ramriah buaina rawn siam fo tawh lo turin MNF chuan a duh hle a ni tih hi Assam sorkar leh Assam Police-te hian lo hre tawh rawh se.

He ramri buai enfiah turin nimin ni 26.7.2021 khan Minister pahnih Pu Lalruatkima leh Pu Lalchhandama Ralte bakah, bialtu MLA Pu Lalrinsanga Ralte-te chu Chief Minister ruahman angin Vairengteah an chhukthla nghal a, tukin khan Home Minister Pu Lalchamliana leh Sports Minister Pu Robert Romawia Roy-te chu Vairengte panin an chhuk thla leh tawh bawk a; MLA pahnih Dr.K.Pachhunga leh Er.H.Lalzirliana-te an chhukthla bawk. Kan sorkar lama hotuten a hmun ngeia kalchilha mipuite an zuk thlamuan hi lawmawm kan ti a, a thlamuanthlak kan ti hle bawk.

Ramri buai chungchang hi NGO hrang hrangte leh Political party-te pawh Party party sawi lo leh pawl leh mimal thangthat lo lak tum nana hman lo tum lo turin kan inngen a. Kohhrante thlengin pheikhai rual taka sorkar tha tichaka tangho turin MNF chuan kan ngenin kan sawm takzet a. Hetih lai vek hian tute mahin mahni duhthu leh rin thu te, thubelhchiandawllo leh rampawn mite laka Mizote hmai tibal thei leh tihmingchhe thei thu leh videoclip-te pawh thehdarh lo turin MNF chuan mitinte a ngen nghal bawk a ni.

(R.LALHMANGAIHA)
Secretary,
Media & Publicity Dept.
Mizo National Front
Memo No.MNF/Media/02/267
27.07.2021.

Press Handout

Mizo National Front
General Headquarters
Mizoram : Aizaw

Press Handout

1.Vawin Dt 27/7/2021 (Tuesday) chhuna Pu Tawnluia Sr Vice President MNF Party, Dy CM ni bawk hoa MNF Party hruaitute, MNF National Core Committee, MNF Political Affairs Committee, Speaker, Minister leh Dy Speaker thukhawm chuan ni 26/7/2021-a Assam Police-hoin Vairengtea IR Camp te, India Force CRP Camp te Palzut hnua , an rawn bei thut a, rawn laa Vairengte Auto Rickshaw Stand lo lut zel a, Mipuite kut an thlak leh silai an hmet puak hmasa kha kan dem tak zet a ni.

2. Kan CM zahawm takin kan ram humhalhna atana hma a laknate hi fakawm kan ti a. Home Minister-in puitling taka hma a laknate hi kan fak a, kan ram humhalhna tura Vairengte mipui, Pawl hrang hrangte leh Mizoram Ramria khaw awm zawng zawng mipuite inpekna hi a ropuiin kan fak takzet a ni. Mizoram Police-te Ram tana an huaisenna leh inpekna kan hriatin a ropui kan ti takzet a, an camp ngaia an awm leh thei hi chhuanawm kan ti takzet a ni.

3.Keini MNF-te chuan Pathianin Kan Ram atana min pek hi Pathian hmachhuanin humhim zel hi kan tum tlat a ni.

4.”Kan Ram humhim nan hian Zoram Mipuite theih tawpin I tangrual zel ang u” tiin MNF chuan Mizoram mipuite kan sawm e.


Issued by Media & Publicity Department, MNF General Headquarters,
Mizoram : Aizawl.
Dt.27.7.2021.

