MNF Sawrkar vanga hripui hi leng a ni lo-Dr. K. Pachhunga, MLA

Mizo National Front
General Headquarters
Mizoram : Aizawl

PRESS RELEASE

Dated, Aizawl, 30th May, 2022(Monday) MNF Sawrkar vanga hripui hi leng a ni lova, khawvel hmun tinah he hri hian mi zawng zawng min tibuai a ni -Dr. K. Pachhunga, MLA, Vice Chairman, Bamboo Development Board. GOM

Vawiin Mizo Hnamrun chhung inkhawmah Dr. K. Pachhunga, MLA,Vice Chairman, Bamboo Dev. Board chuan thu a sawi a. “Hnam boral mai tur, missionary te hmangin Pathianin min chhanchhuak a. Chumi kal zel chuan, Mizote ah hnam rilru tuha lo awmin, hruaitu hmasa Pu Laldenga ten hmahruaiin tun hun hi kan lo thleng ta a. Kan duh dan ni hauh lovin, hripui alo leng a. MNF Sawrkar vanga hripui hi leng a ni lova, khawvel hmun tinah he hri hian mi zawng zawng min tibuai a. Sawrkar zawng zawngin, inrinlawkna nei miah lovin, a ṭha ber tur nia kan hriat angin kan hmachhawn tlang a ni,” a ti.

MNF ten MLA 28 kan neih theih nachhan hi mi rilruah khawngaihna a awm avang leh Pathian remruat a ni a. Mi zawng zawngte duhber kan nih loh avangin social media-a beihna kan tawk ṭhin hi thilmak a ni lo a. Social media-a inbeihna hian a tak ram a thleng ngailo. Sawrkar/MLA te hi _fehkawnga thing ding_ ang deuh hi an ni a. A kal apiangin an sah leh an vawm kan ni fo thin a. Amaherawhchu, hei hi kan ṭhatlohna leh fellohna tehfung atan erawh a hman tlak loh a ni.

Kan ramin hma a sawn lo hle anga kan sawi fo hi thudiklo a ni a. Inkalpawhna kawng tha, ei leh bar hnianghnara kan hmuh theihna atana taima taka thawk mek sawrkar kan ni a. Zirna lamah hma kan sawn zel a, NE a University neitha ber te zinga mi kan ni a, kan college te pawhin grade sang zawk an hmu mek zel a ni. Kan hruaitute thawhrimna avangin hripui vanga nunna chân pawh ka tlem hle a. Health infrastructure lamah pawh hmuh theihin hmasawnna a awm a ni. Kan sawrkar hian thiltha zawng zawng a ti vek seng rihlo a. Nasa lehzualin kan bei zel anga, a vur kum_ kan thlen thuai a beiseiawm a ni, a ti.

Dr. K. Pachhunga hian, kan ram hruaitu hmasate, engmah thawklo leh ek tluk leka chhuah ching party ṭhenkhat an awm thu sawiin, hei hi mipuite rilru ti hrisello tu an ni a. Lalna leh thuneihna chauh atchilhtute hian mi thilṭha tih an hmu theilo a ni, a ti. _Zir hun laia lehkha zir peihlo, exam huna entawna 1st a pass tum, fel leh ṭha bera inngai, mi leh sa nei silo, mi dawihzep te hi an lal ngailo_, kalphung thar tih fo pawh hi independent kan nih ngawt loh chuan a kalpui tak tak theih loh, tiin a sawi bawk.

Hnathawh ṭhalo leh tlolo tak takte hi Congress hunlaia thawh a ni a. Kum 10 an sawrkar chhungin NLUP bak sawi tur an neilo a. Kum 10 chhunga Bamboo Dev Fund an hmanna hmuh tur a awmloh thu a sawi bawk.

Thil hrechianglo leh zir chianglo a, mipui bum leh mipuite rilru ti hrisello zawnga, engkima a chhe zawnga sawrkar puh leh bawlhhlawh vawmkhawm nana kan hmang ṭhin hi a dikloh thu a sawi bawk.

Mizote hian midik, thilṭha ti, langtlang kan duh a, chu chu kan sawrkar pawhin a hmalak mekna a ni a. Hlothlawh laia intodelh a harsat avangin, sawrkar chak leh ngialnghet lehzual MNF in a siam ngei a beisei thu a sawi bawk.

He hunah hian Pu HP Zonunsanga, Secretary MNF Gen. Hqrs.hnen aṭangin, ni 27th May, 2022 a Pu Lalthlengliana, Vice President MNF Gen. Hqrs. ho a, Political Training, Mamit-a hman anih chungchang report ngaihthlak a ni a. Pu H. Laldingliana, Gen. Secretary, MNYF Gen. Hqrs.hnen aṭangin, ni 27th May, 2022 a Pu K. Vanlalvena, MP(RS) Mualcheng khawtlangin chawimawina hun an hman chungchang leh ni 26th May, 2022-a Zirlai tiṭha chawimawina hun, Sailulak khuaa neih chungchang ngaihthlak a ni bawk. Pu NT Thatlua, Gen. Secretary, Siaha Dist. hnen aṭangin, MADC inthlan chungchang leh Siaha Dist report ngaihthlak a ni bawk.

Chhung inkhawm hi Pu Ramkinlova, Adviser, MNF Gen. Hqrs. chuan kaihruaiin, Pi Lalhmangaihzuali,Gen. Secretary, MNWF Gen. Hqrs. chuan hunserh a hmang a ni.

Sd/-PETER CHHANGTE
Joint Secretary
Media & Publicity Dept.
Mizo National Front
Memo No.MNF/Media/03/2022/429
Dt.27.05.2022

MP mal mah ni ila kan zam bik hauh lova, kan tih theih ang chinah kan tlanchhe lo a ni – C.Lalrosanga

Mizo National Front
General Headquarters
Mizoram : Aizawl

Press Release


Dated, Aizawl, 27th May, 2022(Monday)

Vawiin Mizo Hnamrun chhung inkhawm hun hnihnaah Pu C. Lalrosanga, MP Lok Sabha chuan thu a sawi a. “MP te hian palai hna kan thawk ber a- Mizoram sorkar leh sorkar laipui inkarah te, mipui leh Minister inkarah te kan thawk a ni ber. Covid vangin kum 2 leh a chanve dâwn kan buai a, sorkar laipui pawh an buai tho a. Covid dona kawngah MP Fund min cut saka, hlawh min cut sak bawk a. MP mal mah ni ila kan zam bik hauh lova, kan tih theih ang chinah kan tlanchhe lo a ni.

