Mizo National Front
General Headquarters
Mizoram : Aizawl

Press Release

MIZORAM POLITICS-AH MNF CHU NO HRINGTU, A PUI BER A NI: Pu Auva, MNF Treasurer

Ramhnuai atanga chhuak party danga kalte zingah Leader hlawhtlingzui an awm lo’

Vawiin ni 29.04.2022 Zirtawpni chawhma dar 11 hian Mizo Hnam Runah Chhung Inkhawm neih a ni a. Zin report-te ngaihthlak a ni a. Pu K. Vanlalauva, MNF Treasurer-in thusawiin, MNF chu Mizoram political party-a no hringtu nu ber a ni, a ti.

MNF chuan kuminah diamond jubilee lawmna kalpui thei dinhmuna ding leh October 22 hian jubilee closing ceremony neih a nih tur thusawiin, “MNF hi Mizoram political party-ah chuan a pui ber leh no hringtu ber a ni. Pu Hawla pawh 1966 khan MNF-ah a tel ve a, kan fa hrin a ni,” a ti a. “Pu Lalsawta pawh hi kum 1993 khan MNF ticket-in Aizawl South II-ah thlantlin a ni a. Kan fa hrin a ni tih a ngaihtuah chhuak fo mai thei.

“BJP President Pu Hmuaka pawh hi MNF joint secretary lo ni tawh a ni a. ZPM leader Pu Lalduhoma pawh hi MNF general secretary lo ni tawh thin a ni,” tiin ram roreltu leh hotu ni tur chuan kan nun inen uluk a ngai hle,” a ti.

Party dangte chungchang: “ZPM chu movement an nih lai chuan duh duh sawi a rem. Unit leh block neih tul ti lo, Chakma rama unit neih tul ti lo an nih kha. Party an nih hnuah chuan an thusawi thinte sawi a rem ta lo. BJP Northeast enkawltu pawhin nakum Mizoram inthlanah BJP kan sorkar dawn a ti. Awih a harsa a ni. Central-a Congress pawhin hruaitu an dap mek a, pawn lam miten hruaitu tur an dappui a ngai hial tawh a ni.

“National party leh tualto party-ten an pa ber, MNF hi min rawn bei reng a. Mizoram sorkar hi sum enkawl thiam loa puhin min tihchhiat tum mah se, kum hnih chhung hripui avanga harsatna kan tawh karah leh central funding hmuh mumal theih loh karah essential commodity-a harsatna kan tawk miah lote hi sum enkawl that vang a ni,” a ti.

Pu Auva chuan MNF President Pu Zoramthanga chungchang sawiin, “Vawiina kan leader hi Pu Laldenga hnena training la a ni a. Pu Denga secretary niin Mizo hnam movement chi hrang hrang inzir thiama pass a ni a. Pu Denga awm loh hnuah vice president ni sa a nih angin President a ni zui ta a ni. Pu Laldenga chu leader ni mah se, Delhi-ah a awm daih a. Pu Rama chu Arakan-ah leader a ni a. Hnam movement zirtirna petu ber a ni.”

“Ramhnuai atanga chhuak, party danga lutte zingah leader nia hlawhtlingzui ta an awm miah lo, a chhan chu hnam movement an phatsan vang a ni. Leader tha ni tur chuan kal kawi kal kawi lo nih a ngai,” tiin party danga peng kawi tawhte chu mipuiin leader thaah an pawm a rin loh thu a sawi.

Inkhawm hi Pu Lalhmingliana, NCC-in a kaihruai a, Pu VL Chhuanga Chhangte, Secretary-in hunserh a hmang a. Pu Lalthanliana, GS-in zin report a, Minister Dr.R.Lalthangliana bialah mithar 221 MNF-ah an lawmluh thu a sawi. Inkhawmah hian party mi engemaw zat an tel.

Sd/-
(MALSAWMPUIA RALTE)
Joint Secretary
Media & Publicity Dept.
Mizo National Front
Memo No.MNF/Media/03/2022/408
Dt.29.04.2022.

Mizo National Front
General Headquarters
Mizoram : Aizawl

Press Release

Hun harsa hmachhawn tlak tura Pathianin a chher Chief Minister Pu Zoramthanga kaihhruaina hnuaiah hripui leng mahse hmasawnna hmel thar tam tak Mizo mipuiten kan hmu mek zel a ni – L.Thangmawia, MLA

Vawiin ni 27.4.2022 (Nilaini) hian Pu L.Thangmawia, MLA, Vice Chairman, HRD Board chuan Sihphir Neihbawi-a Health Clinic Centre thar a hawng a. Hun harsa kara Mizorama hmasawnna tam tak thleng mek chu lawmawm a tih thu sawiin, “Hun harsa hmachhawn tlak tura chung lamin training harsa tam tak a lo paltlangtir Chief Minister Pu Zoramthanga kan nei hi Mizoram tan malsawmna ropui tak a ni a, mi inngaitlawm leh taima, zu leh sa leh mipat hmeichhiatnaa fihlim CM kan nei ringawt pawh hi kan kristianna nen a inhmeh hle a ni,” a ti.

Pu Thangmawia chuan “Zoramin zalenna a sual lai kum 1960 chhoa Mizo hnam tana penchhuakte kha Contract leh therhlo beisei tur awm lo, ral hmaa thi mai thei tih inhre chunga chhuak an ni a, tunlaia politics-a kan luh chhan nena tehkhin chuan an ngaihsanawm takzet a ni” a ti a.
“Chutiang mi bik zingah hian kan CM zahawm tak Pu Zoramthanga hi a tel a, CM nih duh vanga zalenna sual a nih lohzia chu amah ngeiin a hriat ka ring a, tute emawin CM nih phak a harsat em em laia Super CM tia invuahchawp a, zahtheihloh chhuaha an lo inzuar ve ngawt te nen chuan chhim leh hmar ang a ni,” a ti.