COVID CASE PUN ZÊL VANGIN 4C DINNA TUR NGAIHTUAHIN LUNGLEI ‘N’ MLA CHE CHHUAK

Mizo National Front
General Headquarters
Mizoram : Aizawl

Press Release

COVID CASE PUN ZEL VANGIN 4C DINNA TUR NGAIHTUAHIN LUNGLEI ‘N’ MLA CHE CHHUAK

Dated, Aizawl, 22nd, July, 2021(Ningani) :- Mizoram Youth Commission Chairman Dr.Vanlaltanpuia, Lunglei North bialtu MLA chu a bial chhung Mausen khua In 60 vel chauhah Covid Positive Case-11 leh Haulawngah mi 2 an hmuh chhuah thar avangin, he chanchin a hriat rual rualin 4C dinna ngaihtuahsakin a tlan phei nghal a, nizan zanlai khan Aizawl a lo thleng leh a ni.

Dr.Vanlaltanpuia hian Mausen-ah Oxygen Concentrator, Pulse Oximeters, Disinfectants, PPE Set-9, Digital Thermometers, Silpauline- 5, Thosilen-20, Vitamin C, Hand Sainitizer thahnem tak, ORS tam tak, Gloves & Face Mask thahnem tak leh Rs.10000/- (cheng singkhat) pe nghalin, Haulawng-ah Oxygen Concentrator-1, Pulse Oxymeter-1, Silpauline-2, Thosilen-50, Ragt Test Kid-1 box, Malaria Test Kit-1 box, PPE Set-5, Digital Thermometer-1 a pe nghal bawk a ni.

Bialtu MLA hian Pukpui khuaah 4C (CCCC) dinna turin Rs 50000/-, (cheng singnga) PPE Sets 20 Nos. Oxygen Concentrator, Spraying Guns, Disinfectants, Pulse Oxymeters thahnem tak a pe tawh bawk a. Lunglei Zotlanga 4C dinna turin Rs.10000/-, (cheng singkhat) PPE sets, Disinfectants, Syntex Water Tanks, Disinfectants and Sprayingin Guns thahnem tak a lo pe tawh bawk a ni.Tunah hian Pukpuiah Covid Positive Case -40 vel, Zotlangah -2 , Haulawngah-2, leh Mausenah case 11 vel an nei mek a ni.

Mizoram Youth Commission Chairman hian a bial khaw thenkhat heng – Mualthuam ‘N’, Serkawn, Chhipphir, Zote ‘S’-ahte African Swine Fever (ASF) leng avangin Vawk an thi nasa tawh hle mai a. Mualthuamah ringawt pawh Vawk 300 chuang a thi tawh a ni. Vawk damlote enkawl nan Sodium Hypochloride, Pottasium Permanganate, Hand Gloves engemaw zat leh Face masks thahnem tak a lo pe tawh a. Vawk thite senghawi leh phum bona turin khawtlang hruaitute hnenah sum fai a pe bawk a ni.

Heng hmunahte hian bialtu MLA chuan thusawiin, “Hun khirh ber lai pawhin harsatna kan tawh hi a lum chinah leh him chin atanga thlir ringawt hi tha ka ti lova, a hmunah ngei mipui harsatna en theia ka awm hi ka lawm em em a, en zel pawh ka tum a ni. Hun khirh ber lai pawhin mipui tan ka ding zel ang. Tling lo tak chung pawhin mi retheite ban phak MLA nih hi ka thil tum leh duh ber a ni a. Ram mipuiin harsatna an tawh laia a dotu leh dawmkang vetu turte zingah Pathianin min dah hi ropui ka tiin ka lawm takzet a ni. Heng hun khirh lai hian tumah chhuanchhama awm kan phal lova, a mamawh apiang chu bialtu MLA hnenah rawn inhriattir ula, kan ngaihtuah zel ang,” a ti a ni.