Assam Rifle sawn chhuah chungchang hi Mizo mipuite rilruah a tla nâ hlawm hle a, Parliament-ah te ka auchhuahpui bawk a. Union Home Minister Pu Amit Shah pawh nikum kumtawp lam khan ka hmu a, Assam Rifle sawn chhuah chungchang chauh ka sawipui a ni. Home Secretary ah te kan nawr zel a. Tun hnaiah kan Deputy Chief Minister Pu Tawnluia chu Delhi-ah a lo kal a. Assam Rifle sawn chhuah chungchanga inrawnkhawmna Aizawla nei turin hotute a rawn be pawp thei ta a. AR sawn chhuah kawngah Hmasawnna hmel a lo lang ṭan zel dâwn a ni.

Myanmar lam aṭanga raltlan lo lut, kan unaute thlavang hauh kawngah kan CM leh Minister te an ṭang na em em a. Keini pawh Parliament ah kan ṭan nat ngam phah a ni. Kan unau Raltlan lo lutte tan theihtawp kan chhuah mek a. Ṭanpuina pe tur pawhin Sorkar laipui kan dawr kual zel a. CM hmalakna zarah Sorkar laipui pawh raltlan chhawmdawl kawngah an hmin chho mek a ni”.

Mizoram Sorkar hotu hrang hrangten, Delhi lama hna bawhzui ngai an neih kawngah amah chu pur hreh lo turin MP chuan a ngen bawk. Mizoram tan theihtawp chhuah a inhuam reng tih hriatsak turin a chah bawk.

Central Sector hnuaiah Mizoramah hmasawnna hna nasa tak thawh a ni mek a. Kawngpui ṭha zawk sial mek a ni te hi Mizoram tan hmasawnna hnukpui tur a la ni dâwn a. Sorkar laipui ruahmanna in Bairabi thleng Rel kawng lian kan nei thuai dawn a ni. Central Sector lam chi reng rengah company lian emaw sorkar laipui company ten an tihtur ang ang ṭha taka an tihhlawhtlin ngei theih nan theihtawp a chhuah zel thu a sawi bawk.

MP Pu Rosanga chuan Parliament a auchhuahpui tura duh nei an awm chuan engtik lai pawhin an rawtna te a hnena thlen turin a ngen bawk.

Chhung inkhawm hi Col. Ramnundanga, Adviser, MNF General Hqrs chuan kaihruaiin Upa Dr. H. Lallenmawia, Adviser chuan hunserh a hmang.

Sd/-
LALLIANZUALA FANAI
Joint Secretary
Media & Publicity Dept.
Mizo National Front
Memo No.MNF/Media/03/2022/424
Dt.27.05.2022

MNF VICE PRESIDENT-IN MNF TOBUL, THIL TUM LEH NIHPHUNG A SAWIFIAH

Mizo National Front
General Headquarters
Mizoram : Aizawl

Press Release

MNF VICE PRESIDENT-IN MNF TOBUL, THIL TUM LEH NIHPHUNG A SAWIFIAH

Pu Zoramthanga kaihhruai sorkar hun reilote hian congress sorkar kum 10 chhunga a thawh ai khan hna a thawk tam zawk – MNF Vice President

Vawiin May ni 27,2022 (Zirtawpni) hian MNF Mamit Center Block huaihawtin ‘Political training’ chu I & PR Conference Hall, Mamit-ah neih a ni a. He hun hmanpuitu leh resource person Pu Lalthlengliana, MNF Vice President chuan
MNF party lo din chhan, a thil tumte leh MNF nihna a sawifiah. MNF chu Nationalism a chiang, chuta innghat tlat mi tlemte Pu Denga leh a hoten October ni 22, 1961 khan an din tih a sawi a. Nationalism chu mahni hnam leh nihna a chiang, hnam dang ziarang rawng kai lo, hnam rilru pu dik tak, hnam dang rahbehna hnuaia awm duh lo, mahni a ro inrel leh mahni kea dinchhuah duhna rilru pute an ni a ti.

Pu Lalthlengliana chuan MNF chuan India-in min awpbehna hnuai atanga zalenna famkim (full sovereignty) chu zofaten kan neih theih nan March ni 1, 1966 khan khawvel hriatah Independent a puang a. MNF chuan zalenna famkim kan neih theihna turin zum leh hriam karah kum 20 tal tap India sorkar ropui tak kha an do a. Hetiang ang political party hi Mizoramah pakhat mah an la awm ve lo a ni tiin, MNF atang vek lo chuan an awm thei leh tawh ngai loh tur thu a sawi. India sorkar leh MNF an indo avangin Mizoram chu thing leh raw innawhna, tuboh leh dolung inkarah an awm a. Kha tih hun lai khan harsatna tamtakin Zoram a tlak buak avangin political party leh NGO-te pawh an rawn au chhuak a, kohhran aiawh 7 pawh London-ah zu kalin Pu Laldenga chu India sorkar be turin an ngen a. January 1976-ah mipui leh Kohhran ngenna avangin London atangin India ramah Pu Denga a rawn thlawk lut a, Home Secretary S.L Khurana leh Pu Denga-ten inhriatthiamna thuthlung chu ni 18.02.1976-ah an ziak a, Ni 7.7.1976-ah Mizorama Biakin tinah lawmthusawi tawngtai rualna an nei tih a sawi a. Kum 10 chhung harsatna tam tak paltlangin June ni 30.1986-ah inremna thuthlung ziah fel alo ni ta a ni. India Constitution pawh Mizoram tan bika tihdanglam (amend) hial a lo ngai ta a, constitution amendment article 371/G hlu tak kan neih tak thu a sawi. Remna alo awm takah chuan MNF chu Party thiang alo nil eh ta a. India nen inremna neiin kan lo awm ta a, hetah hian kan economy dinhmun kan sawisang zel ang a, politics-ah fullstop a awm lova kan kal zel dan tur chu kan la ngaihtuah ang a ti.

“Kan hnamin zalenna a sual avangin Mizo hnam party ‘MNF policy’ (thil tum ber) tihlawhtling tur hian Mizo hnam martar tam tak an awm phah a ni. Israel ram pawh hi a area-ah chuan Mizoram ang leka te leh zim a ni. Mahse, Nationalism-ah an chian em avangin vawiin thlenga khawvel ram ropui berte zingah a tel a, Nationalism avangin May 14,1948-ah Independent an hmu a. Salah te hruaia awmin ram hrang hrang, hmun hran hranah rahbeha an awm hnuah hruai darhin an awm a, mahse; nationalism rilru chu an put tlat avangin hun reilote chhungin an ding chhuak leh thei ani,” MNF Vice President chuan a ti.

