PATHIANIN MNF PARTY HI MIN HRUAI A NI – Pu Vanlalzawma MNF Vice

Mizo National Front
General Headquarters
Mizoram : Aizawl

Press Release

PATHIANIN MNF PARTY HI MIN HRUAI A NI – Pu Vanlalzawma MNF Vice President

Vawiin September ni 23, 2022 Zirtawpni hian Mizo Hnam Run ah chhung inkhawmna neih a ni a, hun hnihna ah MNF Vice President Pu Vanlalzawma chuan thusawiin, Social media hmanga inbeihna hi a nasa tawh hle a, Opposition Party ten kawng tin rengin min bei nasa hle a, heng inbeih na karah hian eng ang pawhin MNF party hi sawisel mahsela, Pathian in MNF party hi min hruai a, min sawisel na angte hi engah mah kan ngai lo a ni, a ti.

Pu Zawma chuan MNF party hi kum 60 kan lo ding tawh a, Social media-ah inbeihna nasa tak awm mahse mipui ten MNF Party lakah rinna an nghat a, kan hnathawh that te an hria a, thudik leh dik lo mipuiten an thliar thiam tulh tulh tawh ani a ti. Pathian leh kan ram tan tih thuthlung vuantu te kan nih avangin Pathian zarah kan sorkar leh ngei dawn a ni, a ti bawk.

Mizo Hnam Run chhung inkhawm hi Adviser Pu PP Thawla Ex MLA, in a kaihruai a, Pi J.Chhawnkimi chuan hunserh ahmang a, hmun hrang hranga Martar day hmang a zinchhuakte; Pu Lallenmawia Jongte Secy., Pu Lalnunsiama Secy.
Pu B.Vanlaltana, Secy.,
Pu Thangnghinglova Secy., leh
Pu Lalthlanawma Hnamte Jt.secy. te
hnen atangin report ngaihnawm tak tak ngaihthlak a ni bawk.

Sd/-
LALTHAKIMA
Joint Secretary
Media & Publicity Dept.
Mizo National Front
Memo No. MNF/Media/03/2022/512
Dt. 23.09.2022

𝐌𝐀𝐑𝐓𝐀𝐑TE NI 𝐕𝐀𝐖𝐈 𝟒3 𝐍𝐀

Mizo National Front
General Headquarters
Mizoram : Aizawl

Press Release

𝐌𝐀𝐑𝐓𝐀𝐑TE NI 𝐕𝐀𝐖𝐈 𝟒3 𝐍𝐀

Martarte hi Party ta an ni lo, Mizo Hnam Martarte an ni – Pu Tawnluia, Dy CM & MNF Sr Vice President_

Vawiin ni 𝟐𝟎.09.𝟐𝟎𝟐𝟐 Thawhlehni chawhma dar 11 khan Mizo Hnam Runah Martarte Ni Vawi 43-na hman a ni a. MNF Vice President Pu Lalthlengliana kaihhruai program pawimawh takah hian hnam pasaltha martarte sunna hun hmangin ngawi rengin minute khat chhung din a ni a, martarte hriatrengna pangpar dahna hun an hmang bawk.

Thusawitu 𝐏𝐮 𝐓𝐚𝐰𝐧𝐥𝐮𝐢𝐚, 𝐃𝐲 𝐂M & 𝐒𝐫 𝐕𝐢𝐜𝐞 𝐏𝐫𝐞𝐬𝐢𝐝𝐞𝐧𝐭 chuan martarte hi party ta an ni lo a, Mizo hnam martarte an ni, a ti a. Martarte thlanmual tur ngaihtuahtu commiittee pawh NGO leh Kohhrante telna a nih thu sawiin, martarte thlanmual enkawl pawh Art & Culture Dept. kutah a awm tawh, a ti. Mizo hnam tana nun hlantute chu hmun hrang hrangah phum ni mah se, a theih chin chinah martar thlanmualah sawn an ni, a ti.

Pu Tawnluia chuan MNF-in independence a puan rualin hnam sipaite an chhuak tih sawiin, remna a awm hnuah Mizoram chu special provision neiin – India leh Mizoram leh MNF aiawhin hming sign a ni a. Interim sorkar lo awm tur pawh kha thutlukna awmsa vek a ni, a ti a. “MNF khan zalenna sual kha an peih tawh lo ni lovin – Kohhran, zirlai leh NGO te ngenna angin tihtawp a ni. Kan hnam sipaiten hlauhna an nei lo. Chawnghei an huam a, tawrh pawh an huam. Amaherawhchu, ram mipuite tlin tawk zelin kan kal zawk a ni,” a ti.

“Kan martarte hi Mizo hnam dinchhuahna tura nun hlantute an ni a. Mizo hnam hi tu ma tihbuai loh leh mahnia ro inrel a nih theih nan nun hlan an ni. Kan hnam meichher chhitute leh Mizo nationalism kengtute an ni a. Kan hnam martarte hi harsatna tinreng paltlanga nunna hial hlantute an ni a, kan chawimawi tur a ni a, anamhni zahna chibai kan buk tur a ni,” a ti.

