Aizawl East-II biala Armed Veng South Congress LC Member nilai leh Midang tam takin MNF-ah Membership Fee an pe

Mizo National Front
General Headquarters
Mizoram : Aizawl

Press Release

  • Aizawl East-II biala Armed Veng South Congress L Member nilai leh Midang tam takin MNF-ah Membership Fee an pe

Tunhnai hian Aizawl East-II biala ZPM leh Congress Party atangin mi tam takin MNF zawmin Membership Fee an pe a, MNF zawm tum dang pawh an tam hle niin Bialtu Minister Pu Robert Romawia Royte chuan a sawi a, member tharte hi Budget Session zawhah Lawmluh Runpui neih tum a ni a ti.

Otto Band-a Bassist thin leh Armed Veng South LC Chairman hlui ni bawk Pu Lal Biakthuama Hauhnar, Congress LC Member nilai chuan ni 27.2.2022 khan Membership Fee pein MNF Party a zawm a, Chhinga Veng Congress Mahila Committee President nilai Pi Chalchhingpuii pawhin vawiin ni 28.2.2022 hian Membership Fee pein MNF a zawm bawk.

LC Member ni mek Pu Lal Biakthuama chuan bialtu MLA leh Minister ni bawk Pu Robert Romawia Royte-in Aizawl E-II bial tana hmasawnna hna a thawh dan leh bial mipuite a enkawl dan te, mirethei leh harsate tana hma a lak dante hi ropui ka ti a. Kan veng Armed Veng South-a a hmachhawp Community Hall leh Infiamna ruhrel siam a tumte a taka chan vat theih nan Bialtu MLA dotu ni lova Bialtu MLA Puitu nih hi ka duh tawh a ni a ti. Congress Mahila President atanga bang ta Pi Chhingpuii pawhin “MLA Election hmasa khan Congress-a ka awm avangin Chhinga Veng tana kawng engkima mi tangkai kan thenawmpa Pu Robert Romawia tan tan ka lak a rem lova, tun atang chuan theihtawpin ka pui tawh dawn a ni. Kan chhungkaw tan a hlu a, kan veng tan pawh Minister neih zel hi a tul ka ti a ni a ti.

Bialtu MLA, MNF Aizawl E-II Block leh Mnf Unit te pawhin mitharte avangin lawmthu an sawi a. MNF chu mitin ta a nih avangin party dang atanga lo lut zel turin an sawm bawk a ni.

Sd/-
(THANGKIMA)
Secretary
Media & Publicity Dept.
Mizo National Front
Memo No.MNF/Media/03/2022/371
Dt.28.02.2022.

Minister Pu R.Lalzirliana’n Saitlaw khua eng pekna tur leh Saiphal project a hmunah a enfiah

Mizo National Front
General Headquarters
Mizoram : Aizawl

Press Releas

Minister Pu R.Lalzirliana’n Saitlaw khua eng pekna tur leh Saiphal project a hmunah a enfiah

Vawiin ni 18.2.2022 (Zirtawpni) hian P & E Minister Pu R.Lalzirliana chuan Hortoki aṭanga Saitlaw khuaa Power pekna tur hmunhma a enfiah a, Megawatt 3 pechhuak thei tura beisei Saiphal Project a enfiah nghal bawk.

In 10 awmna Saitlaw khua hi kum 20 chuang kalta khan Electrict êng pek tawh a ni a, kum hnih khat hnuah tihtawp a ni leh a, chumi bâk chu vawiin thlengin he khua hian Electric êng an hmu leh ta lova, Mizo hlang awmna khuaah chuan Saitlaw khua chiah hi electric eng la chhi ve lo khua an ni hialin sawi a ni tawh a ni. He khuaa êng pêkluh pah hian a kalkawnga awm, Ex-MNA Mau chinna hmun a paltlang dawn a, Ex MNA-ho pawh an lawm hle a ni.

Hortoki aṭanga Saitlaw Power pekna tur enfiah paha an tlawh, Saiphal lui, Megawatt 3 pechhuak thei tura beisei enfiahnaah hian Er. Laldêla, SE,P&E(Project II) in a ṭawiawm a, luidung Km 2 aia thui mah an zawh nghe nghe.

P & E Minister Pu R.Lalzirliana chuan, “Mizoram khua zawng zawng Ëng pek vek kan tum a, tunah hian khaw tlêmte pek loh la awm zingah Saitlaw hi hun reiloteah êng a luh ngei ka beisei a ni” a ti.