Heng hmuna mipui leh VLTF Duty-te chuan hun harsat lai ber pawha a hmun ngeia ngaihsaka an mamawh hrang hrangte pe thintu bialtu MLA chu thlamuanpuiawm an ti a, chhuanawm an tiin a chungah lawmthu an lo sawi mawlh mawlh a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/266
Dt.22.07.2021

AIZAWL SOUTH III BIALTU MLA-IN COVID-19 DONA LEH VAWK HRILÊNG DONA ATAN A BIALAH ṬANPUINA PE CHHUNZAWM ZÊL

Mizo National Front
General Headquarters
Mizoram : Aizawl

Press Release

AIZAWL SOUTH III BIALTU MLA-IN COVID-19 DONA LEH VAWK HRILENG DONA ATAN A BIALAH TANPUINA PE CHHUNZAWM ZEL

Dated Aizawl, 21st, July, 2021 (Nilaini) :- Aizawl South III Bialtu MLA Prof.F.Lalnunmawia chuan a bial chhunga Covid-19 positive vei awmna veng leh khuate bakah 4C awmna hmunte chu tun hnai khan tanpuina leh chhawmdawlna hrang hrang a la pek chhunzawm zel a, a hnuaia thilpek hrang hrangte hi nizan thleng khan a la pe a ni : –

  1. Sateek VLTF: Sanitizer, Facemasks, Handgloves, Vitamins leh Rs 5000/-
  2. Falkawn 4C/VLTF : BP Instrument, Thermometer, Sanitizer, Facemasks, Handgloves, 4C-a awmte ei leh in tur Buhfai, Dal, Alu etc leh Rs 5000/-
  3. Melriat 4C/VLTF : BP Instrument, Oxymeter, PPE set 5, Sanitizer, Facemasks, Handgloves, pawisa fai Rs 5000/-
  4. Saikhamakawn LLTF : Rs 20,000/-
  5. Melthum 4C/ LLTF : Rs 20,000/-
  6. Hlimen 4C/LLTF: Rs 30,000/-

Prof.F.Lalnunmawia hian a bial chhungah chak takin Health Department hnuaia thawktuten vaccine an pe mek a, Aibawk PHC hnuaia Vaccination Team-te hman turin Sanitizer, Mask, Gloves ṭhahnem tak leh pawisa pawh a lo pe tawh bawk a ni.

Aizawl South III Bialtu MLA hian a bial chhunga VLTF/LLTF-te chu hripui donaah tha thlah loa an thawhrimnaah lawmthu a sawi a; chutih rualin Covid19 hri len vanglaia an bial chhunga Vawkpul hri ASF an tuar leh hemi laka inven nana theihtawp an chhuah chunga Vawk tam tak an thi leh chhungkaw tam takin sum tak tak an chan phah chu pawi a tih takzet thu a sawi bawk a ni.

Prof.F.Lalnunmawia hian a bial chhung khaw tina vawk hrileng (ASF) laka an him theih nan hmanraw chi hrang hrang Sodium Hypochlorite, Tuisen, Bleaching, Gloves, Mask-te chu a bial khawtinah a lo pe tawh bawk a ni. Covid 19 leh ASF hrilengten a bial an luhchilh ve takah chuan theihtawp chhuahin heng hri lengte donaah hian tha thlah lova theihtawp chhuah chhunzawm zel turin bial mipuite a sawm a, sorkar inkaihhruainate zawm ṭheuh turin a ngen nghal bawk. Bialtu MLA hmalakna chu bial mipui leh VLTF/LLTF-te chuan thlamuanthlak an tiin an lawmzia thu an sawi bawk a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/265
Dt.21.07.2021

PU K.VANLALVENA, MP(RAJYA SABHA-IN VAIRENGTE, PHAINUAM, SAIHAPUI V LEH BUARCHÊP A TLAWH

Press Release

PU K.VANLALVENA, MP(RAJYA SABHA-IN VAIRENGTE, PHAINUAM, SAIHAPUI V LEH BUARCHEP A TLAWH

 

Vawiin July ni 12, 2021(Thawhtanni) hian Assam Police leh Assam mipuiten Mizoram chuha min rawn nek buaina hmun leh buaina an siam fona Vairengte, Phainuam, Saihapui V leh Buarchep chu Pu K.Vanlalvena MP(Rajya Sabha) chuan tlawhin thil awm dante a enfiah a, Mizoram Police leh mipui thlamuan tura kal a ni.

