MNF JOINT SECRETARIES

MNF JOINT SECRETARIES

MNF SECRETARIES

MNF SECRETARIES FOR 2019-2022

SAITUALAH RANGE OFFICE BUILDING THAR PU R.LALZIRLIANA’N A HAWN HNUIN DUDO OFFICE LEH RULCHAWM AUDITORIUM A HAWNG

Mizo National Front
General Headquarters
Mizoram : Aizawl

Press Release

SAITUALAH RANGE OFFICE BUILDING THAR PU R.LALZIRLIANA’N A HAWN HNUIN DUDO OFFICE LEH RULCHAWM AUDITORIUM A HAWNG

Vawiin September ni 14th, 2021(Thawhlehni) hian Pu R.Lalzirliana, LRS & WC Minister chuan Saitual District-a Range Office, LRS & WC Office chu kut hnathawktuten tangkai taka an hman theih turin ribon chepchatin a hawng a. Hemi hnu hian Saitual District-a District Urban Development Officer (DUDO) Office thar chu khuallian bialtu MLA, Pu R.Lalzirliana Minister chuan hawngin building thar sak tur chu a lung a phum nghal. He hunah hian Pu R.Lalzirliana chuan thusawiin, “Vawiinah Pathianin hun tha tak min pe hi a lawmawm ka ti takzet a ni. Politics-a ka luh hlim leh, helai biala ka luh hlim atangin kan tuina ber chu District thar neih a ni ber a, a hmunhma hi a thain a laili a, a boruak a thianghlim a, District khawpui a nih chuan Aizawl tawt lutuk pawh a ziaawm phah ang kan ti thin. Saitual hi tunhma chuan Aizawl atangin darkar li vel kal a ni thin a, tunah chuan darkar hnih vel kal a ni ta a. Kawng siam mek hi zawh a nih chuan darkar khat leh a chanveah kan thleng tawh ang. Kan lo suangtuah thin District chu tunah kan thleng ta a, a lawmawm ka ti hle. Politics-a a goal ka thlenpuinaah ka ngai che u a, ka tumah ka hlawhtlingah ka ngai bawk. A la thar a, tihchangtlunna hun a la awm lo a, kan tichangtlung zel ang. Sorkar hmasaah DC leh SP chauh pawh min dahsak rawh u kan ti thin a, a hlawhchham ta kha a ni a. Pu Zoramthanga sorkar tharah chuan a lo hlawhtling ta a, Pu Zoramthanga chungah leh Pathian chungah lawmthu ka sawi a ni. Soil hi department pawimawh tak a ni chungin, a pawimawhna kan phawrh thiam lo thin a, tunah chuan thawktu thahnemngai tak takte avangin beiseina thar kan nei leh ta a. Covid avangin duh angin hma kan la chak thei lo zawk a ni. Robber hi khawvel boruak inthlak zelah kan la tangkai pui hle dawn a, chutiangin kuva pawh kan ramah a tha duh hle a ni. A chingtute thahnemngai taka hnathawk turin ka chah duh che u a ni,” a ti. Kut hnathawktute tan bawngtuthlawh, Suahdur leh tui pipe a sem nghal a ni.

Pi K.Lalrinzuali Secretary, LRS & WC chuan he hun hi kaihruaiin Pu Rochhunga Ralte Ex-MLA, Vice Chairman, LR & Survey Board, Pu Hualthanga Chhakchhuak Director, LR S & WC leh Pi Margaret Lalrinawmi Fanai, Addl. DC pawhin thu an sawi bawk.

Hemi hnu hian bialtu MLA, Pu R.Lalzirliana Minister chuan ‘Rulchawm Auditorium’ UD & PA Department cheng nuai 120 senga sak thar chu a hawng leh a. Hawnna thu sawiin khuallian Pu R.Lalzirliana chuan, “Helai Auditorium kan hawng thei hi kan Dy.CM, Pu Tawnluia thahnemngaihna vang a ni tih in hriat ka duh a. Tha taka in sa zo thei hi thawktu leh hmalatu zawng zawngte chungah bialtu MLA ka nih angin lawmthu ka sawi a ni. Assembly Session kan zo chauh a, Session zawh hian opposition nih hi chuan zin chhuah a nuam a, rulling MLA-te hmalakna kan sawizui thin. Tun tum Session-ah khan a mimal taka beihna ka tawk nasa hle a, mahse, thudik ziktluak lova inbeihnaah hreawm tihna ka nei lo. Sawi leh selna tam tak kan tawh hi Politician-te chuan kan tawh tur reng a ni. Covid boruak harsatna karah pawh kan Chief Minister Pu Zoramthanga leh a thawhpuiten District tihhmasawnna lamah hma min laksak zel a, a thlamuan thlakin lawmawm ka ti hle a. Saitual District hi lungrual taka hlim tlan i tum ang u,” a ti.

Khuallian hian Covid-19 avanga class kal thei loten online class an kal theih nan Thingsulthliah, Saitual leh Rulchawma zirlai thenkhat hnenah Mobile phone a pe bawk a ni.