He ta resource person chuan, “MNF danglamna chu sorkar hmasa hmalakna reng reng, ram ram tana tha turah chuan a hlamchhiah ngai lo. Kum 1998-ah kan sorkar khan District thar 5 chu congress sorkar hmasain a thu chauha a hawn kha term khat chhung lek khan pangngai takin kan function tir a, District thar 5 chhunga hmasawnna khan ram pum tan hmasawnna tam tak a paw chhuak a. Kum 2008-a, District thar 3- Hnahthial, Saitual leh Khawzawl-te chu congress sorkar kum 10 chhung khan a tipuitling duh lo a, kum 2018-ah kan sorkar leh a, thla 8 chhung lekin kan tipuitling leh hman vek a ni,” a ti bawk.

Pu Lalthlengliana chuan, “Kum 2018 November-ah kan sorkar a, krismas-in min nang zui a, 2019-ah MP (LS) kan thlang leh a. Conduct rules-in min phuar a, hnathawhna hun tha kan nei hman lo. Kum khat vel hna kan thawk dawn chauh a, Covid-in kum 2 leh a chanve vel min nuai leh a, khawvel sorkar ropui ber economy thlengin a ti chhia a, thla hmasa vel atang khan covid a ziaawm tan a, hna kan thawk ve tan dawn chauh a. Party worker ten beisei ang hna in la hmu lo tih kan hria a, lo beidawng mai suh u,” a ti.

“Congress sorkar kum 10 chhung khan hripui a leng ve lo. Kan sorkar chhung hian mihring pulh hri mai bakah ran pulh hri thlengin a leng a. Khaw chhak lamah lir a nghing reng bawk a, Burma ral tlan tam tak kan mikhual a, ramri a buai a. Bugget-a awm lo sum tam tak department hrang hranga mite pawhkhawm a ngai a. Heti chung hian Pu Zoramthanga kaihruai sorkar hun reilote hian congress sorkar kum 10 chhunga a thawh ai khan hna a thawk tam zawk. Hripui len lai khan ei leh bar, buhfai leh gas-ah harsatna kan tawk lo a, sorkar hnathawk hlawh kan ba lo a, kawngpui tha tam tak kan sial zawk a ni.” a ti bawk.

“Kan CM anga thil ti thei leh taima hi hmun dangah an awm ve ka ring lo. Union budget-ah bamboo link road atan cheng vbc 100/-, Mizoram ta tur a ziak lut a. Aizawl by pass road atan cheng vbc 500/- pek kan ni bawk. Mizoram budget piah lam, union budget atanga direct-a kan sum hmuh hi a vawi khatna a ni. Special Assistance-ah cheng vbc 400 kan hmu bawk. State sorkar sum ni lo, kan CM leh Minister ten Central sum an hai chhuah hi cheng vbc sang tel a tling tawh a ni,” Resource person chuan a ti.

ZPM leh Cingress nihna sawiin, “ZPM hi an nihna tak Zoram mipuiin kan hre chiang tawh. Kohhran, thalai, zirlai leh YMA thlengin an nihna kan hre chiang tawh a. Kum 2018 MLA inthlan lai kha an len lai ber a ni. Kha tih lai kha chuan kohhran tam takin an la thlawp a, nasa takin inthlan lehah chuan an tlahniam tawh ang. Tunah chuan an hruaitu lawkte inkar khikzia hi mipuiin kan hre tawh a, Belkeh phuarkhawm tuipai theilo ang vel an ni. Social Media-ah mi pali nga velin taima takin an vil a, an bengchheng hle a, bur ruak khawn ang chauh an ni,” a ti bawk.

“Congress hi central-ah pawh President tur an inhnawn kual mai mai a, a kungpui ber a tliak tawh a. State inthlanah an artelukawn lo chauh zel a. Mizoramah pawh an hniam zel a, a lo berah kum 10 chhung chu an la opposition ang. That loh theih lohna bawm an tihte hi That theih hauh lohna bawm tih tur ni zawk awm tak a ni,” Pu Lalthlengliana chuan a ti.

MNF Vice President chuan MNF sorkar hnuah hian inthlanna kan hmachhawn nual tawh a. MP (LS), Sinlung Hiils Council, MP (RS), V/C, L/C, Lai, AMC, Tuirial bial bye election-ah sorkarna kan siam a. Tunah MADC-ah kan thawhpui nen kan siam leh. Pathian leh mipui zarah Pu Zoramthanga kaihruai hi nakum kum tawpah kan sorkar leh ngei ngei dawn, a ti bawk.

He hun Ist session chu Pu H.Lalthlengliana Block President chuan a kaihruai a, hun hnihna chu Pu Lalrindika Sailo, Block President chuan kaihruaiin Upa Rokamlova, President Suarhliap Unit chuan hunserh a hmang. Pu Lalluaia Sailo Block Secretary chuan lawmthusawiin hun a khar.

Sd/- R.LALHMANGAIHA
Secretary
Media & Publicity Dept.
Mizo National Front
Momo No.MNF/Media/03/426
Dt.27.05.2022.

Pu K. VANLALVENA CHAWIMAWI A NI

MIZO NATIONAL FRONT
GENERAL HEADQUARTER
MIZORAM ; AIZAWL

PRESS RELEASE

Pu K. VANLALVENA CHAWIMAWI A NI.

Kan damchhungin kan tana in thiltha tih hi kan theihnghilh tawh dawn lo. -MP. Rajya Sabha.

Vawiin 27th, May 2022(Zirtawpni) hian Mualcheng khua chuan an khaw pa ropui leh chhuanawm, chawimawi tlak tiin, Pu K.Vanlalvena, Member of Parliament(RS) chu ropui takin an chawimawi.

He hun an buatsaih ah hian, MP Pu K.Vena chuan thu sawiin, vawiin a awmni kham meuha chawimawina hun min neih sak hi ka lawm a, Mualcheng khawtlang chungah lawmthu ka sawi tak meuh meuh a, kan phuloh chawimawina min hlan avang hian kan chhungkua hian Mualcheng khawtlang lakah bat tam tak kan nei a, chuvangin a theih ang angin Mualcheng khawtlang tan hian kan chhungkua hian theihtawp kan chhuah zel dawn a, kan damchhungin kan tana in thiltha tih hi kan theihnghilh tawh dawn lo a ni, a ti.

