MNF SENIOR VICE PRESIDENT-IN BLOCK CONFERENCE A HMANPUI

Mizo National Front
General Headquarters
Mizoram : Aizawl

Press Release

MNF SENIOR VICE PRESIDENT-IN BLOCK CONFERENCE A HMANPUI

Ni 29.06.2022 Nilaini hian MNF Tuichang North Block chuan Khawzawl Zaingen Br. YMA Hall-ah Block Conference an nei a, MNF Sr.Vice President Pu Tawnluia chuan khuallian niin a hmanpui.

Hun hmanpuitu Dy.CM Pu Tawnluia chuan, nimin lama Tuichang South Block in Block Conference hlimawm tak an hman zawh hnua vawiin niah North block lamin hmang leh theia hun tha Pathianin min pe leh a lawmawm a tih thusawiin, MNF hi hnam party a ni a, Pathianin min siam ang dik taka tuma tihbuai lovah hnam zalen, kan tawngte venghima hnamdangte awpbehna lak ata khaichhuah tumin Pu Laldenga hoin 1961 ah ke kan pen tan a, lungphum tha tak neiin, hetiang ang paty hi khawvelah hian an vang khawp mai, Pathian leh kan ram tan titu awmchhun kan ni a, Lalpa hming lam chungin MNF chuan rawng kan bawl a ni, a ti. Mihring chuan tlin loh chang kan nei thin amaherawhchu Lalpa hming lam chunga ke kan pen tlat avang hian party dangte tehkhin a, nihna chanvo inruat ringawt hi a ni lo a, hnam party kan ni, tih hi i hre reng ang u, MNF hian Mizoramah unit 1804 kan nei mek a ni, a ti bawk.

MNF Sr.Vice President chuan, vawiin niah party danga hruaitu lo ni tawh te, VCP te, VC leh midang tha tak tak kan lawmlut hi a lawmawm hle a, MNF party tan rinawm leh taima taka thawk turin duhsakna ka hlan a. MNF hi kan zavai ta a ni, tumah inthlahrung lo a, mahni inpuiah in lo lut a ni, tih inhriat ka duh a ni, a ti a. Mizoram chhunga political party ah chuan MNF hi a upa ber a, a hlu ber bawk a, kuminah hian a kum 61-na kan hmang mek a ni. Party ngelnghet tak kan la ni zel a, MNF hi party dangte anga khaikhin a, teh ve theih kan ni lo, a ti bawk.

Dy.CM chuan, he hnam hi ei leh bara kan intodelh theihna turin SEDP kan duang chhuak a, chumi hnuaiah chuan program hrang hrang kan duang a, hemi hmang hian sorkar dept. hrang hrang hotute pawhin a kaihhruaina hi an hre vek a. Covid hripui kan do laiin kan sorkarin ruahmanna a duante tha taka ram chhung pawl hrang hrangte nen thawhhona tha tak kan nei thei kha a lawmawm em em a, hmasawnna kawng hrang hrang a nghawng avangin kan kal chak thei lova, mi rilru pangngai pute chuan thil tak tak hi a tih theih loh tih an hria a, kan sorkarin theihtawp a chhuahnate an hrethiam hi kan lawm em em a, zoram mipui hnenah kan lawmthu hi sawi nawn fo a ngai a, kan lawm em em a ni, a ti. Thenkhatin covid chhuanlamin min beih tum mahse, mi tam takin sorkarin harsatna a tawhte kha an hrethiam a, zoramin harsatna a tawhte hmachhawn tur hian Pathian hian MNF hi a ruat a ni, tih hi kan pawm dan a ni a, Mautam tam kumah pawh buhfai a thlawnin kan sem theite kha Pathianin MNF hi min awmpuina a ni, a ti a. Harsatna kan tawh hrang hrangte han chhut ila, sorkar dang hi lo awm ta sela an buai hlein a rinawm a, tunah hrih chuan MNF party lo chu sorkar thei dang an awm lo e, tiin zoram mipuite hian hun tha zawk min pe leh ang, tih a rinawm tlat a ni, a ti a, opposition ten ‘ar a chuk tui lo’ khawpin min chirhtheh mahse, a tak hmuh tur hi a awm tlat si a, MNF sorkar hmasain a lo puan tawh district thar kum 10 zet tihpuitlin loh a awm kha, kan theihtawpin tihpuitlin tumin kan bei a, tunah chuan tihhlawhtlin a lo ni ta a. Min duhsaktute chu enge kan pek let ve ang, tih hi kan hriat a tha a, Kan sorkar hi Khawzawl hian kan chawimawi let ve te, kan duhsak let ve hi a tha awm mang e, tih hi i ngaihtuah ang u. Congress sorkar lai khan Urban Development atang hian enge kan hmuh a, tunah chuan kan khawlaite hi a changkang tawh a, a tha tawh em em a, tin, district-in a kentel dept. hrang hrang engzatnge awm tawh tihte hi kan chhut ngai em? a ti bawk.

Dy.CM chuan, Khawzawl Treasury office hi July ni 1 atanga hnathawk nghal turin staff kan dah dawn a, two wheeler taxi pawh kan transport minister-in min dahsaka ruahmanna an siam fel tawh thu min hrilh a ni, a ti bawk. Khawzawl ah Govt college kan nei a hei pawh hi MNF sorkar hmasain Zawlnuam nena kan hlankai a ni a, tunah hian Geography zir theihna turin hmalak mek a ni a. Lecturer pahnih chu MLA fund atanga lak phawt turin kan tifel tawh a, Auditorium cheng vbc 7 man tur pawh ruahman mek niin multipurpose hall chhawng li tur pawh tender a chhuak tep a, Khawhai lam hman turin 3-wheeler/autorickshaw pawh dah turin hmalak mek a ni a chuvangin, hmasawnna kan neih hrang hrangte tangkai taka kan chhawr zel a, kan hmuh belh zel theihnan taima takin party tan hna i thawk zel ang u, a ti bawk.

Bialtu MLA Dy.CM chuan, Khawzawl Govt high school Class room pakhatin an indaih loh avangin MLA fund hmangin a siamsak a, SP Office pawh middle sikul hmun a nih avangin SP hmun nghet atan dil a ni, Education dept. in phal takin min lo pe, chupawh chu MLA fund hmanga siam a niin an siam zo tep tawh a ni, a ti bawk.

