PU LALCHAMLIANA’N TUNLAI MIZORAM DINHMUN A SAWI

Mizo National Front
General Headquarters
Mizoram : Aizawl

Press Release

PU LALCHAMLIANA’N TUNLAI MIZORAM DINHMUN A SAWI

Vawiina kan hotute archuk tui lo khawpa sawisa tute hi kan dinhmunah han ding ve ta sela engruai an nih bik hi ka ring lo

Vawiin ni 1, August 2022 Thawhtanni hian Mizo Hnam Runah chhung Inkhawm neih a ni a, he hunah hian Pu Lalchamliana, Minister leh MNF Adviser ni bawk chuan thu a sawi.

MNF Adviser chuan, MNF party hi kawng chhuk leh chhoah achangin hlimna leh lungaihnaah a awm thin, mahse kum 60 kan tling der a, President hi Pu Laldenga leh Pu Zoramthanga chiah kan la nei a, MLA nei thei party hrang hrang te President te hi MNF lo ni tawh vek an ni a, chu chuan MNF ropui zia atarlang a ni, a ti a, Mizoramah hian kum 60 tling phak party an la awm ve lo, chuvang chuan lawmthu i sawi mawlh mawlh ang u, a ti a. MNF Adviser chuan, hotu nihna hi i la vawng ve lo ila, hruaitu nih duh vanga kal fawr deuh hi MNF-ah hi chuan kan awm thiang ve lo a ni, a ti bawk.

Pu Chama chuan a department chan chungchang sawiin, “DM&R hnuaiah kan sawrkar phat atangin sawrkar hmasain project report an sawitlang theih loh, vaibelchhe 20 chuang kan Chief Minister zarah kan nawr tlang nghal a. Silpouline pawh sem tawh lovin DC tin hnenah a pawisain kan pe a, mamawhtu tak tak ten DC atangin an la chhuak tawh a, DM&R hian kan sem tawh lo. Taxation dept.ah hian Siaha-ah leh Lunglei-ah Quarter kan sa tawh bawk a ni,” a ti.

Home Minister chuan Home department chungchang sawiin, Police pawh Covid avanga sum leh pai dinhmun a that loh avangin engtikah nge kan lak ang, tih kan sawi thei lova a hreawm hle. MLA-te, NGO leh Party lam pawhin kan indaihlohna hria in la turin min nawr thin a. Mahse, Covid vang sum indaihlohna a nasat em avangin kan la thei lo a ni. Post ruak hi 2000 chuang a awm a, kum tin post 300 vel hi a awm tlangpui a, promotion, mithi leh bang avangten vacancy hi a awm nual a ni, a ti.

Home Minister chuan Kuhva ro chungchang sawiin, Kuhva hrim hrim hi chu dan in a khap a nilo mahse, foreign trade-ah Myanmar nen dan ang taka insumdawn tawnna kan la neih theihloh avangin, central-ah Karnataka MP ten nasa takin min hek a. Chuvang chuan khap a lo ni ta a, chuvang chuan khauh taka hmala turin order kan chhuah ta a ni, a ti.

Pu Chama chuan tunlai sawrkar sum dinhmun sawiin, mithenkhat ten kan CM chu Finance Management a thiamloh vangah an puh a, mahse sum leh pai enkawl thiamloh vang a ni lova, kan budget-ah vaibelchhe singkhat sanghnih zahnih sawmkua hi House-ah banpharin kan pass a ni a, State own tax leh non tax revenue atangin kumkhatah za a sawm velin kan pha lo a, State thenkhat chu za a sawmruk deuh thawin an intodelh a, keiniah chuan hailuhna tur kan nei ve lova, Central-ah kan la inghat nasa a ni, a ti.
Tax Devolution hi India sawrkarin tax a lak khawm zawng zawng hi tehna fung hrang hrang atangin 0.50 (Duli) vel kan lo chang ve a, thlakhatah vaibelchhe 50 share nei thin kha Covid avangin a tlahniam ta duai duai a ni, a ti.

