SPORTS LAMAH MIZORAM SORKARIN BUNG THAR A KAI

Mizo National Front
General Headquarters
Mizoram : Aizawl

Press Release

SPORTS LAMAH MIZORAM SORKARIN BUNG THAR A KAI

Aizawl 26th Aug.,2021: Vawiin khan Mizoram Olympian Hockey player Nl.Lalremsiami nimina Mizorama lo let chu Aizawl Vanapa Hall-ah amah lo lawmna (Felicitation Programme) chu dar 12:00 noon atanga tanin sorkarin a buatsaih a, Chief Minister Pu Zoramthanga chu Khuallian niin, Deputy Chief Minister Pu Tawnluia chu Khual Zahawm a ni a, he hun hi an hmanpui. Nl.Lalremsiama lo haw hi Delhi atangin Sports Minister-te nupain an rawn chhawm haw a, Lengpui Airport-ah a chenna Kolasib bialtu MLA/Minister Pu K.Lalrinliana leh P&E Minister Pu R.Lalzirliana-ten an lo hmuak bawk a ni.

Nl.Lalremsiami hi Mizoram sorkarin Cheng nuai 25 pek turin a ruahman fel a, vawiin hian Cheng nuai 10 lo pek tawh bak, Cheng nuai 15 pek tur la awm chu Chief Minister hian cheque-in a hlan fel nghal a ni. A chenna Kolasaib-ah Soil Department ram lo ni thinah inhmun pekfel a ni tawh bawk. Mizoram sorkar hian sorkar hna a bik taka Nl.Lalremsiami tan bika siamchawp group A post, Hockey Chief Coach hna a pe bawk. He hna pek hi atan liau liaua buatsaih (Supernumerary post) a ni a, tu promotion mah a tibuai lo a, midang a dal lo. Amaha bet tlat, a zawm loh emaw, a tawpsan emaw pawh lo nise, a hna hi tawp ve nghal tura ruahman a ni. Recruitment rules nei ve lova siam ni mahse, hun lokal zel tura kaisang zel thei tur, ‘Assured Carreer Progression Scheme’ nena delhkilh thlap a ni.

Hun kal tawhah Archery Olympian C.Lalremsanga chu Group B hna pek a lo ni tawh a, boxer Zoramthanga chu group A, Sports Promotion Officer hna pek a lo ni tawh bawk a; Jenny R. Lalremliani pawh group A hna, DSP-a dah alo ni tawh bawk. Tuna Nl.Lalremsiami hna pek a nih dan hi chu ruahmanna thar fel taka pek a ni a, MNF chuan kan lawmpui hle a ni.

Mizoram sorkar kaltawhahte mipui lam leh Sports lama mi thahnemngai leh tuimiten Sport mite chawikanna leh hmasawnna tur Sports Policy fel tak siam se an lo tih fo thin chu, tunah chuan Mizoram sorkarin a ruahman a, a siamfel tawh a; sports policy tha tak kan lo nei ta bawk a ni.

Chief Minister leh Deputy Chief Minister-te meuhin sports lam hlutsak a, infiammite tiphur zual zel tur leh hmasawn zelna tur ngaihtuaha Nl.Lalremliani lawmna programme an telpui hi Mizorama la awm ngai lo a ni a, Sports Minister a nachang hre tak leh chak tak Pu Robert Romawia Royte kan han nei lehzel te hi MNF chuan ropui kan ti a, Sports lamah Mizoram sorkar chuan bung thar a kai a, fakawm kan ti a, ropui kan ti.

(sd/-R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/277
Dt.26.08.2021.

THUCHHUAH

MIZO NATIONAL YOUTH FRONT
HEADQUARTERS, AIZAWL

THUCHHUAH

Mizo National Youth Front Headquarters, Aizawl chuan vawiin Dt 24/08/2021-a MPYCC-ten Vanapa Hall kawta lungawi lohna an lantir hi hun lo kan tiin âwm lo kan ti hle a, an thil tih hi kan dem hle a ni.

Department lamin an lo tarlan tawh angin, tun ṭuma electric bill thar ber hi hrileng avangin meter reading tih thlap thlap theih a ni lo va, hei vang hian bill hmasa pahnihte chawhrual anga bill siam a ni. Heti chung hian sorkarin mipuite harsatna hrethiamin complaint hun a hawng a, huntiam a tawp hnuah pawh a hawn belh zel zawk a ni.

