Tui anga nghetlote kutah Zoram hruaitu nihna chung lamin a pe ngai lo – Zoramthanga, MNF President

MIZO NATIONAL FRONT
General Headquarters
Mizoram : Aizawl

PRESS RELEASE

Tui anga nghetlote kutah Zoram hruaitu nihna chung lamin a pe ngai lo – Zoramthanga, MNF President

Vawiin May ni 20, 2022 (zirtawpni) chawhma dar 11:30am hian MNF President Pu Zoramthanga chuan, Serchhipah Mizo Hnam Run a hawng.

MNF President Pu Zoramthanga chuan Mizo Hnam Run hawnna inkhawmah thusawiin, “Mizo Nationalism zungkaihna leh sawina hmun tur Mizo Hnam Run hi kan theih dan ang angin kan din zel dawn a ni. Pathian leh kan ram tan ti a chunglama innghat tlat kan nih avangin tlakhniam changte nei ve ṭhin bawk mah ila, tlu chheloin Kum 60 kan thleng thei a ni,” a ti.

Pu Zoramthanga chuan, “Party ṭhenkhat chu Delhi khawnvartui bur an ring a, Delhi lamah a bur a tluk ruah tawh chuan a phita a rawp ral ve nghal mai ṭhin a. Serchhipah pawh kum 3 hnuah kan han inthlan leh meuh chuan an bupuiah dahkham chawiin halral thil hlanah an candidate an hlan a ni. Neitu nihna phun tello, mahni a din chhuah tumna zung neilo, Delhi khawnvartui ringa nungte chu an zuih ral mek a, Jehova Pathian tlansan a, Lord Krishna ringtute tlakchhiat dan hi nasa tak a ni,” s ti.

“Party ṭhenkhat leader-te pawh, MP leh ruling party President-niin ramhnuaia kan awmlaiin bul an ṭan tawh a. Tui anga nghetlo te kutah Zoram hruaitu nihna chunglamin a pe ngailo tih kan hmu. An au pui ber kalphung thar an tidanglam ngun lutuk a, mipuiin kan zui zo lo a ni” MNF President chuan a ti.

“Pathian leh kan ram ti a bul ṭan, kan innghahna anih avangin, Chung lam remruat ang zelin kan kal a. India rama mihring tamtak zinga chanchinṭha hril turin remna min pe a. Pathianin hun a tih lohah chuan sorkarnate hi a lak ngawt theih loh, hman aṭanga Pathianin hlawhtlinna hmu tura movement a kalpui leh thil tum tihlawhtling tura hmanruaa min hman a duh a ni. ‘Pathian leh kan ram tan’ tia kan enremna kan entlat chuan chauh changte nei mah ila, kan tlu ngailo ang” a ti bawk.

Pu K.Vanlalvena, Lunglei Sub-Hqrs, tun hnaia ZPM aṭanga MNF party zawm ta pawhin thusawiin, ZPM-ah theihtawp chhuahin kalphung tharte sawiin kan bei ṭhin a. ZPM-ah hian thil inkawlkalh lian tak pahnih a awm a. Kal dan hriatthiam har tak a awm a, Leader, President leh Working President-e an awm a. Pakhatin chhak lam a pan a, pakhatin thlanglam min panpui a ni. Movement anga a kal hnuah, political party kalphung ṭhalo ṭhenkhat sawi ṭhin khan, party kan ni tawh a lawm tiin kalphung pangngai kan sawi ṭhin ang thoin an kal a ni. Kalphung thar tih hi sawi ṭhin mahse, party thar anih avangin an thiltih apiang hi kalphung thar an tih chu a ni mai. ZPM hi rei a din ka ringlo, Mizo National meichher kengtu MNF party hi Zofate min hruai turin a rintlak a, min la hruai zel ka ring tlat a ni, a ti.

Serchhipa Mizo Hnam Run hmun hi June ni 30, 2002 Remna Ni khan mimal hnen aṭangin lei a ni a, June 19, 2019 aṭangin sak ṭan a ni.

Serchhip Mizo Hnam Run hawn inkhawm ah hian, Congress party, BJP leh neutral aṭanga MNF party zawm thar mi 45-te lawmtakin Pu Zoramthanga’n a lawmlut nghal bawk.

MNF President hian Chawhnu lamah MNF Serchhip West Block Conference, Thenzawl Joint YMA Hall-ah hmanpui lehin, party hrang hrang aṭanga MNF party zawm thar mi 208 a lawmlut.