MNF hi Mizo hnam party kan ni a, party dang dang nen khaikhin theih kan ni lo, Pu Tawna chuan a ti a. Ram leh hnam zalenna atan Pathian leh kan ram tan tiin kan Mizo hnahthlak zawng zawng inpumkhatna tura hmalatu leh nationalism kengtu kan ni. Kan martarte hi nationalism meichher chhi engtu an ni. Mizo hnam hian hnam zalenna kan neih theih nan hma lam panin kan kal zel dawn, tiin kalkhawmte chu hnam tana ke pen zel turin a sawm bawk a ni.

Martarte Ni programah hian 𝐑𝐞𝐯. 𝐓𝐡𝐚𝐧𝐠𝐥𝐢𝐚𝐧𝐬𝐚𝐧𝐠𝐚, Dinthar, Aizawl chuan hunserh a hmang a. 𝐏𝐮 𝐑𝐨𝐜𝐡𝐮𝐧𝐠𝐧𝐮𝐧𝐠𝐚, 𝐆𝐞𝐧 𝐒𝐞𝐜𝐲 𝐢/𝐜 𝐌𝐚𝐫𝐭𝐚𝐫 𝐅𝐚𝐦𝐢𝐥𝐲 chuan independence movement chanchin te, martar day atan 20th September thlan chhuah a nih dan leh martar thlanmual buatsaih a nih dante a sawi a. Martar chhungte aiawh atangin thusawi ngaihthlak a ni bawk.

Sd/-
MALSAWMPUIA RALTE
Joint Secretary
Media & Publicity Dept.
Mizo National Front
Memo No. MNF/Media/03/2022/511
Dt. 20.09.2022

SERCHHIP-AH MARTARTE NI HMAN A NI

Mizo National Front
General Headquarters
Mizoram:Aizawl

Press Release

SERCHHIP-AH MARTARTE NI HMAN A NI

Engtik niah emaw chuan zalenna famkim kan la nei ang: Lalruatkima

Dt.20.9.2022 : Vawiin hian MNF East Block Serchhip huaihawtin, New Serchhip YMA Hall-ah Martar Ni hman a ni a. He hun hi Pu Lalruatkima, Adviser MNF, Minister ni bawk chuan khuallian niin a hmanpui. Pu Ruatkima chuan, “Engtik niah emaw chuan zalenna famkim kan la nei ang, Pathianin hun ṭha min la pe ang tih hi kan pawm dan a ni,” a ti.

Pu Lalruatkima chuan, “Hnam pasalṭhate inpekna leh an hlutna, chawimawia chawi san an ṭul zia kan thinlungah lo thar se la, martar te an nung reng dawn a ni, tih hi i hria ang u. Thangthar lo awm zel turte pawhin martar-te inpekna hlut zia hi i hre thar ang u. He ram tan hian e’nge kan tih ve theih, tih mahni inzawt ila, martar te thisenah inhlan thar ang u,” a ti.

Pu Ruatkima chuan, “India leh a chhehvel insing sak laiin excluded area-a awm kan ni a, chuti chungin India-ah kan tlu lut ta a. District Council te niin UT-ah kan awm chho a. Kum 1966-ah hnam pasalṭhaten zalenna famkim nei turin zalenna an sual ta a ni. Ṭhalai tam tak State pawna lehkhazir leh hnathawkte an haw khawm a, ram chhan turin an penchhuak a ni,” a ti a. “Jet fighter hmangin bomb kan ni a, khaw tam tak a kang duai duai a, mahni khua kan tlansan a, nunau an chiau vawng vawng a. Kan in leh lo bakah chhek in thlengin an hal a nih kha. Mizote lo hi eng hnam mah India hian indo thlawhna hmanga a beih an awm lo. Hnam huaisen kan nih avangin Indo thlawhna hial min beih nan an hmang a. Mi tam takin ram leh hnam tan an nunna hlu tak an hlan ta a ni,” a ti.

MNF Adviser chuan, “Zofa unau tam takte ram hrang hrang India, Burma leh Bangladesh-ah te ṭhendarhin kan awm a. Zofa ṭhendarha awmte hi engtik niah emaw chuan rorelna pakhat hnuaiah kan la awm leh ang. Chumi tur chuan kan ṭanrual zel a ngai a ni,” a ti a. Hnam tam tak ram nei lo an awm laiin Pathianin ram ṭha tak Mizote a pek chu vawnhim a ṭul thu a sawi bawk.

Khuallian chuan, “Ram leh hnam hmangaihna (nationalism) ṭhangtharteah lo vul thar leh rawh se,” a ti.