Tin, Congress Ṭhalaiten kan Power Minister Pu R. Lalzirliana thu sawi duh lai lai lachhuaka mipui rilru hruai sual theihna tura an bawlphuan zui hi âwm lo kan ti a. Kan Power Minister khan mi fel tam tak zinga mi sual tlemteten thil an tihpunlun theihzia a sawina a ni a, chuvangin Congress Ṭhalaite thil tih dan hi a him lo hleah kan ngai a, ching tawh lo turin MNF Thalai chuan kan chah a ni.

Sd/-
(V. LALCHHANCHHUAHA)
Secretary
Publicity Department
Memo No. 063/MNYF/PR/2020-22
Dated Aizawl the 24th August, 2021

MPCC-IN TIHSUAL PALH ZEUH AN CHÂNG RÂN HI AN TIH DAN PHUNG PANGNGAI VE RÊNG, ‘SAWISÊL TUR DAP’ AN LA CHHUNZAWM ZÊL

Mizo National Front
General Headquarters
Mizoram : Aizawl

Press Release

MPCC-IN TIHSUAL PALH ZEUH AN CHANG RAN HI AN TIH DAN PHUNG PANGNGAI VE RENG, ‘SAWISEL TUR DAP’ AN LA CHHUNZAWM ZEL

Aizawl, the 19th Aug.2021 (Ningani) : Nimin MPCC/Media/PR-2021/52 Dated : Aizawl the 18th August, 2021-a thuchhuah an siamah khan Sorkarin a intiam angin VLTF/LLTF Member leh Volunteer Covid-19 veite a thlawnin a enkawl ngei tur a ni tih thupuiah an hmang a.

MPCC chuan sorkarin thuchhuah fel tak a neih bawhchhiain Village/Local Level Task Force Member thenkhat, Covid-19 kai palh, ZMC-a enkawlte chuan a thlawna enkawlna an dawng thei lova, bill engkim chawitir vek an ni. Sorkarin a thlawna enkawl an nih tur thu, thuchhuah siam meuhin tarlang mah se, a tak takah chuan a thlawna enkawl an ni lo a, bill an chawitir vek tho an ti a. MPCC thuchhuah hi thu belhchian dawllo a ni. Sorkar notification No.D-33011/21/2019-HFW(nCOV)/Vol.II/36 Dated Aizawl, the 9th Sept.2020 chu a ngaiin a la ding/nung reng a ni.

Kha chen Mizoramah sorkarna lo siam fo tawh leh kum 10 chuang rorelna chelh zo hlim Congress Party thuchhuah atan chuan thil chhuizau deuha hre chiang ziktluak hmasa si lova thu belhchiandawllo chhuah thin hi a inhmeh lo ngawt mai.

Covid vei damlote hi Mizoramah mi sang tel tak meuh sorkarin a inenkawl mek reng a. ZMC-a enkawl ringawt pawh mi 400 atanga 500 dawn hialte an ni reng thin. Hetiang karah hian thawktute tan pawh pahnih/khat lo tihsual palh zeuh chu khawvel anih miau avangin a awm lo thei lo. Chu chu lo chang rana an tihdan pangngai te, ‘sawisel tur dap’ zawng ringawta thu an kalpui thin hi sim ve deuh tawh se MNF chuan a duh a ni.

Entirna han tarlang lawk ila, hmanni khan Task Force Chairman Pu Ramzauva Tuikual veng pawh ZMC-ah admit a ni a. Amah a lo insawi lo nge bill a lo pe a, ZMC Medical Superintendent pawhin kokir lehin an pelet leh thlap a ni. Hetiang hian midangte pawh tihpalh tihfel leh ngai an awm nual tih hriat a ni. Mizoram sorkar thuchhuah LLTF/VLTF/Frontline Worker leh Volunteer-ten Covid-19 an kai palh a nih chuan a thlawn veka enkawl tur tih kha a la pangngai reng e.

Thil tihthat hei zat infak duh si lova, tihsual palh zeuh lo chan ran hi Congress Party Media-te hna tur a ni reng dawn em ni? Hei zozai Covid damlo inenkawl luai luai zingah pahnih khat lek tihsual palh lo awm ve chu i hrethiam ve mai teh ang u. An sorkar lai an thiltih dan han thlirletin, an sorkar lai thilthleng ni ta se, an nawi ve awm teh reng nen. Tunah pawh thathawh fumfe nei duh ve mang si lovin, awmhmunah zing thawhhlim atangin dawhkanah sawisel tur ringawt an lo dap hi sim then tur chu an nei a ni.

(sd/-R.LALHMANGAIHA)
Secretary,
Media & Publicity Dept.
Mizo National Front
Memo No.MNF/Media/02/2021/276
Dt. 19.08.2021.