Pu Thamgmawia chuan, Pu Zoramthanga CM a nih hmasak lai khan sawrkar officer motor kawl thei chin tihtlem a lo ni tawh a, hei hian sawrkar motor repair-na bill sang tak leh tul lova sawrkar sum sen a tihniam hle a. Tun tuma tawnhriat nei chunga CM a nih nawn leh hnu hian Financial year tawp dawna sawrkar office hrang hrangte tlaivar ngai khawpa an awm thinna te, treasury khar hial ngai thin ang te kha a tibo ta vek a ni. BJP sawrkarin Swatch Bharat a kalpui hma daih khan Clean Mizoram Society-a lo din daih tawh a ni a ti a, CYMA Office hnuaiah office neiin Pu C.Chuaukunga(L) chu CEO-a dahin Mizoram pumpui huapin faina beihpui a lo thlak daih tawh a ni a ti. Thlaite tana hmala tur Mizoram Youth Commission leh Mizo hnam tana mellung pawimawh Mizo Language Development Board-te pawh a CM laia a ngaih pawimawh avanga din a ni pawh hian Super CM inti ve lo mahse hnam hmangaihtu a nihzia a tilang chiang hle a ni a ti.

Pu Thangmawia chuan Sihphir Neihbawiin an mamawh em em Health Clinic Centre thar an nei ta chu a lawmpui thu a sawi a. “Hriselna tel lo chuan hausakna leh thildangten awmzia an nei lo a ni,” a ti a. “Covid-19 hripuiin khawvel pumpui leh Mizoram min tuam chungin, Pu Zoramthanga kaihhruai MNF sawrkarah hian hriselna lama hmalakna kawngah nasa takin hmasawnna a thleng mek a. Health Clinic Centre 327 hawn thar a ni a, Health Sub-Centre 247 lai mai chu Health and Wellness Centre-ah hlankai a ni a, henga thawk tur hian Health & Wellness Officer 240 zet mai chu lak fel an ni tawh a ni. Heng a nih theih nan hian Health Minister zahawm tak Dr R.Lalthangliana leh a thawhpuiten rim takin hna an thawk a ni,” a ti.

Pu Thangmawia chuan, Aizawl East-I bial chungchang sawiin CM bial an nih avanga duhsakna tam tak an dawn mek hi an hmuh hmaih loh a duh thu a sawi a. Aizawl East-I in an la neih ngai loh hmasawnna hrang hrang a awm tawh thu sawiin, Bialtu Chief Minister zahawm tak hmalakna zara bial chhung hmun hrang hranga inkawlpawhna kawng thar sial a ni te, kawng thawmthat ngaite chak taka thawh mek a ni te, thalai infiammite tana Zuangtui hmuna Sport Complex – Futsal Ground, Volleyball Court leh Basketball court siam tura hmalakna hmuh theiha a awm ta te, Zembawk Futsal ground tur Tender a ni ta te leh Zemabawk North Field Tender tura hmalak a ni mek te chu lawmawm a tih thu sawiin, Aizawl East-I bial mipuite a lawmpui thu leh an nihlawh a tih thu sawiin, Aizawl East-I biala Hmasawnna thar duhawm tak tak thleng mekte hi bial mipuite leh an bialtu Chief Minister te thawhhona that vang a ni a ti a, Chief Minister chu East -I bial mipuiten tawiawm zel turin a sawm nghal bawk a ni.

Pu Thangmawia chuan SEDP chungchang pawh sawiin, “MNF sawrkar tirh atangin SEDP hi a taka kalpui nghal a ni a. SEDP sum atangin Mizoram mamawh tam tak cheng tam tak sengin thawh a ni tawh a. Kumin Financial Year atang phei chuan kuthnathawktute hnen thleng phakin Mizoram chhungkaw tam takte hnenah an eizawnna a lo hlawhtlin theih nan MLA bial tinah chhungkaw 1500 tuamhlawm an ni dawn a. A thawhkhatna first instalment atan Rs 50000 aia tlem lo pek phawt an ni dawn a, a trade azirin a tul anga second instalment pek an ni zel dawn a ni,” Pu Thangmawia chuan a ti bawk.

Sihphir Neihbawia Health Clinic Centre hawnna hun hi Pu Lalnelawma, Vice President, Sihphir Village Council chuan a kaihruai a, Pi Lalbiakdiki, Treasurer, Village Council, Sihphir chuan hun serh hmangin Pu PC Lalrinliana, Secretary, Sihphir Village Council chuan report a pe bawk.

Sd/-
(B.LALHMANGAIHZUALA)
Joint Secretary
Media & Publicity Dept.
Mizo National Front
Memo No.MNF/Media/03/2022/405
Dt.27.04.2022.

CENTRAL SORKARIN MIZORAM BJP AIIN MIZORAM SORKAR A DUHSAK ZAWK – Robert Romawia Royte,MNF Adviser.

26th April 2022 : MADC Election ni 5.5.2022-a neih tura MNF Party tana campaign mek Pu Robert Romawia Royte Adviser, MNF Gen. Hqrs. & MoS chuan ni 25/4/2022 khan Siaha Hnam Runah Press Meet neiin Mizoram BJP-in MNF Sorkar an bei chiam chiam chu Central lama an hotuten an nuihzat a rin thusawiin, “Central Sorkar chuan Mizoram BJP aiin MNF Sorkar a ngai pawimawh zawk a, Central-a NDA sorkarah MNF hi ruling party zinga mi kan nih ve avangin MADC-a MNF Sorkar a din hunah pawh Central Sorkar hotute pawh a lawm ber ber tur an ni leh ang,” a ti.