Megawatt 3 vel pechhuak thei tura beisei Saiphal lui hi khuah a nih chuan helai chhehvel khua engemawzat a chawm thei dawn tih Minister Pu Zira ṭawiawmtu SE Er. Laldela Sailo chuan a sawi a. Tunah hian Survey/Investigation tih thuai tum a nih thu a sawi bawk.

Vawiina P & E Minister Pu R.Lalzirliana’n Saitlaw khua leh Saiphal Preject-te a hmuna kala a enfiah hi P&E Department atangin Pu Laldela SE(Civil) Project Circle II, Pu C.Lalruatliana SE, Project Circlre I, Pu C.Lalzarliana EE, Kolasib, Pu R.Lalchhanhima SDO, Kawnpui leh Pu Lalzawmthanga EE, PWD(National Highway I) -ten an tawiawm a, MNF Gen.Hqrs.aiawh leh Ex-MNA-ten an tawiawm bawk.

Sd/-
(F.LALBIAKZAMA)
Secretary
Media & Publicity Dept.
Mizo National Front
Memo No.MNF/Media/03/2022/369
Dt.18.02.2022.

DR.R.LALTHANGLIANA’N CHILI (TUIPUI)-A SERVICE TUR MAR BOAT A VAI LIAM

Mizo National Front
General Headquarters
Mizoram : Aizawl

Press Release

DR.R.LALTHANGLIANA’N CHILI (TUIPUI)-A SERVICE TUR MAR BOAT A VAI LIAM

Vawiin February ni 18, 2022 (Zirtawpni) hian Health Minister Dr.R.Lalthangliana chuan Khawlailung PHC sak thar a tlawh a, thawktuten lo dawngsawngin an mamawh hrang hrangte an lo thlen a ni. He PHC hi NABARD RIDF XXIV sum Rs.140.21 lakhs hmanga 2019-2020-a sak a ni. Minister chuan mamawh an thlente chu sum awm dan azira ngaihtuahsak an nih tur thu a hrilh.

Hemi hnu hian Commerce & Industry Minister Dr.R.Lalthangliana chuan Chili (Tuipui)-a service tur Mar Boat chu mipui tana hman theih turin a vai liam a. Ama motor nen Lawng hian phurin ral leh lam Muallianpui ram chu a chuangkai nghal a ni. He Lawng service tur hi helai khaw chhehvel inkalpawh harsa lutukte tan awlsam leh zangkhai, man tlawm zawka hman theih tura siam a ni a. Mar boat hi bialtu MLA Dr.R.Lalthangliana chuan nikum khan ama MLA Fund atangin cheng nuai 15 sengin Tuipui ‘D’ pa, Lawng tuk thiam Pu R.Lalbela a tuktir a, hmanni lawk khan a tuk zo va, feet 40 zeta sei a ni a, a engine pawh Burma lam atanga chah thlen a ni. Pick-up full load pawh phur thei turin Thir tha chi hmanga tuk a ni.

Minister chuan thu sawiin, “COVID hrileng karah vawiin hian Aizawl lam atang pawhin kan rawn intawiawm tha hlei thei lo a, helaia Lui lian tak maiin bial chhung khaw hrang hrang min daidan a, Leidawh hi a hautak a, Central-ah cheng vaibelchhe tel ka nawr mek tho a, mahse, a kal muan deuh avangin Lawng hmangin inkalpawhna hi siam tha tihna ka nei ta a, Lawng kai theihna tura ram petute chungah pawh lawmthu ka sawi a ni. He lai khaw chhehvel tan tangkai taka hman theih turin ka commission a ni,” a ti.

Dr.Thangtea chuan tunlai Mizoram politics chanchin sawiin, “Lunglei khawpui chhungah tun hnaiah ZPM party atangin mi lawk tak tak kan lawmlut a, kan la lawmluh belh zel dawn a ni. Aizawl lamah pawh kan inlawmlut zel dawn a, ZPM party hian rawih lam a pan mek zel a ni. Nakum inthlanah party dang tan kawl a eng rih lo hle a. Congress phei chu Central lamah an tlachhe mek zel nen, an tan sorkar ngaihna a awm rih lo,” a ti bawk.

Minister hian Cherhlunah party hrang hrang INC, BJP, atangin voters 31, Bualpui ‘H’ ah voter 18-te chu Mizo Hnam Party MNF-ah a lawmlut nghal.