Pu Lalrintluanga Sailo, MLA & Dy.Govt.Chief Whip; Er.H.Lalzirliana, MLA & Vice Chairman, Road & Infrastructure Development Board; Pu Rochhunga Ralte, Ex-MLA & Vice Chairman, Land Revenue & Survey Board-te chu khualzahawm an ni a. Pu H.Lianzela, Director, UD & PA Department, Govt.of Mizoram chuan he hun hi a kaihruai a ni.

Khual zahawm Pu Lalrintluanga Sailo MLA & Dy.Govt.Chief Whip leh Er.H.Lalzirliana MLA bakah Pi Margaret Lalrinawmi Fanai, Addl.DC, Saitual; Pu Ramchhuanmawia, Chairman, Joint VC, Saitual Town; Pu Smith Lalruatfela, VCP Rulchawm-te pawhin thu an sawi a. Pu HVL.Zarzoenga, Joint Director (P), UD & PA chuan Technical Report pein Rev.H.Lallianzara, Keifang Pastor bial chuan hunserh a hmang a ni.

Vawiin chawhnu hian Saitual bialtu MLA, Pu R.Lalzirliana chuan MNF-ah mi thar Saitual Unit atangin 40, Keifang-16 leh Rulchawm atangin-7, an vaiin mi 63-te chu a lawmlut nghal bawk.

(sd/-R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/281
14.09.2021

“MYANMAR UNAU RALTLÂNTE TUMAH EITUR TLACHHAMA AN AWM KA PHAL LO”-Dr.R.Lalthangliana

“MYANMAR UNAU RALTLANTE TUMAH EITUR TLACHHAMA AN AWM KA PHAL LO” – Dr. R. Lalthangliana, MLA, S.Tuipui A/C

Myanmar ram buaina avanga raltlante Mizoram chhungah an rawn lut zel a. Tun hnaia buaina thleng avangin Lunglerh khua leh a chhehvelte mahni in lum pawh luah ngam lovin Mizoram chhungah an rawn tlan lut mek a ni.

Tun dinhmunah hian Cherhlun, Ngharchhip, New Ngharchhip, Thingsai leh Bualpui ‘H’ a raltlan rawn lut tawh zawng zawng hi Ni 12.9.2021 (Pathianni), dar 7:00PM thleng khan mi 1252 an tling tawh a ni.

Heng kan unau mangang thlabara rawn tlante hi bialtu MLA Dr. R. Lalthangliana, Health Minister chuan rang takin a ngaihven nghal a, an ei tur Buhfai trip 2 a pek tur thu a sawi nghal.

Tin, Buhfai bakah, Dal bag 16, Tel case 16 bakah an bûk sakna tur Silpaulin engemawzat pek an nih tur thu Dr. Thangtea hian a sawi a. An hriselna endik turin Cherhlun PHC leh Thingsai PHC bakah Hnahthial District Hospital aṭangin Medical Team tirh an nih tur thu a sawi bawk.

Dr. Thangtea chuan, “Ka bial chhunga manganga rawn tlan lutte hi ka khawngaih takzet a, tumah eitur tlachham an awm ka phal lo a, a ṭul angin kan ngaihtuah zel ang.” a ti a ni.


https://www.instagram.com/p/CTuuFp4LAID/?utm_medium=share_sheet

MPCC-ten mipui hruaisual tumin Power Minister an la bei chhunzawm

Mizo National Front
General Headquarters
Mizoram : Aizawl

PRESS RELEASE

MPCC-ten mipui hruaisual tumin Power Minister an la bei chhunzawm

Aizawl, 10th, Sept.2021(Zirtawpni) :- MPCC chuan Power Minister Pu R.Lalzirliana chu House-ah thudik sawi ngamloah puhin bang turin an phut nawn a. Power Minister khan House zahawm takah khan zawhnaho kha a chhang fiahfai chiang tawh hle zawk a ni. Bill tihsual palh zeuh hi chu khawvel a nih miau avangin a awm lo thei lo a, digit khan lek chhut sual palh pawhin a sang viauin a hniam duai thei bawk. Tihdik loh luih a awm ngai lo. JERC-in Public Hearing a koh laia kal duh chuang si lo, MPCC-te hi ‘tiang taka mipui hmakhaw ngai an inti a nih si chuan nikum 2020-2021-a electric bill sanna 26.59% a nih khan sawisel awm tak hunah an sawisel lo a. Kumin 2021-2022-ah 20.70% a a pun tlem zawknaah an sawisel leh si hi MNF chuan mipui hmakhaw ngaihlohna leh Power Minister beih duhna hrim hrimah a ngai a, mipui hruaisual tumna maiah a ngai a ni. Kumina an sawisel leh si hi MNF chuan awm lo a ti hle bawk a ni.

Electric bill hi sorkarin subsidy a pekah mirethei KJS, BPL family kan tih maite chu unit khat zelah 50%-a a ngaihhnathiam laiin Domestic-ah chuan 27.04% chauh a pe thung a ni. Heta tang pawh hian sorkarin mirethei a ngai pawimawh hle tih a hriat bawk.