Pu K.Vena chuan, central sawrkar thuchhuak angin, Kum 2022 ah hian India ram pum hian In tinah tui connection hi an nei vek tur a ni a, chumi zulzui chuan Jal Jeevan Mission(JJM)-ah hian kan Dy.CM te pawhin theihtawp an chhuah a, ani rem min tihpuina in Serchhip EE ten hma la in ruahmanna te an han siam a, NABARD hnuai atangin kan hotuten Cheng vbc860 min tihsak a, tender pawh thla thar lamah a chhuah a beiseiawm tawh a ni. In tinin tui connection kan nei thuai dawn a ni, a ti bawk. Pu K.Vena chuan, Model village ah district hrang hrang atang a khaw pakhat theuh an thlan thu sawiin, Serchhip Dist.ah N.Mualcheng thlan a ni a, Model Village hi ngaih pawimawh khua an ni thin a, mite entawn tlak khua nihna tura kailawn pawimawh tak, thinlung lam thlenga insanmarna hmanrua a ni, a ti.

Kawlphetha chungchang sawiin, Mizoramah hian kawlphetha kan mamawh ang zat la thar chhuak lo mah ila, kan mamawh phuhru turin Solar Power plant hmangin, Vankal leh Saitual bulah te megawatt engemawzat pe chhuak thei tur siam chhoh mek a ni. Tin, Megawatt 60-70 pe chhuak thei thli hmanga siam chhuah theih tur ruahmanna neih mek a ni, a ti bawk. Kil tinah ramin hmasawnna kawng a zawh mek karah sawrkar hnathawkte chu Mualcheng khawtlang hmasawnna atana theihtawp chhuah turin ka sawm mawlh mawlh che u a ni, tibawk

MP ni tura a kalkawng te sawiin Pu K.Vena chuan kan hotute duhsakna in MNF party ah nihna hrang hrang, Thalai President te Secretary te, General Secretary leh PAC ni chho zelin an duhsakna kal zelah vawiinah MP dinhmunah min hlangkai a, MP ka nihna tur hian nomination file na tur Rs 4000/- pawh kan hotuten min pek sak vek a. Thenrual thaten min lawmpuina tur chawhlui kilhona tur thlengin pawisa min pe a, vawiin ni a MP ni thei tura min tanpuitu hi kan Pathian a ni a, kan party President Pu Zoramthanga leh Nomination Committee te Pathianin a hmang a, anmahni leh kan MLA kaltlangin MP ah min dah a ni, a ti.

He hunah hian Pu Vena te nupa hi chawimawina parthi leh thuziak tam tak, pawl hrang hrang in an hlan a. ZPM leh Congress party pawhin an hlan a, thangchhuah puan pawh bah tir an awm bawk.

MNF Gen.Hqrs.NCC Member Pu D.Thangliana Ex-MLA pawhin Mualcheng khua a lawmpui thu sawiin, Mizoram hian MP thlarau mi, pathian tih mi kan neih ve hi a ngai tawh a ni, tiin rawtna ka siam a, Lok Sabha ah Pu Rosanga Pathian tih mi kan thlang tling a, Rajya Sabha ah mi inngaitlawm em em, MP nih pawh in beisei lo kha lungrual takin kan han vawrh chhuak leh a, an Pathian tihna leh thuawihna kan ram leh hnam tan hian malsawmna tam tak a ni ngei ang, tih kan ring tlat a ni, a ti. Vawiin ni ah chuan Pu Vena zarah Mizoram khawvel hian Mualcheng hi an hriat phah a, kan MP ten hna tha taka an thawh zel theihna turin kohhran hrang hrang ten tawngtaipui zel turin ka han ngenin ka han sawm tak meuh che u a ni, a ti bawk.

Zing dar 9:30 khan Pu K. Vena puala chawimawina lung, Mualcheng kawn lun lai taka an phun chu Mualcheng VCP Pu F. Lalbiakdika chuan a hawng a, hemi hnu hian chawimawina hun hi Community Hallah hman chhunzawm niin, VCP hian a kaihruai a,
Pastor Vanlalruata UPC(Mz) in hunserh a hmangin, MP Pu Vena te chhungkaw lam atangin Pu K.Vanlalvena pa Pu K.Lalzika’n thu a sawi bawk a ni. Pu H. Lalchhanhim, Secy.Vc chuan Programme chhiarchhuahna neiin, Tv. R. Lalneihsanga, secy YMA in inhmelhriattirna leh inlawmna thu a sawi a. Khawtlang aiawhin Pu Lalhmahruaia VC member, pawhin thusawiin, MP lawmna hun hi VC term hmasa ami ten an rel tawh, vawiin nia tihhlawhtlin a nih thu leh an lawmthu a sawi a. Model Village-a min puangte, Vanva Lui Tui pump-na tura hma min laksak te hi lawmawm kan ti hle a ni, ati. Mualcheng khawtlang hian an khaw tlangval MP nih lawmna tur hian kawng hrang hrangin pawisa an thawk chhuak a ni.

Serchhip district chhunga dept hrang hrang hotute leh Mualcheng khuaa Sawrkar Office hotute, Mualcheng Welfare hruaitute pawhin thusawiin, Pu K.Vena an lawmpui thu leh an chhuan zia thu an sawi bawk a ni.

MP lawmna leh chawimawina hi khawtlang huapa neih a niin, tlaiah ruai ropui tak kilho a ni bawk.

Sd/-B.LALHMANGAIHZUALA
Jt.Secretary
Media & Publicity Dept.
Mizo National Front
Momo No.MNF/Media/03/425
Dt.27.05.2022

Nakina kan tu leh fate tana chhawr theih tur hi kan CM hova kan ngaihtuah ber a ni -Dr.R.Lalthangliana

Mizo National Front
General Headquarters
Mizoram : Aizawl

 

Press Release

Nakina kan tu leh fate tana chhawr theih tur hi kan CM hova kan ngaihtuah ber a ni -Dr.R.Lalthangliana

Dated, Aizawl, 23,rd May, 2022(Monday) :- Vawiin hian Mizo Hnam Run chhung inkhawm hun hnihnaah MNF Adviser Dr.R.Lalthangliana chuan social media-ah kan Chief Minister leh Minister-te beihna hrang hrang a tam thin nia sawiin, mi ball vawm mai maia lo buaia chiai lo turin kalkhawmte a chah a. A tak ram hre turin Minister leh MLA-te pawh zawt mai turin a hrilh a. Dik tak leh rinawm taka awmin Lalpa lawm zawng chu MNF tih tur nia sawiin, ‘kan sorkar lehna tur hi sum leh pai, zin tamah a innghat lo, tling leh tlaka Lalpa mit hmuha kan awm a ngai a ni,’ a ti.