Dy.CM hian Tuichang South Block-ah voter 280 chuang leh Tuichang North Block-ah voter 164 a lawmlut a, heng zingah hian Tualte khua Congress party VCP pawh a tel a ni. Block Conference hi Pu C.Kera, President MNF Tuichang North Block chuan kaihruaiin, Upa Lalzuiliana Ralte in hunserh a hmang a, MNF Gen. Hqr. PAC member Pu R.Lalhnuna leh Pu Lalropuia Pachuau GS MNF Gen.Hqr. pawhin thusawiin, Tv Lawmsangzuala Tuichang North Block Secy. chuan report pein inhmelhriattirna a nei bawk. Tlaiah ruai ropui taka theh a ni.

Sd/- B.LALHMANGAIHZUALA
Joint Secretary
Media & Publicity Dept.
Mizo National Front
Memo No.MNF/Media/03/2022/453
Dt. 28.06.2022

2023 inthlanah MNF a sorkar leh ngei dawn” – Dr. Vanlalṭanpuia

Mizo National Front
General Headquarters
Mizoram : Aizawl

Press Release

‘2023 inthlanah MNF a sorkar leh ngei dawn” – Dr. Vanlalṭanpuia

Vawiin June 24, 2022 (Zirtawpnni) Mizo Hnam Run chhung inkhawmah Mizoram Youth Commission Chairman, Dr. Vanlalṭanpuia, MLA chuan thusawiin, MNF party hi a ṭobul a fuhin, a chi phum hi a ṭha em em a, kan innghahna lungphum a fuh em avangin India ram pum thlir pawhin kum 60 hnu ah pawh political party ngelnghet berte zing ami kan ni thei a ni. Pathian leh kan ram tan titu kan nih avangin thil thleng danglam mila kal ve ngawt thei kan ni lo. Ram neitu duhdana ram hi enkawl tur kan ni, a ti.

Dr.Ṭanpuia chuan, politics kan luh chhan hi kan chian a ngai a. Kan mihring puite leh ram leilung enkawl tura ruat kan ni a. Inbei tawna, inchirh theh ngawt loin thurawn inpe tawna ram kan siam a ngai a ni. Rorelna dik kan kalpui zel theih nante, ram leilung kan enkawl danahte, mirethei zawk ngaihsak kawngah te kan zavaiin ṭan kan lak thar a ngai a ni, a ti.

Dr.Ṭanpuia chuan, Mizoram District hrang hranga sorkar hmalakna hrang hrangte leh MLA bial hrang hrang dinhmun ngun taka thlirin hmasawnna chaktakin thawh a ni a. Nakum MLA inthlanah pawh chakna kan chan leh ngei a beiseiawm hle a ni tiin a bial chhungah pawh tunhnaiah party hrang hrang aṭangin mi 195 zet a lawmluh thu report a pe a, Kum 2023 ah pawh sorkarna kan siam leh ngei dawn a ni, a ti.

Dr.Ṭanpuia chuan, hun engemawti aṭang tawhin Mizo ṭhalaite All India Central service lama lut kan tlem tak avangin sorkar pawhin ṭan ala a. Kan CM zahawmtak Pu Zoramthanga ṭhahnemngaihna avangin Mizoram Youth Commission pawhin nasa takin ṭan ala a, tih tak takna nena Central service luh tum ṭhalaite chhawmdawlin an tan sorkar a inhawng reng a ni, a ti.

Chhung inkhawm hi Pu C. Manliana, Gen.Secy MNF Gen. Hqrs. chuan kaihruaiin, Pi B.Vanlanzari, Adviser, MNF Gen.Hqrs chuan hunserh a hmang a ni.

Sd/-LALVENHIMA RALTE
Joint Secretary
Media & Publicity Dept.
Mizo National Front
Memo No. MNF/Media/03/2022/450
Dt. 24.06.2022

INLUNGRUALNA HI HNEHNA CHANG TURA KAILAWN PAWIMAWH BER A NI -K.Vanlalvena MP(RS)

Mizo National Front
General Headquarters
Mizoram : Aizawl

Press Release

INLUNGRUALNA HI HNEHNA CHANG TURA KAILAWN PAWIMAWH BER A NI
-K.Vanlalvena MP(RS)

Ni 22.6.22 Nilaini khan Nursery veng MNF unit leh Local Council buatsaihin Political Training Nursery VC Hall-a neih chu Rajya Sabha MP leh MNF National Core Committee Member ni bawk Pu K.Vanlalvena chuan a hmanpui.

He huna khuallian Pu K.Vanlalvena chuan, vawiin a in unit leh local council-ten political training in han nei dun thei hi in inlungrualna a ṭha hle in ka hria a, party leh local council te, block huam chhunga headquarters mi hrang hrang te thawhhona ṭha kan neih a ṭul a, nakum maiah MLA kan inthlang leh dawn a ni a, chuvangin lungrual taka kan thawhho a ṭul a, inlungrualna hi hnehna chang tura kailawn pawimawh ber a ni, a ti a. Kan inlungrualna hian mipui a hip a, kan bula thawh ve an chak phah a ni, a ti bawk.

Pu Vena chuan, nakum MLA inthlanna kan neih turah pawh tun atang hian kan khingpuite zir chiana kan hriatchian a pawimawh a, helai bialah hian ZPM mi leh sa Independent MLA nei in ni a, anni hi a nihna takah chuan MNF leh Congress lo vote tling tawh tuten enchhin nan a an vote tlin ve mai mai a ni a, khatiang ang boruak kha tun MLA inthlanah hi chuan a awm tawh dawn lova, chuvangin MNF MLA in neih ngei ka ring tawh a ni, a ti bawk.

