MINISTER PU LALCHHANDAMA RALTE-IN MIZO HNAM RUNAH A DEPARTMENT HMALAKNA HRANG HRANGTE A SAWI

Mizo National Front
General Headquarters
Mizoram : Aizawl

Press Release

MINISTER PU LALCHHANDAMA RALTE-IN MIZO HNAM RUNAH A DEPARTMENT HMALAKNA HRANG HRANGTE A SAWI

Vawiin March ni 28, 2022 (Thawhtanni) hian Mizo Hnam Runah Chhung Inkhawm neih a ni a. Hun hnihnaah Minister Pu
Lalchhandama Ralte chuan tun ministry kum thum vel chhung kaltaah hian hripui avangin kum hnih zen zawn kan inkharkhip a, sorkar tirh lam leh a hnuah pawh inthlan hrang hrang avangin Election Model Code of Conduct Rules-ten min phuar chang a tam a, hna thawhna hun tha hi thla 9 vel bak kan la nei lo hial ang. Mahse, kan Chief Minister ho hian hun thima he hnam hruai chhuak tur hian MNF hi Pathianin a ruat a ni. Tih duh leh tih chak kan ngah a, kan duh anga kan ti thei zung zung lo erawh hrehawm kan ti a ni. Kan sorkar hnu hian hripui, ramri buai, ran pulh hri leh lirnghing karah Pathian leh kan ram tan titu kan nih avangin mualpho lovin kan la kal zel a ni, a ti.

School Eduacation Minister chuan kan SEDP bu A-1 ah kan culture, sakhua, leh hnam tawng humhalh kan ziah angin Session hnuhnung berah khan Mizo tawng buaipuitu tur ‘Mizo Language Development Board Bill, 2022’ lungrual taka an pass tawh thu sawiin, Zohnahthlak tawng hrang hrang hmangte min phuarkhawm tha ang a, Mizo hnam tan thil hlu leh chhinchhiah tlak tak a nih tur thu a sawi.

School Education Minister chuan, “Education department hi Covid tuartu tam ber kan ni a, kohhran leh private school thlengin kan thla a tliak deuh hnawp a ni. Khati chung khan online hlawhtling taka zirna kal puiin, youtube kaltlangin zirtirna kan pe bawk a. Hripui kara kum hnih chhung khan mid-day meals pawh zirlai nuai hnih chuangah tha takin kan kalpui char char a ni. April ni 5 atangin offline zirna kalpui turin kan inbuatsaih mek a, India ram pumah covid chhung hian kum 2020 leh 2021-ah Board exam siam thei kan ni a, offline-a, MBSE hnuaia exam buatsaih thei kan ni kha a chhuanawm takzet a ni,” a ti.

“SEDP bu 3.4.(2)-ah Mizo hnam chawilar thei tura thangtharteah Mizo Nationalism tuh a nih theih nan hma kan la nasa hle a, pawl 6 atanga pawl 8 zirlaiah ‘Zonun’ tih zirtirna kan telh a. Science leh Mathemstics-ah pawh English hlirin kan inzirtir thin a, academic session tharah chuan pawl 10 to pawl 12-ah Mizo tawnga hriatfiah awlsam turin ruahmanna kan kalpui a ni,” Education Minister chuan a ti bawk.

School Education Minister chuan ‘Aw nang kan Lal kan Pathian’ tih hla chu Mizo hnam thinlunga a reh theihlohna turin sorkar sikul leh private sikulah saktir an tum thu a sawi a. “SEDP bu A. 2.4(6)-a ziah angin kan CM leh Dy.CM. thilphalna azarah Higher Secondary Principal leh Headmaster nei lo thinte kha mi 500 chuangin promotion an hmu tawh a ni. Sorkar hmasaah khan sorkar sikul a tlahniam duai duai a, private sikul an bawh nasa a nih kha. Kan sorkar kum 3 chhung hian sorkar sikul khar ai chuan tihpun belh zawngin hma kan la nasa a, tunah chuan sorkar sikulah admit senloh kan nei ta. Mipui tan man tlawm zawkin free education kan buatsaih theih tak avang hian mipui thinlung a inthlak ta a, sorkar sikulah rinna an nghat ta a ni. Kum 2023 academic session tharah chuan Primary, Middle leh High School-ah uniform inang vek ha turin ruahmanna kan siam a, sikul dangah insawn mahse hautak lo zawkin uniform a ngaia rin theih turin kan ti a ni. School Upgradation chungchangah hri avangin kan sum dinhmun a chhe si a, kan CM hovin sum dinhmun a ziaawm veleh upgrade turin hma kan la mek a ni,” a ti bawk.