MoS Pu Robert Romawia chuan, “Mizoram state-ah MNF sorkar nghet takin a ding a, tuna a lan dan chuan Pathian leh mipui zarah kum 2023 election-ah pawh MNF bawk a sorkar leh ang. Mara mipuiin state sorkar do tlattu MADC-a sorkar neih fuh lohzia chu kan hre tawh a, chak taka hmasawnna a kal theih nan MNF party hi Mara mipui tan a tha ber, MNF Party hi Mara mipuite ta a ni,” a ti.
Minister chuan, “Kum 50 chhung Siaha District-in roreltu a neih fuhloh thin avangin hmasawnna a thanthu rei tawh a. Chuvangin, Zoram hmun dang umpha turin Tripple Engine Sorkar(Sorkar pathum tangrual) a mamawh. MNF hi Central-ah Ruling Party zingah a tel ve a, MNF MP-te pawh Parliament-ah Treasury Bench(Ruling tlarah) an thu a ni. Keini Minister-te pawh hi Central-ah chuan Ruling Minister kan nih angin ngaih pawimawh kan hlawh hle thin. Chuvangin MADC-ah MNF a tlin chuan Engine Lian 3, viz Central Sorkar Engine, State Sorkar Engine leh MADC Sorkar Engine-te tanghovin Siaha district hmasawnna hi thapui thawhin kan nawr ang. State sorkar tel lovin MADC sorkarin engmah a ti thei lo tih hrechiangtute tuna MADC-a BJP sorkar lai hi an ni,” a ti.

MNF Adviser chuan, “6th Schedule chu research degree a lakna anih thusawiin, “MADC hian 6th Schedule-in hamthatna a ken tel tam tak a taka a chan theih nan MNF Party chuan hma a la dawn a, Siaha district tan huapzo ruahmanna pawh siam tum mek a ni. Central Sorkar leh State sorkara malsawmna tam tak haichhuaka Mara mipuite tana vanneihna thlen thei tur MADC-ah roreltu neih a tul ta tak zet a ni,” a ti.

Minister Pu Robert Romawia Royte chuan, Mizoram Sorkar chu Zoram Kristian Mipuite thlanchhuah a ni tih sawiin, Mizoram BJP unauten namthluka President’s Rule-a dah an tum chu mitin mak tih a ni tiin Kristiante uluk taka inngaihtuah a ngai a ni a ti.

Mnf Adviser hian Siahaah Street Campaign neiin Siaha mipuite MNF vote turin a sawm a, ”MADC-ah hmasawnna do tlatlotu a sorkar a ngai tawh a; chu chu MNF party a ni,” a ti.
Chhimlama ZPM dinhmun hi hria se Aizawl lama ZPM-te saw an tha a na ngawt ang tiin MADC-a sorkarna chan inbeiseia insawi siin Candidate tur 8 an hmu hram a ni a ti a. India ram pum huapa Congress tlakchhiatzia sawiin, “Siaha district-a Congress ni mekho pawh BJP Returnees an ni fur mai anih hi” a ti a. MDC bial hrang hrangte a tlawhkualnaah Minister Pu Roberta chuan Pathian leh mipui zarah MADC-ah MNF a sorkar dawn avangin Opposition bial nih bik a fuh dawn lova, MNF huk mai chu a fuh ber a ni a ti zel bawk a ni.

“Kan hriat theuh angin SEDP chu rampum huapin Benificiary Oriented-in kalpui a ni tan ta a. Sawrkarin a tih thin dangte a tih tho dawn avangin Zoram tan a hlu hle dawn a ni. MADC-ah Congress-in rorelna a chang fo tawh a, tunah BJP-in rorelna an vuan mek bawk. Anni party 2 hian Mara mipuite khawiah nge min hruai a, tunah hian eng dinhmunah nge kan din tak le? Thlan nawn leh chi-ah kan ngai em aw?tiin MADC-a sorkarna la chang ve ngai lo MNF Party hi Siaha District hmasawn nan leh kan Kristianna hum him tlat a nih zel nan Sorkarna i pe ve chhin ang u hmiang. Tichuan Siaha District hmasawn nan MADC Engine, State Sorkar Engine leh Central NDA Sorkar Engine tanghovin kan nawr dawn alawm tiin mipuite a sawm a ni.

Minister Pu Robert Romawia Royte hian Chhaolo bial te, No’aotla bial te leh Siaha Tla bialte tlawhkualin Siaha khawpui veng thenkhat a tlawh bawk a. Rawminbawk bial leh Campaign Committee-in tlawh tul nia an hriatte a tlawh kual zel ang.
MNF Adviser Pu Roberta hi MNYF Gen Hqrs Hruaitute leh Siaha District Hotuten an tawiawm a ni.

Sd/-
(F.LALBIAKZAMA)
Secretary
Media & Publicity Dept.
Mizo National Front
Memo No.MNF/Media/03/2022/404
Dt.26.04.2022.

Mizo National Front
General Headquarters
Mizoram : Aizawl

Press Release

‘Kan sorkar hi Covid hripui leng karah a ṭhuthluang mai mai lova, hna hi kan thawk nasa a ni’ – Tawnluia, Sr.Vice President.

Vawiin 25.4.2022, Thawhtanni hian Mizo Hnam Runah Pu Tawnluia, MNF Senior Vice President leh Deputy CM ni bawk chuan mi paruk MNF-ah a lawmlut. Lawmluh tharte hi Pang Zirlai Pawl General Headquarters Aizawla Hruaitu lo ni tawh ṭhinte – Herbert Ramengmawia, Ex President, K. Lalremkima, Ex-Gen. Secretary, Henry Lalchuailova, K. Vanlalzauva, Siamthanzauva, leh Laltlanthara-te an ni.