MNF-IN ANDREW H.THANGLIANA MLA BORAL A SÛN

Mizo National Front
General Headquarters
Mizoram : Aizawl

Press Rease

MNF-IN ANDREW H.THANGLIANA MLA BORAL A SUN

Aizawl, 17th, 2021:- Vawiina kan thlahliam tak Pu Andrew H.Thangliana (44) kum 2018 inthlanpuia Independent-a ding MLA atana Tuirial Constituency-a thlantlin, Zo Peoples’ Movement Legislature Party MLA ni mek, Aizawl Chawlhhmun Venga chhungkuaa cheng mekin min lo boralsan ta mai hi MNF chuan hun lo a tiin, pawi a ti takzet a, thinlung takin a sun a ni.

Pu Andrew H.Thangliana hi a MLA-puiten an uiin an sun hlawm hle a, vawiina amah thlahliamnaah pawh hian Chief Minister, Speaker, Minister, MLA leh MNF hotute thahnem tak an tel nghe nghe.

MNF chuan Pu Andrew H.Thangliana kalsan tak a nupui fanau leh chhung khatte chu Pathian thlamuanna leh awmpuina chang zel turin duhsakna a hlan a ni.

(sd/-B.LALHMANGAIHZUALA)
Joint Secretary
Media & Publicity Dept.
Mizo National Front
Memo No.MNF/Media/02/2021/275
Dt. 17.08.2021.

HEALTH MINISTER-IN S.VANLAIPHAI PHC BUILDING THAR A HAWNG

Mizo National Front
General Headquarters
Mizoram : Aizawl.

Press Release

HEALTH MINISTER-IN S.VANLAIPHAI PHC BUILDING THAR A HAWNG

‘Silchar kawng buai hlekah Assam-hovin an nawm an maka kawng min dansak reng hi tha kan ti lo a, International Trade Border lamah hma kan la zel’
Dr.R.Lalthangliana
Minister,_Commerce & Industry

14th August, 2021: Vawiin hian Health Minister Dr.R.Lalthangliana chuan S.Vanlaiphai PHC Building thar cheng nuai 140 senga NABARD sum atanga sak chu luah theih turin a hawng a, Dr.F.Lallianhlira, Principal Director, Health & Family Welfare chuan he hun hi a kaihruai a ni. Minister chuan, “Covid boruak karah hetiang hawn theihna hun tha kan nei hi lawmawm ka ti hle a, Health Department hian a tum ber chu mi nunna chhan theih nana hmalak hi a ni a, mite hriseltir hi a tum ber chu a ni a, hospital building tha tak neih aiin a chhunga tha taka service hi a pawimawh zawk a ni,” a ti.

S.Vanlaiphai, Darzo, New Kawnpui, Lungpuitlang leh Muallianpuiahte hian Health Minister chuan sorkar official-te leh khawtlang hruaitute chu meeting a neihpui leh nghal bawk.

Heng hmunahte hian Health Minister chuan, “Covid First Wave-ah khan Mizoramah mi 10 vel awrhin nunna kan chan a, Second Wave-ah chuan mi 170 chuangin nunna hlu tak kan chan ta a, a pawi kan ti takzet a ni. Mithiamten Third Wave lo thleng turah chuan kum lama naupang zawkten an tuar nasa dawn nia an sawi avangin kawng hrang hrangin kan inbuatsaih lawk a ni. Engtik niah emaw chuan min chenchilh rengtu Covid hi a la reh ang a, Pathian hnenah tawngtai bang lo ila, a hlawhtlinna kan la hmu ang. Covid chungchangah hi chuan vawiina rorel hi a kar leh lawkah a lo tha tawk leh tawh lo thin a, hmalak dan tur tha zawk a lo chhuak leh thin a, rorel thiam a har hle a ni. Tuna Mizorama Covid thihpuite hi Comorbid- natna benvawn nei, Cancer, zunthlum, lung thalo, thisen sang leh natna dang lo nei sate an ni tlangpui a. Covid an kai tawh chuan an natna dang kha kan sawi ri tawh ngai lo a, Covid thihpui an ni vek tawh mai a ni. Tin, tunhnaiah Mizoramah Covid damlote ni 10 an inenkawl hnuah an dam that chuan mahni In lamah ni 7 chhung inkhung hrang leh tura tih hi SOP thar niin, Test nawn kher ngai lova Doctor-ten him thlap leh dama an ngaih a ni a. Khawvel hmun dangah leh India ram State dangah pawh kum khat kalta khan an lo kalpui daih tawh a ni a, Expert Committee-ten test nawn kher ngai tawh lova an ngaih Doctor-ten discharge certificate an pek thlap tawh a ni a, kan Mizo-pui State dang atanga lo hawte pawh negative certificate an neih chuan inkhuahkhirh hun chhung a danglam tawh a, kan lo sawisel theih ngawt pawh a ni lo,” a ti.