Electric Bill hi Assam-ah Fix Charge 50/kw, Slab 1-120 units, rate Rs.4.90, 121-240 units rate Rs.6.15, above 240 units-ah Rs.7.15 a ni a. Manipur-ah fix charge 65/kw, slab 1-100 units Rs.5.10, 101-200 units Rs.5.95, above 200 units-ah Rs.6.75 a ni a. Nagaland-ah fix charge 200/kw, slab 1-30 units, rate Rs.4.75. 31-100units rate, Rs.5.45. 101-250 units rate Rs.6.00. Above 250units Rs.7.00. Mizoramah fix charge 50/kw, slab 1-100 units, Rs.4.80. 101-200 units rate Rs.5.50, above 200 units Rs.5.90 a ni a. State dangte dinhmun leh Mizoram dinhmun khaikhin hian kan la chawi tlem zawk a ni tih hi MPCC-te hian lo hre tawh turin MNF chuan a chah nghal a.

Heti tak maia kan Minister zahawm tak Pu R.Lalzirliana beihzuina remchang hmua inngaia, a tihdanglam theih hun laia engmah sawi nei duh si lo leh tel ve duh si lovin an bei vak mai hi, a chhuahsan Congress-ho zia, phuba lak tuma umzuinaah MNF chuan a ngai a ni.

(sd/-R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/279
10.09.2021.

ZPM LEGISLATURE LEADER-IN HEALTH DEPARTMENT HMALÂKNA CHUNGCHÂNGAH THUDIKLO A SAWI

Mizo National Front
General Headquarters
Mizoram : Aizawl

Press Release

ZPM LEGISLATURE LESDER-IN HEALTH DEPARTMENT HMALAKNA CHUNGCHANGAH THUDIKLO A SAWI

Aizawl, 10th, Sept.2021(Zirtawpni) :- Pu Lalduhoma, MLA, ZPM Legislature Party Leader chuan vawiin September ni 10, 2021 hian Aizawl Press Club-ah thuthar thehdarhtute kawmin Health Department hmalakna chungchangah thudiklo a sawi hi MNF chuan pawi a ti hle a, hetiang hi thil awm dan dik tak chu a ni e.

India Formosa Foundation emaw, hmun dang reng reng atangin Mizoram sorkara Health Department hian duhsaktute thilpek a hnar ngai lo. RT-PCR Mobile Van hi neih tumin Health Department hian hma a la reng zawk a ni. Kuminah ringawt pawh RT-PCR Mobile Van dilna hi Central sorkarah Mizoram sorkar chuan dilna a thlen ngun tawh hle a, reiloteah fel thei tura beisei a ni. India Formosa Foundation pawhin Mizoram tan pek an duh thu hi an rawn thlen tawh ngei a, uluk deuhin an ngaihtuah hnuah, Mizorama hman ve theih nia an hriat hnuah Chief Minister zahawm tak Pu Zoramthanga pawhin September ni 2, 2021 khan a tul anga hma la turin India Formosa Foundation-ah DO Letter a thawn tawh nghe nghe a ni. Chief Minister leh Health Minister bakah Health Secretary pawhin Ministry of Science & Technology, Institute of Bioresources & Sustainable Development (IBSD) hnenah ziakin dilna a thlen tawh a. Chumi hnuah Health Minister-in vawi hnih, Chief Minister-in vawikhat lehkhain an chhuzui tawh a ni.

March thlaah khan Whole Genome Sequencing (WGS) nei turin sample 69 thawn a ni a. March thla vek khan result dawn a niin Covid-19 virus hrik chhuak thar hmuh a la ni lo. April thlaah khan Sample 217 thawn zinga sample 76 result chu June ni 18 khan dawn a ni a. A tukah SNO/Official Spokesperson chuan Covid-19 in DIPR kaltlangin a puangchhuak nghal a. TV chanchinthar leh chanchinbu lamah pawh chhuah a ni. June thlaa sample 100 thawn result hi July ni 20-ah dawn niin a tukah SNO hian DIPR kaltlang bawkin a puangchhuak leh nghal a ni.

Integrated Health Information Platform (IHIP)-a dahluhte chauh hi Official Report-ah ngaih a ni. Delta variant mai bakah Alpha leh Eta variant pawh a hlauhawmzia mipuia zirtirna kawngah pawh sorkarin kawng hrang hrangin hma a la reng a. Mithiamte hmangin discussion-te neih a nih bakah ram hruaitute pawhin thuchah an sawiah pawh vawiduailo an sawi tawh a ni. Tualchhung chanchinbu leh TV chanchintharahte pawh tihchhuah thin a ni. Hemi kawnga thahnemngai taka mipuite zirtir kawnga tan latu thuthar thehdarhtute lakah MNF chuan lawmthu a sawi nghal a ni.

Pu Lalduhoma MLA hian thudik ziktluaklo hi mipui hmaah sawi fo tawh lo turin MNF chuan a chah nghal bawk a ni.

(sd/-R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/280
Dt.10.09.2021