Minister hi Dr.C.Lalzepuii, Joint Director Health, Pu H.Lalfakzuala, EE Health. Hnahthial DC, SP, BDO bakah official thahnem takin an tawiawm a ni.

Sd/-
(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/368
Dt.18.02.2022

ZPM HRUAITU HLUITEN MNF AN ZAWM

MIZO NATIONAL FRONT, SUB HQRS. LUNGLEI

PRESS RELEASE
No 08 of 2022

ZPM HRUAITU HLUITEN MNF AN ZAWM

Ni 11.2.2022 (Zirtawpni) khan MNF Sub Hqrs Lunglei Office-ah ZPM hruaitu hluite lawmluhna hun hman a ni a, heng mi tharte hi Pu Vanlalzawma, MNF Vice President-in a lawmlut.

Mithar lawmluttu Pu Vanlalzawma chuan, “MNF Sub Hqrs hruaituten mithar duhawm tak tak, party dang hruaitu tha tak tak in lo seng lut thin hi a lawmawm ka ti a, hruaitute inpekna a ropui hle a ni.

MNF hi Party dang nen hian kan danglam em em a, mahni nunna pawh dahkham ngam, nupui fanau leh chhungte pawh kalsan ngam khawpa Ram tana lo inpete awmna pawl a ni a, a din tirh phat atangin he ram leh hnam hi a lang nghal a, a din chhan tak pawh Mautam tam avangin he ram hi a chhe vek thei ang tih hlauhna avangin Pathian leh kan Ram tana he ram chhan chhuahna tur hi a ni tih kan hriat a pawimawh a, kan lo chauh ber lai pawha inhmuhkhawmna tur chhan, hun pawimawh bik Ni pawimawh tak tak 6 kan nei tlatte hi a ropui bik em em a, kan chetziaah pawh MNF kan ni tih hi kan tilang fo tur a ni,” a ti.

“MNF hian Pathian hruaina a chan tlat avangin Diamond Jubilee kan thleng thei a ni a, Pathian hian hruai lo se la chuan MNF hi a ral ve daih tawh ang. Social media ringawt ringtu tan chuan MNF hi chhe ta riauvin a lang mai thei a, mahse Social media-a chhiat leh that viau hian awmzia a nei thui lo hle a, Pathian enkawlna leh kaihhruainaah hian kan thatna tur leh kan chhiatna tur hi a innghat zawk a ni,” Pu Vanlalzawma chuan a ti.

Hon’ble Minister Pu Lalruatkima pawhin, “He sawrkar hi Pathianin min enkawl a, harsatna leh hun khirh tak maia min hruailuttu hian kum that kum, hun tha,term thaa min hruailuh hi a rinawm em em a ni.

Congress sawrkar kan han thlir a, Zoram mipuite hian Aigupta sabel hi kan ngai lo hle tih a chiang a, anmahni an han inenlet a, an mangang lutuk chuan an hotupain  that loh theih lohna bawm te a han zuar a, a zuartute kha a ngai reng an ni a, kum 10 kaltaa tha duh reng reng lote kha han that thar thutna tur hi an nei chuang lo a ni.

2017-ah sum harsatna avangin Zu chhiah atangin Mizoram sum harsatna kan siamtha ang, an ti a, House-ah pawh Zu zuar lo tura kan tih lawm lawm pawhin sum an hmuh theihna tur a nih phawt chuan tih hreh an lo nei reng reng lo mai a, zu chu an han zuar a, a result that lohzia chu kan hriat kha.

Congress hunah Assam sawrkarin kan ramri min chhuhsak a, kan zirlaite leh kan thalai, ram chhan tura kalten vai kut an tuar a, Mizo civil-te lamah vai silai a puak a, Zoram hi a tap a nih kha.

Ram neitu Party kan han sawrkar a, Vai sipaiten kan ram min chhuhsak, kan ram chhunga in an rawn luah chu kan chhuhsak a, Vai sipaite hawi zawngin Mizo sipaite silaimu chu a puak ta thuai thuai mai a ni.