MNF Serchhip West Block Conference-ah thusawiin, Pathianin Thenzawl leh a chhehvel hmun rem leh ṭha takah a dah che u a. Hetianga hmun rem leh pawimawh a hmala tur hian Serchhip bialah MNF MLA nei ngei tawh turin party mipuiten ṭan kan lak a ngai. Roreltute hi Pathian ruat an ni a, Pathianin tunge a pek ang che u tih hi rilru fim takin ngaihtuahna in lo hmang dawn nia, tiin party mipui kalkhawmte a chah.

Mizo Hnam Run hawn inkhawm leh MNF Serchhip West Block Conference ah hian MNF Gen.Hqrs leh Lunglei aṭangin party hruaitu engemawzat an kal bawk a ni.

Sd/-LALVENHIMA RALTE
Joint Secretary
Media & Publicity Dept.
Mizo National Front
Memo No.MNF/Media/02/2021/422
Dt.20.05.2022.

Hun khirh laia ram hruaitu atan Pathianin Pu Zoramthanga a ruat – Dr. K. Beichhua

Mizo National Front
General Headquarters
Mizoram : Aizawl

Press Release

Hun khirh laia ram hruaitu atan Pathianin Pu Zoramthanga a ruat – Dr. K. Beichhua

Vawiin May 20, 2022(Zirtawpni) hian Mizo Hnamrunah chhung inkhawm neih a ni a. He hunah hian Dr. K. Beichhua, Adviser, MNF leh AH&Vety Minister ni bawk chuan thu a sawi a.

Dr. K. Beichhua chuan vawiin ni hian MNF sorkar hian kum 3 leh a chanve hmel a lo hmu ta a. Kan hun hman tawha Covid-19 hrileng turte, Ramri lama buaina te, Lirnghing turte, Myanmar raltlan lo kal turte kha Pathian chuan a hre vek a. Hun khirh laia ram hruaitu atan Pathianin kan CM Pu Zoramthanga hi a ruat a ni. ‘Harsatna ka tawh lai pawhin hun khirh laia chanvo chelh tura min ruattu Pathian vangin hmalam panna rilru ka pu leh ṭhin a ni’ a ti.

Tunhnaia inthlanna zawh tak MADC chungchang sawi langin, tunhma chuan MNF in mark neisa loin a bei ṭhin a. Tunah chuan MADC ah Mark 5 kan nei sa ta. Pathianin indim taka kal turin Rorelna min pe a. Congress MDC palite nen thawkhoin Lungrual tak leh nghet takin MADC ah sorkarna kan siam thei dawn ta a ni. MADC ah Mark 5 kengsain inthlan hmachhawn tur kan ni tawh a, 2023 inthlan tur pawh a huphurhawm tawh loh a ni a ti.

MNF in sorkarna a chan hnuah harsatna hrang hrang Mizoramah a thleng a, hun khirh lai berah pawh nitin mipui mamawh (Essential Commodity) ah harsatna awm miah lo khawpa sorkar hmalakna hi ‘Mizoram hi kan ram a ni’ titu tan chuan fak loh theih a ni lo a ni a ti. Politics khela mahni pumpui lam chauh thlir tan chuan fak pawh a har mahna a ti.

African Swine Fever leng avanga vawk tihhlumte tan leh Ar natna hri leng tuarte tan zangnadawmna pek chhuah thuai a nih dawn thu a sawi bawk.

Pu K. Riachho, IAS Rtd. Adviser, MNF General Headquarters chuan thu a sawi bawk. Pu K. Riachho chuan MADC ah MNF in majority la lo mah se election hmasa ngaihtuahin MNF in hma a sawn zel thu a sawi. Kum 1 leh thla tlemte chauh hnathawhna hun kan nei tawh a. Insiam ṭhat a ṭulna zawna insiam ṭha chungin hmasawn zel tura thawh a ngaih thu a sawi.

Pu Riachho chuan Mizoramah chuan Hindutva kalpui tum party hrim hrim tan beisei tur a awm loa hriat thu a sawi bawk. Tin, Ṭhat loh theih lohna bawm zuartu congress hi Central ah an chak chauhin Mizoramah chuan an chak ṭhin a. Central lama an hotute aṭangin in siamṭhat tum viau mah se awmzia a nei thei lova, Beisei tur an nei tlem hle a ni. ZPM hian kalphung thar an zuar a, kalphung thar hi rintlak tur a nih leh nih loh a chiang lo. An kal mek dan enin Party dangte nen danglamna an nei lo a ti.

Chhung inkhawm hi Pu Vanlalzawma, Vice President, MNF chuan a kaihruai a. Pu Rochungnunga, General Secretary, MNF General Headquarters in hunserh a hmang bawk.