MNF Senior Vice President Pu Tawnluia chuan, ‘Mizo hnama lo piang tawh phawt chu hnam party MNF-ah an lo piang a ni kan ti thin. Chuvangin lawmluh tharte pawh inkiltawih miah lo turin ka sawm a ni’ a ti. MNF hi Mizo Hnam Party awmchhun a ni. MADC inthlan kan hmachhawn mekah pawh vannei turin chance ṭha tak kan nei a. Kan chak ngei kan beisei a ni. Kan President-in sorkar leh party min enkawlnaah hian kan pumkhat a, party chhungah neuh neuh a awm lo. Nitina Pathian hnena inhlana ṭawngṭai ṭhin hruaitu kan neih avangin kan hlawm ṭha em em a, hei hi kan chakna hnar a ni mek a ni. Leadership lamah party dang angin neuh neuh kan nei lo a ni.

Kum thum hnuah kar hmasa khan ka bial ka fang ve thei chauh a. Kum hnih chhung zet hrileng avangin hna thawk mumal thei lo mah ila, kan theihtawp chhuahin rah ṭha a chhuah mek a. Hei hi Zoram mipuiin an hmu a, nakum inthlan lo awm turah pawh hian sorkar turin MNF lo chu an awm lo tih hi mipui ngaihdan a ni tih hi ka hmuhdan a ni a ti.

SEDP hi Zoram mipuite enkawl a, hmasawnna leh changkanna tura kan duan a ni a. Hemi hi hriain SEDP hi mipuiin duhsakna min hlan chhan, sorkarna min pek chhan a ni. Kan sorkar tirh aṭangin kan Flagship Programme hi kan kengkawng char char tho a. Zoram ruhrel siam nan – Kawng siam nan te, zirtirtu rawih nan te kan hmang a. Mipui nawlpuiah hmalak pawh tum mah ila kum hnih zet inkharkhip chhung khan a theih chuang loh tih kan hre vek awm e. Tunah chuan mipui hne zawngin, beneficiary thlangin chhungkaw 60,000 hnenah tanpuina pe turin ruahmanna kan siam a. Constituency tinah chhungkaw 1, 500 thlan chhuah hnenah ₹50,000 ṭheuh bul ṭan nan kan pe dawn a ni.

SEDP Board 14-te hi chu an kal ngaiin an kal reng ang. SEDP Governing Board, SEDP Executive Board, District Level Board din fel vek a ni tawh a. SEDP Village Board hi April thla chhunga ruatfel vek tur a ni. Trade hi naktuk April 26-ah thlan fel vek a ni dawn.

Kuthnawthawktu leh mi harsa zawkte tana bul ṭan nana ruahman SEDP hi a dawngtuten an tangkaipui em em ang tih kan ring tlat a ni. SEDP-ah hian Chhungkaw lam hawi (Family oriented) bakah hian ram hmasawnna ruhrel (Infrastructure) – kawngpui, Lei dawh,, zirtirtu lak etc siamna tur kan dah tel vek a ni.

Kum 1986-a Inremna kan ziah (MoU)-ah khan Border Trade lama hmalak hi tarlan vek a ni a. Myanmar lama sumdawnna tur Zokhawthar khi kan sorkar hmasakah kan hawng a. Tunah Silsuri-ah Bangladesh nen insumdawn tawnna tur hmalak a ni leh ta. Bangladesh Commerce Minister Tipu Munshi leh a zuitu mi 11 zetin Mizoram an rawn tlawh mek a. Bangladesh sorkar pawh kan ko ei chho ta hi a lawmawm. Border Haat hi a hlawhtlin hunah Zoram Chhim lam tan malsawmna a ni dawn a ti.

SMART City hi sorkar hmasaah bul ṭan niin hmalakna erawh a awm hman lova. Hemi hnuaiah hian ṭhalaite tan infiamna ṭha siam nise kan ti a. Tuivamitah Vbc 7 chuang man Phullem phah a ni dâwn a, kan tender tawh a. Edenthar-ah vcb 9 sengin phullem phah, Hlimenah vbc 6 sengin phullem phah a ni ang, contractor thlan fel a ni tawh. High Field-a phullem phahna tur tender a ni tawh bawk. Zemabawk Field pawh vbc 24 sengin phullem phaha chei ṭhat a ni dawn a. Chite Field tuaihnum nan vbc 5, Durtlang field-a phullem phah nan vbc 18, hei pawh hi tender turin peihfel a ni tawh. Heng bakah hian Zemabawkah futsal ground, Zuangtuiah Indoor stadium, Chaltlang DIET hmunah Multipurpose Hall, vbc 20-in kan siam dawn a, Tender a ni tawh.

Lammualah Vbc 1 sengin Laldenga Cultural Centre siam kan tum a. Luangmualah Music City, Vbc 12 sengin kan siam dawn a. Tin, Vbc 42 senna tur New Market chei ṭhat a, tunlai thei ang bera siam a ni dawn. Covid chhung pawhin smart city-ah chauh pawh hetiang hian hna kan thawk a ni.

SIPMIU-ah Aizawl khawpui tui lak belhna tur Setlaklui, Tanhril ramah buaipui a ni a. Pipe phum zawh ṭep a ni. Nakkum March-ah hawn theih a, mipui hnena tui hnianghnar sem theih kan tum. Tawi tlâng aṭangin Gravity-a tui lak a ni dawn a, vbc 100 senna tur hi pipe kan phum mek. Hei hian Aizawl chhim lam tlangdung, ZMC te pawh chawm vek thei tura ruahman a ni.

Kan sorkar hi Covid hripui leng karah a ṭhuthluang mai mai lova, hna hi kan thawk nasa a ni. Kan Ministry hian Central sum haichhuak tur hi chuan hma kan la nasa hlawm em em a ni. Bawlhhlawh sawngbawlna hi Aizawl chhim (Hualngohmun), chhak (Tuirial), thlang leh hmar lamah (Sihphir) nei turin ruahmanna kan siam.

