MNF-IN PADMA SHRI DAWNG PAHNIH AN CHAWIMAWI

MNF-IN PADMA SHRI DAWNG PAHNIH AN CHAWIMAWI

Mizo National Front General Headquarters
Mizoram : Aizawl

PRESS RELEASE

MNF-IN PADMA SHRI DAWNG PAHNIH AN CHAWIMAWI

Roreltute chu Pathian ruat an ni a, hnam tana la pen chhuak ve loten kan President hekin case chitin an awrhtir
Lalthlengiana, Vice President

Dated Aizawl 15th Nov. 2021 (Thawhtanni) :- Vawiin chawhma hian Mizo Hnam Runah Chhung Inkhawm neih a ni a. Hun hnihnaah Pu Lalthlengliana, MNF Vice President chuan thu a sawi a. Pu Lalthlengliana chuan Padma Shri Award dawngtute pahnih Pu Lalbiakthanga Pachuau leh Pi B.Sangkhumi-te chu India ram mipui tam takin an dawn theih loh, mi nuai 50 zingah pawh dawng thei an awm zen zen loh, MNF member zingah chawimawina sang dawng thei pahnih kan nei hi a ropui kan ti takzet a. MNF chuan kan lawmpuiin chawimawina kan hlan a, kan chhuang hle a ni, a ti.

MNF Vice President Pu Lalthlengliana chuan, “Roreltute chu Pathian ruat an ni a, hnam tin roreltute chu Lalpa ruat an ni. Keini Mizote pawh Tuipui ral atangin Lalpa’n min hruai chhuak a, Assam hnuaiah District Council hunah rethei takin kan awm a. Kum 1961-ah MNF party dinin Pu Denga hovin hnam rilru pu mi an lo lang a. Hnam rilruah Nationalism a lo pian tawh chuan hnamin awpbettute rilru atanga talchhuah a tum thin. Pathianin hnamah leh chi-ah min siam a, ramri min khamsak a, hnam dangzia la a, an thu hnuaia awm turin min dah lo. Mahni hnama min siam chhan anga kan par chhuah hian Pathian a lawm a, hnam dang nuna par chhuak turin min ti lo. Mautam tuarin rethei takin Assam hnuaiah kan awm a, chumi laka ta chu talchhuak turin kan bei a, hnam rilru pu tan lo chuan India kha do ngam chi a ni lo, hnam tlemte ni chungin India sorkar do ngam kan ni. Ram tana ni khat pawh la pen chhuak loten hnam hmangaih ber ang ziazanga an insawi hi a zahthlak a, heng mite hi Pathianin finna a pek an ni lo. Pu Denga leh Pu Zoramthanga-ten an lo beih tawhnate hi kan chhutpui ngai lova, India ram kum 20 chhung an do a, Pu Denga, Pu Zorama leh Pu Tawna-te hi ram tana zalenna an sual laiin House arrest-in an awm lai khan, Hualngohmun an rawn thlen khan India sorkarin a hre ve chauh a, Pathianin a hruai chhuak a ni. Pu Denga pawh Arakan-ah vawi thum an lo ban hman a nih kha, hnam tana tuartute khan ‘ram daiah tawihral mai mai mah ila a pawi lo, thang leh tharten lei rem an rah theihna a nih chuan kei chu ram daiah ka boral ang, Zoram dam reng ang che’ lo tiin an boral a nih kha. Tuna hnam hmangaih ber anga insawite hian London-te khu hnam tan vawi khat pawh an la thleng ve lo. Kan ram tana la pen chhuak ve miahloten kan President te hekin case chitin reng a awrhtir a, Lalpa’n roreltute a ruat hi tawrh a phal a ni,” a ti.

Inremna chungchang sawiin MNF Vice President chuan, “Kan inremnaah khan Article 371G kan nei a, inremna tha leh ropui tak a ni. Hun rei tak India sorkar nen inbiain inremna kan nei a. Ram hmangaih intitu tam tak hian Indian constitution chhun han khat pawh an tidanglam ve lo. Pathianin kan ram hruai turin harsatna tinreng kan hotute kha a tuartir tawh a ni,” a ti.