Sd/- LALLIANZUALA FANAI
Joint Secretary
Media & Publicity Dept.
Mizo National Front
Memo No.MNF/Media/02/2021/421
Dt.20.05.2022.

PU DAWNGTEA MLA-IN LUNGMUAT PRIMARY SCHOOL TLAWH

Mizo National Front
General Headquarters
Mizoram : Aizawl

Press Release

PU DAWNGTEA MLA-IN LUNGMUAT PRIMARY SCHOOL TLAWH

Pu K Laldawngliana, Tuirial bualtu MLA chuan vawiin hian Lungmuat Primary School a tlawh a. He School chungchanga video darh awm chungchang a hmunah kalin a enfiah.

He hunah hian Pu K Laldawngliana chuan thusawiin, “Pulpit tlanga kan thusawi ang hian Politics-ah pawh hian thu dik tak kan sawi tur a ni,” a ti a. “He lai hmunah hian action la tur emaw, thinrim vang emaw a lo kal ka ni lova, he news hi ka hriat veleh kan zirtirtute leh kan khawtlang te thlamuan tur leh thil nihna a hmun ngeia finfiah ka duh vangin ka lo kal a ni,” a ti.

Tuirial bialtu MLA chuan, “Zirtirtute hi danglamna tam tak in nei a, Doctor te Engineer te ang inni lova, naupang enkawl seiliantu leh an nunkawng enkawl sak tu inni a. Zirtirtute’n an ti tih hi chu an zawm em em mai thin, theihtawp chhuahin hma la zel turin ka ngen che u a ni,” a ti bawk.

Lungmuat Primary School hi sak ṭhat tura ruahman mek a ni a, naupangin School an kal lailawkna hmun turte khawtlang hruaitute leh zirtirtuten an ngaihtuah mek lai a ni a. He School sakna tur hian 1st installment pawh hmuh tawh a ni nghe nghe. Social media-ah leh Party ṭhenkhatin thil hrechiang mang hlei lova thu belhchian dawl lo an thehdarh hi pawi kan ti tak zet a ni.

School Education Minister chak tak Pu Lalchhandama Ralte hmalaknaa rei tak ngaihthah tawh, Mizoram School building-te sak ṭhat mek a ni hi MNF chuan lawmawm a ti tak zet a ni.

(THANGKIMA)
Secretary
Media & Publicity Dept.
Mizo National Front
Memo No.MNF/Media/02/2021/420
Dt.19.05.2022.

“Sports Discipline hrang hrangah India ram a thei ber ni turin Ṭhalaite in lo pen chhuak ngam dawn em le.”

Mizo National Front
General Headquarters
Mizoram : Aizawl

Press Release

 

“Sports Discipline hrang hrangah India ram a thei ber ni turin Ṭhalaite in lo pen chhuak ngam dawn em le.” – TC Pachhunga,Vice Chairman, SYS Development Board,Govt of Mizoram.

Vawiin May ni 18, 2022 Chawhnu Dar 2:00 khan, Mizoram Wrestling Association buatsaih, 5th Inter District Mizoram Wrestling Championship 2022 Serchhip a buatsaih a hmanpuinaah, Pu TC Pachhunga chuan, “Kum 2 chuang zet Hripuiin min luhchilh vangin kawng engkimah Sawrkar leh mipuiin harsatna tam tak kan hmachhawn a. Tunah chuan hripui leng pawhin ziaawm lam a lo pan chho ta zel in nunphung pangngai zawh turin Sawrkar leh mipui pawhin hmalam kan pan chho mek zel a ni. Hripui vanga mipuite hnathawk thei lo a kan awm chhung khan, Pu Zoramthanga kaihhruai MNF Ministry hi a awm mai mai lova. Hmasawnna hna tam tak chawl lovin kan thawk zel a. Kan CM zahawm tak Pu Zoramthanga leh Sports Minister zahawm tak Pu Robert Romawia Royte, a ngaihna hriate zarah abik takin Sport Infrastucture Development-ah phei chuan, Mizoram mipuite tan haider rual lohin hma kan sawn a ni,” a ti.

A sawi zelnaah, “Hrileng a lo zia chhoh tak zel vanga nunphung pangngai a kan khawsak chhoh mek lai hian, Kan CM leh Sports Minister te’n kan Ṭhalaite tana Infiamna hmunhma ṭha tak tak an buatsaih sak che u hi, kan ram leh hnam tana hmaiuanpui tham khawp a inbuatsaih nasa lehzual turin ka chahin ka ngen duh che u a. Mizoram State hi India ram pumah sang taka min hlangkai turin, kan ṭhalaite hian theihna in nei a. Chumi tur chuan kan Ṭhalaite hi in lo pen chhuak ngam dawn em le?,” tiin Infiammi kalkhawmte tan chona a pe a ni.