UDPA hnuaiah Aizawl khawpui tei velna tur siam ṭhat nan Sustainable urban transport project siamin Finance Ministry-in min sawipui hnuah ADB aṭangin US Dollar mtd 248 kan puk thei dawn ta a ni. Inremna thuthlung pawh nikum khan kan ziak fel vek tawh a. Consultancy firm-in Aizawl khawpui an zirchiang dâwn ta a ni.A survey chhung hian kum 3 vel a duh dawn. Kawng chhawng aia ṭha zawk pawh awm thei tura beisei a ni a ti.

Vawiina PZP hruaitu hlui Lawmluh thar aiawha thusawi Herbert Ramengmawia chuan MNF chu ram leh hnam tan khawthlir thui tak nei, belh tlak a nih vanga zawm a nih thu a sawi. K. Lalremkima pawhin thu sawiin, ‘Mizorama nationalism tuipuitu, Zofate suihkhawma kuahkhawm ṭhin party chu MNF ngei nia a hriat avangin a zawm tih a sawi.

Mizo Hnam Run inkhawm hi Pu MS Dawngliana, General Secretary-in a kaihhruai a, Pu JH Biakmawia, Adviser-in hunserh a hmang. He hunah hian Pu Lalthanliana, Gen. Secy chuan Pu Lalrinliana Sailo bial an fan report a pe a. Hmun tinah Congress an mawih vek tawh thu a sawi. Pu H. Ramdinliana, Secretary hnen aṭangin Siaha District Zin Report ngaihnawm tak ngaihthlak a ni bawk.

Sd/-
(LALLIANZUALA FANAI )
Joint Secretary
Media & Publicity Dept.
Mizo National Front
Memo No.MNF/Media/03/2022/402
Dt.25.04.2022.

Mizo National Front
General Headquarters
Mizoram : Aizawl

Press Release

*INTHLAN DAWN KUM HNIH KHAT HI ZAWLNEI DERTE LO CHHUAH HUN A NI

*Electric hrui zam hnawk zual, power station chhe zual leh ban chhiate thlak turin hma kan la mek  -R.Lalzirliana, Power Minister

Dated Aizawl, 22nd, April, 2022 (Friday) :- Vawiin chhun dar 11:30 hian Mizo Hnam Run Chhung Inkhawm hun hnihnaah Power Minister Pu R.Lalzirliana chuan Aizawl khawpui chhunga electric hrui zam hnawk zual leh mipui tana ninawm zualpui te, power station chhe zual tihthatna tur te, electric ban chhe lutuk tawhte thlakna turin cheng vbc 700 atanga 800 chu DPR siamin a thuphungin min pawmpui tawh a, Local Council-te leh official-te nen tang tlangin kan enho mek zel a ti.

Pu R.Lalzirliana chuan, “Meghawatt 400 pe chhuak thei tur Chhimtuipui (Kolodyne) pawh ngaihtuahna sengin hma kan la mek a. State thenawma power kan chawkluh hi engemaw intihbuai thilah kan inthlunzawmna hruite hi min tihchhiatsak theih avangin ei leh bara intodelh kan tihmakmawh angin power-ah pawh kan intodelh a ngai. Thawk khat laia political party pakhat electric bill pung tam tia phun phuna sawiseltute khan an zu chian meuh chuan a punna a tam lo tih an zu hmu a. Tu pawh sorkar se Power Tariff hi kumtin JERC-in a ennawn thin a ni. ‘Power department-a thawktute hi indaih lo hle mah ula, a thawktuten a hmaa inthawh letin thawk rawh u’ tih hi ka hrilh thin dan a ni. NABARD nikum sum hmang khan kuthnathawktute zau hrang hrangah eng pelut a, power hmanga hnathawk thei turin hma kan la mek a ni,” a ti a. Land Resorces, Soil & Water Conservation Minister chuan kuthnathawktute tan rubber ur rona tur Rubber Smoke House 50 zet sak mek a nih thu a sawi bawk.

Pu R.Lalzirliana chuan, “Covid avangin hun rei tak kan khaihlak a, central atanga kan dawn tur tam tak kan dawng lo a. Tun hi chhel a ngaih hun lai tak, Mizo kan ni tih kan lan chhuahna hun a ni. Mizo taka ‘kei kei’ ti lova, ‘nang nang’ tih hun lai a ni a, ‘Pathian leh kan ram tan’ titu party chuan kan hriat makmawh a tul a ni,” a ti a. Pu R.Lalzirliana chuan inthlan dawn kum hnih khat hi Zawlnei derte lo inlan a, lo chhuah leh hun a ni a. Kan eptute lam hi an fingin thu leh hla an thiam si a, Zawlnei derte hian rulling party hi an bei duh bik a, i fin khalhin i fimkhur tlang ang u. ‘Sorkara la tel ve loten ro an rel ang a, mi thar hlakin ro an rel ang’ tihte hi awih reng reng loh tur. Khawi party-ah pawh mi thar hlak a awm theih loh a, rorel tur dang a awm theih loh. ‘Mizoram First Movement’ intite paw’n Lengpui Airport chei that chungchangahte FIR ka thelut an ti a, an chiri leh tan der tawh a. Kan Zawlnei leh Puithiam Lal ber chu Lal Isua ni zawk rawh se,” a ti.