Pu Thlenga chuan MNF sorkar thiltih tawhte sawilang telin, “Mautam tam kumah free ration kan sem a, Gas lah a awlsam em em a, Durtlang kawng te, New Secretariat complex-a khawpui thar te, Millenium centre te, Ch.Chhunga Bus Terminal, Rangvamuala Ch.Saprawnga Truck Terminal-te sorkar hmasaah kan thawk a. Tuna Champhai lam leh chhim lam kawng four lane thawh mek te, buhfai, Gas, Oil chi tinah harsatna kan tawk lo. He sorkarin hrileng kara hma a lakna hi a fakawm a, pu berin phungbawm a siam thiam a, kohhran leh NGO-te nen lam a thawhpui thiam a, covid donaah pawh a titha ber State kan ni. Engineer-te, Zirltirtu te, Nurse leh thawktu hrang hrang pawh lak an ni,” a ti bawk.

Pu Thlenga chuan, “Sorkar kal tawhah ramri chungchangah kan zirlaiten hliam an tuar a, hman ni lawkah chuan India sorkar kum 20 do ngam hruaitute chuan ram chhan nan hmalain, lehlam sipai chu an thi phengphung mai tih kan hriat kha. Pathian huat ber chu milem biakte a ni a, Lalpa mi ruat pawisawitute chuan Lalpa mit naute an khawih a ni. Vawiina kalphung thar buaipuite kal dan hi a mak khawp a, President-ah Pu Lalliansawta, Working President-ah Pu K.Sapdanga, Leader-ah Pu Duhoma-te an ni a. Valupa Council an tihte kan hria a, hotu ber pawh an hriat loh teh nuaih hlawm a nih hi. Inthlan dawn apiangin engemaw nih tumin an rawn pen chhuak thin a, kalphung thar tak tak an nei lo. Kelchal tlanchhe ek ang phauh phauh an ni a, an tlem tham lutuk, engtikah mah an sorkar lo ang. Congress lah Central, State dangah leh Mizoramah an tlasawp tawh em em a, MLA 34 atangin 5 chauh an nei tawh. Kum 2023 inthlan lo awm leh turah hian Pathianin MNF hi chawisangin ropui takin a sorkartir leh ngei dawn a ni,” a ti bawk.

He hunah hian MNF High Command member pahnih Pi B.Sangkhumi leh Pu Lalbiakthanga Pachuau, Padma Shri Award dawngtute chu chawimawina parthi MNF Vice President Pu Vanlalzawma leh Pu Lalthlengliana-ten an hlan a. Pu Lalbiakthanga Pachuau leh Pi B.Sangkhumite pawhin thu an sawi. V.Lalbiakzuala, Jt.Secretary, MNF Gen.Hqrs. chuan Er.R.Rohmingliana NCC member hova kar hmasa lama Thorang bial Block-1 fan report pein MNF-ah mithar 911 an lawmluh thu a sawi bawk.

He hun hi Pu R.Lalhnuna PAC member chuan kaihruaiin, Upa Dr.H.Vanlalhluna chuan hunserh a hmang.

(Sd/-R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/321
Dt.15.11.2021.

Covid donaah Chief Minister, Health Minister leh thawktu hrang hrangte an thawk tha

Covid donaah Chief Minister, Health Minister leh thawktu hrang hrangte an thawk tha

Mizo National Front General Headquarters
Mizoram : Aizawl

Press Release

Covid donaah Chief Minister, Health Minister leh thawktu hrang hrangte an thawk tha
-Dr.Vanlaltanpuia, MLA, Chairman, MYC

Vawiin ni 13 November, 2021 (Inrinni) hian Dr. Vanlalțanpuia, MYC Chairman, Lunglei North Bialtu MLA chuan a bial chhung, Zotuitlang khua leh Chengpui khuate a tlawh a. Zotuitlang khuaah hian MNF party zawm thar mi 22 leh, Chengpui khuaah Pu C.Lalremruata, Congress Ex- VCP leh a hnungzuitu mi 9-te chu MNF President, Pu. Zoramthanga aiawhin MNF-ah a lawm lut. Lawmluhte hi an vaiin mi 31 an ni.