Pu J Malsawmzuala Vanchhawng, Adviser pawhin thu a sawi a, “Zoramin zalenna a sual chhungin nunna hlan tam tak an awm a. Vawiin hian Martar-te inpekna leh inhlanna te kan thinlungah lo thar se ka duh hle. Pathianin hnamah min din a, ram ṭha tak min pe bawk a. Ṭhangtharte hemi humhim zel tur hian kan theih tawk i chhuah zel ang u,” a ti a. “Martar kan chawimawi theihna sang ber chu Martar-te lung lo phum tawh, ram leh hnam hmangaihna chhawm nun zel hi a ni. Chumi tur chuan kan theih tawk i chhuah ang u.” a ti a. Zalenna sual ngam hnam kan ni hi inchhuanna tham a tlin thu a sawi bawk.

He hunah hian Martar-te zahna leh sunna hun atan ngawi rengin minute 1 din a ni. Pu C Vanlalsiamthara, President MNF East Block Serchhip-in a kaihruai.

 

(sd/-LALLENMAWIA JONGTE)
Secretary
Media&Publicity Dept
Mizo National Front
Memo No.MNF/Media.03/2022/512
Dt.20.09.2022

 

 

Zalenna leh Hnam movement hi MNF hian a la vawngnung reng- Pu K. Vanlalauva, Treasurer, MNF

Mizo National Front
General Headquarters
Mizoram : Aizawl

Press Release

Zalenna leh Hnam movement hi MNF hian a la vawngnung reng- Pu K. Vanlalauva, Treasurer, MNF

Vawiin September ni 19, 2022 Thawhtanni hian Mizo Hnam Runah Ram leh Hnam tana nunna hlantu, Pte. Zothanpara, ‘T’ Battalion puala inkhawm hun hman a ni a. He hunah hian Pu K. Vanlalauva, Treasurer, MNF Gen. Hqrs chuan thu sawiin, ” Zalenna leh Hnam movement hi MNF hian a la vawng reng a. Zalenna meichher hi kan la chhi reng a ni,” a ti.

Pu K. Auva chuan, Mizo Hnam movement lo pianchhuah dan leh MNF lo indin dan te a sawi a. Martarte mimal chanchin hrethui vek tawhlo mah ila, an martar chhan erawh kan chiang em em a ni, a ti. MNF in martar te a zah a, a ngaihlu a, martar te thlanmual siamin sawrkar ta atana a dah thu a sawi bawk.

MNF Treasurer chuan, Zalenna sual hunlaiin, sawrkar leh party, kohhran leh tlawmngai pawl leh zirlai pawl ten, “Zalenna sual in ni a, Zalenna loah chuan in lungawi lo ang, amaherawhchu, in thawhsak Zoram mipuiten kan tawrhna hi a nasa tawh em mai, Zalenna in sual zui dawn tawhlo tihna niloin, rawn hahchawl rih mai te u,” ti a min ngenna avang chauhin kan haw a ni, a ti. Kum 34 mi lek nichungin Hnam movement Pu Laldenga’n a lo hruai tawh a. Hei hian thalaiten Ram leh Hnam movement kan thupui thin zia a tichiang a. Tunthleng pawhin, thalaite hian Ram leh Hnam an la vei em em a ni, a ti bawk.

Hnam Pasaltha ram tana nunhlantu puala inkhawm hi Col. Lalrawnliana’n a kaihruai a. Pu Vanropuia Sailo, Treasurer, Ex-MNA chuan hunserh a hmang a ni. Pu C. Zama, President, Ex-MNA Association hnen atangin report ngaihthlak a ni bawk.

Sd/-
PETER CHHANGTE
Joint Secretary
Media & Publicity Dept.
Mizo National Front
Memo No.MNF/Media/03/2022/510
Dt 19.09.2022

PU ZORAMTHANGA LEH PU TAWNLUIATE ANG HI INDIA RAM HMUN DANGAH AN AWM VE LO -Lalthlengliana

Mizo National Front
General Headquarters
Mizoram : Aizawl

Press Release

KUM 60 CHHUNG CHAWL LOVA HRUAITU ROPUI PU ZORAMTHANGA LEH PU TAWNLUIATE ANG HI INDIA RAM HMUN DANGAH AN AWM VE LO-Lalthlengliana
MNF Vice President

Vawiin September ni 19, 2022 (Thawhtanni) hian Mizo Hnam Runah chhung inkhawm neih a ni a. Hun hnihnaah Pu Lalthlengliana, MNF Vice President chuan MNF anga kum 60 chhung ni hnih khat chauh pawh chawl lova, hruaitu ropui Pu Zoramthanga leh Pu Tawnluiate ang hi India ramah an awm ve loh thu a sawi a. Tun laiin mi thenkhatin social media-ah nuihza siam nan kan President Pu Zoramthanga thlalak chhe tak taka siam danglamin an ti nasa a. Heng mite hi han chhui chiang i la, veng khat leh khaw khatah pawh miten engah mah an ngaih lohte an ni. Khawvel hmun dangah mahni hnam pui, mahni ram hruaitu nuihza siam nana hmang ve vak vak an awm a rin loh thu a sawi a. Heti khawpin sawisa mahse, Pu Zoramthanga hian huatah en lovin vawi khat pawh a chhanlet loh thu a sawi a, Pu Zoramthanga chu hruaitu ropui leh nunnel tak a ni a, kum 20 chhung kan ram tan an rammu a, Pathian hriak thih an ni, a ti.