He sawrkar kalphung hi ngun takin ngaihtuah ila, kum 2017/18 chhova kan harsatna zawng zawng – kan kawngpui chhe lutuk te, ei leh ina kan harsa em em te, Gas lei tur vang em em mai te, buhfai harsa em em mai te kha tunah chuan sutkian a ni a, covid 19 hripui avanga kan khawsak buai em em tur, kan lo mangan em em lai khan tunge min khaichhuaktu hi kan tih chuan, Israel fate thlalera mana leh vahmima chawmtu khan min ensan lova, a hun takah min khai chhuak mai thin. Keini chuan Social Media kan ring ve lo, keini chu Social media vangin kan sawrkarin kan tla lovang. Kan Lalpa Pathian avangin kan sawrkar leh zawk dawn a ni, a ti.

_Kan manifesto hi kan zir kan zir a, tihhlawhtlin tawh tam tak kan nei a, kan la tihhlawhtlin hman lohte zingah enge pawimawh hmasa tih thlirin, decentralisation of power lam kan han hawi leh a, Lunglei Municipal Council, congress sawrkar laia a pek duh loh, UD & PA minister hlui Lunglei pa Pu Zodintluanga’n a buaipui duh miah loh kha, tunah chuan Lungleiah hman a lo ni dawn ta a, zirna kawnga hma kan sawn theihna turin MZU southern campus pawh kan nei dawn bawk, Lunglei tan hian hmasawnna tur ruangam lian pui pui a insehmur mek a ni, Pu Ruatkima chuan a ti bawk.

MNF-a lawmluh thar, ZPM Southern Hqrs ex G.S Pu K.Vanlalvena chuan, “Vawiinah MNF-a min lawmluhna min hriatpuitu mi tamtak in lo kal avangin ka lawm hle a, ZPM lo din tirh atang khan theihtawp chhuahin hma kan la thin a, MNF-a lokal hi suangtuahnaah pawh ka la nei ngai lo. ZPM-ah bul kan tan a, ZPM-ah hian kan hun pawh kan hmag zo turah kan lo inngai thin a, amaherawh chu ZPM Party hi Lalpan a venpui lo emaw ni aw tih mai turin, kan kalphung hi a buaichuar hle a, vawiinah hian loh theih lohvin MNF Party hi kan lo zawm ta a ni.

ZPM Party-a kan nihna hlihsak kan han nihna chhan hi 2022 Oct-ah OB term tihthar a ni a, kan president-in GS-hote min titipui a, order a lo chhuak a, kan portfolio pawh min tidanglam ta a, kan appointment kum khat atana siam a nih lai khan engmah pawh inrawnna leh inhrilhna awm miah lovin reiloteah appointment thar siam a ni leh a, keini GS 3-te chu hnawl kan ni ta ngawt mai kha mak kan ti hle a, kan President han zawh chian kan tumin kan inbe thei lova, Ni 3/4 vel kan ngaihchan hnuah engmah thawm a awm tak lohvah chuan Gen Hqrs-ah kan thlen phei a, 7th Jan., 2022 thleng kan ngaichang a, amaherawhchu kan beisei ang thil engmah a lo awm tak si loh avangin kan hruaitute hnenah pawh vawiina kan awm dan tur hi kan hrilh ta a ni.

ZPM tana lo insengral ve a, theihtawp chhuah vetute min ngaithei lova, kan awm tha hle hle lai min hnawt chhuak ringawt mai hi hriatthiam harsa min tihpuitu, kan thawhpui thahnem tak an awm mek a, keini hi hetiang dinhmuna kan lo din takah chuan Congress Party pawhin min rawn rim ve a, nimahsela Opposition party atanga opposition party thova luh leh chu thil atthlak tak nia kan hriat avang leh MNF Party chak taka a kal mek zia pawh kan hmu a, hripui leng karah pawh chak takin min kaihruai a, MNF sawrkarin ram mipui min enkawl dan hi a thlamuanthlak kan ti a, MNF hi kan han zirchiang a, MNF Sub Hqrs hi ral atanga kan lo thlir ang leh chakvak lo anga kan lo hmuh thin chu, a lo nih lohzia kan han hmu a, rintlak an lo nihzia kan han hmuh hian a thlamuanthlak ka ti a, vawiinah hian lungsi takin MNF-ah kan lo lut ta ni.

Party dang aia ZPM Party a danglamna chu ZPM Party chu Party hrang hrang atanga kalkhawm, hotu hrang lian tak tak nei theuh kan ni a, chung hotu hrang hrangte chu khaikhawmtu kan awm si loh avangin a kalphung hi a buai tual tual mai dawn a ni tih chiang takin ka hmu a ni.

Vawiin ni atang hian ZPM tana thahnemngai taka kan thawh thin aia nasa khan MNF Party tan hian thahnem ngai takin ka thawk dawn a ni,_ a ti.