“January thla vel ni tain ka hria, Thlarau duk dak lo chang pakhatin Pathian Biakin chhungah meuh Chief Minister puan a bahtir a, a hnua an interview lehnaah khan CM a hmuh theih mai loh thu a sawi a, tum tak tak ni se, Biakin chhungah lo khan hmuhna hun a tam lutuk. Biakin thianghlimna (sanctity) tibawlhhlawh a, mimal leh sorkar zahawmna tibawrhbang thei ang hi chu kan Police-ten man hmak hmak mai se tih hi kei chuan ka duh dan a ni. Politics thil leh thil dangah pawh Pathian hmakhalh hi Pathian huatzawng tak a niah ka ngai, Pathian hi hmakhalh lovin a hnungzuitu nih a pawimawh zawk,” Pu R.Lalzirliana chuan a ti bawk.

Chhung inkhawmah hian Prof.L.H.Chhuanawma chuan tun hnaia MADC inthlang tur campaign-in Chief Minister Pu Zoramthanga hova an zin report a pe a, party hrang hrang atangin mi thar 514 an lawmluh thu a sawi a, tuilet hnua MNF-in sorkarna kan la siam ngai lohna hmunah sawn Pathian leh mipui zarah MNF-in sorkarna a siam ngei kan ringnghet tlat a ni a ti. Pu H.P.Zonunsanga Joint Secretary pawhin Deputy Chief Minister Pu Tawnluia hovin, Tuichang bialah tun hnaia party hruaitute nen an zin report a pe a, heng khaw hrang hrangahte hian bialtu MLA leh MNF sorkar hnathawh an hmuh avangin MNF VC thar a piang nasa a, mi thar engemaw zat an lawmlut a, hun remchang hmasaa lawmluh tur mi tam tak an chhawlchhin thu a sawi.

He hun hi Pu F.Aithanga, PAC member-in kaihruaiin, Pu N.Zokunga Adviser-in hunserh a hmang.

Sd/-
(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/400
Dt.22.04.2022

Mizo National Front
General Headquarters
Mizoram : Aizawl

Press Release

MNF rawn zawm tharte pawhin an thupui berah chuan ‘MNF chu kan ram leh hnam tana ding ngam an nih vang a ni’ an ti zel – Vanlalzawma MNF Vice President

Vawiin ni 22 April, 2022 Zirtawpni hian Aizawl South – II huamchhunga Thakthing MNF Unit-te chuan mi 46-te hnenah Puanthui khawl an sem. He huna khuallian MNF Vice President Pu Vanlalzawma chuan thusawiin, “Vawiin nia Thakthing MNF Unit-ten in thawhchhuah hmanga khawl sem nachang in hria hi a ropui ka ti a, in entawn tlak hle a, a Pathian thu em em bawk a ni,” a ti. “MNF hi party dang nen kan inanglo hle a, kawng tam takah inanna anga lang pawh pawh a awm mai thei e, mahse MNF chu danglam taka din, a bul tanna atang rengin Mautam tuar tanpui tura lo dingchhuak a ni a, chuvangin, he ram leh hnam tana an kal zelnaah pawh ram hmangaih vangin silai pawh an tung hial a ni,” a ti. Pu Zawma chuan “Serchhip bial bye election-ah hnehna kan chang zo ta lova, amaherawh chu lawmna em em mai ka neih chu kum 20 chhung opposition-a lo awm tawh kan party mite an tawrhna ka hmuhin party tan an rinawmna khi ropui ka ti em em a, Congress party te kum 20 chhung harsa miah lova an awm chungin bye election-ah chuan dahkham an chawi tlat mai a. Keini kum tam tak awpbeh tawh kan ni chung pawhin kan la tha em em a, chuvangin MNF party hian ropuina thuk tak kan nei a ni,” a ti.

MNF Vice President Pu Zawma chuan, “Zirlai pawl leh pawl lian tak tak atangin MNF party hi an rawn zawm zel a, an lo luh chhanah MNF rawn zawm tharte pawhin an thupui berah chuan ‘MNF chu kan ram leh hnam tana ding ngam an nih vang a ni’ an ti deuh zel a, MNF chuan thuawihna kan ngai pawimawh em em a, vawiin nia hetiang hun hmang tura min sawm hi ka lawm em em a, MNF history-ah pawh kan hriat zen zen loh hun hmang tura min sawm hi a lawm takzet a ni tiin Ram leh Hnam tan, party tan theihtawp chhuah zel turin kalkhawmte fuihna thu a sawi bawk a ni.

Khualzahawm AMC ward No.17 bialtu Pu David Zohmangaiha pawhin thusawiin, “Mi 46 lai mai eizawnna tur, rohlu tling kan unit-ten in sem thei hi a hlu ka ti em em a, kan khawtlangah hmasawnna ngaihtuahna nei chunga Unit-in hma in la hi lawmawm ka ti a, Thakthing veng MNF unit-te khawtlang tana tangkai tak ni chho zel turin duhsak ka hlan che u a ni,” a ti.

He hun ah hian Aizawl South – II MNF Block President Pu Lalrindika Chhangte leh Thakthing Veng Local Council Chairman Pu H.Lalnunsanga pawhin thu an sawi bawk a ni.

Sd/-
(B.LALHMANGAIHZUALA)
Joint Secretary
Media & Publicity Dept.
Mizo National Front
Memo No.MNF/Media/03/2022/401
Dt.22.04.2022.

Mizo National Front
General Headquarters
Mizoram : Aizawl

Press Release

Project lian hmachhawp – Bamboo Link Road; Aizawl By-pass Road Pahnih leh Leiverh; Flyover; Bus Terminal

Vawiin ni 18.04.2022 Thawhtanni chawhma dar 11 hian Mizo Hnam Run-ah chhung inkhawm neih a ni a. MNF Vice President Pu Vanlalzawma’n zin report a pe a. Adviser to Chief Minister (Technical) Er. K. Lalsawmvela pawhin thu a sawi a, Peace Bonus ang bawka thil awm lo, kan pu phuahchawp pahnihna a lo chhuak, tiin bamboo link road sual chhuah a nih dan party mite a hrilh.