Pu K.Vanlalvena chuan heng hmunahte hian thusawiin, “Nimin khan CM hovin kan meeting a, Aitlang a ni emaw, Buarchep a ni emaw, henglai vela inkalpawhna kawng siamthat ngai awmte chu ngaih pawimawh hmasak tur an nih thu rel a ni a. Tuna mamawh hmasa Police Camp-te pawh Silpauline chauh ni lo, rangva leh hmanraw tha zawka cheibawl thuai tum a ni. Thlam inhalsak, huan thlai intihchhiatsak hi keini Mizote chuan kan ti ve ngai lo a. Assam-ho awm mai mai hi an engmah kan tihchhiat sak ve lo, Pathian leh mihring mit hmuhah te, khawvel mit hmuhah pawh thiam kan chang a ni. Niminah pawh CM-hovin kan pass a, helai buainaah hian sorkar a tawlh ngai lo ang. Ram leh hnam chhan tur hian tam leh tlem lam a ni lo va, Mizo pahnih hian a tawp khawkah chuan vai 40 kan ngam a ni. Tun thlengin Hnam huaisen kan nihna hi a la bo lo, tunah hian inkah rup rup lam ka sawi lo a, Assam-ho hian min rawn tihbuai ngam leh tawh lohna turin kan inbuatsaih a, hei hi mi va cho leh vauna erawh a ni lo, tuna an inkulh rihnaah hian awm rengtir kan tum lo,” a ti.

Henglai hmuna Police Duty-te leh khawtlang hruaitute hnenah phai khawlum karah ram leh hnam hmangaihna avanga duty-te chungah lawmthu a sawi a. Duty-te hian Mobile Phone Signal chhiat thu te, kawng leh electric lama an harsatnate lo hrilhin theihtawp a chhuahpui tur thu a hrilh a ni. MP hian Buarchep, Phainuama Police Duty-te inkulhna turin Silpauline engemaw zat a pe a . Heng lai hmuna khawtlang duty-te thingpui inna tur pawisa a pe bawk a ni.

MP Pu K.Vanlalvena hi Pu David J.Byhmadadlai, Adll.SP, Kolasib, Pu K.Lalrinmawia Asst.Commandant, PTS, Pu Lalmuanpuia Magistrate, S.O.Kolasib, Vairengte MNF Block hruaitute, Phainuam VC, Vairengte Sub-Hqrs.hruaituten lo dawngsawngin, MNF General Headquarters atangin hruaitu engemaw zatin an tawiawm bawk a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/264
Dt.12.07.2021

PU LALDENGA THLANAH MNF HRUATUTE LEH MINISTER-TEN PANGPAR AN DAH

Mizo National Front
General Headquarters
Mizoram : Aizawl

Press Release

PU LALDENGA THLANAH MNF HRUATUTE LEH MINISTER-TEN PANGPAR AN DAH

Vawiin ni 07.07.2021 Nilaini hi MNF Founder/President/Mizo Hnam Pa Pu Laldenga (1927-1990) thih champha vawi 31-na a ni a, zing dar 7-ah khan MNF party hruaitute, Pi Biakdiki W/o Pu Laldenga leh Minister-ten a thlanah urhsun taka zahna leh chibai bukna pangpar dahna hun an hmang.

MNF Founder/President/,Mizo Hnam Pa Pu Laldenga (L) thlan, Treasury Square, Aizawlah hian MNF Elected Office Bearers – Pu Zoramthanga, President; Pu Tawnluia, Senior Vice President; Pu Lalthlengliana, Vice President; Pu Vanlalzawma, Vice President; Pu K.Vanlalauva, Treasurer; MNF National Core Committee members, Pi Biakdiki, W/o Pu Laldenga (L) leh Minister-ten pangpar an dah a. A hranpaa programme siam a nih loh avangin zahna leh chibai bukna pangpar urhsun taka dah tawpin hun hman a ni.