Pu Vena chuan, hnam chungchang sawiin, Pathianin Mizote min hruai dan leh humhalh danah hian, zalenna famkim neia, dingchhuak tur, mahni kutke a ding ngei ngei tur kan niin ka hria a, chutiang ni tur chuan Pathian hian min khalh fal ngar ngar ni hian ka hre bawk a. Mizoramah hian zohnahthlak hnam hrang hrang kan awm a, za a za kristian kan ni a, khawchhak lama awm mizo hnahthlak te pawh za a za tho kristian an ni, chutiang tho chuan hmun hrang hrang a zohnahthlakte hi kristian vek kan ni te hi mak tak mai a ni, keini chhinlung chhuak zofate nuai 30 atang a nuai 40 inkar vel hi kristian vek kan ni a, kan thenawm rama awmte hi kan kristian hma daih khan an lo Budhish daih tawh a, a ṭhen chu an lo mosolman daih tawhin, an Islam a, mahse keini mizote hi khawchhak atanga pem thla pawh ni ila, engatinge kan lo kristian tak daih dan hi chhut tham a ni a, Pathian hian min lo voh bik daih tawh niin a lang a, kan pi pute sakhua khan kristianna hi alo kawk daih tawh a, alo inzul em em tawh a, sap missionary ten kristianna an rawn kenluh hma khan pathian hian rem alo ruat daih tawh a ni, tih hi a chiang a, kan CM Pu Zoramthanga MNF President-in chanchinṭha hril tura ruat kan ni, a tih hi a dik em em a ni, a ti bawk.

A sawi zelnaah Pu Vena chuan, hetiang ang a min sawh ngheta min zawng chhuaktu Pathian hian tuna kan nih ang mai mai ni tur hian min dah ka ring lo a. Hindu sakhua vuantuten Pathian ring mite hi min nek min nek chuan anmahni zawk hi an la boral ang a, keini Pathian ringtute hi India ramah hian kan la ding chang daih mai thei a ni, a ti bawk.

Pu Vena chuan, tun hunah hian ralthuam famkimin Independent sual tawh lo mah ila, Pu Denga khan kan rilru hi Independent turin min hruaichhuak daih tawh a, Mizo thalai ten Hindi film te ngaihhlut nachang an hre chho dawn chiah tihah khan Pu Denga chuan, Mizo hnam movement a rawn chawk chhuak a, kha khan kan Mizo hnam hi min humhim ta zel a ni. Min chimral phalo tur sap kan ngaisang hlauh hi a vanneihthlak a, min chawmtu vai kan ngaisang lo hi a vanneih thlak em em bawk a ni, chutiang ang chi tuhtu chu Pu Laldenga kha a ni a, Vai chung daiha ngaihdan a nei kha a ropui hle a ni, a ti bawk. MNF Independent movement kha awm lo ta sela khawtina dawr lian lian hi vai ta a nih rinawm tawh a, amaherawhchu khatiang zawng zawng pumpelh nan khan Pu Denga kha Pathianin hmanruaah a rawn hmang a, tichuan hun te lo kal zelin kan chheh vel hnam hrang hrangte hmang hian mizote hi Pathianin min rawn kaiharh zel a, India mi kan ni, tih hian hnamdang zawk hian an awihlo a, reiloteah Pathian hun ruat alo thleng ang a, kan Independent lovang tih hi a sawi theih miah loh a ni, a ti bawk. MP chuan, Burma ram a buai a vawikhat mah Mizorama lo la kal lo pawhin mizoram chu nuam an rawn ti em em a, zohnahthlak te kan la insuihkhawm thuai hi ka ring tlat a ni, a ti.

Pu Vena chuan, politic hi insawichhiat tawnna ringawt a ni lova, kan ram leh hnam Pathianin min hruai dan thlir thiam hi a pawimawh em em a, Pathianin hnama chiang, Pu Zoramthanga min pe a, hnam thilah chuan mi khawng tak mai a ni a, Pathian kan rin tlat chuan he hnam hi a parchhuak ngei ngei ang, tih ka ring tlat a ni, a ti. MP chuan, Unit hruaitu emaw Local Council kan ni emaw anih chuan Pathian ruatah inngai ila, a duh zawnga rorel turin kan inbuatsaih a ngai a, Pathian duh dan a kan kal zel chuan sawrkarna hi min pe reng thei a. Davida lalthuththleng pawh chatuan atan apawh sei sak a, chuvangin kha lalthutthleng kha Pathian hian a boral ang tih a hlau a, keini lalram pawh Pathian duhdan a kan awm chuan chatuan atana a pawtsei thei a ni, tih hi i hre reng u, a ti bawk.

He hun hi Nursery veng MNF Unit President Pu F.Laltlankima chuan kaihruaiin, Upa R.Zolura’n hunserh a hmang a Pu Ch.Lalnunmawia LC chairman pawhin thu sawiin, Pu Lalhmuthara Unit Vice President-in lawmthu sawina hun a hmang a. MP hi MNF Gen.Hqrs.hruaitu engemwzatin an tawiawm a. Nursery veng MNF Unit leh Local Council te hian an Hall hmun sakna turte a hmunah enpuiin an mamawh te an thlen nghal bawk a ni.

Sd/-B.Lalhmangaihzuala
Joint Secretary
Media & Publicity Department
Mizo National Front
Memo No.MNF/Media/03/2022/449
Dt. 23.06.2022

TAXI DRIVER TE HI NATIONALISM KALPUITU TUR PAWIMAWH TAK IN NI-Pu Manuna, Minister

Mizo National Front
General Headquarters
Mizoram : Aizawl

Press Release

TAXI DRIVER TE HI NATIONALISM KALPUITU TUR PAWIMAWH TAK IN NI-Pu Manuna, Minister

Vawiin June 22, 2022(Nilaini) hian Aizawl Two Wheeler Taxi Association chuan Vanapa Hall-ah General Body Meeting Vawi 4-na an nei a.He hunah hian Pu TJ Lalnuntluanga Minister of State, Transport Dept. etc chu khuallian niin he hun hi a hmanpui .

Pu TJ. Lalnuntluanga Minister chuan, nang malsawmna ni ang che tih thupui a hmangin ATTA member te afuih a, “Pathianin mihringte hi a huho a cheng tur leh mamawhte inphuhru tawn turin min siam a, chuvang chuan mihringte hi kanin mamawh tawn vek a, hatrsatna, buaina keimahni tete ah tawk thei vek kan ni a, damlo te, miharsa te leh tanpui ngaite kan puih hian keimahni ah hlimna tam tak min thlen thei a ni” a ti.