Commerce & Industry Minister Dr.Thangtea chuan, “Silchar kawng buai hlekah Assam-hovin an nawm an maka kan ei leh in, kan bungraw chawkluhna kawngpui ber min dan chahsak fo hi thalo kan ti hle a. Silchar kawng chauh hmang reng lo turin Bangladesh lam nen pawh kan indawr zel a, Zorinpui, Saisihchhuah, Kawrpuichhuah leh Silsuri lamah International Border Trade tipuitling turin theihtawp kan chhuah zel dawn a, Bangladesh Commerce Minister nen pawh kan inbe reng a, remchang hmasa berah a hmunhma enfiah dun kan tum a ni. Tin, kan mamawh hrang hrang tlawm tak takin kan chawlut thei ang a, keini thar chhuahte pawh man man leh hlawk zawkin kan kan hralh theih phah dawn a ni,” a ti bawk.

Pu HD.Lalrintluanga, Additional Director, Commerce & Industry pawhin, “Covid leh vawk hrilengte avangin Border Trade chungchangah duh angin hma kan la chak hlei thei lo a. International Border Trade chungchangah hian Myanmar leh Bangladesh-te pawh tlawhin kan dawr tawh thin a. Hetiang thilah hian sorkar leh sorkar a inrem a ngai a, dan lo angin a ruk deuhin engemaw chen chu a kal ve tho bawk a, dan ang taka a kal theihna tura hmalatu department kan ni. Tih takzetin ram dang leh State dangte rual kan el a ngai a, ramri hrulah hian ringtu kan nihna leh puitlingzia kan lantir hram hram tur a ni,” a ti bawk.

Dr.R.Lalthangliana hian nizan khan Tarpho-ah Congress VCP hlui leh Vice President telin mi 21-te chu MNF-ah a lawmlut a ni. Vawiin tlai hian Tuipui ‘D’ ah Health Sub-Centre a hawng nghal bawk.

Minister hi Dr.F.Lallianhlira Principal Director, H & FW, Pu HD.Lalrintluanga, Additional Director, C & I Dept., Pu Dolianbuaia, Hnahthial DC, Pu Lalbiakkila, Hnahthial SP, Pu H.Lalfakzuala, Sr.EE Health, BDO Hnahthial, CMO Hnahthial leh Official dangte bakah MNF Gen.Hqrs. hruaituten an tawiawm a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/274
Dt.14.08.2021.

HEALTH MINISTER-IN SORKAR OFFICIAL-TE LEH KHAWTLANG HRUAITUTE MEETING NEIHPUI

Mizo National Front
General Headquarters
Mizoram : Aizawl

Press Release

HEALTH MINISTER-IN SORKAR OFFICIAL-TE LEH KHAWTLANG HRUAITUTE MEETING NEIHPUI

13th August,2021 : Vawiin (Zirtawpni) hian Health Minister Dr.R.Lalthangliana chuan Mizorama Damdawiin hmasa ber kum 1913-a din N.Vanlaiphai PHC chu a tlawh a, Hospital thawktute leh khawtlang hruaituten an lo dawngsawng. Hemi hnu hian Cherhlun RD Rest House-ah sorkar official leh khawtlang hruaitute nen meeting neih leh a ni a.

Heng hmunahte hian Health Minister chuan thusawiin, “Mizoramah Dental Doctor hi kum 20 chhung an lo la tawh lo a, remchang hmasa berah la turin kan inruahman a ni. World Bank Project cheng vbc 220 pawh kan hlawhtlinpui tan ta a, Hospital leh Sub-Centre hrang hrangte tihchangtlunna tura hman a ni ang. Health Department-a hna ruak hrang hrang Post 740 lak mai tura kan tihte pawh Covid vangin kan la thei mai lova, boruakte a ziaawm dan azira la hnawhkhah kan tum dawn a ni,” a ti.