Mizotea Mizo Nationalism chinung tuhtu, titiaka tithangliantu Mizo Hnam Pa Pu Laldenga hi July 11, 1927-ah Lunglei Pukpui khuaah a lo piang a, kum 1944-ah British Indian Army a zawm. Kum 1959-ah Mizo National Famine Front chu a hoa din niin, chu pawl chu October 22, 1961-ah Mizo National Front (MNF) tiin thlak a ni. He a pawl din Mizo National Front-ah hian a thihni thlengin President dinhmun a chelh a ni.

Pu Laldenga hi kum 1986 khan Mizoram sorkar lailawk (interim)-ah Chief Minister a ni a, kum 1987-a Mizoram state Assembly inthlan hmasa berah Sateek leh Aizawl North-II bial aṭanga thlantlin a ni a, state nih hnua Chief Minister hmasa ber a ni.

Kum 1990 khan Cancer a nih hriatchhuah a ni a, Memorial Sloan Kettering Cancer Centre, USA-ah thla thum enkawl a nih hnuin Mizoram pana an rawn haw kawng Ashford Hospital, London-ah July 7, 1990, India sanaa tlai dar 2:30-ah a thi a ni.

Pu Denga ruang hi July 11, 1990 tlai dar 4:30-ah Tuirial Airfield-ah helicopter-in rawn phurh thlen a ni a, July 13-ah ropui taka vui liam niin, Mizote zinga state funeral-a vui awmchhun a la ni.

(LALTHANZUALA HNAMTE)
General Secretary,
Media & Publicity Dept.
Mizo National Front
Memo No.MNF/Media/02/2021/262
Dt.07.07.2021.

MP (RS)-IN BAIRABI TO SAIRANG RAIL KAWNG HNATHAWH MÊK TLAWH

Mizo National Front
General Headquarters
Mizoram : Aizawl

MP (RS)-IN BAIRABI TO SAIRANG RAIL KAWNG HNATHAWH MEK TLAWH

Press Release

 

Aizawl, 7th, July, 2021(Nilaini) :- Pu K.Vanlalvena, Mizoram MP (Rajya Sabha) chuan vawiin hian Bairabi to Sairang Rail kawng hnathawh chu a hmunah kalchilhin a enfiah a. Khamrang kawnga Bridge No 115 te, Khamrang Railway Station tur te, Bridge No 161 & 167 te, Bridge No 196 Toll Bridge (Kurung) leh Sairang Station Yards-te a en nghal bawk a ni. Hei bakah hian Lei verhna hmunpui hmun li-ah a tlawh bawk. He hnathawh hi a thui zawng chu km 51.38 a ni a, a Project Cost hi cheng vbc 6000 vel a zawh nan beisei a ni, cheng vbc 3900 vel hman zawh tawh niin cheng vbc 2100 vel la hman loh a awm a ni. December 2023-ah thawh zawh hman tura ruahman a ni. Tunah hian hna hi 58% thawh zawh tawh niin 42% thawh la hmabak a ni. Kumin 2021-2022-ah hian Vbc 1000 Union Budget-ah dah belh a ni bawk. MP chuan he hna hi thawh hun chhung tura ruahman December 2023 chhung ngeia tha taka zo hman ngei turin Railway hotute leh thawktute a chah a ni.