Pu Manuna chuan taxi khalh kan ni a, mi hmangtu tan malsawmna nih kan tum ṭheuh tur a ni a, tin, Taxi kan khalhpui kan ṭhiante tan pawh malsawmna thlentu nih tum tur leh inkungkaihna tha a awm theih nan thawhho na ṭha pawh kan neih aṭul hle a, taxi kan khalhna kawngah pawh midangte thu ngaichang a duham bik lutuk leh stand a dingrei lutukte ngaihtuah lek lo a lo duham fal bik lutuk te hi a ṭhalo hle a, hetiang te te ah hian kan in zir a, midangte tan malsawmna nih kan tum zel tur a ni.

Transport Pu Manuna chuan khawvelah hian mamawh neiin kan lo piang chhuak a, midangte nen a cheng ho tur in kan piang chhuak a, chu kan pian chhuahnaah chuan mahni chauh inngaihtuah bikna hian midangte malsawm dawn ve na turte kan lo huisak vak ang tih te hi a hlauhawm ṭhin a, chuvangin midangte lakah pawh semsem damdam ei bil thi thi, kan ti ṭhin tur a ni a ti.

Tin taxi driver-te hi rilru thianghlimte, zaidamnate, dawhtheihnate leh teirei peihnate kan neih a pawimawih hle mai a, miten kan chungah emaw an chungah emaw thil an tihpalhin kan tipalh ve theia, hawihawm tak leh zawldawh tak a midangte kan hmachhawn thin tur a ni. Chumiah chuan rahṭha tak inremna a awm ṭhin a ni, a ti.

Taxi driver te hi kan ram hmel lanna in ni a, Driver-te hi kan ram economy siamtu pawimawh tak in ni a, ram hmasawn nan in pawimawh em em a, Nationalism kalpui tu tur pawimawh tak pawh in bawk. Pu Manuna chuan, hnam hmangaiha, hnam neitu nihna thinlung ah chuan mite chhiatna alang lo a, mahni chiah inngaihtuah a rem lo a, midangte puih zawkna hna hi kha hnam hmangaihna thinlung ah khan a lian tur a ni, ati a. Pu Manuna chuan, Kan ram hi ram zimte mipui pawh tlemte kan ni a, hmasawnna tur tam tak kan nei a, mi ram kumsangbi tel lo awmte nen kan tehkhin a, kan tunlai khawvel changkannate nen min hrut rual ta vek mai a, kan in sawisel luai luai a, chutihlai chuan hmasawnna tur hmabak kan la nghah em em a ni. Midangte sawisel hman kan ni lo a, inhmangaihtawn ṭheuh tur kan ni a, insawisel mailo in kawng engkimah in fuih tawn ila, chu chuan rahtha a chhuah ang a ram pawhin hma a sawn zel dawn a ni ati.

He hun hi Pu C Laldinthara chuan a kaihruai in Rev Lalbiakchhunga Pachuau chuan hunserh a hmang a, ATTA Founder dintute chawimawina hun hman a ni bawk a.

 

Sd/-(LALTHAKIMA)
Joint Secretary
Media & Publicity Dept.
Mizo National Front
Memo No.MNF/Media/03/2022/448
Dt.22.06.2022

Ram tanTuirial Jail hmun hlui humhalh a, cheibawl a ni ang. – K.Vanlalvena, MP (RS)

  • Mizo National Front
    General Headquarters
    Mizoram : Aizawl

Press Release

Ram tana Zalenna sualtu, Mizo Hnam sipaite tanna Tuirial Jail hmun hlui humhalh a, cheibawl a ni ang. – K.Vanlalvena, MP (RS)

Vawiin 21.6.2022 hian Pu K.Vanlalvena, MP (Rajya Sabha) chuan, Mizoram zalenna sualtu Hnam sipaite tanna Tuirial jail hmun hlui a tlawh.

Tuirial Jail-ah hian Mizo Hnam sipai zalenna sualtu mi engemaw zat an tang a. He jail pindan chhung aṭang hian lei verh kuain October ni 16, 1979 zanlaiah mi 18 an tlan chhuak a. He thil hi vawiin thlengin khawvel ti ti ala tling a ni.

Pu K.Vanlalvena, MP (RS) chuan, Hnam sipaiten lei an verhna hmunah hian thu sawiin, Mizo hnam pasalṭhate tlanchhuahna hmun hi a hlu a, ṭhangthar, zirlaite leh khualzinte te tlawh theih turin a hmun hi MP Fund aṭanga cheibawl a ni dawn a. Lei verhna lai hi danglam deuh tawh mahse, lei verh kua an hnawhna lai te pawh kan hai chhuak leh anga. Zalenna sualtuten tha leh zung nasa tak senga an beihna hi a hlu a, thangthar zawk te thinlungah ram leh hnam hmangaihna thinlung kan tuh zelna tur hmun pawimawh tak a nih ka ring a ni, a ti.

He hunah hian mi 18 tlanchhuak zinga tel, Pu Lalhminga (Hmingtea) leh Pu Lalrengliana te pawh telin, an lei verh dan chanchin ngaihnawm takin an sawi a. Thla hnih chhung zet hmanraw mumal hmangloin feet 50 vela sei Pathian hnena ṭawngṭai chungin an verh thu an sawi a. He leiverh aṭanga tlanchhuak mi 18 zingah hian mi 8 an la dam a ni.

Tuirial jail hlui hmun hma hi 38 Bn.BSF ten an luah mek a. Cheibawl a nih hmaa a hmunhma lo samfaina turin Tuirial Airfield VCP Pu Lalthangluaia hnenah MP hian pawisa a pe nghal bawk a ni.

Pu K.Vanlalvena hi Pu VK Pandey, SI, 38Bn BSF leh a thawhpui te, Tuirial Airfield VC, YMA, MUP leh MHIP ten an lo dawngsawng a. Pu BN Thangpuia, EM, LADC leh MNF General Headquarters hruaitu, Ex-MNA Gen.Hqrs President, Pu C. Zama leh Ex-MNA hruaitu engemawzat leh PAMRA hruaituten an ṭawiawm bawk a ni.

Sd/-(LALVENHIMA RALTE)
Joint Secretary
Media & Publicity Dept.
Mizo National Front
Memo No.MNF/Media/03/2022/447
Dt.21.06.2022.