MNF Vice President chuan, “Vawiina political party dangin dawta min beihna zozaite hi hnunglamah dah i la. Mizo hnam mipui hian Nehemia anga rinawmin, kan ram hi i din thar leh ang u. Party dangin an sawi fo Kamrula hna pe tam bertu leh Mizo nihna petu pawh congress party an ni a. An sorkar laia Dihmunzawl inthiah man to uchuak chungchang te, kawng chhiat avanga kawngpuiah buh an phun te, kawngpuiah sangha note an chhuah te, Zocarbon chungchanga Truck thlawk thei te, pawisa an tih lapse zozai te, an zu zawrh avanga hmeithai leh fahrah an tamzia te, Pu Hawla helicopter chuan tamziate kha keini chuan kan sawi kan sawi ve lo,” a ti.

ZPM leader Pu Lalduhoma chungchang sawiin, “Party hrang hrang dina awm kual, political party hrang hrang 10 chuanga awm tawh, a awmna chu tha ber anga sawi a, a chhuahsan party chu chhe bera chhuah zel hian kalphung thar sawiin, kalphung thar hmuh tur awm chuanglo hi engmah tak tak an ni ngailo ang,” Pu Lalthlengliana chuan a ti bawk.

He hun hi Pu Ngurzamlova, General Secretary chuan kaihruaiin, Pi Lalramengi Secretary MNWF Headquarters chuan hunserh a hmang a. Pu PB.Lalduhawma, Secretary-in E.Tuipui leh Champhai bial zin report a pe bawk.

Sd/-

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/509
Dt.19.09.2022

Kan pi leh puten thisen senga an sahzau a ni, an thlah zelte hian kan humhalh tur a ni a ti.

Mizo National Front
General Headquarters
Mizoram : Aizawl

Press Release

  Sapho min awp lai chuan kan hnam himna hi an kutah a awm a, India hnuaia kan awm hnuah erawh kan himna hi keimahni kutah a innghat_
– Pu Lalthlamuana Ralte, Asst. Prof. PUC

Vawiin September ni 16, 2022 Zirtawpni hian Mizo Hnam Runah chhung inkhawm neih a ni a, he hunah hian Pu Lalthlamuana Ralte, Assistant Professor, PUC hnen aṭangin ram leh hnam humhalh (Nationalism) chungchang ngaihnawm tak ngaihthlak a ni.

Pu Muantea chuan ‘Ram hmangaihna dik tak chu Hnam venhimah a innghat a. Awp behna lak ata zalenna nei tura hmalak te hi Nationalism a ni. Pathianin he ramah hian tuma tihbuai loin zalen takin min dah a, hnamah min din a. Engtikah emaw chuan zalenna dik tak hi kan la nei ang tih kan ring tlat tur a ni lawm ni? a ti.

A sawi zelnaah Israel te leh Japanese te lak aṭanga Nationalism hi zir chiang lehzual turin kalkhawmte a ngen a. Israel chu kum 1948 ah UNO in ram an pe a, an ram neih hi engti zawng maha chãn an tum tawh lo. An ram him nan chuan huaisen takin an bei a ni, a ti bawk.

Pu Lalthlamuana chuan Ṭhenawm Cachari te pawh Cachar ram la awm mah se chimralin an awm tawh tih sawin, ‘Japanese te Nationalism in a tum ber chu sumdawnna leh eizawnna hmanga khawvel awp a ni. An taima, an thawkrim, an hlawhtling reng a ni. Chutiang in Chimralna leh hmelma laka kan him nan Israel Nationalism – ram humhim duhna leh hmangaihna neih tel hi i zir zel ang u a ti.

A sawi zelnaah ‘Mizote hi kan vannei, Ram kan nei a, hnam hlawm ṭha taka kan la awm hi ka ngaihtuah chang chuan Pathian hnenah lawmthu ka sawi ṭhin a ti.

Hnam ropui ber ber te pawh an ral thei a. He ram luah tura Pathian ruat kan ni. Kan chhevela tribal hnam tam tak, ram nei tawh lova chimral leh nekchepa awm an tam. Pathian min hruaina avanga Ram leh hnam kan la awm hi lawmthu sawi tur kan ni a ti.

Hnam indin thar lehna tura pawimawh chu kan political party te an ni. Juda ho chuan an vahvaihna hmun ram hrang hrangah an hnam leh sakhua an vawng nung tlat a. 1948 ah an ram ngaih em emah Ram an din thar leh a ni.