MP(RS) hi Dy.Chief Engineer Harjimalanee, Project Manager Bragen Das leh Railway Executive Engineer pathumten lo dawngsawngin, Pu Hrangtawna IRTS (Rtd), Consultation, Govt.of Mizoram Railway leh MNF General Headquarters hruaituten an tawiawm a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/263
07.07.2021

MIZO HNAM PA PU LALDENGA THLANAH MNF ELECTED O.B. 5, PI BIAKDIKI, MNF HRUAITU,SPEAKER, DY.SPEAKER LEH MINISTER-TEN A THLANAH PANGPAR AN DAH DAWN

Mizo National Front
General Headquarters
Mizoram : Aizawl

Press Release

MIZO HNAM PA PU LALDENGA THLANAH MNF ELECTED O.B. 5, PI BIAKDIKI, MNF HRUAITU,SPEAKER, DY.SPEAKER LEH MINISTER-TEN A THLANAH PANGPAR AN DAH DAWN

Aizawl 5th July, 2021:
Ni 7.7.2021(Nilaini) hi MNF Founder/President/Mizo Hnam Pa Pu Laldenga thih champha vawi 31-na a ni a, he hun pawimawh tak lo thleng tur hi MNF hruaitute chuan urhsun takin an ngaihtuah a, Pu Laldenga nupui Pi Biakdiki leh an chhungkua pawh berawnin, tun tum chu Covid hripui leng mek avang leh Sorkarin SOP a siam zawm ngei ngai a awm bawk si avangin Pu Laldenga thih champha hi a hranpaa programme siama hun hman ni lo mai se an ti a. Zing dar 7:00-ah Pu Laldenga thlanah MNF Elected Office Bearers 5, Pu Denga nupui Pi Biakdiki, National Core Committee (NCC), Political Affairs Committee(PAC), Speaker,Dy.Speaker, Ministers leh Minister of State-te a remchang apiangin zahna leh chibai bukna pangpar an dah dawn a ni. A bak mimala dah duhte tan chuan SOP zawm chungin mahni remchan dan azirin chhun lamah dah ve ni ta mai se tih a ni . Hei hi Pu Denga nupui Pi Biakdiki leh an chhungkua paw’n lung dam takin an pawmpui thlap a, programme hranpa siama hun hman loh mai hi tha an tihpui a ni.

MNF Founder/President/Mizo Hnam Pa Pu Laldenga thih champha vawi 31-na lo thleng turah hian MNF chuan Mizotea Mizo Nationlism chinung tuhtu leh titiaktu Pu Laldenga chu a ngaihluin, ngaihtuahna thinlung chhungrilah a thar leh em em a ni tih kan puangzar nghal bawk a ni. Hun zalen, remchang nise urhsun leh ropui taka amah hriatrengna leh zahna ropui taka hun hman kan duh hle a, Covid hripui lengin tithei loa min bumro hi pawi kan ti. Nikumah pawh khan Lockdown avang bawkin hun hman theih a ni tawh lo bawk a, a thlanah erawh chuan amah zahna leh chibai bukna pangpar dahna hun chauh neih a lo ni tawh bawk a ni.

Pu Laldeng hi kum 1990 khan cancer natna a nei tih hriatchhuah a ni a, Memorial Sloan Kettering Cancer Centre, USA-ah thla thum chhung enkawl a nih hnuah, Mizoram pana an rawn haw kawngah Ashford Hospital, London-ah July ni 7, 1990 tlai dar 2:30 khan a thi a. Pu Denga ruang hi helicopter-in dar 4:30-ah Tuirial Airfield rawn phurh thlen a ni a, July ni 13,1990-ah ropui taka vui liam a ni.

(LALTHANZUALA HNAMTE)
General Secretary,
Media & Publicity Dept.
Mizo National Front
Memo No.MNF/Media/02/2021/261
Dt.05.07.2021.