“MNF Party chuan 2018 Election dawn a kan intiam ang ngei khan, Flagship Programme SEDP hnuai ah, Sports Discipline hrang hrang chu, Co Curricular ni tawh lovin, Carricular ni tawhin, SEDP Sports Policy thar hnuaiah Sport Industry a puang ngam leh nei hmasa ber kan ni hial tawh a. Mizo Ṭhalaite hian tihtur kan neih te hlen chhuak tura kan theihnate lan chhuah tir turin, hmalam i pan zel ang u” Pu TC Pachhunga chuan a ti bawk a ni.

Sports & Youth Services Dept hnuaiah hian, Discipline Association hrang hrang 33 zet an awm tawh a ni.
He huna khuallian Pu TC Pachhunga chuan Mizoram Wrestling Association-in a ṭul apianga an hman turin ₹ 10000/- a pe a. MNF General Headquarters Secretary pahnih Pu Lalawmpuia (OPA) leh Pu James L Chhakchhuak te’n Pu TC Pachhunga hi an ṭawiawm bawk.

sd/-B. LALHMANGAIHZUALA
Joint Secretary
Media & Publicity Dept.
Mizo National Front
Memo No.MNF/Media/02/2021/379
Dt.18.05.2022.

MNF DANGLAMNA CHU SORKAR HMASA THIL TIH PAWH NI SE, RAM TANA THA TUR CHU A HNAWL NGAI LOVA, A CHHUNZAWM ZEL

Mizo National Front
General Headquarrters
Mizoram : Aizawl

Press Release

MNF DANGLAMNA CHU SORKAR HMASA THIL TIH PAWH NI SE, RAM TANA THA TUR CHU A HNAWL NGAI LOVA, A CHHUNZAWM ZEL

Kan thil tum a hlawhtlin zel nan Mizo zawng zawng-Congress, ZPM, BJP leh neutral pawh Mizo Hnam party-ah an leng vek
– Dr.R.Lalthangliana

Vawiin May ni 17, 2022(Thawhtanni) hian Hnahthial Electric veng Community Hall-ah ‘MNF South Tuipui Block-I Political Training’ neih a ni a. He hun hmanpuitu bialtu MLA Dr.R.Lalthangliana chuan Block I huam chhung atangin mi thar 221 a lawmlut nghal a, tun hnaia a bial fan Block 2 ah 132 leh Block-3 ah 131-te nen belhkhawm chuan mi thar 484 lai a lawmlut a ni.

Dr.R.Lalthangliana chuan, “MNF danglamna chu sorkar hmasa thiltih pawh kan ram tana tha tur chu a hnawl ngai lova a chhunzawm zel. Kum 1998-ah kan sorkar a, sorkar hmasa Congress khan District thar 5 a puang a, a thu ringawtin an puang a. Tihpuitlin harin hautak hle mahse; Pu Zoramthanga kaihruai sorkar khan Cabinet-ah kan rel a, sorkar hmasa puan mah nise; kum 2003-a kan sorkar tawp dawn kha chuan District 5-te chu pangngai takin kan kal pui thei a ni. Kum 2008-a kan term tawp dawn hnai khan Hnahthial, Saitual leh Khawzawl kha District-ah kan puang ve a, Congress sorkar kum 10 chhung khan engtin mah an chhunzawm ve lo, kum 10 chhung meuha an tihpuitlin theih loh kha, Kum 2018 November thlaah kan sorkar leh a, kan sorkar tirh atanga thla 8 chhung lekin keini chuan District 3 kan puan chu pangngai takin kan function tir leh hman a, kan Chief Minister Pu Zoramthanga chungah pawh lawmthu sawi nasat kan ba nasa hlein ka hria. Kan sorkar tirhah Covid-in min han nuai tak tak a, kum 2 leh a chanve deuh thaw min nuai a, chuti chungin Hnahthial District chhung leh Zoram hmun hrang hranga kan hnathawhte hi a chhut peih tan chuan a tam nasa hle tawh ang. Congress kum 10 a sorkar chhung khan Covid-19 a thleng ve lo a. Kan sorkar chhung hian ran pulh hri a leng a, khaw chhak lamah lir a nghing a, ram a kang a, ramri a buai a, khawchhak lam atangin raltlan kan dawngsawng bawk a, budget a awm lo sum tam tak sen a ngai a, hei hi mipuiin kan hriat thiam hram hram a tul a ni. Tun hnaiah a tharin kan kal tan ve dawn chauh a, i beidawng mai lo ang u. Kan thil tum a hlawhtlin zel nan Mizo zawng zawng- Congress, ZPM, BJP leh neutral mite chu Mizo hnam party-ah an leng vek a, lolut zel turin ka sawm a ni. La sorkar miah lo hi Mizoramah an sorkar ka ring lo a, lo sorkar palh pawh ni se, Minister pawh la ni ngai lo kha CM ta se, thla tam an kal lo ang, an chhung ril kawrawngzia hi mi tam takin an hre lo,” a ti.