HNAHTHIAL DISTRICT MIZO HNAM RUN SAK TUR LUNGPHUM DR THANGTEA’N A PHUM

Mizo National Front
General Headquarters
Mizoram : Aizawl

Press Release

HNAHTHIAL DISTRICT MIZO HNAM RUN SAK TUR LUNGPHUM DR THANGTEA’N A PHUM

SEDP leh development hrang hranga hma kan lak tur covid avanga kan tih theih nghal mai loh teah mipui hriatthiamna kan ngen

Bangladesh nen border trade chungchanga kan indawrna a kaltluang zel – Dr R Lalthangliana, H & FW, C & I Minister

Vawiin June ni 21, 2022 (Thawhlehni) hian MNF Adviser, Dr.R.Lalthangliana chuan Hnahthial District Mizo Hnam Run, Hnahthial Peniel venga sak tur chu a lung a phum. Thu sawiin, “Kan District-a Mizo Hnam Run sak tur hi kan President Pu Zoramthanga pawh ka hrilh tawh a, min phurpui em em a, kumin hian a sak hna tan hman kan tum a ni. ‘MNF office’ kan ti ngai lova, ‘Mizo Hnam Run’ tiin kan sawi thin. Mi thil phalten Community Hall leh khawtlang In sak nana sum an thawh thin ang hian, Mizo Hnam Run sak nan hian sum thawh thei kan awm anih chuan a duh apiang thawh turin kan insawm a. Hnatlanga tha leh zung thawh thei a piangin thawh turin a remchang a piang kan insawm a, he lai hmun phal taka lei tirtu chungah pawh lawmthu ka sawi nghal bawk a ni,” a ti.

Nimin June ni 20, 2022 (Thawhtanni) chawhnu dar 3:30pm khan Dr.R.Lalthangliana, MNF Adviser chuan Lunglei Hnam Runa party mipui kalkhawm hmaah thu a sawi a. Lunglei a kal chhan chu Health Minister anih anga Chief Medical Officer office building, Trauma Care Facilities & Type III Quarters (5 Units) building-te chu Lunglei Civil Hospital Complex hawnga kal a nih thu a sawi.

Health Minister chuan Covid hian budget-a awm sa ni lo, sum hmanna a siam belh nasat hle thu a sawi a. “Kum 2018 December ni15-ah MNF chuan sorkarna siamin Minister-a lakluh kan ni a, a kar leh lawk krismas leh kum thar hunpui a ni nghal a, hna thawhna hun a awm lo. Kan sorkar tan tirh chu kum 2019 tihna ang a ni. Health Minister ka nih tirh phat khan Health department-ah post ruak 3000 vel a awm tih ka hmu nghal a. Chief Minister zahawm tak Pu Zoramthanga, Finance Minister hovin Finance, DP & AR, Planing leh Health department-te chuan meeting kan nei nghal a, post ruak hnawhkhah tur 734 lak tur kan ruahman nghal a ni. Hma kan la tan dawn chauh a, Covid thawm kan hre ta a, tum angin kan kal thei ta lo a ni. SEDP leh development hrang hranga hma kan lak tur Covid vanga kan tih theih nghal mai lohteah mipui hriatthiamna kan ngen a, kan Chief Minister chak tak kaihhruaina hnuaiah hma kan la mek zel a ni. Sorkar atanga kum khat velah Covid khan khawvel a tihralkhel nasat avangin Jan.30.2020-ah meeting pawimawh dang cancelled-in department hrang hrang – Health, Home, DM & R-te nen Covid chungchangah emergency meeting ka ko nghal a. Kum khat chauh Health Minister ka la ni si a, mangan thlak ka ti hle a. Doctor leh thawktu hrang hrang bakah hmanraw tha kan la nei si lo a. Covid chu a hluar nasa zel a, America ram thlengin nikhatah singbi kan thi a, Europe ram ropuiah mi sing tel an thi phuk phuk a nih kha. Kha tih lai khan ka rilrua lolang hmasa ber chu Pathian tanpuina chauh a ni. Kei hi engmah ka nilo tih ka inhre chiang si a. Ka rilruah veng tin khaw tinah VC, YMA leh Kohhran kan nei a, Aizawl-ah chuan Local Council kan nei bawk a. Chungte nena tangrual chuan VLTF/LLTF din a tha ber ang tih ngaihtuahna ka nei nghal a. Committee chuan Task force hrang hrang kan din ta a. State level-ah a khaikhawm turin Chief Secretary, District tinah DC Chairman-na hnuaiah kan indin ta a ni,” a ti.

Dr.R.Lalthangliana chuan Covid do chu Mizoramah chuan tu pawhin mahni mawhphurhnaah an ngai a, mi neinung fa leh pawl hrang hrangin tanpuina an chhung lut ruih ruih a. Thingtlang lam leh khawpui lam pawh chawhmeh kan inpe tawn a. Mizoram anga tangrual tha hi khawvel hmun dangah an awm ve ka ring lo. Hmannia USA ka zu kal khan Mizoramin Covid kan do dan sawi ka tum a, ‘kan hre sa vek tawh, khawvelah in ti tha ber’ min lo ti hial a. Heng zawng zawng hi sorkar, kohhran, NGO leh mimal tinte kan thawhrah Pathianin mal min sawm a ni. German Finance Minister pawh kum 2020 covid vanglai khan mawhphurhna hlen zo lovin a inhria a, amah leh amah a intihlum phah ringawt a nih kha. Khawvel ram ropui ber ber leh India ramah mit thi vui pangngaiin kan invui thei lo a, a hu hovin kan inphum ruih ruih a. Mizoramah pawh mitthi vuinaah mi 35 chin chauh kal phalin, inneih naah mi 35 bak SOP-in kal a phal lo a, khang hun laite kha a rapthlak takzet a ni. Pathianin vawiin hian min chhan chhuak leh ta a ni, a ti bawk.