Pu Vanlalzawma chuan May ni 5, 2022-a Mara Autonomous District Council (MADC) inthlan lo awm tura inbuatsaihna tlangpui leh Siaha zin report a pe a. MDC seat 25 awmnaah MNF tlin beiseina biala thawhhona a that thu leh an inlungrual thu a sawi a. MNF-a lawmluh mi thar 598 an awm thu leh MNF boruak a kang tih sawiin, Candidate tur thlan kawngah pawh seat/ticket beiseitu zawng zawngte nen inremsiamna fel tak an neih dante report pein, “MADC inthlanah kan chak ngei kan beisei” a ti.

Thusawitu Er. K. Lalsawmvela, Adviser to CM (Technical) chuan Mizoram Sorkarin project lian tham a kalpui mek chanchin a sawi. Heng zingah hian Bamboo Link Road chu Chief Minister Pu Zoramthanga tumruhna leh hrat lak vanga hlawhtling mek a nih thu sawiin, “Thil awm ngai lo, kan puin a phuahchawp pahnihna a lo chhuak leh ta,” tiin Union Budget (Mizoram tan)-a Rs vbc 100 dah a ni chu, Peace Bonus nen khan a inang chiah tih a sawi.

Bamboo Link Road lo pian chhuah dan sawiin Pu Sawmvela chuan, tun MNF sorkarah Chief Minister Pu Zoramthanga’n Delhi a zin hmasa berah khan Bamboo Link Road a nawr nghal a. RD, Agri. leh Horti. changtu Union Minister dawr a ni a, thil tih theih a ni loh thuin a lo chhang. MoRTH dawr a ni leh a, highway lo chu an ti thei lo. Niti Aayog dawr a ni leh a, a hlawhtling thei chuang lo. A project (road) hming thlak tura thurawn an lo pekte chu CM Pu Zoramthanga chuan state dangte thal ve theih loh tur kher a duh avangin, beidawng lovin a nawr zel a. A tawpah Finance Ministry-in an lo pawmsak thei ta a ni, a ti.

“He Bamboo Link Road hi kan pu phuahchawp a ni a, Peace Bonus hming phuahchawp nen khan a inang chiah a. Phuahchawp rau rauah a tak taka pawisa awm a ni,” a ti.

Er. Sawmvela chuan a tirah Bamboo Link Road concept paper Rs vbc 965 siam a ni a. Finance Ministry chuan pilot project atan Rs vbc 100 ni phawt se tiin Union Budget-ah an dah ta tih a sawi a. He hna hi pilot project (enchhinna) a nih angin ministry lamin an enfiah vek dawn avangin hmun hrang hranga sem darh lovin hmun hnihah i.e. Lengpui – West Serzawl leh Tuirial Airfield – Hmar Chaltlang lamah kalpui tur a ni a, hemi atan hian guideline siama nghah mek a ni, a ti.

Adviser to CM Pu Sawmvela chuan Aizawl By-pass Road project chi hnih chungchang a sawi bawk a. Pakhatna chu Union Budget-a Rs vbc 500 lo lang chu KM 40 vel, double lane tur, lei lian (major bridge) pathum a awm dawn a. Sihhmui – MZU hnuai – Lawipu hnuai – Tlangnuam – Hlimen – Samtlang – Hualngohmun leh Melriat inkarah chhuakin Lunglei road a pawh ang. “Tunah hian DPR siam mek a ni a, sanction kan nghak,” a ti.

Aizawl By-pass Road pahnihna, chu pawh chhim leh chhak pan tur tan khawpui kaltlang lovin KM 28.9-a sei Sairang chhak Kurung lui kanin Rangvamual epah chhovin leiverh pahnih (twin tunnel 9m ve vea zau) KM 2.40 (Bawngkawn Brigade ruam atanga Muthi ruam thleng), heta tang hian Tuirial Airfield – Seling thlen hmaah a chhuak ang. He hna hi NHIDCL thawh tur a ni a, Rs vbc 715 vel tura DPR siam mek a nih thu Pu Sawmvela chuan a sawi.

Heng bakah hian Bawngkawn leh Vaivakawnah Flyover siam turin feasibility report pawm a ni tawh a. TCIL Company nen MoU ziah tur a ni dawn a, tunah hian Law deptt vet ngaite nghah mek a ni a. Tin, Chaltlang Bus Terminal tur pawh BOT (built-operate-transfer) project outsourcing tura ruahman mek a nih thu a sawi bawk a ni.

PWD hnuaia Contractor hna chungchang sawifiahin Adviser to CM Er. Sawmvela chuan, “A fund lokalna azirin PWD hnuaia Contractor registered nih kher a ngai lo. Kan kawng hnathawktu hnam dang company-te pawh hi registered contractor pakhatmah an awm lo,” a ti bawk.

Inkhawm hi ZOHANCO Chairman Pu C. Lalrammawia’n a kaihruai a, Pu JH Lianchungnunga, Adviser-in hunserh a hmang a. Inkhawmah hian party mi engemaw zat an tel a ni.

Sd/-
(MALSAWMPUIA RALTE)
Joint Secretary
Media & Publicity Dept.
Mizo National.Front
Memo No.MNF/Media/03/2022/398
Dt.18.04.2022.