“India ram hmun thenkhatah Covid a kiam rualin Mizoramah kan la ziaawm hlei thei lo, fimkhur taka tha thlah lova kan beih chhunzawm a la ngai a ni. Covid-in nasa takin khawvel min nuai a, medical lama thiam ram changkangte pawh an mualpho a ni. Keini pawhin SEDP atan sum ruahmanna kan kalpui dawn chauh a, department zawng zawng a nghawng a, Covid chu awm lo se SEDP pawh kan kalpuina a rei tawh ang. Covid avang hian sorkar hna leh Contract-te pawh kan inpek theih loh phah a ni. Mahse, kan boruak rip zualpui hi a la ziaawm ve mai turah beisei ang u. Tin, Covid vaccine hi a pawimawh em em a, la la lo zawng zawngte la vek turin ka ngen che u a ni. Vaccine lakah India ramah a titha ber 7-na kan ni a, hmarchhakah pawh a titha pahnihna kan ni. Thawktu zawng zawng leh Task Force zawng zawng chungah lawmthu ka sawi nawn leh a, Pathian rinchhanin theihtawp i chhuah bang lovang u,” Dr.Thangtea chuan a ti bawk.

Cherhlunah hian Health Minister hian Horticulture Department kaltlanga zikhlum chingtute leh GSA-te hnenah thil pek hrang hrang a hlan a ni.

Meeting-ah hian Hnahthial DC.Pu Dolianbuaia pawhin thu a sawi a. Minister hi MNF General Heaquarters atang te, Commerce Additional Director Pu HD.Lalrintluanga, Hnahthial SP Pu Lalbiakila leh Official dangten an tawiawm a ni. Meeting hi Pu MC.Lalhredika, MNF South Tuipui Block-II Secretaty chuan a kaihruai.

Vawiin tlai leh zanin thlengin Thingsai leh Tarpho-ah sorkar official leh khawtlang hruaitute chu Minister Dr.R.Lalthangliana hian meeting a neihpui leh nghal a ni.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/272
Dt.13.08.2021

CM Pu Zoramthanga kaihhruaiah hian Mizoram mipuiin rintawkna an nei hle niin a hriat a, mipuiin an bawr chho tan zel dawn a ni – H.Biakzaua, MLA

Mizo National Front
General Headquarters
Mizoram : Aizawl

Press Release

 

CM Pu Zoramthanga kaihhruaiah hian Mizoram mipuiin rintawkna an nei hle niin a hriat a, mipuiin an bawr chho tan zel dawn a ni – H.Biakzaua, MLA

13th August,2021: Vawiin khan Lawngtlai East Bialtu MLA Pu.H.Biakzaua’n Sangau-ah Voter 92 MNF-ah a lawmlut.
Pu.H.Biakzaua, MLA Lawngtlai East Bialtu leh Vice Chairman Agriculture Development Board ni bawk chuan, Sangau leh a chhehvel Chhungkaw 36 aṭangin Voters 92-te hi MNF-ah lawm takin a lawmlut a ni.

Hengte hi lawmluhte chu an ni :

📍Sangau-I Ramhlun Congress Chhungkua 15 atangin Vote 46
📍Sangau-III BJP
Chhungkua 3 atangin Vote 5
📍Pangkhua BJP chhungkua 5 atangin vote 10
📍Thaltlang BJP chhungkua 8 atangin Vote 22
📍Sentetfiang BJP chhungkaw 5 atangin Vote 9

Lawmluhte zingah hian Sentetfiang khua atang hian Elected VC member nilai 2 an tel a, heng bakah hian Congress leh BJP atanga lawmluhte zingah Party Elected OB engemaw zat an tel bawk.

He inlawmluhna hun hi Sangau-I, Ramhlun veng Pu T.Chhankhuma, Eastern Block-I Vice President Inah hun hman a ni a, Pu FC Vanlalzawna Secretary, MNF Dist. Hqrs. Lawngtlai leh Sangau MNF Unit Joint President-in he hun hi a kaihruai a. Pu H.Biakzaua, MLA hian lawmluhnaah hian MNF Party-a lut tharte hnenah lawmthu a sawi a, thusawiin, “MNF Party chu Hruaitu ṭha tak nei, Pathian leh kan ram tan titute kan nih avangin, CM zahawm tak Pu Zoramthanga kaihhruaiah hian Mizoram mipuiin rintawkna an nei hle niin a hriat a, MNF Party chu mipuiin an bawr chho ṭan zel dawn a ni,” a ti.

He Inlawmluhna hunah hian Pu K.Hrekung Executive Member i/c Revenue etc.
Pu BN Thangpuia, Deputy Speaker LADC,
leh Pu JB Vanhoy MDC LADC Sangau South bialtuten thu an bawk.