Hun khirh laia rorel turin Pu Zoramthanga kaihhruai MNF chu Pathianin sorkarna chelh tura a ruat thu Health Minister chuan a sawi a. Kan sorkar chhung hian mihring pulhhri mai ni lo, ran pulhhri a leng a, ramri a buai a, khaw chhak lamah lir a nghing reng a, ram a kang a, khaw chhak lam unau raltlan thlengin kan mikhual a, Pathian hruainain mualpho lovin kan kal zel a ni a ti. October ni 22,1961-ah MNF chu Tuikhuahtlanga Pu Laldenga Inah mi tlemte ten an din thu sawiin, ‘Pathian leh kan ram tan’ tih thupuia hmangin, Pathian kan dah hmasa ber a ni, a ti. Lungleiah hian LMC pawh kan inthlang hnai mai thei a, Hnam Party chu rilru dik leh thianghlim pu tur kan ni. Dah hmasak tur dah hmasak hi kan tih tur a ni a, a ram leh a felna kan zawng hmasa tur a ni. ‘Kei kei ti lovin nang nang’ kan ti zawk tur a ni. Pathian chu kan chakna leh inhumhimna, mangan laia tanpui vartu hnai ber a ni, a ti bawk.

Commerce & Industry Minister Dr.R.Lalthangliana chuan, “Tunah hian Myanmar nen kan insumdawn tawnna tur hi an politics boruak buai vangin kan kalpui hlei thei lo a ni ber a. Chuvangin, April thlatira Bangladesh Commerce Minister, Tipu Munshi lokal tura ka phone chu April ni 23 khan a lokal nghal a. Bangladesh official pawimawh mi 9 nen Aizawl lokalin, Lengpui Airport atangin Helicopter-in Pukzing bul Silsuri chu kan zu kal a. Ke-a thui vak lo kan kal hnuah an Car-in min lo hruai a, Border Trade tihchangtlun dan tur vel kan enfel a ni. Anni chuan blacktopping leh metalling-in Mizoram an rawn thleng deuh thaw tawh a ni. Kawrpui chhuah insumdawn tawnna tur hmun kan tlawh leh nghal bawk. Kan indawrna hian rah tha chhuahin Kawrpuichhuah border trade tihhmasawnna turin Land Ports Authority of India (LPAI)-te chuan DPR cheng vbc 200-a siam tawh chu Ministry of Home Affairs-ah bawhzui mai tura peihfel a ni tawh a. Reiloteah Bangladesh nen hian mamawh hrang hrangah kan indawr tawn thei dawn ta a ni,” a ti bawk.

He hun hi Pu H.Thangrenga Lunglei MNF Sub-Headquarters Vice President chuan a kaihruai a. Pu Lawmawma Tochhawng MLA, HPC Vice Chairman leh Dr.K.Pachhunga MLA, Vice Chairman, Bamboo Development Board-ten thu an sawi bawk.

Sd/-R.LALHMANGAIHA
Secretary
Media & Publicity Dept.
Mizo National Front
Memo No.MNF/Media/03/2022/446
Dt.21.06.2022

Mizo National Front
General Headquarters
Mizoram : Aizawl

PRESS RELEASE

SEDP SEM RING LOTUTEN AN HNÂR AN HMU ṬAN MEK – Pu Robert Romawia Royte

Vawiin June 20, 2022 (Monday) Mizo Hnam Run chhung inkhawm hun hnihnaah, Sports Minister Pu Robert Romawia Royte chuan thusawiin, “SEDP hi party body ni loin, dan ang thlapa sawrkarin inkhaidiat fel taka a din Committee ten an relin a dawngtu turte an thlang ang a ti. Pilot project atan trade hran hranah hmalak tawh mek niin, vawk vulhah phei chuan cheng nuai 3 dawng kim tep an awm tawh hial a, kan hotute sawi angin a kal zel a ni a ti. Hei bakah hian infrastructure lian atana kan hman phei chu sawi tur tam tak a awm. Sorkarin sum
a release hi instalment-a pek chhuah zel ṭhin a ni a, chu chu SEDP kal dan tur pawh a ni.Tunah chuan SEDP sem a nih ring loten an hnar an hmu lian mek a, a dawn loh hlautu ah an ṭang ta zawk a, chu chuan party dangte a sawi ṭhiat mek a ni,” a ti.

Minister chuan, “Ram ropui leh changkang zawkte hian, ram leh hnam hmangaihna tak tak thinlung (nationalism) an neih tlat vanga dingchhuak an ni a. MNF pawhin he nationalism hi kan kalpui tlat avangin ramri buaiah pawh hma kan sawn a, buai hma aia zau zawk ram kan luah ta hial a ni. Sorkar hmasaah hnam rilru pu ve lo kaihhruaina hnuaiah chuan pawisawi lo zirlai, press mi leh civil mite hmahruaitu an ni a, kut an tuar a.MNF Sorkarah chuan Sorkar Force ten hma an hruai a, hmasawnna kan hmu a ni a ti. MNF tan chuan Nationalism hi kan phaw, min phuarkhawmtu a ni a, Mizo hnam rilru pu chunga kal ṭhin kan ni a, hei hi party dang nena kan danglamna a ni a, party dangten an nei ve lo,” a ti bawk.

Pu Robert Romawia chuan, “State changkang leh hmasawn zawkte dinchhuahna bul pakhat chu external loan a ni a. Tuna ADB sum Central Sorkarin min puk sak tur hi thil ropui leh lawmawm a ni a.Nasa takin Mizoramin kan ṭhatphah dawn a,kan leiba punna aia kan dehchhuah punna a san phah zawkna tur a ni ang. GSDP growth rate aṭanga chhutin Mizoram leibat tlem ber lai chu CM zahawm tak Pu Zoramthanga hruaina hnuaiah hian a ni mek a ni.State dangten EAP an hman ṭangkai dan ang hi kan zir zel a ṭul a ni, a ti bawk.

MNF Adviser ni bawk, Pu Robert-a chuan, social media kan hman tangkai thiam a tul thu leh, thudik pholan nana hman a tul a. Social media hmanga thu belhchian dawl lo vawrhdarh chingte an tlahniam zel a, ZPM te an tlahniam zel tih hi factual proof a awm a, Congress party ah mipuiin beiseina an nei tawh lo a. Central-a sawrkar, NDA chu Congress duh lo hoten an din a ni a. MNF kan tel ve avangin Central ah Ruling party kan ni.BJP kan zawm lova NDA kan zawm zawk a ni. NDA kan zawm hian MNF power a hniam phah lova,a san phah zawk a,hei hi kan state in kan hlawkpui zel ang, a ti

MNF te hi tunhnai election zawng zawng (Serchhip bye election tih chauhloh)ah hneh takin kan tling zel a. Chuvangin, party inkaihhruaina nghet leh hruaitu nghet nei party, MNF-a lut zel turin mipuite a sawm bawk a ni.