Printing & Stationary Minister Pu Lalchhandama Ralte chuan Printing & Stationary department hi a thawm a lian lo na a, department pawimawh tak a nih thu sawiin, sorkar thu pass turte tipuitling tura thawktu a ni bawk a, sorkar sum renchemna tura man tlawm zawka pe chhuak thintu a nih thu a sawi bawk. Labour Employment, Skill Development & Enterpreneurship department chungchang pawh a enkawltu Minister Pu Lalchhandama Ralte chuan sawiin, khawvel ngaihah pawh department pawimawh a ni a. Kut hnathawka eizawngtute hamthatna tur te, thalaite eizawnna kawng hrang hrang daptu a nih thu a sawi a. Workers’ Welfare Board kaltlangin Contractor-te hnen atangin labour cess one percent an la a, cheng vbc 250 deuhthaw an hmuh thu a sawi a, chuta tang chuan mi singriat hnenah sangthum theuha an tanpui thute leh Covid vanga thite an tanpui nasat thu a sawi a. Thalaite thiamna hai chhuahna lamah National Skill Competition-ah pawh Mizo nula leh tlangval kan inpho chhuak tawh a. World Skill Competition thlengin Mizo nula tlangval kan inteltir dawn mek a, Pathianin talent tha tak tak min pekte hi khawvel hriata min pho chhuak turin tan kan la zel dawn a ni, a ti bawk.

He hunah hian tun hnaia zin report chu MNF General Headquarters, General Secretary pathum – Pu Ngurzamlova, (MNF Treasurer Pu K.Vanlalauva hova Lunglei North tlangdung zin chanchin), Pu R.Lalthansanga, (Dy.Chief Minister Pu Tawnluia hova Khawzawl leh a chhehvel zin report) leh Pu C.Lalzamlova, (Pu Ramthanmawia MLA, Vice Chairman, Bamboo Link Road hova E.Tuipui bial) zin report-te ngaihthlak a ni.

Inkhawm hi Pu Rochhunga Ralte, Ex-MLA, Vice Chairman, Land Revenue & Survey Board chuan a kaihruai a, Pu M.Dawngliana Adviser chuan hunserh a hmang a ni.

Sd/-
(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/385
Dt.28.03.2022.

MINISTER PU ROBERT ROMAWIA ROYTE-IN SORKAR LEIBAT DAN A SAWI KHA THUDIK TAK A NI

Mizo National Front
General Headquarters
Mizoram : Aizawl

Press Release

 

MINISTER PU ROBERT ROMAWIA ROYTE-IN SORKAR LEIBAT DAN A SAWI KHA THUDIK TAK A NI

Aizawl 26th March,2022: Tunhnaiah Sports Minister zahawm tak Pu Robert Romawia Royte chuan Reserve Bank of India(RBI) official website atanga Mizoram State sorkar Leiba neih dan la chhuakin MNF Sorkar hnuah Covid hripui karah pawh GSDP (Gross State Domestic Product=State Sum Dehchhuah Zawng Zawng) atanga Leiba percentage chu a tlahniam zel tih a sawi a, GSDP atanga percentage hmanga Leiba chhut chu chhut dan dik ber a nih thu a sawi bawk.

He a thusawi hi Congress party chuan a diklo tidawt silovin mipui bum thei zawngin thuchhuah an siam ve leh pek a, a chauh thubarawh thin ngawt a ni.

Hetianga Minister zahawm takin Leiba chungchanga Eptu party-te dawt sawi thin lehthala RBI official Statement atanga thudik a rawn puang chhuak hi ropui kan ti a. A thusawi dik em em pawh kha a hnuaia figure kan rawn dah nawn leh hi a ni e:-

Mizoram Sorkarin GSDP atanga Leiba % chhuta Leiba a neih dan:-

1. Congress Hun
1. 2014 =60.4%
2. 2015= 51.2%
3. 2016 = 46.7%
4. 2017 = 38.9%
5. 2018 = 38.9%

2. MNF Hun
1. 2019 = 34.9%
2. 2020 = 35.8%
3. 2021 = 32.9%
4. 2022 = 31.2%

A chunga Minister zahawm tak Pu Robert Romawia Royte thusawi khi a dik vek a, MNF Sorkar hnu hian GSDP atanga chhutin Sorkar Leiba hi a tlahniam mek zel a ni. Hei hian kan CM leh FM ni bawk Pu Zoramthanga sum enkawl thiamzia a tilang a ni.

Minister zahawm tak Pu Robert Romawia Royte-in tun MNF Sorkar hnua leiba pung anga Congress leh ZPM-ten an sawi thin dik lohzia RBI Official Statement hmanga rawn puang chhuak a, MNF-in Sorkarna a chan leh kum 2019 atanga sorkar leiba percentage a tlakhniam zel dan RBI Figure a rawn tarlang khan mipui kawngdikah a kaihruaia lawmawm kan ti takzet a ni.

Sd/-
(B.LALHMANGAIHZUALA)
Joint Secretary
Media & Publicity Dept.
Mizo National Front
Memo No.MNF/Media/03/2022/384
Dt.26.03.2022.

