REMNA NI CHAMPHA VAWI 35-NA PU VANLALAUVA,TREASURER THUCHAH

PRESS HAND OUT

REMNA NI CHAMPHA VAWI 35-NA A, PU K.VANLALAUVA, TREASURER,MNFΒ  THUCHAH

Β 

Mizoramin Remna kan neih champha vawi 35-na kan lo thleng ta a, a lawmawm takzet a ni. June ni 30, 1986 zana Aizawl khawpuia mipui hlimzia kha a hmute chuan an theihnghilh theih ka ring lo.

Mizoramin remna kan neih theihna tura hma latu an tam em em a, tlawmngai pawl leh political party-te mai ni lovin, Kohhran pawl hrang hrangten tul kan tihzia kan au chhuahpui theuh a nih kha. Hengte bakah MNF Uderground sawrkarin an thu an ngaih pawimawh em em chu, February ni 18, 1974-a UT sawrkara roreltute thusawi kha a ni. Mizoramin remna kan mamawh thu sawipui turin khatih laia sawrkar chelhtu Congress President Pu Lalthanhawla, Vice President Pu Ch.Saprawnga leh Chief Minister Pu Ch.Chhunga-te leh, Underground sawrkar hruaitu Pu Lalmalsawma Colney leh a thianten Tuikhuahtlanga SIB Office-ah nithum lai inkawmna an neih tuma UT sawrkar hotute thusawi hi a ni : “MNF-ten zalenna in sual hi kan pawmpui em em che u a, hriat pawh kan hrethiam e. Amaherawhchu, tuna Mizo mipuite dinhmun hi kan hrechiang a, India sipaiten an tihretheihzia hi a nasa lutuk a, sawisen pawh a ni love. Chuvangin tlawm leh zah pawh dawn lovin nangni nena inbiak kan rawn rawt ta ringawt mai a ni; remna atan hian hma rawn la thuai teh u, a tul chuan inphahhniam pawh hreh lo mai teh u, kan mipui intawmte retheihna hi a nasa lutuk ta e,” an tih hi a ni. Anni leader pathumte thusawi hian underground sawrkarah pawh awmzia a nei thui ta hle reng a ni.

Mizorama remna a thlen theihna tura kan inhuamnate kha chhutkir thar leh ila, Pu Laldenga MNF President London-a awm hmu tura kalte pawh khan, anmahni hamthatna tur ni lovin, an pawl tan pawh ni lovin sum tam tak sen an inhuamnate kha remna atan vek a nih kha. Mizo mipui pawhin remna a awm theihna tur a nih phawt chuan, ui leh phalloh kan nei lo a nih hial kha, chu chuan remna hlutzia a sawi chiang em em a ni.

A sawisel zawng leh indemna rilru pu dawn ta ila chuan mitin hian sawi tur kan nei theuh ang le! UT sawrkar dem dawn ila kan nei teuh mai thei, political party-te dem dawn ila chuti bawk, tlawmngai pawl leh Kohhran lam thleng pawhin demna tur an awm mai thei bawk. A bik takin underground sawrkarah phei chuan kan ngah lehzual mai thei e. Heng zawng zawng hi tunah chuan kan kalsan tawh a, tui baw hnu a ruh theih lohzia kan hriat vek avangin tuma’n mi rilru tihnat kan duh tawh loh hi.

Tute thinrim fal deuh emawten zalenna sual lo ang hiala tawng lo thlah palh pawh an awm thei e, inremna thupuan avang hian lung lovah i la lo ang u. Kan hnam martar-te kha an sual vanga thi-ah puh ta ila, an chhungte rilru na tur kha tunge a man pe seng ang? Tuma’n chutiangin kan puh love. Mizo mipuiten zalenna sual avanga martar an nih an pawmzia pawh hre thar leh ila. Dik tak chuan, Pathian Thlarauvin hnam sipaiah khan hna a thawk a, an thudawn pawh ‘Thuawih nun’ a ni a, hmun tinah a inang vekin a thleng lehnghal a. Remna ziah hnu lawk a, “Hotute thu pawh ni se ka chhuak dawn lo,” titute pawh kha, thuawihna nunin a rawn man meuh chuan tumah phunnawi an awm ta lo reng a ni. Chuvangin Mizorama remna thlen thu-ah hian Pathian a inrawlh a ni tih hi a chiangin ka hria. He thuawih nun avang hian Arakan atang khan martar-te ruhro kuang 47 nen Aizawl an lo thleng a nih kha.

Martar-te ruhro kuang thlahnaah Pu Zoramthanga Vice President-in thutawite a sawi a : “Arakan atanga kan hnam martar-te nena kan haw tur hi, keini chu nungdamin Mizoram kan pan dawn a, anni erawh chu an ruhro chauhin remna hmang turin Mizoram an pan dawn a ni. Hnam martar kan tihna chhan chu, kan hnam inzawmkhawmna tur leh dinchhuahna atana nunna hlantu an nih vang a ni. Anni hian kan nationalism chi an tuh a, engtik niah emaw chuan a la par chhuak ngei ang; chuvangin anni hi kan chawimawi a, kan zah takzet a ni,” tiin Arakan Capital field-ah a sawi a ni.