Chhung inkhawm hi Pu C. Tawnvela, Adviser, MNF Gen. Hqrs. chuan kaihruaiin, Upa Lalthanliana, Chairman, MKVI chuan hunserh a hmang a ni.

Sd/- PETER CHHANGTE
Joint Secretary
Media & Publicity Dept.
Mizo National Front
Memo No. MNF/Media/03/2022/445
Dt. 20.06.2022

Mi dawihzep an dingchhuak ngailo – Pu Lalrinsanga Ralte, MLA

Mizo National Front
General Headquarters
Mizoram : Aizawl

Press Release

Mi dawihzep an dingchhuak ngailo – Pu Lalrinsanga Ralte, MLA

June ni 17, 2022 (Zirtawpni) hian Zirlai titha chawimawina hun, MZP Sub Hqrs. Vairengte huaihawtin, Vairengte Multipurpose hall-ah hman a ni a. Pu Lalrinsanga Ralte, MLA Serlui constituency, Vice Chairman, Rubber & Allied crop Dev. Board chuan khuallian niin he hun hi a hmanpui a ni.

He huna khuallian, Pu Lalrinsanga Ralte chuan, ” Mi hlawhtlinna kan hmuh rual hian, chumi phena an kalkawng khirhkhan takte kan chhutpui angai a, mi dawihzep an dingchhuak ngailo a ni,” a ti. Tih tak takna nen, beidawnna inhnehtir lo a, tum ram chiang tak nei chungin hmalam kan pan tur a ni, a ti a. Kan nih tuma chiang tur leh nulat tlangvalna kawnga talbuai lo turin zirlai kalkhawmte a chah bawk a ni. Kawng tluang tak zawh chunga hlawhtlin a harsa a, zirna lamah leh hnasang zawnna kawnga harsatna tawkte tan a tlanchhiat san loh tur thu a sawi bawk.

Central service lama Mizote kan tlem ta em em hi a pawi hle a, ram leh hnam humhalh nana thaber chu zirna hi a ni a, ruihhlo laka inthiarfihlim tur leh social media hman kawngah fimkhur a tulzia a sawi bawk.

MLA, Pu Rs-a chuan zitirtute pawh fuihin, “Hmundanga zirtirtute aia nep chuang bik hauhlo in ni a, naupang in anglo tak takte hlawhtling taka chhertu in ni a.” Hlawhhmuh nan ringawta thawk loin, transfer leh posting buaipui reng lo tur leh zirtir hna hi mission field-a pawm turin a chah bawk.

Vairengte chhunga Zirna In atanga Zirlai HSLC leh HSSLC pass thar te hi lawmpuina thuchei leh Lehkhabu rotling tak, ‘Ram leh hnam humhalh – heti zawng hian aw’ Zonunsanga ziak chu Khuallian tumin hlan vek an ni a. Distinction-a pass te hi Laptop pek vek an ni bawk.

He hun hi Pu Lalramnghaka, President, MZP Sub Hqrs. Vairengte chuan a kaihruai a, Rev. B. Lalthlamuan’an hunserh a hmang. Pu Neng Thianlala, SDO(C) Vairengte chu khualzahawm niin thuchah pawimawh leh hlawkthlak tak tak sawiin hun a hmang a. Pu VL Krosshnehzova (Ex President, MZP Gen. Hqrs) hnen atangin zirlaite fuihna thu pawimawh tak tak ngaihthlak a ni bawk. He hunah hian MNF Gen. Hqrs hruaitute leh MZP Gen. Hqrs President Pu Lalnunmawia Pautu leh hruaitu thenkhat ten an hmanpui a ni.

He hun hi hun hniha hman niiin, 2nd session ah hian Pu Lalthlamuana Ralte, Asst. Prof, PUC chu resource person niin, career guidance hun hlawk tak neih a ni bawk.

Sd/- PETER CHHANGTE
Jt. Secretary
Media & Publicity Dept.
Mizo National Front
Memo No.MNF/Media/03/2022/442
Dt 17.06.2022.

ADB loan rulh tur tam zawk 90% hi sorkar laipui rulh tur a ni – Prof.F.Lalnunmawia

Mizo National Front
General Headquarters
Mizoram : Aizawl

Press Release

ADB loan rulh tur tam zawk 90% hi sorkar laipui rulh tur a ni- Prof.F.Lalnunmawia

Vawiin June 17, Zirtawpni hian Mizo Hnam Runah chhung inkhawm neih a ni a. He hunah hian Prof. F. Lalnunmawia, Adviser, MNF leh Vice Chairman, Horticulture Development Board ni bawk chuan thu sawiin Mizoram sorkar hmalakna hrang hrang a tarlang.

Prof. F. Lalnunmawia chuan CM zahawm tak Pu Zoramthanga leh Health Minister te hmalaknain Mizoram State Healthcare lama harsatna sut kian nan ADB atanga Loan cheng Vbc 1000 puk tura tihfel a ni ta chu mipuite tana thil lawmawm tak a nih thu sawiin, mi thenkhat chuan hei hi hrethiam lovin an sawisel a. Mahse, ADB loan rulh tur tam zawk 90% hi sorkar laipui rulh tur a ni a, keini State in kan rulh tur erawh 10% a ni thung. Chuvang chuan sorkar laipui pawhin approve harsa an ti hle a. Opposition thalaiten ‘Bang chhak sahthlaka bang thlang lama bel tum ang a ni’ an tih nen chuan thil intu lo tak a ni a ti.

ADB loan Rs vbc 1004 tih hian ADB atangin 80% (Rs vbc 803.76) loan anga puk tur a ni a, a bak 20% (Rs vbc 200.94) chu State tum tur a ni. Loan Rs vbc 803.76 ah hian Central-in 90% (Rs vbc 723) atangin a rul ang a, Mizoram Sorkar-in 10% (Rs vbc 80) atangin a pung a rul thung dawn a ni.