Ngaihdan nghet mumal tak nei thei lo tan hruaitu ropui nih a har – K.Vanlalauva

Mizo National Front
General Headquarters
Mizoram : Aizawl

Press Release

Ngaihdan nghet mumal tak nei thei lo tan hruaitu ropui nih a har – K.Vanlalauva

Vawiin ni 25.3.2022 (Zirtawpni) khan Hausiampa Hall, Haulawngah Pu K. Vanlalauva, MNF Treasurer hoin “Mi th ar lawmluh leh Political Training” neih a ni a. Pu K. Vanlalauva hian Lunglei North Block – II huam chhunga party dang aṭangin mi 154 zet MNF-ah a lawmlut.
Pu K. Vanlalauva’n Lunglei North Bial block-II huamchhunga lawmluhte chu:-
(a) Haulawngah – 69
(b) Mualthuam ‘N’ – 23
(c) Hmuntlang – 8
(d) Kanghmun ‘S’ – 6
(e) Zotuitlang – 21
(f) Sekhum – 5
(g) Phaileng ‘S’ – 17
(h) Ramlaitui – 5
Total = 154

MNF Treasurer chuan, ‘Kan party dangdaina em em chu Mizo Hnam Party a nihna hi a hmingah a lang nghal a. Mizo National Front a ni. Congress hotu Pu Hawla, Pu Sawta te, ZPM hotu Pu Lalduhoma leh MBJP hotu Pu Vanlalhmuaka pawh hi MNF chhulchhuak vek an ni tlat.

Politics-ah chuan dawhtheihna leh teirei peihna kan nunpui a ngai a. Ngaihdan nghet mumal tak nei thei lo tan hruaitu ropui nih a har. Tin, pawl tlo tak pawh an nei thei lo. MNF erawh Pathian leh Kan ram tan tih thupuia nei kan ni a, hruaitu dawhthei leh tuarfei em em nei kan nih avangin Kum 60 kan chuangkai thei ta hial a ni’ a ti.

Lunglei North Bialtu MLA Pu Dr. Vanlaltanpuia, MLA chuan welcome speech sawiin, Bialtu MLA a nihna angin kalkhawmten zalen taka MNF party-a hun an hman zel a beisei tih a sawi.

Dr. Tanpuia chuan ‘CM Pu Zoramthanga kaihhruaina hnuaiah MNF party a ṭhang duang hle a. Pathian zarah party bawrhsawm tak, hausa bawk lo hi Kum 60 zet zan khat pawh hming thlak loin a kal tawh a ni. Kan bialin hma a sawn zel a, MZU Southern Campus pawh kan bialah dah a ni dawn a, class kal thuai turin hmalakna chak taka kalpui a ni. SEDP pawh chhungtinte fairelbel khawih zawngin kan sem dâwn tih hi i hre nawn ang u. Lunglei North Bial chhunga tui harsatna pawh chinfel a nih theih nan Dy CM hmalaknain khawtinah Tui pump turin chak takin ruahmanna kan siam tawh a ni’ a ti

He hunah hian Lunglei North Bialtu MLA Pu Dr. Vanlaltanpuia, Chairman, Mizoram Youth Commission bakah MNF General Headquarters a PAC Pu R. Vanlalruata, Pu C Lalzamlova, GS (Lunglei bialtu) bakah hruaitu dangten an ṭawiawm a. Mi thar lawmluh inkhawm hi Pu C. Lalduhawma, President, Lunglei North MNF Block – II chuan a kaihhruai a ni.

Sd/-
(LALLIANZUALA FANAI)
Joint Secretary
Media & Publicity Dept.
Mizo National Front
Memo No.MNF/Media/03/2022/383
Dt.25.03.2022.

Mizo National Front
General Headquarters
Mizoram : Aizawl

Press Release

 

PARTY DANG ANG KAN NI LO, MNF A RAL DAWN LO: Pu Zawma

Vawiin ni 25.03.2022 Zirtawpni hian Mizo Hnam Runah inkhawm program hman a ni a. Thusawitu MNF Vice President Pu Vanlalzawma chuan MNF chu party dangte ang kan ni lo, MNF hi a ral dawn lo, a ti.

Pu Zawma chuan, MNF mipuite zingah kan sorkar emaw, sorkar lo emaw pawha buai ve lo tam tak an awm, a ti a. Serchhip bialah pawh a lang chiang tih sawiin, “Pu Hawla’n kum 20 chhunga a vurte khan kum hnih hnu lekah an phatsan a, by election-ah an candidate-in dahkham a chawi. MNF atang chuan kei ni lo, mi dang pawh ding se dahkham an chawi lovang. Saitual bialah pawh Pu Zira tlin chhoh theih chhan chu party dang ang kan ni lo, kan rinawm tlat, hei hi MNF kan danglamna a ni,” a ti.