Pu.F.Rozuala, Secretary MNF Eastern Block-I leh Sangau Joint VC Chairman-in ‘Vote of thanks’ sawiin mithar lawmluhna hun hi tihtawp a ni.

sd/-(THANGKIMA)
Secretary,
Media & Publicity Dept.
Mizo National Front
Memo No.MNF/Media/02/2021/273
Dt. 13.08.2021.

LUNGLEI ‘N’ BIALTU MLA BIAL MIPUI TAN CHE CHHUAK ZEL

Mizo National Front
General Headquarters
Mizoram : Aizawl

Press Release

LUNGLEI ‘N’ BIALTU MLA BIAL MIPUI TAN CHE CHHUAK ZEL

Aizawl, the 11st August, 2021(Nilaini) :- Dr.Vanlaltanpuia Lunglei North bialtu MLA, Mizoram Youth Commission Chairman ni bawk chuan tunah hian, a bial chhung khaw hrang hrangah Hripui leng avanga harsatna tuar mekte chhawmdawl hna a thawk chhunzawm mek zel a. Nimin khan Haulawng 4C chu a tlawh a, VLTF Duty-te tlawh nghalin VLTF-ten an thlan chhuah Lock down leh Quarantine avanga harsatna tawk chhungkaw 21 hnenah Rs 1000/- theuh a pe a ni. Haulawngah hian Cancer vei damlo pahnih Pi Lianchhawni leh Pi Lalpianthangi-te chu Rs 5000/- ve vein a kan nghal. Mausen khua chhungkaw 68-te chu Covid-in a tibuai nasa em em a, tun dinhmunah active case 31 an nei mek a, an harsatna phuhruk nan chhungkaw 64 hnenah Rs 1000/- theuh a pe bawk. Mausenah vek hian damlo Zosangliana Cancer vei enkawlna atan Rs 25000/- a pe bawk a. Haulawng leh Mausen khaw mipui hian bialtu MLA chungah lawmthu sawiin, an thlamuanpui takzet thu an lo sawi.

Vawiin August ni 11, 2021 hian Dr Vanlaltanpuia hian Chawngbawla Hall Pukpui khuaah Home Quarantine lai leh khawsak harsa zual chhungkaw 105-te tan Rs.105000/- a sem leh a. Lunglei Zotlang Social Welfare Office Conference Hall-ah ‘Zotlang YMA Education and Literature Committee’ huaihawtin zirlai tithate lawmpuina leh chawimawina hun hmang lehin, NEET tling thar (clear vekte) Lalramfawni, F.Lallawmkima, Esther Lalbiaknungi-te chu Laptop a pe a, Education Committee hnenah Rs.10000/- a pe bawk. Dr.Vanlaltanpuia chuan NEET leh JEE Advance-a tling tharte chu Laptop a pek zel tur thusawiin, “Hun khirh leh hun harsa kan tawh lai hian, bial mipuiten min thlan chhan ang ngeiin mipui tan lawm tak leh phur takin ka theih ang tawkin in rawng ka bawl zel dawn a, lo thlaphang reng reng suh u, in tan theihtawp chhuahin hma ka la zel dawn a ni,” a ti. He hun hi Pu C.Lalringdika, Chairman, Zotlang YMA Education & Sub-Literature Committee chuan a kaihruai.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/271
Dt.11.08.2021.

MINISTER PU ROBERT ROMAWIA ROYTE CHHUANAWM KAN TI

Mizo National Front
General Headquarters
Mizoram : Aizawl

Press Release

MINISTER PU ROBERT ROMAWIA ROYTE CHHUANAWM KAN TI

Kan hriat theuh angin Covid 19 hripui avangin khawvel a buai a, India rama state hrang hrang leh Mizoram ngei pawhin kawng hrang hrangin kan tuar mek a, Sorkar laipui leh state sorkarte sum leh pai pawh a buai nasa tih tlang hriat a ni.

Covid 19 hripui a len mek laiin, Assam ramri hmun hrang hrang leh Vairengte daiah Assam Police-in harsatna an rawn siam a. Vairengte daia Mizoram Police Post pawh rawn hnehchhuhin inkahna hial thlengah Assam Police 6 leh Civilian 1 thiin mi 60 chuang hliam an awm nia sawi a ni. Hetiang harsatna a awm mek lai hian Myanmar atanga kan unau tam tak raltlanin Mizoram min rawn bel mek bawk a ni.