Covid do dan tur chungchang ngaihtuaha kan zavai huap meeting kotu sorkar a fakawm

Mizo National Front
General Headquarters
Mizoram : Aizawl

Press Release

Covid do dan tur chungchang ngaihtuaha kan zavai huap meeting kotu sorkar a fakawm

Aizawl 3rd July, 2021:
Sorkar lam aiawh tel awm tak hlir, Covid donain a kaihhnawh sorkar department hrang hrang, Medical Operation Team (MOT), Indian Medical Association (IMA), Non-Government Hospital Association, Mizoram Kohhran Hruaitute Committee (MKHC), Joint NGO Co-Ordination Committee, LLTF aiawh, Local Council zawng zawng aiawh leh tel awm tak taka ngaih mi pawimawh dangte chuan Covid dona chungchangah rorelin Health Minister Dr.R.Lalthangliana kaihhruaina hnuaiah, a tul changin DM&R leh Home changtu Minister Pu Lalchamliana, I&PR Minister Pu Lalruatkima leh Minister dang dangte pawh tel chang awm thinin, karawl awm hman lo lekin Meeting an lo nei thin a.

Henga an meeting-te hi kan zavai huap aiawh roreltu anga pawm thei loa sawinawina lo zawng reng mai, mimal leh pawl (party)-te chuan, ‘Min ko tel duh lo,’ ‘Min thawhpui duh lo,’ chuti khat, ‘All party meeting ko rawh se’ tia thu vawrhdarhtu an awm chamchi reng a, Central YMA hnen hial thlengin, CYMA chuan Joint Meeting a koh phah ta hial niin a hriat a, chutah chuan ‘All party meeting’ chu neih nise tia rel a lo ni ta a. Chu chu MNF Sorkar chuan ngai pawimawhin Chief Minister Pu Zoramthanga kaihhruainain, ni 2.7.2021 (Zirtawpni) khan Meeting chu koh a lo ni ta a ni.

He Meeting-ah hian sorkarin tihawm tak sorkarin a tihloh, rawtna thar dangdai leh tha tak tak sawi chhuah tur nei teuh anga lang, sorkar hmalakna duhkhawp lo ang ziazanga sawisel tur lo dap reng maite tel ve chuan ‘enge rawtna thar an siam teh reng’ tih chu mipuiin kan lo ngaichang thuap a, mahse, thilthar danglam teh vak, tuna Covid dona sorkarin kalpui mek dan aia tha leh hlawhtling zawk tur, tidanglam dawrh thei rawtna thar sawichhuah a awm lutuk lem lo niin a hriat ta tlat a ni. Chu chu mipui lam pawhin kan hmuh dan niin a hriat ta tlat mai. Social Media vela thu vawrhdarh satliah engah mah ngai lo a, chak taka hma la chhunzawm char char turin Sorkar fuihna thu sawi chhuah a ni tih te kan hre ta zawk hial a ni.

He Meeting-a pawl leh party aiawha telte chuan rawtna thar danglam tak an siam lem lo niin a hriat a, an rawtna siam vete, tha an tihtlante chu sorkarin ruahmanna siamin a bawhzui dawn tho tih hriat a ni a. Thiltih remlo leh tihchiloh pawh thil awmthei tho a ni tih pawh kan hriat tlan tel a pawimawh bawk a ni.

Sorkarin Covid donaa a hmalak dan leh hmalak meknate han hriatin a tha thawkhat hle a, sorkar hian a ngaihna leh a nachang pawh a hre hle. Chutih rualin mipui lam pawh hian mawhphurhna sang tak kan nei ve a ni tih hi kan hriat tlan a pawimawh : Sorkarin inkaihhruaina dan (Standard Operating Procedures) a siamte hi kan zawm tha em? tih te, Sorkar leh LLTF-te thu kan awih em? tihte hi i inenlet theuh ang u.

Midangte thurawn leh mipui aw ngai pawimawhtu MNF Sorkarin kan zavaia aiawhtu nia kan pawmtlan vek theih tawh tur nia ngaih, ‘All Parties, All NGOS Joint Meeting a ko hi MNF chuan kan chhuangin fakawm kan ti.

(LALTHANZUALA HNAMTE)
General Secretary,
Media & Publicity Dept.
Mizo National Front
Memo No.MNF/Media/02/2021/260
Dt.03.07.2021.