Dr.Vanlaltanpuia chuan a bial chhung, Zotuitlang khua a covid veite enkawlna hmun, 4C an dinte chu tlawh nghalin, an mamawh chi hrang hrang, oxygen concentrator, PPE set leh damdawi eng emaw zat bakah pawisa fai Rs.5,000/- a pe nghal a.
Hripui laka mipuite kan lo him zawk nan Pathian hnena innghah a pawimawh ber a. Bial chhung mipui tumah chi-ai lova, mihring lama tih theih awm ang angte chu inthlahrung lova a hnenah hriattir zel turin a chah nghal a ni. Lunglei North bialtu MLA chuan, “A hrehawm leh nuamah pawh bial tana ding tur ka nih angin, a chhe ber pawh lo thleng sela, engtik lai pawhin inbulah ka ding zel dawn a, ka awm zel dawn a ni, ” a ti.

Dr.Vanlaltanpuia chuan, “Covid hian khawvel sorkar ropui tak takte a titlawm a, India leh Mizoram thlengin nasa takin min tibuai a. Hetih lai hian kan Chief Minister Pu Zoramthanga leh Health Minister Dr.R.Lalthangliana ten Covid dova kan hmalaknaah an thawk tha hle a. Minister/MLA, kohhran, NGO/Task Force hrang hrang te, sorkar leh mimal thlengin kan thawhhona a tha em em a, heng avangte hian Mizoramah pawh covid a kiam hret hret mek zel a, bang lovin i tawngtai zel ang u,” a ti bawk.

Dr.Vanlaltanpuia chuan a bial chhung khaw hrang hrang 16-a 4C din tawhnaah an mamawh hrang hrangte chu a hlan kim tawh a, a tul ang zela tanpuina pek zel a la inhuam thu a sawi bawk.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/320
Dt.13.11.2021

MIZO HNAM RUN CHHUNG INKHAWM

MIZO HNAM RUN CHHUNG INKHAWM

Mizo National Front General Headquarters
Mizoram : Aizawl

Press Release

MIZO HNAM RUN CHHUNG INKHAWM

Kum tharah chuan chhungkaw hawi zawngin SEDP kan her tawh dawn

-Robert Romawia Royte

Vawiin ni 12.11.21 Zirtawpni hian Hnam Run Chhung Inkhawm program hman a ni a. Thusawitu MNF Adviser leh Minister of State Pu Robert Romawia Royte chuan SEDP chu Sorkar Flagship proramme a nih avangin MNF sorkar chuan kum 2½ chhungin Hmasawnna Ruhrel siam nan SEDP sum Rs nuai 73000 chuang a hmang thei a nih chuan kumthar atanga Beneficiary Oriented – chhungkaw hawi zawnga SEDP kalpui hi sorkar tan a harsa lo. Infrastructure lian tham chu Central projects sum atanga siamin SEDP chu chhungkaw hawi zawngin kalpui tum a ni ta, mi harsa leh rahbi tleu tawhte tan malsawmna thar a thleng dawn, a ti.

Pu Robert-a chuan politics a luhchilh hmain party-te dinhmun uluk taka a zirchian hmasak thu a sawi a. Belhchian dawl ber MNF party-a awm chu a inchhir loh bakah tifuh a inti hle tih a sawi.

Kan Chief Minister zahawm tak hi ropui ka ti. Tun hmain project thilah North East CM-te thawhpuiin hun ka lo hmang ve tawh a. Tuna kan CM Pu Zoramthanga hi mi danglam tak, mi ropui tak a ni tih hi ka hmuchiang hle. Delhi tlanga kan Prime Minister, Home Minister leh Minister senior Ram Vilas Pashwan phei chuan a keah vuanin pathian biakin a be lo chauh. Ani ang hruaitu kan nei hi kan vannei a. Tih theih loh tura ngaih pawh a tithei mai zel hi a ropui a ni,” a ti.

MNF Sorkar hmasa hunlai khan tih theih lohva ngaih, amah pawhin ‘Ka phuahchawp’ a tih hial Peace Bonus hming phuahchawpa Finance Ministry atanga Non Plan sum Rs nuai 18200 chuang a nawr chhuakte kha thil mak a tling. Party hruaitu pakhatin Peace Bonus sum hi NLCPR sum a ni, tiin Assembly House-ah hial a sawi a, hei hi thudik lo a ni. Finance Ministry-in a bika State sorkar min pek zawk a ni. “Party thenkhatin peace bonus a awm lo, NLCPR hnuaia mi niin mi state-in an dawng hnem zawk, tih thu an sawite kha a zahthlak hle. Khatiang kha tu CM dangin nge ti ve thei?” Pu RRRa chuan a ti.