“MNF hi a ral mai mai lo ang, headquarters mite pawh hi bang darh vek mah ila, thingtlang lamah bang ve miah lo tur tam tak an awm. Tin, kan hruaitute zingah party-a nghet tlat tam tak an awm,” tiin, phunnawi chang awm bawk thin mah se, party chhuahsan zawng khawsa an awm ve loh thu a sawi a. “MNF chu thuawih thei leh ze nei kan ni a. Mahni hlawkna uma MNF zuang lut kan ni lo. Kan hnam pasalthate pawh kha hlawkna um vanga feh chhuak an ni lo, ram tana pen chhuak an ni. MNF chu a tobul atangin mahni hmasiala kal a ni lo,” a ti.

Pu Vanlalzawma chuan: He hnam run hi kan dinkhawng reng a ngai a, a ruhrel kan awm reng a ngai. Sorkar reng theih a ni lo, sorkar loh ni pawh a awm ang, tiin hnam tan rinawm tak leh lungrual taka thawkho zel turin party mite a sawm a ni.

Pu Lalthlengliana, Vice President pawhin thu sawiin, “Israel fate zingah mi chi hnih an awm, pakhatna chu rinawm taka Pathian zuitu an ni a, a dangte chu Amor ho pathian lalutute an ni. A rinawm zawkte chuan Babulon sala an luh pawhin Jerusalem an thlir tlat a, an kulhte chim chhe vek mah se din thar leh tumin an thlir tlat a ni. Mizote zingah pawh Mizo nationalism leh Indian nationalism a insual reng dawn. Mi thenkhat chuan hnam dang party an zawm a ni. MNF chu Mizo hnam tana ding, hnam pasalthate pawh thisen luang ral raih khawpa ding ngam an ni. He hnam tana rawngbawltu kan nihna vawng nung reng tur kan ni,” a ti bawk.

Inkhawm hi MNF Vice President Pu Lalthlengliana’n a kaihruai a. Pu Ramzauva, Adviser-in hunserh a hmang a. Inkhawmah hian party mi engemaw zat an tel a ni.

Sd/-
(MALSAWMPUIA RALTE)
Joint Secretary
Media & Publicity Dept.
Mizo National Front
Memo No.MNF/Media/03/2022/382
Dt.25.03.2022.

Covid hripui leng mah se Pu Zoramthanga kaihhruai Sorkar kal a kham lo

Mizo National Front
General Headquarters
Mizoram : Aizawl

Press Release

Covid hripui leng mah se Pu Zoramthanga kaihhruai Sorkar kal a kham lo
RRR

Vawiin March 21, 2022 (Thawhtanni) hian Mizo Hnam Run Chhung Inkhawmah Minister Pu Robert Romawia Royte, MNF Adviser ni bawk chuan thu sawiin, “Covid hripui leng mah se Pu Zoramthanga kaihhruai sorkar kal a kham lo, kum 2023-ah chuan Pathian leh mipuite zarah MNF in MLA seat 33 aia tlemlo kan la ang,” a ti.

Pu Robert-a chuan Covid hripuiin kum 2 zet min nuai tawh a, mimal, chhungkua leh pawlin harsatna kan tawk ang bawkin sorkar tan harsatna leh buaithlak a tam khawp mai. Sorkar chuan kalphung zui tur neuh neuh a nei thin a, covid hripuiin min han nuai chiah chu a nghawng a na hle a ni. Opposition-ho phei chuan hripui leng hi an lawm emaw tih turin sorkar beih nan an hmang tih sawiin hetiang hi state danga an tih ngai loh a ni. Covid karah Mizoram sorkar a thuthluang mai mai lova, Mizoram dung leh vangah hmasawnna hnathawh a kal mup mup zawk a; ‘Covid hripui leng mahse Pu Zoramthanga kaihhruai sorkar kal a kham lo’ a ti.

“Kan Sorkar hnuah SEDP aṭangin kawngpui kan siam a. Rs.nuai 80,000 chuang kum thum chhungin Infrastructure siam nan kan hmang a ni. Congress-in NLUP an kalpui chhung khan kawngpui khap khat pawh an siam lo. Kan kawngpui siam hi Rulling mai ni lo, opposition pawhin an chhawr a. Mirethei leh mi hausaten kan chhawr bawk a ni,” a ti.

Pu Roberta chuan, “Mipuiin kan harsatna tawh an hria, kan hotute thiam loh an chantir lo. ‘Hripui leng karah engtinnge hetianga hna hi an thawh theih le!’ min ti hial zawk a. Lungphum tur mai ni lo, a hawn turin min nghak thup zawk a nih hi. Sorkar hmasa, hripui tuar lo leh khuarel chhiatna thleng lo hnuaiah aiin MNF sorkar, hriin a tihbuaiah hian hmasawnna hnathawh a tam zawk a, thawh chhunzawm tur phei chu a insehmur tuau tuau a ni,” a ti bawk.