Pu SL.Chhunga, Ex Gen Secy, ZPM Southern Hqrs Lunglei pawhin, _”Ram siamtha tur chuan sawrkar a ngai a, chutiang tur chuan Pu Duhawma hovin theihtawp kan lo chhuah thin a, chutianga ke kan pen lai chuan hnathawk thei tawh lo tura paihchhuah kan han ni ngawt mai hi a na kan ti a ni.

ZPM-ten kan chhuan em em, kan lo tlangau pui, kan tih hi MNF Party hmalakna, an kal mek dan hi a ni tih kan hmu a, congress party-in ram an lo tihchhiat tawhte an siam tha a, congress party tih theih reng reng loh Lunglei tana Municipal Council min chhawp chhuahsak tur te, Ni 100 inhlawhnaah ni 100 kan han thawk thei te, Congress Party huna PM special package awm ngai reng reng lo kha MNF hunah chuan PM Package te kan han hmu te, congress hunlaia kan ramri humhalh tura sipai leh silaimu kan nei tlat lo avanga rilru na taka kan awm thin chu MNF sawrkarah Ramri humhalh tura Sipai leh Silaimu kan neihzia lo langte bakah, MNF sawrkarah hian sawisen loh hmasawnna a thleng a ni tih kan hmuh hian, he MNF Party hmang hian Zoram thar hi a thleng thei a ni tih hriain lawm takin MNF Party-ah kan lo lut a ni,a ti.

He hun hi Pu H.Thangrenga President MNF Sub Hqrs Lunglei-in kaihruaiin Pu J.Dengliana, adviser-in hunserh a hmang a, ZPM atanga lawmluh thar Pu Lalrinawma pawhin thu a sawi bawk.Stacy Punte-in kalkhawmte zaiin a awi bawk.

ZPM atanga MNF-a lawmluhte hi.

1.S.L Chhunga. Ex GS. Chanmari
2. K. Vanlalvena Ex GS. Bazarveng.
3. David Rosangliana Lunglawn
4.Lalhmangaihsangi. Lunglawn
5. Zorinpuii Renthlei, Theiriat
6. C. Lalhmangaihzuali. Venglai.
7. Lalrinawma Tochhawng, Treasurer Zobawk Unit
8. C.Lalrinawma Chanmari.
9. C. Malsawmtluanga, President, Mualthuam N
10. Lalrinchhani. Asst Secy. Mualthuam N Unit
11. Lalropuia Ngente. Congress. Rahsiveng

Pathian leh kan ram tan

Sd/-
(K.ZODINSANGA)
Jt.Secretary.
Inf & Publ Dept.
MNF Sub Hqrs, Lunglei.Memo No – I&P-MNF(S)L- 08/ 2022-2023.
Dated Lunglei
the.11th.Feb.2022

ASSAM CM NENA ZANRIAH KILHO CHUNGCHANGA MIZORAM CM PUH HMINGCHHIAT TUMNA HI DAWT A NI – MNF

Mizo National Front
General Headquarters
Mizoram : Aizawl

Press Release

ASSAM CM NENA ZANRIAH KILHO CHUNGCHANGA MIZORAM CM PUH HMINGCHHIAT TUMNA HI DAWT A NI
– MNF

Aizawl dated 7th Feb.,2022 : Ni 25.11.2021-a Assam House, Chanakyapuri, New Delhi-a Assam Chief Minister Pu Himanta Biswa Sarma leh Mizoram Chief Minister Pu Zoramthanga te’n anmahni ṭawiawmtu ve vete nen zanriah an kilho chungchanga Pu Zoramthanga a tih loh pui ti anga Zozam Times chanchinbu Vol.XVI No.011 dated 7.2.2022-in headline-a thu a chhuah leh social media-a ZPM PAC Member Pu TBC Lalvenchhunga-ten thu an vawrhdarh hi dawt a ni.

He dinner an kilho Pu Zoramthanga buatsaih anga an tarlang hi a dik lo a, Assam Chief Minister Pu Himanta Biswa Sarma-in Assam House, Chanakyapuri, New Delhi-a a buatsaih zawk a ni a, Pu Zoramthanga hi zanriah kilho turin Assam CM hian a sawm zawk a ni.