Pu Zoramthanga hmalak dan sawi chhunzawmin, “Inthlan hma khan Chief Secretary thar ruat a ngai a. CM hmasa khan Mizo tawng hmang lo CS turin Central Sorkarah a zuk dil a, Arvind Ray an pe a nih kha. Kan pu ve thung chuan Mizo ngei a dil thung. An duhzawng a inang lo hle a ni. Kan sorkar tirh khan AGMUT cadre pawh ni lo Pu Lalnunmawia Chuaungo, IAS ka duh tiin CS-ah a dah a. Addl CS to CM atan pawh Manipur cadre a mi Mizo bawk Pu JC Ramthanga, IAS a lachhuak leh thei a. Ram hmasawnna leh hnam tana tha tur ngaihtuah kawngah an inthlau hle. Tunge kan zui hi kan chian a ngai,” tiin ramhnuai atanga harsatna an sual chhuah thute a sawi bawk.

MNF Adviser chuan Aii puka inpuhna chungchang sawiin, agriculture beneficiary-ten kel pal hungna an dawn zinga pakhat, Rs nuai 1 vel bak a ni lo. Pu Zorama tihmualphona tura audio lem an siamte pawh kha a mak a, kha audio lem siamtute zinga mi pakhat chu a inchhir tawp thei lo tih a sawi bawk.

MNF Sorkar chungchang sawiin, “Covid 19 avanga kan budget hmuh kim loh pawh Rs vbc 2000 chuang daih a ni. Heti chung hian sorkar a la kal zel thei a. Sorkar hmasain sum an la hmuh ngai reng reng lohna atangin kan hmu a. Scheme awmsa ngai rengah pawh sorkar hmasa hmuh let singa tam pawisa hmuhna kan nei. Kan dinhmun a that loh avangin budget pawn atangin nasa takin tan kan la a. Hengte hi CM leh Dy CM tha kan neih vang a ni. Minister tha leh MLA tha tak tak kan neia hmalam panin kan kal zel dawn,” tiin MNF sorkar hmalakna chhuanawm tam tak a awm thu leh hun harsa kara minister hrang hrangte hmalakna tlangpui pawh, “Minister-te hmalakna tam tak chu a mal malin nilenga sawi tham a ni. Kan minister te hi official-te kuta innghat mai an ni lo va, official-te an kaihruai thei zawk a ni,” a ti bawk.

Pu Robert-a chuan, election manifesto chungchangah party dangte chuan kum hnih vel an sorkar hnuah manifesto an sawi ngai lo. Keini chuan kum thum kan sorkar hnuah sawi nuam kan ti a, tihhlawhtlin tam tak kan nei tawh a ti.

SEDP chungchangah, “Kum hnih leh a chanve chhung Rs nuai 73,451.09 sengin kan kalpui tawh. Congress kum hnih sorkar khan NLUP atan cheng engzatnge an hman ve? Amaherawhchu, mipuite chuan chhungkaw thleng phak an beisei a. Kum 2½ chhunga nuai sing sarih kan hmang thei a nih chuan, kum a lo thar anga SEDP chu chhungkaw ei bar hawi zawngin kan her mai dawn a ni,” a ti a. “Keini chuan SEDP hmangin kawng tha kan siam a, NLUP hmang khan khap khat pawh kawngpui an siam lo,” a ti bawk.

Lung kan phumte hi nasa takin an sawisel a, khawia pawisa nge an hman dawn? an ti. Kan Chief Minister hova lung kan phunte hi thawh loh pakhatmah kan nei lo. Covid avangin pakhat chauh kan la thawk lo. MNF sorkar chuan ‘kan ti ang’ kan tihte chu tih loh kan nei lo,” a ti.

By election laia amah an beihna chungchang sawiin Pu RRRa chuan, “Model court of conduct bawhchhia te min ti a. Heti lam hi chu kan hriat ve zawng a ni a, kan bawhchhe lo ang tih a chiang. Mahsela offside lek leka tlan thinten an pet goal thin angin dan bawhchhe lo tawk, offside lo chiah chiahin kan khelh ve a ngai. Hortoki ral lehlamah offside a awm lo.