Health Minister Dr.R. Lalthangliana chuan hriselna lama hma kan sawn theih nan USA (Taxas) hmunpuiah tun hnaiah a zu kal thu leh, khawvel hmun dang atanga Health Minister zu dawr ve an awm a rin loh thu a sawi a, a hlawhtlinna pawh an hmuh thuai a beisei thu a sawi. Tun hnai thovah Gujarat state-ah India ram state hrang hrang Health Minister-te meeting-ah a tel thu a sawi a. Tah chuan Health Minister zingah MLA term tling tam ber anih avanga chawhma meeting a kaihhruai thu sawiin, an meeting agenda lian ber chu Covid aia hlauhawm zawk pawh lo thleng thut thei anih chungchangah ruahmanna tha leh inbuatsaihna tha zawk an rel thu a sawi a, Health bikah an ruahmanna lian tak tak hmachhawp chu nakum hian a lo thlen mai tur thu a sawi bawk.

Kum hnih leh a chanve vel covid-in min tibuai thu Health Minister chuan a sawi a, “Health department-ah hian sorkar hmasa khan hna lak a lo nei mumal si lo a, Health bikah post ruak 3000 dawn kan nei mek a ni. Kan Chief Minister hovin ngaihtuahna kan seng a, 2019-a kan sorkar tirh khan post ruak 734 la turin cheng vbc 50 kan dah fel a, finance pawhin min approved fel tawh kha covid lo awm leh thut avang khan kan la thei ta lo a ni. Loh theih loh avanga Health bika hna ruak hnawhkhah tur hi tun hnai mai khan kan CM hovin, Finance, Planning, DP & AR hotute nen kan rel a. Mahse, tuna dil mai chi a la ni rih lo a, a tlem berah pawh thla 3/4 lai a fel hun tur la nghah ngai a ni, a theih hunah chuan in hre vek ang,” a ti.

Health Minister chuan, Covid karah thil tih a harsat em em lai hian Health department bikah pawh a theih ang anga hna an thawh thusawiin, “Aizawl Civil Hospital-ah sorkar hmaa ICU 5 chauh awm thin kha, tunah chuan 10 kan nei ta a. ICU 10 dang ruahman leh mekin nausen ICU engemaw zat kan siam leh mek bawk. Civil Hospital-ah cardiology (lung lam) enkawlna turin cheng vbc 12 kan ruahman mek bawk a, District zawng zawngah Oxygen khawlpui kan din fel tawh bawk a ni. ZMC-ah a tira khum 140 awm kha kan sorkarah chuan 400 vel kan nei ta a. ICU 13 chauh awm kha 80-ah kan tipung ta. Kan CM bialah Cancer Hospital cheng nuai 2000 man kan din fel a. Hei bakah hian International-ah leh India ramah pawh zahpuiawm loh tur, North East-ah pawh a tha ber tura ngaih kum 2019 atanga Japan International Cooperation Agency(JICA) nen indawrin Cancer Super Speciality Hospital lian din tura kan hma lakna pawh Delhi lam dawr ngai tawh lovin a lehkha kal kual tur a fel vek tawh a. A tira cheng vbc 500 ruahman khan a daih loh dawn avangin cheng vbc 660-in kan din tur pawh a fel ta a. A project hi a len tham em avangin kum 2028-ah daih thawh zawh a ni ang. Hei hi Pu Zoramthanga kaihhruai sorkar hmasawnna lian tak a ni a, nakina kan tu leh fate thlenga kan chhawr theih tur hi kan CM hova kan ngaihtuah ber a ni a,” a ti.

Dr.R.Lalthangliana chuan state dangten covid chungchanga Mizoram sorkar hmalakna an hrilh thin dan a sawi a. “Mizoram chuan in ulukin test ngai zawng zawng chhui chhuakin in test a, sorkar, kohhran, tlawmngai pawl hrang hrangte inthawhhona a tha a, India ram leh khawvel hmun dangah Mizoram anga hmala tha in awm ve lo min ti,’ a. Tuna covid avanga thite hi 700 la tlinglo deuh kan ni a, covid vei atanga thi 698 vel hi chhutin India ramah kan thi tlem ber a. Thi zinga 80% chu natna benvawn nei, cancer, bp sang, lung-na leh natna serious tak tak lo vei sate an ni a. Covid thihpui tak hi chu a thi zinga 20% vel hi a ni ang,” a ti bawk.

Pu PB.Lalduhawma Secretary pawhin he hunah hian East Tuipui bialtu MLA Pu Ramthanmawia hova an zin report tawi pein, Khuangthingah Congress leh ZPM party atangin mi 41 ten MNF an zawm thu a tarlang.

Chhung inkhawm hi Pu Lalliankima, NCC chuan kaihruaiin Pu C.Lalzamlova Adviser chuan hunserh a hmang.

 

Sd/-R.LALHMANGAIHA
Secretary
Media & Publicity Dept.
Mizo National Front
Memo No.MNF/Media/03/2022/423
Dt.23.05.2022

Tui anga nghetlote kutah Zoram hruaitu nihna chung lamin a pe ngai lo – Zoramthanga, MNF President

MIZO NATIONAL FRONT
General Headquarters
Mizoram : Aizawl

PRESS RELEASE

Tui anga nghetlote kutah Zoram hruaitu nihna chung lamin a pe ngai lo – Zoramthanga, MNF President

Vawiin May ni 20, 2022 (zirtawpni) chawhma dar 11:30am hian MNF President Pu Zoramthanga chuan, Serchhipah Mizo Hnam Run a hawng.

MNF President Pu Zoramthanga chuan Mizo Hnam Run hawnna inkhawmah thusawiin, “Mizo Nationalism zungkaihna leh sawina hmun tur Mizo Hnam Run hi kan theih dan ang angin kan din zel dawn a ni. Pathian leh kan ram tan ti a chunglama innghat tlat kan nih avangin tlakhniam changte nei ve ṭhin bawk mah ila, tlu chheloin Kum 60 kan thleng thei a ni,” a ti.