Thudik chanve hmanga Social Media leh Assembly session-ah opposition hotuten mipui bum tuma thu an sawi thin a dem thu sawiin, “Opposition leader pakhat phei chuan session neih zawh takah khan dawt dawrzawn khat chuang ngawt a sawi a. An dawt sawi an mualphopui a ni” a ti. ‘A sawi leh tur pawh dawt’ an tih zel tawhte kaihhruai ZPM hi zui chi an ni lo tih sawiin, pawl ding thar a awm apianga tlar hmaa ṭhu ṭhin te vek hruaitu nei an ni a, an daih rei pawh a rin loh thu a sawi.

Mizoram Chief Minister Pu Zoramthanga finna leh hmalaknain rahtha a chhuah mek zel a. Central pawhin an duhsak hle tih a lanna chu Union Budget Document-a PMDevine kaltlanga Rs.vbc 600 ngawt min pek thu a lang kha a ni a ti.

Sports Minister chuan MNF sorkar hnuaiah Leiba a pung lo tih hi Mizoram mipuiin hria se ka duh. RBI document tarlanah hian a chiang :
GSDP atanga leiba kan neih dan chu: 2016 ah 46.7%
2017-ah 38.9%
2018-ah 38.9%
2019-ah 34.9%
2020-ah 35.8%
2021-ah 32.9% leh 2022(BE) ah 31.2% a ni a tiin MNF sorkar hnuah State sum thawhchhuah zawng zawng atanga chhutin leiba a tlahniam zel a ni a ti.
Kan leiba neih hi Gross State Domestic Product % atanga chhutin Congress sorkar lai aiin MNF sorkarah a tlahniam hle tawh zawk a ni. Kum 10 zet Congress-in min hruai lai khan hmasawnna a ding thuap a. Covid-in min tibuai lo phei se chu hmasawnna a kal chak hle ang a, leiba hi a tlahniam hle tawh ang a, sang lo ang. MNF sorkar hnu nen khaikhinin hnathawh tam zawk chu MNF sorkar tih deuh vek a ni tih a chiang reng a ni a ti.

Chauh-thu-ba-rawha ‘that loh theih lohna bawm’ han tih hian nuih a tiza, a tahtu pawh hian a timak ka ti. Khatiang bawma khung khawm tur kha han ngaihtuahzui ila, pentawng rim te a nam rum rum ang tih ka hlau’ a ti. MBJP hotuten Mizoram chu President’s Rule-a dah tumin hma an la tih kan hria. Mahse, MBJP-ten tha an tih loh hi Central BJP-ten tha an ti a ni. Rajya Sabha Chairman pawh Mizoramah lokalin Assembly House-ah Pu Zoramthanga kaihhruai sorkar hmalakna leh hnathawh tha a tih thu a sawi a, SEDP pawh tha a tih thu a sawi. Pu Zoramthanga rintlakzia hriain Pu Modi a sorkar chuan PMDevine-ah Rs.vbc 600 min pe hial a nih hi a ti bawk.

Pu Robert-a chuan SEDP-ah chhungkaw 60,000 tuam a ni ang a, Constituency tinah chhungkaw 1,500 thlan hmasak an ni dawn tih sawiin, ‘ First instalment-ah Rs.50000 pek tum a ni a. Sorkar atanga sum pek chhuah reng reng installment zel a ni, Rs.nuai 3 pek hi kan din nghehna a la ni reng’ a ti.

District Council, UT leh State kan nih hnua la thleng ngai miah lo, kum 2022 April ni 1 aṭang hian Rs.vbc 1100 dawngin, Infrastructure atan chauha hman turin sorkar kum bul kan ṭan dawn a, heng sumte hi kan CM Pu Zoramthanga finna leh hmelhriat neih ṭhat zarah Budget pawn lam aṭanga sorkar laipui aṭanga kan dawn tur liau liau a ni. PMDevine Rs.vbc 600 bakah kum kaltaa kan thawh ṭhat avangin Central Assistance Rs.vbc 100 min pek belh a, hei bakah Central Assistance to States Rs.vbc 400 min pe dawn bawk. Hengte belhkhawm a vaia sorkar kum bul kan tanpui tur hi Rs.vbc1100 a ni.

MNF in Pathian hruainaa kum 60 a lo chuangkai ta hi, chapopui mai lo ila. Kan unaute pawh rawn lut zel turin i sawm ang u tiin kalkhawm mipuite a sawm a. Pu Zoramthanga kaihhruai sorkara Minister tinin an department an hneh em em vek a, hna an thawh nasat avangin Kum 2023 ah hian MNF in seat 33 aia tlem lo lak ngeia rin thu asawi bawk.
Vawiin Hnam Run inkhawm hi Pu K.Vanlalauva, Treasurer, MNF General Headquarters chuan a kaihruai a, Upa Sanghmingthanga H.Pautu, Adviser-in hunserh a hmang bawk.