Mizoram CM Pu Zoramthanga tawiawmtu zingah Assam Police-ten kuhva tawlhru ṭhin anga an rinhlelh mek Abu Mazumdar-a a tel anga thu an vawrhdarh pawh hi dawt chiang tak a ni bawk. Assam CM hian amah ṭawiawm turin Minster Atul Bora leh Abu Mazumdar-ate hi a sawm zawk an ni. Abu Majumdar-a hian Assam CM hi New Delhi a thlen khalh nghe nghe a, Mizoram House-ah Pu Zoramthanga leh a ṭawiawmtute hi va hmu hmasain, anni chuan ani chu anmahni lam Assam House-a thleng turin an lo kawhhmuh nghe nghe a, Assam House-ah hian Minister Atul Bora nen an thleng dun ta nghe nghe a ni. Zanriah kilhonaah pawh hian Abu Majumdar-a hi a tir lamah a lut ve mai nghal lo nghe nghe a, Assam CM hnenah ‘I sawm a ni lo’m ni, pawnah a awm’ an tih takah chauh Assam CM hian a kohluhtir tih hriat a ni.

Zanriah kilhonaa Mizoram Chief Minister Pu Zoramthanga ṭawiawmtute hi OSD to CM Pu Rosangzuala, Additional PS to CM Pu Peter Sawmpuia leh Delhi Mizoram House Resident Commissioner Pu Amjad Tak-te an ni.

Hetiang tak maia thu belhchiandawllo leh dawt hmanga kan Chief Minister Pu Zoramthanga beihna social media vawrhdarh leh chanchinbua chhuah a ni ta mai hi MNF chuan a hrethiam thei lo hle a ni. Hetiang thu an vawrhdarh dawn a nih chuan a nihna chian hmasa phawta puanzar chauh ni ṭhin se ṭha tur a ni. Zanriah kilho chungchang leh Abu Majumdar-a chungchang hi Assam House, Chanakyapuri, New Delhi-a an lo chhinchhiah (record) dante pawh awlsam taka zawhfiah hmasak theih reng a ni a, finfiah si lova awmhmun atanga thudawn ang ang mipui hriata vawrhdarh kan ching ṭhin hi i sim tawh ang u.

Lal duh ve avanga khingpuite thu belhchiandawl si lo leh dawt muhlum hmanga mipui rilru sukthlêk hruaikawi tum ṭhin pawh hi i sim tawh ang u. Hetiang tih chin hi kalphung thar atan mipuiin an pawm theih a rinawm loh em mai.

Sd/-
(LALTHANZUALA HNAMTE)
General Secretary,
Media & Publicity Dept.
Mizo National Front
Memo No.MNF/Media/03/2022/366
Dt.07.02.2022.

MYC CHAIRMAN, LUNGLEI ‘N’ BIALTU MLA-IN RALTLANTE DINHMUN A ENFIAH

Mizo National Front
General Headquarters
Mizoram : Aizawl

Press Release

MYC CHAIRMAN, LUNGLEI ‘N’ BIALTU MLA-IN RALTLÂNTE DINHMUN A ENFIAH

Vawiin February ni 1, 2022(Thawhlehni) hian Dr.Vanlalṭanpuia, Mizoram Youth Commission Chairman leh Lunglei ‘N’ bialtu MLA ni bawk chuan a bial chhung hmun thuma Burma raltlante dinhmun enfiahin a tlawh a. Raltlante hi Haulawng-ah hmun hnihah dah an nih bakah Zotuitlangah te dah an ni a, an vai hian mi 95 zet an ni.

Raltlante tlawhtu Dr.Vanlaltanpuia chuan heng hmun a tlawhnaah hian thusawiin, “Burma ramchhung buaina avanga rawn raltlante hi kan unaute vek in ni a. Ramin ri nei mahse; Hnamin ri a neih loh avangin lo lungngai suh u. Chief Minister Pu Zoramthanga kaihhruai sorkar hian a ngaihthah dawn reng reng lo che u a ni,” a ti. “Covid-19 len nasat lai ni mah se, ka bial chhunga rawn tlan lutte pawh MLA ka nih angin in tan theihtawp ka chhuah zel dawn a, nangmahni In lum dam taka thleng leh vek turin ka duhsak che u a ni, “a ti bawk.