Pu Zoramthanga chuan, “Party ṭhenkhat chu Delhi khawnvartui bur an ring a, Delhi lamah a bur a tluk ruah tawh chuan a phita a rawp ral ve nghal mai ṭhin a. Serchhipah pawh kum 3 hnuah kan han inthlan leh meuh chuan an bupuiah dahkham chawiin halral thil hlanah an candidate an hlan a ni. Neitu nihna phun tello, mahni a din chhuah tumna zung neilo, Delhi khawnvartui ringa nungte chu an zuih ral mek a, Jehova Pathian tlansan a, Lord Krishna ringtute tlakchhiat dan hi nasa tak a ni,” s ti.

“Party ṭhenkhat leader-te pawh, MP leh ruling party President-niin ramhnuaia kan awmlaiin bul an ṭan tawh a. Tui anga nghetlo te kutah Zoram hruaitu nihna chunglamin a pe ngailo tih kan hmu. An au pui ber kalphung thar an tidanglam ngun lutuk a, mipuiin kan zui zo lo a ni” MNF President chuan a ti.

“Pathian leh kan ram ti a bul ṭan, kan innghahna anih avangin, Chung lam remruat ang zelin kan kal a. India rama mihring tamtak zinga chanchinṭha hril turin remna min pe a. Pathianin hun a tih lohah chuan sorkarnate hi a lak ngawt theih loh, hman aṭanga Pathianin hlawhtlinna hmu tura movement a kalpui leh thil tum tihlawhtling tura hmanruaa min hman a duh a ni. ‘Pathian leh kan ram tan’ tia kan enremna kan entlat chuan chauh changte nei mah ila, kan tlu ngailo ang” a ti bawk.

Pu K.Vanlalvena, Lunglei Sub-Hqrs, tun hnaia ZPM aṭanga MNF party zawm ta pawhin thusawiin, ZPM-ah theihtawp chhuahin kalphung tharte sawiin kan bei ṭhin a. ZPM-ah hian thil inkawlkalh lian tak pahnih a awm a. Kal dan hriatthiam har tak a awm a, Leader, President leh Working President-e an awm a. Pakhatin chhak lam a pan a, pakhatin thlanglam min panpui a ni. Movement anga a kal hnuah, political party kalphung ṭhalo ṭhenkhat sawi ṭhin khan, party kan ni tawh a lawm tiin kalphung pangngai kan sawi ṭhin ang thoin an kal a ni. Kalphung thar tih hi sawi ṭhin mahse, party thar anih avangin an thiltih apiang hi kalphung thar an tih chu a ni mai. ZPM hi rei a din ka ringlo, Mizo National meichher kengtu MNF party hi Zofate min hruai turin a rintlak a, min la hruai zel ka ring tlat a ni, a ti.

Serchhipa Mizo Hnam Run hmun hi June ni 30, 2002 Remna Ni khan mimal hnen aṭangin lei a ni a, June 19, 2019 aṭangin sak ṭan a ni.

Serchhip Mizo Hnam Run hawn inkhawm ah hian, Congress party, BJP leh neutral aṭanga MNF party zawm thar mi 45-te lawmtakin Pu Zoramthanga’n a lawmlut nghal bawk.

MNF President hian Chawhnu lamah MNF Serchhip West Block Conference, Thenzawl Joint YMA Hall-ah hmanpui lehin, party hrang hrang aṭanga MNF party zawm thar mi 208 a lawmlut.

MNF Serchhip West Block Conference-ah thusawiin, Pathianin Thenzawl leh a chhehvel hmun rem leh ṭha takah a dah che u a. Hetianga hmun rem leh pawimawh a hmala tur hian Serchhip bialah MNF MLA nei ngei tawh turin party mipuiten ṭan kan lak a ngai. Roreltute hi Pathian ruat an ni a, Pathianin tunge a pek ang che u tih hi rilru fim takin ngaihtuahna in lo hmang dawn nia, tiin party mipui kalkhawmte a chah.

Mizo Hnam Run hawn inkhawm leh MNF Serchhip West Block Conference ah hian MNF Gen.Hqrs leh Lunglei aṭangin party hruaitu engemawzat an kal bawk a ni.

Sd/-LALVENHIMA RALTE
Joint Secretary
Media & Publicity Dept.
Mizo National Front
Memo No.MNF/Media/02/2021/422
Dt.20.05.2022.

Hun khirh laia ram hruaitu atan Pathianin Pu Zoramthanga a ruat – Dr. K. Beichhua

Mizo National Front
General Headquarters
Mizoram : Aizawl

Press Release

Hun khirh laia ram hruaitu atan Pathianin Pu Zoramthanga a ruat – Dr. K. Beichhua

Vawiin May 20, 2022(Zirtawpni) hian Mizo Hnamrunah chhung inkhawm neih a ni a. He hunah hian Dr. K. Beichhua, Adviser, MNF leh AH&Vety Minister ni bawk chuan thu a sawi a.

Dr. K. Beichhua chuan vawiin ni hian MNF sorkar hian kum 3 leh a chanve hmel a lo hmu ta a. Kan hun hman tawha Covid-19 hrileng turte, Ramri lama buaina te, Lirnghing turte, Myanmar raltlan lo kal turte kha Pathian chuan a hre vek a. Hun khirh laia ram hruaitu atan Pathianin kan CM Pu Zoramthanga hi a ruat a ni. ‘Harsatna ka tawh lai pawhin hun khirh laia chanvo chelh tura min ruattu Pathian vangin hmalam panna rilru ka pu leh ṭhin a ni’ a ti.

Tunhnaia inthlanna zawh tak MADC chungchang sawi langin, tunhma chuan MNF in mark neisa loin a bei ṭhin a. Tunah chuan MADC ah Mark 5 kan nei sa ta. Pathianin indim taka kal turin Rorelna min pe a. Congress MDC palite nen thawkhoin Lungrual tak leh nghet takin MADC ah sorkarna kan siam thei dawn ta a ni. MADC ah Mark 5 kengsain inthlan hmachhawn tur kan ni tawh a, 2023 inthlan tur pawh a huphurhawm tawh loh a ni a ti.

MNF in sorkarna a chan hnuah harsatna hrang hrang Mizoramah a thleng a, hun khirh lai berah pawh nitin mipui mamawh (Essential Commodity) ah harsatna awm miah lo khawpa sorkar hmalakna hi ‘Mizoram hi kan ram a ni’ titu tan chuan fak loh theih a ni lo a ni a ti. Politics khela mahni pumpui lam chauh thlir tan chuan fak pawh a har mahna a ti.