Mizo National Front
General Headquarters
Mizoram : Aizawl

Press Release

MNF chu nationalism-a chiang, chuta innghat tlatten an din a ni  -Lalthlengliana, Vice President

ZPM hi MLA inthlan laia ZPM ang kha an ni tawh lo. MPCC President thar hi a hrechiangtu chu East-II mipui kan ni
-Robert Romawia Royte, Minister

Vawiin April ni 14, 2022 (Ningani) chhun dar 12:00 hian ‘Aizawl East-II MNF Block Political Training’ chu Armed Veng South Community Hall-ah neih a ni a. Heta resource person MNF Vice President, Pu Lalthlengliana chuan MNF hi eng vanga lo ding nge, enge a din chhan leh a thil tum tihte sawiin, “MNF chu nationalism-a chiang, chuta innghat tlatten an din a ni a. Nationalism chu hnam rilrupu dik tak, rahbehna hnuai atanga tal chhuah a, mahni kea din duhna a ni a, chuta tang chuan hnam hla, national anthem te a lo chhuak a ni. MNF chuan India-in min awpna atanga tal chhuah a, zalenna (full sovereignty) nei turin kum 20 chhung India kan do a, Independence Declaration kan puang a ni. Zoram mipuiin lei rem a rah hma loh chu kan kal zel ang titu party kan ni a, kan ngaih pawimawh ber chu ‘Pathian leh kan ram tan’ tih a ni. Khawi ramah pawh nationalism a pian a, chumi denchhena party a lo ding a nih chuan mahnia ro inrel duhna neiin an awm a, tam takin mahnia ro inrelna an neih phah a ni. Israel ram pawh a te hle na a, an nationalism rilru avangin heti khawpa khawvel hriat hlawh an ni. MNF pawh a policy tihlawhtling turin mi tam takin nunna an chan a, hnam martar tam tak an awm phah a, chu mi party-a awmte chu kan ni a, kan party ang hi Mizoramah an awm ve lo. Congress emaw ZPM tha nia ngai tlatte hian an bihchian loh vang a ni. Kan Chief Minister Pu Zoramthanga ang tluk hi Mizoramin kan la nei lo a, budget piah lama sum tam tak sawi chhuak thin a ni a, Pathianin mal a sawm a, a ropui takzet a ni. Amah sawisel thintute hian a ne pawh an ek lo, a sawisel thintute hi lo inbihchiang teh se,” a ti.

Bialtu MLA, Pu Robert Romawia Royte Minister pawhin, “Covid avangin kum hnih thil ti hlei thei lovin kan awm a, tunah hetiang hun tha kan hmang thei hi a lawmawm ka ti hle a ni. Aizawl East-II MNF hi election hnuhnung ber Chhinga Veng local council bye election thlengin Pathian leh mipui zarah kan la tha tluang zel a, AMC-ah ward 9-ah hnehna sang tak kan chang bawk a, ward 8-ah erawh MLA-ah chak hle mah ila, kan vanduai ta hlauh a ni. Nakkum inthlanpuiah hnehna sang tak nei turin MLA atanga Unit level thlengin insiam that zel kan tum mek a, MNF chu Pathianin mal min sawm zel a ni. Kan Chief Minister Pu Zoramthanga anga thiltithei leh taima hi hmun dangah an awm ve lo. Union budget-ah khan bamboo link road atan cheng vbc 100/- Mizoram ta tur an ziak lut a, Aizawl by pass road atan cheng vbc 500/- pek kan ni bawk a, Mizoram tana Union Budget atanga direct-a kan hmuh hi a vawikhatna a ni. Kum 2 liamta chhung khan Covid hrileng khirh tak karah sum a lo chhuak mai thei thin lo a, engkim a harsa a, tlemin SOP-te kan inthlahdul ta a, kan hotuten theihtawp an chhuahna hi a ropui takzet a ni,” a ti a.

“ZPM nihna leh a chhunga mite hi mipuiin an hre tan tawh a, thalai, zirlai leh YMA thlengin an hre chiang tawh a. MLA inthlan laia ZPM ang kha a ni tawh lo tih kohhran hruaitute thlengin an hre tawh a.Thalai leh zirlai hruaitu hluite pawhin MNF party bawk an thlang leh thin.ZPM leh Congress-ah mi pangngai an lut duh lo, an kiam mek zel a ni. ZPM chhunga awmho hi mipuiin an hre chiang zel a ni. Inthlan lo awm zel turah an nihna a lang ang. Congress pawh kan hria a, an President pawh hi Aizawl East-II mipuite a hre chiangtu kan ni a. Aizawl East-II mipui mamawh chhang thei lotu hian Zoram mamawh hi engtin mah a chhang thei lovang. Kum 10 chhung khan Aizawl East II-ah enge a tih kan hria a, a intiam angin a awm lo hle a ni. MPCC president thar hi Aizawl East-II mipuiten kum 10 chhunga a thiltih kan hre chiang hle a ni. Tunah chuan MNF chauh loah chuan party dangah beisei tur a awm lo. Aizawl East-II bial chhunga hmalakna tam tak a awm Dawrpui bikah pawh cheng nuai 1000/- telin hma kan la mek a ni. Armed vengah Field chhawng pawh chak takin kan kalpui mek a. Armed veng lei che thin pawh hma kan la tan dawn bawk a, Chite-ah pawh Field ropui tak kan din dawn a ni. Chite Convention Centre pawh state sorkar sum ni lovin cheng nuai 4000/- man tan thuai a ni ang a, a bulah cheng nuai 3000/- man bazar-pui sak kan tum mek bawk.Chite-ah hian power sub-station cheng nuai 1000/- in kan din dawn bawk a ni.
Aizawl East II-ah hian kum 2023 MLA election-ah pawh MNF bawk a tlin leh ngei a rinawm hle a ni,” Pu Robert Romawia Royte chuan a ti bawk.

He hun hi Pu H.Malsawma Block President-in a kaihruai a, Upa Bawlliana Chhinga veng chuan hunserh a hmang a, Pu C.Laldingliana Block Secretary chuan report pein, Pu H.Lalrinawma Block Vice President chuan lawmthu sawiin hun a khar.

Sd/-
(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/397
14.04.2022