He ram hi Pathianin kan tana a dah a ni. Kan pipute sahzau ramah kan awm a, he ram hi kan thlahtuten huaisen taka an neih a ni. Kan Pasalṭha te thisen luanna ram kan chhawm zel hi a hlu thlawt a. Hnam khat ṭawng khat hmanga inbe thei kan ni zel hi a ropui em em a. Engti zawng pawhin kan inven a ngai, a ti.

Pu Lalthlamuana Ralte chuan Sapho min awp lai chuan kan hnam himna hi anmahni kutah a awm a, India hnuaia kan awm hnuah erawh kan himna hi keimahni kutah a innghat ta tlat a ni a ti. Chuvangin, kan himna tur hian keimahni, ram hruaitute hi a pawimawh a ni. Keimahni kan inven a ngai a ni. Kan piputen Kristian sakhua an lo pawm kha a ṭha thlawt a ni.

Sorkar laipuiin dan chi hrang hrang min barh luih thut thut lai hian kan inven a ngai ta. He ram hi Mizote ta a ni. Pathianin hnam leh ram min pe a, chumi humhalh chu keimahni kutah a awm a ni. Kan pi leh puten thisen senga an sahzau a ni, an thlah zelte hian kan humhalh tur a ni a ti.

Vawiin chhung inkhawm hi Pu J. Malsawmzuala Vanchhawng, Vice Chairman, MNF Publicity Board chuan a kaihruai a. Pi Chuauzikpuii, Councillor chuan hunserh a hmang bawk. Pu VL Krosshnehzova, Secretary, MNF Publicity Board leh General Secretary, Media & Publicity Department ni bawk hnen aṭangin Report ngaihthlak a ni.

Sd/-

LALLIANZUALA FANAI
Joint Secretary
Media & Publicity Dept.
Mizo National Front
Memo No.MNF/Media/03/2022/508
Dt.16.09.2022

SEDP KALPUI MEK ZEL A NI

Mizo National Front
General Headquarters
Mizoram : Aizawl

Press Release

 

SEDP KALPUI MEK ZEL A NI

Dated, Aizawl, 9th, Sept.2022 (Ningani) :- MNF sorkar, Pu Zoramthanga kaihhruai chuan hripui leng karah a Flagship Programme SEDP, Family oriented-a ranvulh thlangtute hnenah AH & Vety Department chuan 6th September, 2022 atang khan District hrang hrangah ‘Sensitisation of beneficiaries’ neih tan a ni a. Aizawl District-ah pawh veng leh khua hrang hrangah nasa taka kalpui mek a ni.

Aizawl District chhungah heng hmunahte hian sensitization of beneficiaries neih pahin, APR sign tir an ni. Chung vengte chu : Lawipu, Durtlang, Muthi, Luangmual, Dinthar, Aibawk, Ramhlun, Ramhlun N, Ramhlun S, Armed Veng, Chanmari, Chanmari West, Damveng, Darlawn, Ratu, East Phaileng, Lungleng, Lungleng N, Republic, Venghlui, Tuirial, Tuirial Airfield, Zemabawk, Zuangtui, Muanna Veng, Hmuifang, Sumsuih-ahte neih zawh tawh niin, nitin veng hrang hrangah leh khaw hran hranahte la kal pui zel tur a ni.

He hunah hian vety department mi leh saten awareness/sensitization pein, pawisa hman dan turte leh components hrang hrang te hrilhfiah a ni a. Vawkvulh thlangtu te tan Insurance a tih theih thute hrilhhriat nghal an ni bawk. Insurance tihna tur hi component-ah telh nghal niin, hri avanga vanduaina an tawk palh anih pawh a, beneficiary-te kutbeng ringawta an awm lohna tura ruahman a ni a. An hamthatna tura tan lak dan turte hrilhfiah an ni bawk.

He Programme hi an chhungkaw dinchhuahna tura tih a nihna ang ngei a, hmang tura chah leh fuih an ni a. Department lam pawhin kawng engkima beneficiary-te kaihhruai an ngaihna a pianga pui tura an in hawng reng thei tur hi MNF chuan lawmawm a ti hle a, mipuite pawhin thawktute thu zawm hram turin kan inngen mawlh mawlh a ni e.

 

Sd/-

(THANGKIMA)
Secretary
Media & Publicity Dept.
Mizo National Front
Memo No.MNF Media/02/2021/506
Dt.09.09.2022.