Pu Zoramthangan NLUP chungchangah “Bang chhak sah thlaka Bang thlang lama bel ang” tia a sawi chhan chu, ‘NLUP hi state budget ni lo, PM Special package aṭangin kan sem ang an tih ṭhin’ a sem huna State budget aṭang veka sem ni leh sia sawina a nih thu Pu Mawitea chuan a sawi.

Pu Mawitea chuan MNF sorkar term kal mek chu Covid19 hrileng leh lockdown vangin kum 2 zet chu hmasawnna hna thawk hleithei loin a awm a, hun khirh tak tak paltlangin Covid19 hripui leng, ramri buai, lirnghing, raltlan buaipui te in kan buai a, sorkar laipui atanga hmuh ngei tura ngaih sum tam tak kan hmuh loh karah sorkar hmalaknaa lawmna tur tamtak a awm, tupawh sawrkar se hetiang bak hian a kal theih a rinawm chuang lo” a ti. MNF Sorkar lai ni lo phei se chuan kan dinhmun tawn aia chhe zawk feah Mizoram hi a awm a rinthu a sawi bawk.

Hrileng kara kan harsatna denchhen hian tu tute emaw chuan sorkar sawiselah an ram tang a, social media hmang tein a chhe thei ang ber leh tawngkam mawilo tak tak tein he kan ram hi chhe ta viau leh MNF party hi sorkar leh tlak tawh lo  ang hialah min chhuah an tum a ni. Amaherawh chu mi pangngai chin te chuan heng sawiselna leh sawichhiatna te hi ngaihdan tawk an nei a ni a ti.

Pu Mawitea chuan sorkar in zoram mipui tam ber duhdan (Consensus oriented) in hma a lak thin thu a sawi a. Covid19 do naah kohhran te, NGO te leh mipuite duhdan thlir chung zelin sorkar in hma a la a, thawhhona tha tak vangin India ram state zingah hrileng dona kawnga thawk tha ber leh Covid19 vanga nunna chan tlem ber state zingah kan tel a ni. Zu leh ruihhlo do kawngah leh ruihhlo bawiha tangte chhawmdawl kawngah tlawmngai pawlte, kohhran mipuite duhdan thlir chungin kan sorkar hian hma a la a, a theih chin chinah mipui aw ngaihthla chung zelin kan sorkar hi a kal a ni. Mizoram sorkarin ram tana a thawh chinah lawmna tur tam tak a awm tih mipuiten an hmuh hmaih a ring lo tih a sawi.

Mizoram in Regional Connectivity Scheme hnuaiah ‘The Most Proactive State Award 2022’ kan dawngte hi thil lawmawm tak a ni. Primary Healthcare tih phuisui nan World Bank atangin loan cheng vbc 280 puk ani a, hemi hmang hian health sub- center zawng zawng chei thaa Health and Wellness Center-a hlankai vek tura hmalak a ni hi Mizoramin hriselna kawngah hna a thawhzia a tilang a ni. JICA tanpuinaa Cancer damdawi in tha (Cancer Superspeciality Hospital) cheng vbc 660 senga din tura bultan a ni ta te hi thil lawmawm leh chhinchhiah tlak tak a ni a. Peihfel a nih hnuah Phaiah Cancer veite refer an ngai tawh dawn lo a ni a ti.

Prof. F.Lalnunmawia chuan SEDP Economic Development hnuaiah Family oriented in sorkar in hma ala ṭan tih sawiin, Hri chu leng lo phei sela chuan kum 2 kalta khan kalpui a ni tawh ang a ti. Pilot project pawh 2020 ah kan kalpui tawh a ni a. Family Oriented hi mipui tam ber thlir a ni mek a. Mahse, theibawng sem ang ngawta sem tur a ni lo tih sawiin SEDP hi thutluang prog a ni lo, a tak ngeia thawh a ngai a ti. Tanpuina dawngtu ten a taka an thawh ngei nan thlai chi (Vaimim, bekang) leh thlai tiak (Kuhva tiak, Dragonfruit, Mau tiak) te sem ani hian a taka thawk tura in kaihhruai sorkar in a tumzia a lan tir a ni. Kumin sorkar kum kal mek ah kuthnathawka eizawng chhungkua 60,000 te puih tum an ni te leh nakkumah Phase2 atangin chhungkaw engemawzat pek leh tum a ni a, hei hian kuthnathawkte tan rahtha a chhuah zel dawn a ni a ti.

Sports & Youth Services lamah kan sorkar in nasa takin hma a la chho mek bawk a, zoram thalai infiam mi te an lawm a ni. Education dept. hma lakna in sorkar school te an lun leh ta a, nu leh pa ten senso tlem zawkin an fate sorkar school tha pangngai takah an kaltir thei ta te hian Zoram hi a chhe vek lo a ni tih a lantir a ti. Tin, mipui mamawh ei leh bar (essential commodities) chawk luh kawnga Mizoram sawrkar hma laknaah mipui kan lawm a, hei aia titha tur chuang an awm lo a ti.

Pu Mawitea chuan Mizorama Political Party dang aiin MNF Party in leadership tha leh nghet a nei hi a danglam bikna a ni a ti. He MNF party -ah hian pawl dang atangin mi tha leh chhuanawm tak tak an lo lut tawh thin a; chung zawng zawngte lo kuah khawm a, hlim leh tlangnel, thlamuang taka awm tir theitu President, leadership nei tha tak mai kan nei hi kan vanneihna a ni. Party dangte leh pawn lam mi ten min bei thin mahse, leadership tha kan neih avangin he party hi ngelnghet takin a kal zel a, hei vang hian 2023 ah pawh MNF bak sorkar tur an awm chuanglo tih hi thil chik mite thlir dan a ni. He kan sorkar hi chunglam malsawm tlakin kal zel ila, kan sorkar chhunzawm zel ang tih ka ring’ a ti.

Vawiin chhung inkhawm hi Pu Vanlalzawma, Vice President, MNF chuan a kaihruai a, Pu Michael Lalthanmawia, Adviser, MNF General Headquarters chuan hunserh a hmang bawk.

Sd/-LALLIANZUALA FANAI
Joint Secretary
Media & Publicity Dept.
Mizo National Front
Memo No.MNF/Media/03/2022/443
Dt.17.06.2022