Sd/-
(LALLIANZUALA FANAI)
Joint Secretary
Media & Publicity Dept.
Mizo National Front
Memo No.MNF/Media/03/2022/381
Dt.21.03.2022.

THORANG BIALAH MNF THLI A TLEH ZEL

Mizo National Front
General Headquarters
Mizoram : Aizawl

Press Release

THORANG BIALAH MNF THLI A TLEH ZEL
“Congress-in an sorkar laia Mizoram khaw pakhat India ram pawna an lo dah chhuak daih hi a pawi hle” – Er.R.Rohmingliana
NCC, MNF

Aizawl 12th March,2022 :
Er.R.Rohmingliana, National Core Committee, MNF chuan Thorang Bial a fang mek a, MLA inthlana MNF chhiatna thin Thorang MNF Block II-in a huam chhung (area) chanve khaw 12 zet an fang zo tawh a, heng khua atangte hian Congress atangin voter 177, BJP atangin voter 14, an vaiin voters 191 zet chu MNF-ah a lawmlut a. Thorang bialah MNF thli a tleh mek zel a, MNF-a inpek tum mithar dangte pawh an la insehmur tuau tuau mek zel tih hriat a ni.

Er.R.Rohmingliana chuan heng mithar lawmluhnaahte hian thusawiin, “Congress-in an sorkar laia Mizoram khaw pakhat, Terabonia khua India ram pawna an lo dahchhuak daih mai hi a pawi hle a, Border Fencing pawna awm a nih tawh tlat avangin kalpawh tur pawhin BSF duty-te nen insawi rem fel fe hma loh chuan duh duha kal theih pawh a ni tawh lo. Border Fencing an duh duhnaah an lo siamtir avang hian hmun hrang hrangah ram kan chan teuh hi a pawi hle a ni,” a ti.

Pu Rohminga chuan, “Thorang bialin bialtu MLA bial ngaihsaklo tak an nei hi a pawi hle. Tun Assembly session zo ta hnuhnung berah pawh khan bialtu MLA Pu Zodintluanga chuan a bial tan vawikhat mah thu a sawi lang lo kha a mak a, bial dang daih MLA pahnih, Pu Lawmawma Tochhawng leh Pu Nihar Kanti Chakma-ten Thorang bial tana thu an rawn sawi lang zawk daihte kha a mak hle a ni,” a ti.

Pu Rohminga chuan, Thorang bialtu MLA-in MLA Fund nei ve si a, MLA Fund hmanga Development hnathawh hmuh tur a awm loh hle thu sawiin, “MLA Fund hmanga hnathawh kan hmuh ve chhunte chu New Sachan khuaa bawngin ang mai awngrawp tak, lawng nghahna-Boat Waiting Shed leh Bazar Shed te, Congress Unit President-in cheng nuaihnih leh singnga mana kawr pakhata lei chhete a dawh te chu a ni deuh mai a. Thlanmual kawng samfaia Congress member-te chauhin chawhma chauh te, chawhnu chauh te thawka pawlawh taka hna an thawh thu min hrilhte chu a ni mai a, a mak hle a ni,” a ti bawk.

Thorang bial mipuite hian MLA Fund-a Ambulance lei pakhat Lungleia dah a nih daih thu leh pakhat dang MLA Fund tho hmanga cheng nuai 21 vel man Isuzu car chu bialtu MLA-in a ina private car anga a kawl daih thu an lo hrilhte a sawi bawk.

MNF sorkar hnuah in tinin tui connection an han nei thei ta te, khaw thenkhat ke leh lawng chauha kalpawh theihahte motor-a tlanluh theih a ni ta te chu lawmawm an tih thu Pu Rohminga-te hi bial mipuiten an lo hrilh a ni.

Er.R.Rohmingliana’n Thorang bial a fang kual hi MNF General Hqrs. atangin Pu Lalropuia Pachuau GS, Pu V.Lalbiakzuala Jt.Secy., Pu Ramropuia NEM leh Lunglei Sub Hqrs atangin Pu P.C.Lallawmsanga GS-ten an tawiawm a ni.

Sd/-
(K.ZOTHANKHUMA)
Joint Secretary
Media & Publicity Dept.
Mizo National Front
Memo No.MNF/Media/03/2022/377
Dt.12.03.2022.

Mizo National Front
General Headquarters
Mizoram : Aizawl

Press Release

MIZORAM BOMB NI, ‘ZORAM NI’ HMAN A NI

 

Ni 5.3.2022 (Inrinni) hian Mizo Zirlai Pawl, General Hqrs. huaihawtin Mizoram Bomb champha ‘Zoram Ni’ hman a ni. He ni HYVE Aizawl City Hall-a hman hi Pu Lalruatkima, I&PR Minister, MNF Adviser ni bawk chuan khuallian niin a hmanpui.