LAND REVENUE BILL HI THINGTLANG MITE TAN MALSAWMNA A NI DAWN: LALRUATKIMA

Mizo National Front
General Headquarters
Mizoram : Aizawl

Press Release

LAND REVENUE BILL HI THINGTLANG MITE TAN MALSAWMNA A NI DAWN: LALRUATKIMA

Vawiin September ni 9, 2022 Zirtawpni hian Mizo Hnam Runah chhung inkhawm neih a ni a. Hun hnihnaah (Political session) Pu Lalruatkima, MNF Adviser leh Minister ni bawk chuan thu a sawi.
Pu Lalruatkima chuan Sorkar-in Assembly koh hlan a nghakhlel em em a, dan siam ṭhat ngai siam ṭhat nan te, dan siam thar ngai siamna hun atan Assembly session neih hun hi an nghakhlel ṭhin tih a sawi. Thla ruk danah Assembly session hi neih ziah tur a ni a, session neih zawh tak kha MNF sorkar hnua session vawi 10 na a nih thu a sawi.

MNF Adviser chuan Session neih zawh tak chungchang sawi langin, House a pharh tak ‘ The Mizoram (Land Revenue) (Amendment) Bill, 2022 chu mi retheite tana ṭha tur zawk a ni tih sawiin House-a Dan Amendmend siam tam zawk hian mi retheite a neksawr ngai lo a ti. Opposition MLA House a ṭanga chhuak ta daih khan a chhiar chian loh vang a ni mai thei a, ‘Property card kha ka bialah rawn ti vat vat ula’ titu tur kha a chhuak daih mai si a, a hre chiang lo ani ngei ang. Congress sorkar khan Mizoram Land Revenue Rules 2013 an siam a, Mizoram Land Revenue Act 2013 ah an telh reng reng lova. Anmahni hun laia siam, dan ang taka siam thata, mipuite leh sorkar tana tha tura ruahman a ni. A mual boin an bo a, Zawlbuka an ek tan kha, then kan tum a, anmahni chuan ‘tunge e’ an tia, anmahni ek a ni reng si a ti.

MLR Act amendment Sec 75A chungchang chu Sorkar ram hman hawh (Temporary pass- periodic patta/ House pass/ Shop pass/ Stall pass/ Land lease) chhung ah Land Acquisition a awm chuan, a ram neitu dik tak Sorkar in Land value atangin share 15% a chang anga, a ram hmang hawhtu in 85% a chang thung anga, Hemi bak ah hian 100% Solatium & 12% Interest achang bawk ang ati a.
Hemi hian Permanent settlement LSC a huam lo.

Sorkar hmasa khan MLR Rules 2013 (17/7/2013) ah an lo daha, mahse MLR Act 2013 ah alo awm si lova, Dan reng reng hi Act milin Rules siam tur ani, Act a awm lo Rules a awm tlat hi adik lo bawk avangin MLR Act ah hian telh tur a ni ve dawn ta a ni a ti.

Pu Ruatkima chuan “Legislator ten Dan kan siam a, chumi behchhan chuan Court in thutlukna a siam ṭhin. ‘Court-ah kan chak leh chuang lovang’ ti a, Dan siamtu aia court kha thunei zawka ngai kan awm ni a lang chu pawi atih thu asawi. Chief Minister ni ta se khuar khurumah min tlak pui ang tih hlauhawm khawpin a bo tlat a ni” a ti.

Minister chuan The Mizoram (Land Revenue) (Amendment) Bill, 2022 kha thingtlang mi tan malsawmna a ni dâwn. LSC an duh reng, an neih theih loh kha Property card an nei anga, property card hmangin Loan te a la thei tawh dâwn a ni. Tuna zangnadawmna lakna tur ah hian ‘cut’ a ni dâwn lo, thil kal mek a nih avangin. Land acquisition dan hmang a ram lak tur awm leh hun turah chauh a ram neitu sorkar hian a chanvo a la mai dawn a ni a ti.

CM car hman tur lei chungchang sawi langin, Congress sorkar lai khan Motor thar lei thuah khatih laia CM khan, “vawi khat pawh budget la pharh lo hian motor lei chungchang hi lo sawisel ve tawh suh u,” a ti hial a nih kha. Sorkarin Motor hi ṭul loah lei a ni ngai lo a ti . Kum 2018 inthlan dawnah ZPM hotuten an MLA candidate te an kokhawm a, “ MLA hamthatna dawn zinga mi Car leina (nuai 10) ka la lo ang, MLA hlawh pung la lo turin ka intiam e,” tiin an intiamtir a, an chham rual dual dual a. Assembly Secretariat-ah MLA Car leina la hmasaber zawh a ni a, ‘Pu Lalduhoma’ tih chu chhanna a ni a ti.

Pu Ruatkima chuan BADP hna atangin 25% hi in ei em ni? tiin opposition MLA kha a rak dar dar a. 25% hi ei tur a awm lo, lak tur pawh a awm lo. Sevadal training chhuak zawhna, dawt 100 i sawia pakhatin an awih pawhin a hlawk tho tih ang chi hi chu tunlai khawvelah an ching tawh lo a ti.
House pass dilna Minister kaltlanga tih ngai chungchang pawh sawi langin, Pu Ruatkima chuan Congress sorkar laia kalpui tawh anga kalpui zel a ni. Surveyor indaih ni ila kan thlah zalen thei reng a ni a ti.