Phullem phah an sawisel thin a. Mizoram sum cheng khat mah tel lovin phullem kan phah ruala tax an pek atangin Mizoram sorkarin Rs nuai 70 te, Rs nuai 40 te, Rs nuai 34 te a thlawnin kan hmu zawk a ni. Budget pawn atanga sum lo lut hi a hlawk em avangin sorkar hmasa tih theih loh leh sum an la hmuh ngai lohna atanga kan hmuhte hi an thik a, sawichhiatna an zawng mai a ni,” tiin, a deptt chan – ICT hnuaia budget, a leta sanction an hmuh dan te, Tourism project bakah policy – dan leh hrai an siam dan te, sports hnuaia full fledge school cheng nuai sang thum zel senga sikul pathum din tawh a nih thu te a sawi bawk.

Hnam Run inkhawm hi NCC Member Pu D.Thangliana’n a kaihruai a. Pi Vanlalbuki, Secretary-in hunserh a hmang a ni.

(Sd/-MALSAWMPUIA RALTE)
Joint Secretary
Media & Publicity Dept.
Mizo National Front
Memo No.MNF/Media/02/2021/319
Dt.12.11.2021.

PU K LALDAWNGLIANA MLA-IN BIAL FANG CHHUNZAWMIN LAWMTHU A SAWI

PU K LALDAWNGLIANA MLA-IN BIAL FANG CHHUNZAWMIN LAWMTHU A SAWI

Mizo National Front General Headquarters
Mizoram : Aizawl

Press Release

PU K LALDAWNGLIANA MLA-IN BIAL FANG CHHUNZAWMIN LAWMTHU A SAWI

MNF hi Mizorama political party dang ang a ni ve lo, martar-te thisenin a bual a ni.

– K Laldawngliana, MLA

Aizawl 11th Nov. 2021: Pu K.Laldawngliana MNF Official Candidate, Tuirial bial by-election-a thlantlin tak chuan a bial chhung khaw tam tak lawmthu sawiin a fang kual a, vawiin November ni 11, 2021 (Ningani) hian mipuiten an thlantlin avanga lawmthu sawi la chhunzawm zelin Zanlawn, Serkhan, Lungmuat tlangdung phei fangin hun hman chhunzawm leh a ni.

Heng hmunahte hian Pu K.Laldawngliana chuan amah an thlantlin avanga lawmthu sawiin, amah vote ve lotute hnenah pawh inthlahrunna nei lova thawhho puiah atan a sawm a, amah vote-tute chauh ni lo, amah vote lotu zawng zawngte leh Tuirial bial zawng zawng mipui tana bialtu MLA a nih thu a sawi a. Harsatna leh mamawh hrang hrang an neihte chu a hnenah inthlahrung lova thlen zel turin a chah a ni.

Pu K.Laldawngliana chuan, “MNF hi chu Mizorama political party dang ang a ni ve lova, martar-te thisenin a bual a ni a, a din tirh ata kum 60 zet hming thlak ve lo a ni. Mizorama political party dang engemaw zat chu District Council, UT leh State puitlinga hlankai kan nih hnu thlengin vui liam an ni tawh. MNF chu ‘Pathian leh kan ram tan’ titu party awm chhun kan ni a, kan lakah Pathian pawh a thikthu a chhe bik a, chuvangin, MNF worker-te chu an dikin an rinawm tur a ni a, an taima bawk tur a ni,” a ti.

MNF hotute, kan Chief Minister, Elected OB, Ministers leh MLA zawng zawngte hi Pathian rawn chung zela ram kaihruai thin, chapo ve lo, inngaitlawm leh Mizo taka nunze pu mi an ni. Opposition party leh media hrang hrang atangin kan hotute hi sawiselin beihna awm thin mahse; Pathian leh mipui zarah kum 2023-ah hian MNF hi Pathianin he ram kaihruai tur hian thuneihna a pe leh ngei ngei ang tih ring ngam ang u. Covid vangin kum hnih tha kan hotute hian hma la thei lo mahse, SEDP pawh kan hotute sawi ang ngei hian budget thar atang chuan hma an lak ngei lo ring ngam ang che u,” Pu Dawngtea chuan a ti bawk.

(Sd/-THANGKIMA)
Secretary
Media & Publicity Dept.
Mizo National Front
Memo No.MNF/Media/02/2021/02/318
Dt. 11.11.2021