HRIAKTHIHTU PATHIANIN KAN HRUAITUTE A ENSAN NGAI LO: PU LALRUATKIMA

Mizo National Front
General Headquarters
Mizoram : Aizawl

 

PRESS RELEASE

HRIAKTHIHTU PATHIANIN KAN HRUAITUTE A ENSAN NGAI LO: PU LALRUATKIMA

Vawiin ni 5, August 2022 Zirtawpni hian Mizo Hnam Runah chhung inkhawm hun hman a ni a, he hunah hian Pu Lalruatkima, Minister leh MNF Adviser nibawk chuan thusawiin, “Hriakthihtu Pathianin kan hruaitute a ensan ngai lo a, Zoram min enkawla min dawm kang ṭhintu Pathian hian min kalsan ngai lo a, a hun takah kan hruaitute huaisenna a pe thin,” a ti.

Pu Lalruatkima chuan, tunlai khawvel buaina hrang hrang, mihring leh ran hrileng, lirnghing leh khawvel indo thuthangte, sum leh paia harsatna karah hian, engkim hmulawktu Pathianin MNF chu roreltu atan a ruat a. Hun hmasa lam leh tun thlenga hmasawnna lian tham leh rotling zawng zawng deuhthaw hi MNF hnathawh a ni a. MNF chu tawng tam lo, thawk tam kan ni, a ti. Zu chhiah atanga hausak ai chuan retheih deuh zawk kan thlang a. Chutih rualin kan manifesto angin ei leh bar, gas leh oil hnianghnar kan neih theih nan hma kan la a, zirna kawngah leh kawng hrang hrangah, a tha zawnga thil inthlakthleng kan hmu zel a ni. Manifesto tihhlawhtlin tam tak kan nei tawh a, hei hi mipui nawlpui pawhin min teh nan hmang se a ṭha hle, a ti bawk.

MNF Adviser chuan, Lalnu Ropuiliani te, Pasaltha Khuangchera te leh hnam pasaltha te thisena leichhuah, kan ram hi chenna tlaka siam zel turin MNF chuan theih tawp a chhuah zel a. Thalaite tana kan hmathlir leh eizawnna chungchanga kan hmalakna hmutute tan MNF vote a chakawm hle ang, a ti. Hnam thuthlung kengtu party mite hian kan tu leh fate hnenah kan hmalakna chhuanawm tak tak te hi kan hrilhchhawn zel a ṭul a ni, tiin kalkhawmte a fuih bawk.

Pu Ruatkima chuan, world class education min tiamtu party ten, zirna lama min thlen mek chu kan hmu a. Delhi tlanga President hming sawi tur mumal pawh nei lo te hi nitinin an hniam zel a. An mau put an zo lo a, zawnpui an ngai ta hial zawk a ni, a ti. An sawrkar hunlaia sum harsatzia kha mipuiin an la theihnghilh lo a, an hunlaia leiba tam tak, a lu nunga cheng singnga chuang min battirtu te hian, sum enkawl thiam loa min puhna hi in enlet nan hmang se a tha ang, a ti. Hruaitu rintlak nia inngai chuan MADC sawrkar siam tura an party thuchhuak kalha inrawlh an MLA leh member te chungah action an la ngam tur a ni, a ti bawk.

MNF Adviser chuan, Treasury khar se tia lawma kutben tum an awm a, sawrkarna la siam ve reng reng lotu te tan sum enkawl chungchang hi hriatthiam a harsa ang. ZPM-te hian pahnihna nihah hian an lawm tawk em em zel a ni, a ti bawk. Chunglam hriakthih, Pu Zoramthanga kaihhruai sawrkar hi a ngialnghet tawk a, opposition ni chunga buh vawi hnih seng la hmabakten MNF lam rawn pan zel turin a sawm bawk.

Mizo Hnam Run chhung inkhawm hi Pu H. Zonunsanga, Exe Councillor chuan kaihruaiin, Pu N. Zokunga, Adviser, MNF Gen. Hqrs, (Member, Planning Board) chuan hunserh a hmang a, party mi thahnem tak an kal bawk a ni.

Sd/-
PETER CHHANGTE
Joint Secretary
Media & Publicity Dept.
Mizo National Front
Memo No.MNF Media/02/2021/487
Dt.05.08.2022

1