Pu Ruatkima chuan MNF sorkar hnuah Zirtirtu ringawt pawh 3000 (MR+SEDP) chuang lak an ni tawh tih sawi langin, Two Wheeler taxi permit pawh 3000 vel pek chhuak a ni tawh a. ‘Mi ṭhahnem tak tan eizawnna kan siam der tawh tihna a ni’ a ti. Minister chuan ‘Pathian in kan sorkar min veng a, Sorkar hnathawk hlawh pawh a hun takah release a ni leh mai dâwn’ a ni. Ṭampui mitthi ang maia kum hnih zet hripui leng karah pawh buhfai lamah harsatna kan tawk lova. Tun hnaiah Mizoramin ‘Best Agriculture State in North East India Award’ kan dawng a, Delhi lamah kan Agriculture Minister-in Union Minister hnenah a dawng dâwn a ni. ‘Kan Minister leh kan sorkar hian thawk ṭha lo ni ila he lawmman hi kan dawng hauh lovang. A ṭha ber in ni e tia min thlangtu hi Ministry of Agriculture a ni tlat’ a ti.

Pu Ruatkima chuan kum 2023-ah Pathian leh Mipuite zarah an sorkar leh ngei a ring tih sawiin, Opposition hoin, ‘CM hi a tla ang, a bial a buai em mai’ an ti a. Mahse, inkhelhnaah pawh inchuh buaina karah zel lawm kan pet goal ṭhin le’ a ti.
Rural Development Minister chuan a department chanah pawh kum thum chhung ni 100 in hlawhna za-ah za inhlawhna siam a ni thei chu chunglam hruaina vang a ni a ti.

‘Kum hnih chhung zet hun ṭha loa min hruaitu hian hun ṭha min pek hi ka ring tlat a. Kum nga dang, a vur kum hi Pathianin min la pe leh in ka ring a ni. Lungrualna leh thawhrimna nen kan kal a, Pathian leh kan ram tan tia kan ṭan tlat chuan hun thar kan chuangkai ngei ang. Kum 2027/2028-ah chuan Champhai khi lehlangin a kal theih tawh ang a, Pu Zoramthanga kaihhruaina hnuaiah he ram hmasawnna hi kan hmu zel dâwn a ni’ a ti.

Vawiin Mizo Hnam Run chhung inkhawm hi Pu F. Lalthlamuana, member, PAC, MNF Gen. Hqrs chuan a kaihruai a. Upa T. Lalrinawma, Bawngkawn chuan Hunserh a hmang a. Tv. Lalengkima, Secretary, South I block hnen aṭangin report ngaihthlak a ni a, Pu Lalzahawma, President, Lawngtlai District MNF hnen aṭangin thusawi tawi ngaihnawm tak ngaihthlak a ni.

Sd/-

(LALLIANZUALA FANAI )
Joint Secretary
Media & Publicity Dept.
Mizo National Front
Memo No.MNF/Media/03/2022/507
Dt.09.09.2022

BY ELECTION RESULT-AH KAN LAWM

Mizo National Front
General Headquarters
Mizoram : Aizawl

Press Release

BY ELECTION RESULT-AH KAN LAWM

Mizoram hmun hrang hranga Local Council leh Village Council by election seat 65 neihah, MNF chuan seat 33 lai mai kan la thei hi MNF chuan lawmawm kan ti tak zet a. By election hlawhtling tak neih a nih theihna tura vote thlaktu mipuite leh inthlan buaipuitute chungah lawmthu kan sawi a, a bik takin MNF candidate vote tu zawng zawngte chungah lawmthu kan sawi a ni.

LC/VC inthlana tling zawng zawngte lawmpuina leh duhsakna kan hlan a. Khawtlang leh ram tana rawng an bawlna kawngah theih tawp chhuaha ṭan la turin kan ngen a ni.

He inthlan result hian Pu Zoramthanga, Chief Minister kaihhruai MNF sorkar chu mipuiin an la ring tawk hle a ni, tih a tilang chiang hle a. Hripui leng leh harsatna hrang hrang karah pawh chak takin he sorkar hi a kal zel a, hma a sawn zel a ni tih mipuiin an pawm tih an entirah MNF chuan kan ngai a ni.

Sd/-
F. LALBIAKZAMA
Secretary
Media & Publicity Dept.
Mizo National Front
Memo No.MNF Media/02/2021/504
Dt.07.09.2022.