African Swine Fever leng avanga vawk tihhlumte tan leh Ar natna hri leng tuarte tan zangnadawmna pek chhuah thuai a nih dawn thu a sawi bawk.

Pu K. Riachho, IAS Rtd. Adviser, MNF General Headquarters chuan thu a sawi bawk. Pu K. Riachho chuan MADC ah MNF in majority la lo mah se election hmasa ngaihtuahin MNF in hma a sawn zel thu a sawi. Kum 1 leh thla tlemte chauh hnathawhna hun kan nei tawh a. Insiam ṭhat a ṭulna zawna insiam ṭha chungin hmasawn zel tura thawh a ngaih thu a sawi.

Pu Riachho chuan Mizoramah chuan Hindutva kalpui tum party hrim hrim tan beisei tur a awm loa hriat thu a sawi bawk. Tin, Ṭhat loh theih lohna bawm zuartu congress hi Central ah an chak chauhin Mizoramah chuan an chak ṭhin a. Central lama an hotute aṭangin in siamṭhat tum viau mah se awmzia a nei thei lova, Beisei tur an nei tlem hle a ni. ZPM hian kalphung thar an zuar a, kalphung thar hi rintlak tur a nih leh nih loh a chiang lo. An kal mek dan enin Party dangte nen danglamna an nei lo a ti.

Chhung inkhawm hi Pu Vanlalzawma, Vice President, MNF chuan a kaihruai a. Pu Rochungnunga, General Secretary, MNF General Headquarters in hunserh a hmang bawk.

Sd/- LALLIANZUALA FANAI
Joint Secretary
Media & Publicity Dept.
Mizo National Front
Memo No.MNF/Media/02/2021/421
Dt.20.05.2022.

PU DAWNGTEA MLA-IN LUNGMUAT PRIMARY SCHOOL TLAWH

Mizo National Front
General Headquarters
Mizoram : Aizawl

Press Release

PU DAWNGTEA MLA-IN LUNGMUAT PRIMARY SCHOOL TLAWH

Pu K Laldawngliana, Tuirial bualtu MLA chuan vawiin hian Lungmuat Primary School a tlawh a. He School chungchanga video darh awm chungchang a hmunah kalin a enfiah.

He hunah hian Pu K Laldawngliana chuan thusawiin, “Pulpit tlanga kan thusawi ang hian Politics-ah pawh hian thu dik tak kan sawi tur a ni,” a ti a. “He lai hmunah hian action la tur emaw, thinrim vang emaw a lo kal ka ni lova, he news hi ka hriat veleh kan zirtirtute leh kan khawtlang te thlamuan tur leh thil nihna a hmun ngeia finfiah ka duh vangin ka lo kal a ni,” a ti.

Tuirial bialtu MLA chuan, “Zirtirtute hi danglamna tam tak in nei a, Doctor te Engineer te ang inni lova, naupang enkawl seiliantu leh an nunkawng enkawl sak tu inni a. Zirtirtute’n an ti tih hi chu an zawm em em mai thin, theihtawp chhuahin hma la zel turin ka ngen che u a ni,” a ti bawk.

Lungmuat Primary School hi sak ṭhat tura ruahman mek a ni a, naupangin School an kal lailawkna hmun turte khawtlang hruaitute leh zirtirtuten an ngaihtuah mek lai a ni a. He School sakna tur hian 1st installment pawh hmuh tawh a ni nghe nghe. Social media-ah leh Party ṭhenkhatin thil hrechiang mang hlei lova thu belhchian dawl lo an thehdarh hi pawi kan ti tak zet a ni.

School Education Minister chak tak Pu Lalchhandama Ralte hmalaknaa rei tak ngaihthah tawh, Mizoram School building-te sak ṭhat mek a ni hi MNF chuan lawmawm a ti tak zet a ni.

(THANGKIMA)
Secretary
Media & Publicity Dept.
Mizo National Front
Memo No.MNF/Media/02/2021/420
Dt.19.05.2022.

“Sports Discipline hrang hrangah India ram a thei ber ni turin Ṭhalaite in lo pen chhuak ngam dawn em le.”

Mizo National Front
General Headquarters
Mizoram : Aizawl

Press Release

 

“Sports Discipline hrang hrangah India ram a thei ber ni turin Ṭhalaite in lo pen chhuak ngam dawn em le.” – TC Pachhunga,Vice Chairman, SYS Development Board,Govt of Mizoram.

Vawiin May ni 18, 2022 Chawhnu Dar 2:00 khan, Mizoram Wrestling Association buatsaih, 5th Inter District Mizoram Wrestling Championship 2022 Serchhip a buatsaih a hmanpuinaah, Pu TC Pachhunga chuan, “Kum 2 chuang zet Hripuiin min luhchilh vangin kawng engkimah Sawrkar leh mipuiin harsatna tam tak kan hmachhawn a. Tunah chuan hripui leng pawhin ziaawm lam a lo pan chho ta zel in nunphung pangngai zawh turin Sawrkar leh mipui pawhin hmalam kan pan chho mek zel a ni. Hripui vanga mipuite hnathawk thei lo a kan awm chhung khan, Pu Zoramthanga kaihhruai MNF Ministry hi a awm mai mai lova. Hmasawnna hna tam tak chawl lovin kan thawk zel a. Kan CM zahawm tak Pu Zoramthanga leh Sports Minister zahawm tak Pu Robert Romawia Royte, a ngaihna hriate zarah abik takin Sport Infrastucture Development-ah phei chuan, Mizoram mipuite tan haider rual lohin hma kan sawn a ni,” a ti.

A sawi zelnaah, “Hrileng a lo zia chhoh tak zel vanga nunphung pangngai a kan khawsak chhoh mek lai hian, Kan CM leh Sports Minister te’n kan Ṭhalaite tana Infiamna hmunhma ṭha tak tak an buatsaih sak che u hi, kan ram leh hnam tana hmaiuanpui tham khawp a inbuatsaih nasa lehzual turin ka chahin ka ngen duh che u a. Mizoram State hi India ram pumah sang taka min hlangkai turin, kan ṭhalaite hian theihna in nei a. Chumi tur chuan kan Ṭhalaite hi in lo pen chhuak ngam dawn em le?,” tiin Infiammi kalkhawmte tan chona a pe a ni.