Assam Sorkar nena kan inepnaah hian kan Chief Minister zahawm tak Pu Zoramthanga’n Twitter a hmang tangkai thiam hle a, kan Sports Minister zahawm tak Pu Robert Romawia pawhin thiam takin a tul dan ang angin tan a la a, a tweets hrang hrangte pawh CM leh sorkar tha tichaktu leh Sorkar hawizawng puitu tangkai tak tak a ni. Assam MP Dr Rajneesh Roy-a’n Mizo tlangval Vairengte pawh kal miah lo Pistol nena thlalak a twitter account-a a thlalak post a, Vairengte inkahnaa Civilian tel ve anga a tweet pawh na takin Minister Pu Robert Romawia hian Assam MP dawtsawi hi khawvel hmuhah phochhuakin an CM Himanta Sharma pawh lo control tawh turin a hrilh a ni.

Assamese Spl DGP GB Singh-a’n kan MP zahawm tak Pu K.Vanlalvena man an tum thu a tweet pawh Pu Roberta hian hnehsawh takin a khak bawk.

Cachar DC-in Mizoram dawta a puhna pawh twitter hmangin na takin Minister Pu Roberta hian twitter hmang bawka chhangletin, ‘Assam chu dawtin a khat a, heng dawtte hi hliahkhuh turin dawt a va ngai tam em, dawt zawng zawngte umbo ni rawh se’ a tih te chuan khawvel a deng chhuak a ni.

Assam lamin Media hrang hrang hmanga dawta min puh avangin Minister nachang hre tak Pu Robert Romawia hian India-in thudik hriat a mamawh, National Leh International Media-ten Assam leh Mizoram inkara buainaa thudik hre turin a hmun rawn pan teh u tiin a tweet a, Media lianhovin an rawn ngaihven hle a, Mizoramah Mainstream Media mi 13 lai a chahlutte hi a va ropui em! India media lianah Vairengtea buaina chungchangah thudik a chhuak ta uaih uaih a nih hi!

Buaina chhuah hnu ni 28/7/21-a Union Home Secretary-hova Assam leh Mizoram CS-ten inremna ziaka an dah hnu chuan Assam CM leh kan CM pawhin FIR hlih thute, muanna kawng zawn an tum thute an tweet a.

Minister Pu Robert Romawia Royte pawhin Assam CM Himanta Biswa Sharma chu tweet atangin tunhmaa Assam Sorkar atanga Achiever Award a dawnglai leh Assam CM hlui leh Governor awm ve laia Aizawl FC Award India Vice President hnen atanga a dawn lai thla dahin a tweet-a lenglo a bak pawh part 2 siamin Northeast zawng zawng hmasawn vek a tul thu leh remna a pawimawh thute a tweet bawk a. Assam CM pawh hian Minister hi lawmthusawi chungin remna leh hmasawnnana atana tanho vek a duh thuin a chhang a ni.

Vanduai thlak takin boruak tha a awm hnua thiandun twitter inbiakna Party thenkhatin mipui bum tum nana hmanga a kim si lova lo thehdarh leh Assam CM hlau leh tlawn hiala kan Minister puhna Press Release an tichhuak hi an timak takzet a.Kan Minister-in twitter hmanga a hmalakna hrang hrangte hian a huaisenzia leh Assam CM a ngamzia a tilang chiang hle zawk a, kan chhuang hle a ni.

Kan Chief Minister zahawm takin ramri buainaa hma a hruai dante, kan Minister leh MLA-te hmalak dante ropui kan ti a. An lo tihfo tawh anga Pu Robert Romawia Royte chungchanga thil hote ni sia PR siam a ni leh hian a chakzia leh a hnathawh thatzia a tilang a ni. Myanmar raltlante chhawmdawlna kawnga a hmalaknate, Ramri buai harsatna sutkianna kawnga a hmalaknate leh a Department 3-te a enkawl dan leh hmasawnna a thlen nasatzia kan hmuh hian ropui kan ti a. Minister Pu Roberta’n Covid 19 hripui kara Mizoram budget pawn atanga sum tam tak hailuta hmasawnna hna Zoram hmun hrang hrang chawl lova a kal thei leh Mizoram sorkar sum bawma tam tak a chhunglut thei hi a chhuanawm kan ti takzet a ni.

Tun chinah mipuiin thutak bawla an.lo bawl ve tur ni si, belhchiandawllo leh thudik ziktluak ni si lo thu vawrhdarh hi Party-lian inti ve site hian ching chhunzawm tawh lo se kan tihpui hle a, an tan pawh a tha lo thei hle zawk a ni.