Pu Ruatkima chuan thusawiin, MZP-in kum 2008 aṭanga chawl lova Zoram Ni an hmang chu lawmawm a tih thu a sawi a. “March ni 5, 1966 khan Zoram khawvela kan hun tawn lungchhiat thlak ber mai kan tawng a. Aizawl leh Mizoram hmun hrang hrang Indo thlawhtheihna hmanga bomb a ni,” a ti a. “Zoramin zalenna famkim a neih theihna atana British hunlai aṭanga beitu, martar leh pasalṭhate Zoram Ni-ah hian zahna chibai ka buk a, Zofate thinlungah in nung reng dawn a ni,” a ti.

MNF Adviser chuan, “British-in tihluihna hmangin Zofate min awpbet a, 1947-ah tihluihna hmangin Indiaah min hnutchhiah ringawt a. Hemi avanga hian zangna dawmna min pein thupha an chawi dawn lo’m ni? India hian Mizoram an bomb avangin thupha an chawi dawn lo’m ni? India-ah hian sorkar do zawnga ralthuam lek chi hrang hrang an lo awm tawh a, Mizote chiah hi indo thlawhna Jet fighter hmanga beih awmchhun kan ni,” a ti a. “India kha mahni ram mipui indo thlawhnaa bei awmchhun a ni awm e. Sawinep theih a ni lo. Thudik chu India-in a hria a, Mizo mipuiten kan hria a ni. khatiang tuarna kha tu hnam mahin tuar tawh lo se kan duh a ni,” a ti bawk.

Pu Lalruatkima chuan, “Kan hnam Pasalṭha, Lalnu Ropuiliani leh Khuangchhera leh he hnam zalenna atan beitu pasalṭhate inpekna i hre reng ang u. An tum ram zalenna mei hi a mit tur a ni lo. Zofa hmun hrang hrang – Bangladesh, Burma leh India-a ṭhendarha awmte hi rorelna pakhat hnuaiah zalenna famkim neiin kan la insuihkhawm leh ngei ang. ‘Kan sakruang Mizoram tan’ ti zel thei turin kan inbuatsaih a ṭul a ni,” a ti a. “Zofate thinlungah Nationalism hi thar reng se ka duh a. Kan ram lo hi ram dang kan nei lo a, kan hnam tan theihtawp i chhuah zel ang u,” a ti bawk.

Zoram Ni hmanna hun hi Pu Andrew F Lalramnghaka, MZP Vice President-in a kaihruai a. Pu F Vanlalrochana MPS leh Pu Lalnunmawia Pautu MZP President te’n thu an sawi bawk a, sawm bik a nih angin MNF Treasurer Pu K.Vanlalauva pawhin a telpui a ni.

(Sd/-LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/03/2022/376
Dt.05.03.2022.

Hunserh bik Ni kan ngah hi MNF chu a ral ve mai mai dawn lo tih tilangtu a ni’ – Pu Vanlalzawma,MNF Vice President

Mizo National Front
General Headquarters
Mizoram : Aizawl

Press Release

‘Hunserh bik Ni kan ngah hi MNF chu a ral ve mai mai dawn lo tih tilangtu a ni’
– Pu Vanlalzawma,MNF Vice President

Vawiin March ni 1, 2022, (Thawhlehni) MNF-in Indepence a puan ni ‘Mizo National Day’ hian New Serchhip YMA Hall-ah MNF Serchhip East Block chuan Mizo National Day hmanna leh Political Training an nei a. He hun hi MNF Vice President Pu Vanlalzawma chuan a hmanpui.

He hun hmanpuitu MNF Vice President Pu Vanlalzawma chuan thusawiin, “Kan hotute remruatnain helai bialah hian bye election-ah khan ka lo ding a. Kan tlin leh tlin loh chu thuhran daih a ni. Theihtawp in lo chhuahnaah kan chhungkua kan lawm takzet a ni. Phunna tur leh vuina tur ka hre lo. Thahnemngai taka kan thawhhonaah khan lawmthu ka sawi a. Chutih rualin, Kum 20 chuang Congress hotupain a thut a, Chief Minister thau sawk pha renga awm si kha, kum hnih lekah Serchhip khaw pa congress-in an dintir a, chu chu phatsanin ZPM an vote thei kha a mak a, a chhan lian ber chu Congress-ho lelohzia tilang chiangtu a ni,” a ti.

Pu Zawma chuan, “MNF Kum 60 kan tling tawh, Diamond jubilee kan hmang mek, harsatna tam tak karah he party hi a lian tawlh tawlh a, harsatnate tawk mah ila kan hma hi a eng em em a. MNF party a ral dawn lo tih hi ka sawi duh. A chhan chu Pathian hruai party a ni tlat a ni. A chhan lian deuh pakhat chu, MNF hian ni pawimawh kan nei tha em em a. Independence puan champha Mizo National Day hi a pawimawh em em reng a, kan hmang kum tin dawn a ni. Tin,
June ni 30, ‘Remna ni,’ July ni 7 kan Hnam Pa ‘Pu Laldenga thih cham,’ Sept ni 20 ‘Martar day,’ October ni 22 ‘MNF din ni,’ December ni 16 ‘Exodus day.’ MNF Kan danglamna, party dangte neih ve loh hun serh bik ni kan ngah hi en ila, MNF hi a ral ve thei dawn lo tih tilangtu pawimawh a ni. Chauh ni awm mahse, heng nite hian a tivul leh thin dawn a ni.
Kan hmalam hun lokal zel turah vawiin nia kan ni pawimawh March ni 1 hi a la pawimawh deuh deuh zel dawn a ni,” a ti a.