Kan vaia tantlanna rah chu June ni 30, 1986 khan a lo par chhuak ta a ni. Zalenna sualtute pawh khan mipui ta an nih hre thar leh sela, he kan inremna hi tinung zel ila, Mizo zawng zawngten kan ta a nihzia i hre thar leh ang u.

Ka lawm e

MIZORAMIN KAN LA LUAH NGAI LOHNA HMUN LUAHIN KAN CHEIBAWL MÊK: LALRINSANGA RALTE MLA

Mizo National Front
General Headquarters
Mizoram : Aizawl

Press Release

MIZORAMIN KAN LA LUAH NGAI LOHNA HMUN LUAHIN KAN CHEIBAWL MEK: LALRINSANGA RALTE MLA

Aizawl 1st July, 2021: Serlui bialtu MLA Pu Lalrinsanga Ralte chuan tunhnaia Assam ram lamin Vairengte Aitlang hmuna thawm an rawn neih avangin Vairengte a pan nghal a, “Chief Minister zahawm tak Pu Zoramthanga kaihhruai MNF sorkar chu thenawm state-te nen ramri buaina a awm a nih pawn tlawm zawk leh hnungtawlh zawkah αΉ­an kan tum lo,” a ti.

Pu Rinsanga Ralte chuan, “Tunhnai kum 2019 leh 2020 kumahte Vairengte dai lamah Assam lamin min rawn tibuai a. Hei hi Vairengte mipuiin huaisen taka lo chhangletin an lo bei a. Sorkar-in a tih tur tak ti nghalin kan sipaiten silai cheng kau sain Assam sipaite an hmachhawn nghal a. KM 1 vel Assam lamah kan nawr let a, Mizoin engtik lai maha kan la luah ngai lohna hmun chu tunah hian luahin kan cheibawl mek a. Vairengte VC-ten ram αΉ­heh nghalin chhungkaw 70 laiin hmun neilote In hmun pein tunah hian an sa mek hlawm a ni. Tin, IR camp changtlung tak siam nghal a ni a, awm nghehtir ngei kan tum a, Home Minster hmalaknain cheibawl mek a ni,” a ti bawk.

Serlui Bialtu MLA chuan, “Kan chief minister zahawm tak kaihhruaina hnuaiah Mizoramin ramriah hmasawnna nasa tak kan nei mek a. Tuna Assam lamin ramri chungchanga min rawn tihbuainaah pawh Mizoram Sorkar chu hnungtawlh a tum lo a, Sipai thahnem tak Vairengte khawtlangin an duhna hmun takah duty post siamtira awmtir nghal an ni. Kan sipai huaisente hi silai cheng kau sa reng an ni a, engpawh hmachhawn turin kan inpeih reng a ni,” a ti bawk.

Serlui bialtu MLA Pu Lalrinsanga Ralte, Vice Chairman, Rubber and Allied Crops Development Board ni bawk chuan a bial chhung Vairengte khawtlangin Community Covid Care Centre (CCCC) an buatsaihna hmun tur tlawh nghalin bul αΉ­anna turin Rs 100000/-(Nuai khat) a pe a, hei bakah hian, Vairengte 4C tur atan hian bialtu MLA Pu Lalrinsanga Ralte chuan an mamawh tur chi hrang hrang :

  1. Oxygen Concentrator
  2. Full PPE Kits – 20
  3. Digital Thermometre-15
  4. Pulse Oximetre – 3
  5. Digital Blood Pressure Monitor – 3
  6. Silpauline – 1 bundle
  7. Sodium Hydrochlorite – 10 ltr
  8. Hand Sanitizer – 10 ltr
  9. Glove – 10 box-te a pek bakah 4C-a an mamawh tur damdawi chi hrang hrang – Multi Vitamin, Paracetamol, Vitamin C thahem tak pein Mask engemawzat a pe bawk a, tin, Serlui bial chhung mi Synod hnuaia Hindi BD zirtur mi pahnihten an zirna atana an mamawh Laptop a pe ve ve bawk

Serlui Bialtu MLA chuan Sethawn CCC-a Serlui bial chhung mi Covid-19 positive enkawl mekte kanna tur Immunity & Protection kit a siam chu a vawi thumna (3) atan a dah leh a. Immunity & Protection Kit chhungah hian Vitamin C, Multi Vitamin, Immunity Booster, Paracetamol, 3 Ply Mask, ORS leh Hand Sanitizer-te a awm a ni.

Pu RSA chuan Vairengte chu Mizoram tan hmun pawimawh tak a ni a. Kan khawtlangah Covid-19 positive engemaw zat an awm tak avangin positive-te inenkawlna hmun mamawh belh zel a ni a, khawtlang tangrualin 4C an siam thei chu lawmawm a tih thu a sawi a. Mi rethei leh harsa zawkte tan Vairengte 4C chu chhenfakawm ni thei se a duh thu sawiin, chutiang a nih theihna atan chuan lungrual taka Vairengte mipuite tangrual zel turin a chah bawk a ni.

(LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/02/2021/259
Dt.1.07.2021.