(F.LALBIAKZAMA)
Secretary
Media & Publicity Dept.
Mizo National Front
Memo No.MNF/Media/02/2021/270
Dt.05.08.2021.

MOT LEH IMA-TEN RAMRIA DUTY-TE AN TLAWH

Mizo National Front
General Headquarters
Mizoram : Aizawl

Press Release

MOT LEH IMA-TEN RAMRIA DUTY-TE AN TLAWH
Kan sipai chhuanawm tak takte leh Vairengte khawtlang leh a chhehvel mipuite huaisenna leh inpekna hian, Mizo mipuite hnenah hnam hmangaihna thinlung min put thar tir takzet a, thinlung takin kan chhuang che u a, kan ram neih chhun hi hum tlat turin hnungtawlh lova, hmalam pan deuh deuh turin, kan infuih a ni. – Dr. Thiamsanga, Chairman, MOT

Vawiin ni 4, August 2021 khan Medical Operational Team(MOT) leh Indian Medical Association(IMA)-te chuan ramria duty kan sipaite tlawh kualin, damdawi leh thildang, hrivenna atana thil tangkai turte pe turin MOT chairman Dr. Thiamsanga hovin Vairengte leh a chhehvelah an kal.

Sipaite hnenah hian IMA leh MOT hmingin OC Vairengte Pu Vanlalfaka Ralte hnenah Rs. 30000/- hlan a ni a, Jt. V/C chairman, Vairengte Pu R. Lalfamkima hnenah Rs. 10000/- hlan a ni bawk. Pawisa bakah hian Pulse Oxymeter 10nos te, Mizoram Drugist and Chemist Association ten an thawhkhawm Damdawi chi hrang hrang leh hri laka invenna hmanrua engemaw zat hlan an ni a, Vitamins leh taksa tichak tur eitur chi hrang hrang leh Mask thahnem tak a tel bawk.

Thilpek hlanna hun hi Vairengte Police Station, Officer in Charge Roomah hman a ni a, he hunah hian kan sipaite hnena thilpek hlan paha thusawiin, Dr. Thiamsanga chuan, ‘kan sipai, kan pasaltha ten kan ram humhim tura huaisen tak leh chhel taka inbeihna hi kan ngaihlu a, a hmuna lokal a, inthiltih kan ngaihhlutzia lantirna leh in tana kan tangkai ve theihna anih ringin, a hmunah kan rawn tlawh che u a ni. Kan ram tana nunna chan huama in inpekna hi kan zahin, Vairengte leh a chhehvel khawtlang huaisenna zawng zawng pawh kan chhuang takzet a, ram tana inpete tana kan tih ve theih chinah keini Medical mite hian theihtawp chhuah zel kan inhuam takzet a ni, a ti. Kan hmabakah Kan ram leh hnam tan ti zela theihtawp chhuah chhunzawm zel turin duhsakna ka hlan che u a. In inpekna kal zel hian ram mipui thinlungah ram leh hnam hmangaihna nasa tak a tuhin, a tipung deuh deuh a ni, a ti a, kan ram neih chhun hi hum tlat turin hnungtawlh lova, hmalam pan deuh deuh turin, kan infuih a ni, a ti bawk. Hw hunah hian Dr. Lalhmuchhuaka pawhin thusawiin, a tul dan ang zelin, ram tan Medical mite hian tan ral raih kan inhuam a ni, a ti bawk.

Thilpek hlan hnu hian ni 26, July 2021 a inkahna hmun, Vairengt dai leh Saihapui leh Phaisen lam te tlawhin, chhel taka ram hum hna thawk mek Sipaite kan kual nghal a ni bawk. Saihapui VCP, Saihapui Duty Post Commander leh Phaisen VCP leh Duty post Commander hnenah te hian Rs. 5000/- theuh hlan a ni bawk.

MOT Chairman leh a hote hi Kolasib Bialtu MLA zahawm tak, Minister Pu K. Lalrinliana leh DC Kolasib, CMO , SMO leh Medical Supdt leh an thawhpuiten Kolasib Circuit House ah tukthuan an lo kilpui a ni.

Ramri a duty te tlawhna ah hian Dr. Lalhmuchhuaka, Medical Superintendent, Civil Hospital, Aizawl, Dr. Ringmaia, Dr. Chawnglungmuana, Hony. Secy IMA, Dr. Don S Halliday, Dr. Sangzuala-te an kal a ni.

(V.L.KROSSHNEHZOVA )
Secretary
Media & Publicity Dept.
Mizo National Front
Memo No.MNF/Media/02/2021/269
Dt.04.08.2021.