Martar Thlanmual chungchang sawiin Pu Zawma chuan, “Martar Thlanmual, Luangmuala mi khu tun sawrkar hian sawrkar kuta dah leh enkawl turin ruahmanna a siam mek a, a chhan chu he ram leh hnam tana martar vek an ni. MNF tana martar an ni lova, chuvangin Martar Thlanmual hi sawrkar enkawl turin tunah hian ruahman mek a ni ta a ni,” a ti bawk.

Kum 2023 inthlan lo awm tur chungchang sawiin MNF Vice President Pu Zawma chuan, “Tun inthlan lo awm turah hian kawl a eng chho zel dawn, MNF mi leh sate kan tanrual a, nghet taka kan awm chuan hnehna hi awlsam tein kan la dawn a ni,” a ti.

Serchhip Block MNF-in National day leh Political training an neih hi Pu C Vanlalsiamthara, President MNF ‘E’ Block, Serchhip-in a kaihruai a, hmanpuitu MNF Vice President Pu Vanlalzawma hi MNF Gen.Hqrs. atangin Pu Ngurzamlova, GS leh hruaitu dangten an tawiawm a ni.

Sd/-
(LALLIANZUALA FANAI)
Joint Secretary
Media & Publicity Dept.
Mizo National Front
Memo No.MNF/Media/03/2022/372
Dt.01.03.2022.

MNF-IN MIZO NATIONAL DAY HMANG

Mizo National Front
General Headquarters
Mizoram : Aizawl

Press Release

MNF-IN MIZO NATIONAL DAY HMANG

MNF hi Mizo Nationalism kengtu kan ni, min chhuhsak tum thin mah se: Pu K.Vanlalauva, MNF Treasurer

Vawiin March ni 1, 2022 hian MNF General Hqrs. chuan Mizo Hnam Runah ‘Mizo National Day’ (independence puan ni champha) hman a ni a. He hun hi MNF Vice President Pu Lalthlengliana’n a kaihruai a. Thusawitu MNF Treasurer Pu K. Vanlalauva chuan independence declaration changchang leh MNF chu Mizo nationalism kengtu a nih thu a sawi.

MNF declaration leh a vuakvet chungchangah Pu Auva chuan, India sorkar rawn chet dan avangin January ni 14, 1966 khan Pu Laldenga hovin Zarkawtah emergency meeting an nei a. Indian nationalism-in Mizo hnam bawhbeh a tumna chu dodal a tul tiin Zoram independence puan an rawt thlu ta tih a sawi a. He independence day puan champha hi ‘Mizo national day’ tiin hlut taka hman chhunzawm zel a ni, a ti.

“MNF chuan retheih huamin hnam movement kan kalpui a, India sorkar nen kan inkap a. Kan Mizo nula leh tlangval sang telten kan declaration – kan hnam – nationalism humhim nan India nen kan indo a, tam takin nunna an hlan a ni,” tiin MZP lam pawhin Independence puan a nih hnu deuh March ni 5, 1966 chu India sorkarin mahni ram ang pawha ngai lo ang hrima Zoram a rawn bomb ni a nih angin ‘Zoram Ni’ tiin an hmang thin a ti bawk.

“Hnam movement kan din chhan chu nationalism a ni”, tiin Pu Vanlalauva chuan nationalism chu politics nen a kalkawp tlat avangin hruaitu zingah harsatna a awm chhoh thu a sawi a. India sorkar intelligence atangin Pu Laldenga hming sign chuanna lehkha (siamchawp) a lo chhuah vanga Founder Pu Laldenga meuh pawh President atanga paih a nih lailawk dante a sawi a. Amaherawhchu, chunglam remruatna zawkin miten nationalism kengtu nihna min chhuhsak tum thin mah sela, MNF hi nationalism kengtu ziding niin a kal ta zel a, malsawmna pawh a kengtel zel a ni, a ti bawk.

Mizo national day inkhawmah hian MNF Adviser Pu C.Lalramzauva’n hunserh a hmang a. Headquarters hruaitu engemaw zat an tel a ni.

Sd/-
(MALSAWMPUIA RALTE)
Joint Secretary
Media & Publicity Dept.
Mizo National Front
Memo No.MNF/Media/03/2022/373
Dt.01.03.2022.