“MNF Party chuan 2018 Election dawn a kan intiam ang ngei khan, Flagship Programme SEDP hnuai ah, Sports Discipline hrang hrang chu, Co Curricular ni tawh lovin, Carricular ni tawhin, SEDP Sports Policy thar hnuaiah Sport Industry a puang ngam leh nei hmasa ber kan ni hial tawh a. Mizo Ṭhalaite hian tihtur kan neih te hlen chhuak tura kan theihnate lan chhuah tir turin, hmalam i pan zel ang u” Pu TC Pachhunga chuan a ti bawk a ni.

Sports & Youth Services Dept hnuaiah hian, Discipline Association hrang hrang 33 zet an awm tawh a ni.
He huna khuallian Pu TC Pachhunga chuan Mizoram Wrestling Association-in a ṭul apianga an hman turin ₹ 10000/- a pe a. MNF General Headquarters Secretary pahnih Pu Lalawmpuia (OPA) leh Pu James L Chhakchhuak te’n Pu TC Pachhunga hi an ṭawiawm bawk.

sd/-B. LALHMANGAIHZUALA
Joint Secretary
Media & Publicity Dept.
Mizo National Front
Memo No.MNF/Media/02/2021/379
Dt.18.05.2022.

MNF DANGLAMNA CHU SORKAR HMASA THIL TIH PAWH NI SE, RAM TANA THA TUR CHU A HNAWL NGAI LOVA, A CHHUNZAWM ZEL

Mizo National Front
General Headquarrters
Mizoram : Aizawl

Press Release

MNF DANGLAMNA CHU SORKAR HMASA THIL TIH PAWH NI SE, RAM TANA THA TUR CHU A HNAWL NGAI LOVA, A CHHUNZAWM ZEL

Kan thil tum a hlawhtlin zel nan Mizo zawng zawng-Congress, ZPM, BJP leh neutral pawh Mizo Hnam party-ah an leng vek
– Dr.R.Lalthangliana

Vawiin May ni 17, 2022(Thawhtanni) hian Hnahthial Electric veng Community Hall-ah ‘MNF South Tuipui Block-I Political Training’ neih a ni a. He hun hmanpuitu bialtu MLA Dr.R.Lalthangliana chuan Block I huam chhung atangin mi thar 221 a lawmlut nghal a, tun hnaia a bial fan Block 2 ah 132 leh Block-3 ah 131-te nen belhkhawm chuan mi thar 484 lai a lawmlut a ni.

Dr.R.Lalthangliana chuan, “MNF danglamna chu sorkar hmasa thiltih pawh kan ram tana tha tur chu a hnawl ngai lova a chhunzawm zel. Kum 1998-ah kan sorkar a, sorkar hmasa Congress khan District thar 5 a puang a, a thu ringawtin an puang a. Tihpuitlin harin hautak hle mahse; Pu Zoramthanga kaihruai sorkar khan Cabinet-ah kan rel a, sorkar hmasa puan mah nise; kum 2003-a kan sorkar tawp dawn kha chuan District 5-te chu pangngai takin kan kal pui thei a ni. Kum 2008-a kan term tawp dawn hnai khan Hnahthial, Saitual leh Khawzawl kha District-ah kan puang ve a, Congress sorkar kum 10 chhung khan engtin mah an chhunzawm ve lo, kum 10 chhung meuha an tihpuitlin theih loh kha, Kum 2018 November thlaah kan sorkar leh a, kan sorkar tirh atanga thla 8 chhung lekin keini chuan District 3 kan puan chu pangngai takin kan function tir leh hman a, kan Chief Minister Pu Zoramthanga chungah pawh lawmthu sawi nasat kan ba nasa hlein ka hria. Kan sorkar tirhah Covid-in min han nuai tak tak a, kum 2 leh a chanve deuh thaw min nuai a, chuti chungin Hnahthial District chhung leh Zoram hmun hrang hranga kan hnathawhte hi a chhut peih tan chuan a tam nasa hle tawh ang. Congress kum 10 a sorkar chhung khan Covid-19 a thleng ve lo a. Kan sorkar chhung hian ran pulh hri a leng a, khaw chhak lamah lir a nghing a, ram a kang a, ramri a buai a, khawchhak lam atangin raltlan kan dawngsawng bawk a, budget a awm lo sum tam tak sen a ngai a, hei hi mipuiin kan hriat thiam hram hram a tul a ni. Tun hnaiah a tharin kan kal tan ve dawn chauh a, i beidawng mai lo ang u. Kan thil tum a hlawhtlin zel nan Mizo zawng zawng- Congress, ZPM, BJP leh neutral mite chu Mizo hnam party-ah an leng vek a, lolut zel turin ka sawm a ni. La sorkar miah lo hi Mizoramah an sorkar ka ring lo a, lo sorkar palh pawh ni se, Minister pawh la ni ngai lo kha CM ta se, thla tam an kal lo ang, an chhung ril kawrawngzia hi mi tam takin an hre lo,” a ti.

Health Minister Dr.R.Lalthangliana chuan, “SEDP pawh covid avangin hma kan la hlei thei lo a, kumin chho leh nakum chhoah hi chuan nasa taka kalpui kan tum a ni. Health Worker-te hi kan lak theih hunah pawh a khaw mi ngei duhsak ni se, a khaw mi tak lak tur an awm loh hi pawhin a khaw hnai vaia mi ngei lak tha kan ti a, a chhan chu transfer dil zung zung lova, mahni thawhna hmuna awm nghet tur hi kan duh a ni,” a ti bawk.

Pu C.Lalruatkima Block Secretary chuan Block report hrang hrang a pe a. Pu C.Lalrammawia Chairman ZOHANDCO, Pu Vanlalhnema Adviser leh Pu Ngurzamlova General Secretary -te pawhin thu an sawi.

He hun hi Pu J.Lalchhuana, Block President chuan kaihruaiin, Rev.TC.Vanlalmalsawma BCM, Hnahthial ‘S’ bial chuan hunserh a hmang a, Pu B.Lalromawia Block Vice President chuan lawmthusawiin hun a khar.

Hemi hnu hian Hnahthial Electric veng Commumity Hall-ah hian bialtu MLA Dr.R.Lalthangliana hian ‘Hnahthial District Ameteur Taekwondo Assocition’ chu hawngin khuallianah a tang nghal a ni. He hun hi Er.Rohmingliana Secretary, MATA chuan a kaihruai a. Pu Joseph Thansanga G/S MATA chuan MATA report a pe a, Sr.Vice President Pu Vanlalsawma chuan technical report pein, Prof.Rualkhuma Colney President MATA chuan presidential adress a pe a, Pu CH.Vanhmingthanga Vice President MATA chuan lawmthusawiin hun a khar.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/417
Dt.16.05.2022