Home minister chuan kumin budget vaibelchhe 2646.64 hi CSS aṭanga kan hmuh tur a ni a. CSS scheme hi hmasawnna tura central-in a state a rawn pek hian state sawrkar sum bawmah rei tak a tang thin hi a tha lo em em a. Tun hma chuan RBI-ah Mizoram hian account neiin State-in a sum kan hmuh hrang hrang kha a lut khawm thin a, kha khan sum kan hmuhna hrang hrangah min chhan a, tunah chuan khang kha a awm tawh loh avangin kan buai ta deuh thin. Amaherawhchu, kan thatna tur a nih te pawh ka ring, a ti a. External Aided Project (EAP) – ADB/JICA atanga loan lakte hi za a sawmhnih (20%) State, zaa sawmriat (80%) Funding Agency. Hemi atanga zaa sawmkua (90%) hi central in a rulh tur a ni. 14th Finance Commission khan State-ah hian pawisa an pe tha em em a, Congress sawrkar lai khan Pu Sawta kha finance a thiam an ti a. Mahse, a hunlaia a hmuh ang pawisa kha hmu ve ta ila tupawhin an thiam ang, a ti.

Home minister chuan, Budget a chuang ve lo, loh theihloh a hman ngai a crore tel kan hmang a, RTPCR khawl leina tur te, Covid avanga sum senna hrang hrang avangin kan hmang nasa em em a, 2600cr tel hi kan hmuh tur ang kan hmu lo bawk a, ramri buai avangin a vaibelchhe tel kan sen a ngai a, mi sang tel kalna leh haw man hi a tam sam em em a ni, a ti bawk. Pu Chama chuan, vawk pul hri avangin kan buai em em a, vawk pul neite hnena zangnadawmna pek tur nen a vaibelchhe tel hi kal ral a, chutiang karah chuan tupawh hi lo sawrkar sela, tun ang system a central-in min kalpuia, keimahni lamah intodelh kan tum loh chuan awlsam aiin harsat lam hi kan pan zel ang. Sawrkar pawh hi mipui telloin a kal thei lo, Kohhran pawh mipui tel loin a kal thei lo, Kohhranah chuan a tam zawk hi mipui tum a ni a, sawrkarah chuan zaa sawm vel kan intum ve tawk a. Political party hruaitute leh mipui pawh hian kan rilru kan thlak a hun tawh. UT kan nih aṭanga State kan nih thleng hian Central-in min tum sak a la ni a, sorkarin tui/electric bill a han tisang deuh a opposition hoin inti tha fahranin an thlavang an han hauh a. Income tax te hi tlang mite tih loh chuan an pe a, keiniah chuan tribal kan nih avangin Mizoram chhungah kan pe lova, phailama awm chuan an pe ang. Chuvangin, tupawh lo sawrkar sela, politics a inbeihnan kan lo hmang thin hi i sim ang u. Keimahni leh keimahni inchawm zo turin pen khat te te a kan kal a ngai a, central sum ring lo hian kan awm vat ka ring a ni, a ti.

Home minister chuan, engvangin nge Central-in sum min pek a tih hniam tial tial mai chhan hi, tih chuan mahni intodelh ve turin min duh a nih ka ring, a ti a. Khawvel pumah Covid avang a kan harsat lai hian tumah hian Financial Management an thiam ka ring lo a, alehlamah sawrkar hnathawk hlawh leh DA te a lo pung zel a, Finance Commission min pek hi tisang leh thei tur chuang an awm lo a. Chuvangin, kan sum leh pai dinhmun hi mahni phak tawk theuhin i zir chiang ang u. Vawiin ni a kan hotute archuk tui lo khawpa sawisa tute hi kan dinhmunah han ding ve ta sela engruai an nih bik hi ka ring lo, a ti.

Hnam Run chhung inkhawm hi Upa K.Lalthawmmawia NCC chuan kaihruaiin, Upa Zomuana (Ex-Synod Revival Speaker) MNF Gen.Hqrs.Adviser chuan hunserh a hmang a party mi thahnem tak an kal bawk a ni.

Sd/- B.LALHMANGAIHZUALA
Joint Secretary,
Media & Publicity Dept.
Mizo National Front
Memo No.MNF Media/02/2021/485
Dt.01.08.2022

1