Dr.Vanlaltanpuia hian Haulawnga raltlante tan hian buhfai bag 15, Alu bag 3,Tel case 3 leh nutrella bag 6 bakah Rs.30000/- zetin raltlante ṭanpuina leh chhawmdawlna thilpek a pe a. Zotuitlangah hian raltlante tan test kid 100, face seal engemaw zat, raltlante tan sum fai engemaw zat leh raltlan buaipuitute tan sum a pe bawk a ni. Raltlan Steering Committee, Haulawngte hnenah Covid test kid 100 leh Rs 10000/- ṭanpuina a hlan bawk a ni.

Lunglei North bialtu MLA hi MNF General Headquarters atangin Pu J.Lalchhuanliana Secretary leh Zadingliana Joint Secretary-ten an tawiawm a, Lunglei atangin Kolouthungan-a, Lunglei DC leh official dangten an ṭawiawm bawk a ni.

Sd/-
(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/365
Dt.01.02.2022.

Prime Minister’s Development Initiative for North-East (PM-DeVINE)

  1. MIZO NATIONAL YOUTH FRONT
    HEADQUARTERS, AIZAWL

THUCHHUAH

Mizo National Youth Front (MNYF) Headquarters, Aizawl chuan February 1, 2022-a Union Budget pharh taka Prime Minister’s Development Initiative for North-East (PM-DeVINE) scheme hnuaia Mizoram tana cheng vbc 600 zet mai dah a ni hi lawmawm kan ti a, heti zat mai ram hmasawnna tura dah a nih theih nana hmalatu kan Chief Minister zahawm tak Pu Zoramthanga chu kan chhuang a, kan ngaisang tak zet a ni.

PM-DevINE hi central scheme dang thlakna emaw, chhunzawmna emaw ni lovin scheme thar, India hmarchhak state hmasawnna tur liau liauva Finance Minister-in a propose a ni a. Union Finance Minister Nirmala Sitharaman-in budget a pharhah khan PM-DevINE hnuaiah hmarchhak state tan cheng vbc 1500 dah a ni a, heng zinga a zatve dawn lai mai chu Mizoram chanpual tur a ni. India hmarchhak state dangte thîk tham khawpa Aizawl by-pass road siamna tur cheng vbc 500 leh bamboo link road laihna tur cheng vbc 100 dah a ni hi Mizoram tan bung thar pawimawh tak mai leh hmel thar hmuh theih dawrhna tur a ni a, MNYF chuan ropui kan ti hle.

Kan Chief Minister Pu Zoramthanga’n ‘MNF chuan kawngpui kan âtchilh’ a lo tih fo tawh angin, Chief Minister a nih hmasak lai khan World Bank road kan tih tak mai, Aizawl by-pass road, Silaimual to Falkland chu tha taka laih lo ni tawhin tun thleng hian chhuah lama Aizawl helna kawngpui pawimawh leh lûn tak a ni a. Tuna Aizawl tlak lam hêlna kawngpui laihna tur ruahman a ni leh ta hi kawng lun leh tangkai tak, a bikin lirthei lian zawkte tan pawh khawpui lut lova hêlna remchang tak tur a nih ngei kan ring a; Mizoram tana mellung pawimawh tak min siamsaktu thintu Chief Minister Pu Zoramthanga kan chhuang a ni.

Tin, Bamboo Link Road laihna tur cheng vbc 100 hian Mizoram tan rah tha tak a chhuah kan ring a. Bamboo approach road a nih piah lamah a bik takin thingtlang kut hnathawka eizawngten nasa takin an chhawr thei dawn a, feh kawng leh eizawnna kawng pawt tawitu tur a nih bakah, awlsam leh hahdam, hlawk bawk sia eizawnna kawng zawh theihna tur tangkai tak niin kut hnathawktute tan chuan hei hi harh tharna (revival) thlentu pawimawh tak a nih ngei pawh kan beisei bawk.

Hripui leng avanga kan ramin harsatna lian leh khirhkhan tak a tawh mek laia hetiang thu lawmawm tak hriat tur lo awm hi Chief Minister Pu Zoramthanga kan neih vang te, MNF MP tha tak tak pahnih Pu K. Vanlalvena leh Pu C. Lalrosanga te nen inthurual taka ke an pên tlàn zelna rah niin MNF Thalai chuan kan hria a, an hnathawh hian rah duhawm tak chhuahin thang leh thar leh zelte tan pawha hriat reng tlak ro tling a nih ngei kan ring a ni.

Sd/-
(K.C. LALTHANSANGA)
General Secretary
Publicity Department
Memo No. 074/MNYF/PR/2020-22
Dated Aizawl the 4th February, 2022