AIZAWL SOUTH-I AH VOTER 485-IN MNF AN ZAWM THAR

Mizo National Front
General Headquarters
Mizoram : Aizawl

Press Release

Hmasawnna hna thawk tam hre duh chuan Taxation website-ah lut mai se an hria ang -Robert Romawia Royte,Minister

AIZAWL SOUTH-I AH VOTER 485-IN MNF AN ZAWM THAR

Dated, Aizawl, 7th, Sept. 2022 (Nilaini) :- Vawiin chawhma dar 11:30am khan Bethlehem Vengthlang YMA Hall-ah MNF, Aizawl South-I Block huaihawtin ‘Mi thar lawmluhna hun’ hman a ni a. He huna khuallian MNF Adviser Pu Robert Romawia Royte, Minister ni bawk chuan South I huam chhung veng hrang hrang atangin Congress, ZPM leh Neutral atangin voter 485 a lawmlut.

Mi thar lawmluttu Pu Robert Romawia Royte chuan MNF chu party hlun ber anih thusawiin kum 60-na lawm mek thu te, MNF-ah a luh hma khan party hrang hrangten nihna hrawl tak taka an thlem thu leh, MNF zawm chu an chhungkaw tawngtai chhanna anih thu a sawi a. Vawiina member thar 485 lai lawmlut theia an awm chu Pathian hruaina a ni, a ti. Membership fee pea ‘Pathian leh kan ram tan’ titute chu an ngheh bikzia sawiin vawiina lut tharte tihfuh thu leh MNF lo chu party dang belh tur an awm loh thu a sawi a ni.

“Covid avangin sum kan dawn tur cheng vaibelchhe tam tak kan dawng thei lo a. Chutichung chuan mipui ngaih pawimawh avangin SEDP chu rethei leh harsa zawkte tan a inkhai fuh chho mek a. Opposition party ten ‘An ti thei lo ang’ tiin an sawi thin a,mahse Pathian zarah kan ti thei zel a. Hmana hun harsa tak kara MNF hruaichhuak thintu Pathian khan tun thlengin min la khaichhuak zel a ni. Tunah hian SEDP chu mi tam tak account-ah a lut tan dawn mek a, tuna la thlan ve lohte pawh mi tam tak kum tharah thlan an ni ang,” Pu Robert Romawia Royte chuan a ti.

Pu Robert Romawia Royte chuan Pu Lalduhoma leh amah an inan loh thu sawiin, “Tunhnaiah Pu Duhoma chuan number leh figure a lawmlut a, keini chuan mihring tak tak kan lawmlut a ni. ZPM Leader Pu Lalduhoma’n Rajiv Nagar-ah September ni 2 khan mi thar 40 chuang a lawmlut an ti a,a hnu lawk September ni 6 a VC bye-election ah chuan ZPM candidate khan vote 6 chiah a hmu lawi si a ni. Keini chuan vawiinah pawh MNF a Membership pe ngei te kan lawmlut a ni. Tun tum VC bye-election-ah hian seat 65-ah inthlan a ni a, MNF-in 33 kan la a, a bak chu party dang zawng leh independent-ten an insem ve mai chauh a, MNF kan che tha hle a ni,” a ti bawk.

Minister Pu Robert Romawia Royte chuan hmasawnna hna thawk tam leh tam lo hre duh chuan Taxation website-ah lut mai se, an hriatchhian tur thu a sawi a. MNF term reilote chhung hian GST a tam thu sawiin, GST a lo luh tam chuan hmasawnna hnathawh a tam a ni a ti a. Congress kum tam tak sorkar lai ai khan tunah hian GST a loluh tam thu a sawi. Minister Pu Roberta chuan Mizoram Congress chungchang sawiin an President thar Pu Lalsawta ai thu mi 3 vel an awm a,MADC a Congress MDC ten MNF nena sorkar an siam chungchangah pawh ama thu a dintlang pui ngam lo a ti bawk.

He hunah hian MNF Treasurer Pu K.Vanlalauva chuan MNF chu Hnam movement-a a din tirh ata tun thlengin leader tha kan nei reng a, kan vannei hle a ni. Hnam movement reng rengah leader tha an neih loh chuan an ding chhuak thei ngaillo, a ti a. Pu R.Lalhnuna PAC MNF Gen.Hqrs.pawhin Aizawl South-I hi opposition-ah kan awm tawh dawn lo a, South I thar kan din ang. Inthlan hrang hrangah hnehna chang zelin MLA 28 kan nei mek a. Politics-ah hian dawihzep an ding chhuak ngai lova, huaisen a piang an ding chhuak a, nakum inthlanah kan hotuten he lai bialah hian tupawh candidate-ah rawn dah se, kan titling ngei ngei dawn a ni, a ti.

Lawmluhte atangin thusawi ngaihnawm tak tak ngaihthlak a ni bawk.

He hun hi Pu Hrangkunga Fanai, Block President chuan kaihruaiin, Pu R.Lalrinmawia, Block President hlui chuan hunserh a hmang a. Pu F.Vanlalzawna Block Secretary (Election) chuan report pein, Pu K.Rohlira, Block Vice President chuan lawmthu sawiin hun a khar.

Kalkhawmte hian Resolution siamin lungrual takin an pass bawk a ni.

Sd/-

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/505
Dt.07.09.2022