Health Minister Dr.R.Lalthangliana chuan, “SEDP pawh covid avangin hma kan la hlei thei lo a, kumin chho leh nakum chhoah hi chuan nasa taka kalpui kan tum a ni. Health Worker-te hi kan lak theih hunah pawh a khaw mi ngei duhsak ni se, a khaw mi tak lak tur an awm loh hi pawhin a khaw hnai vaia mi ngei lak tha kan ti a, a chhan chu transfer dil zung zung lova, mahni thawhna hmuna awm nghet tur hi kan duh a ni,” a ti bawk.

Pu C.Lalruatkima Block Secretary chuan Block report hrang hrang a pe a. Pu C.Lalrammawia Chairman ZOHANDCO, Pu Vanlalhnema Adviser leh Pu Ngurzamlova General Secretary -te pawhin thu an sawi.

He hun hi Pu J.Lalchhuana, Block President chuan kaihruaiin, Rev.TC.Vanlalmalsawma BCM, Hnahthial ‘S’ bial chuan hunserh a hmang a, Pu B.Lalromawia Block Vice President chuan lawmthusawiin hun a khar.

Hemi hnu hian Hnahthial Electric veng Commumity Hall-ah hian bialtu MLA Dr.R.Lalthangliana hian ‘Hnahthial District Ameteur Taekwondo Assocition’ chu hawngin khuallianah a tang nghal a ni. He hun hi Er.Rohmingliana Secretary, MATA chuan a kaihruai a. Pu Joseph Thansanga G/S MATA chuan MATA report a pe a, Sr.Vice President Pu Vanlalsawma chuan technical report pein, Prof.Rualkhuma Colney President MATA chuan presidential adress a pe a, Pu CH.Vanhmingthanga Vice President MATA chuan lawmthusawiin hun a khar.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/417
Dt.16.05.2022

Nakum inthlanah Pathian leh mipui zarah MNF a sorkar leh dawn – Dr.R.Lalthangliana

Mizo National Front
General Headquarters
Mizoram : Aizawl

Press Release

Nakum inthlanah Pathian leh mipui zarah MNF a sorkar leh dawn
– Dr.R.Lalthangliana

DR.R.LALTHANGLIANA’N CHERHLUN 50KW SOLAR POWER PLANT A HAWNG.

Vawiin May ni 13, 2022(zirtawpni) hian MNF Adviser Dr.R.Lalthangliana chuan ‘MNF South Tuipui Block-II Political Training’ Cherhlun Community Hall-a neih chu a hman pui a. Bialtu MLA Dr.R.Lalthangliana chuan MNF-ah mithar Cherhlun atangin mi 27, Bualpui H-ah 7, Thingsai 74, INC-82, ZPM-6, Neutral,-17, pem-3, Total-108 a lawm lut. Lawmluhna thusawiin, Dr.R.Lalthangliana chuan, “Tun hunah hetiang zat kan inlawmlut hi lawmawm ka ti hle a ni. Covid dona tur hian budget-ah pawisa dahlawk a awm lo a, mipui himna turin department hrang hrang sum kan pawt khawm a, kan sorkar kalphung pangngaiin kan kal thei lo a ni. Chuti chungin hmasawnna engemaw zat kan paw chhuak tawh a. Covid hi awm lo phei se chuan tun term-ah hian tuna kan thawh let engemaw zat kan thawk tawh ang. Nakum inthlanah Pathian leh mipui zarah kan sorkar leh ngeiin ka ring a, Covid-te pawh a reh tawh ang a, nasa takin ram tan hna kan thawk zel dawn a ni. MNF hi ‘Pathian leh kan ram tan’ titu kan ni a, kan dah hmasak ber chu Pathian a ni. Vawiin hian kan fairel belah sorkar sum lut lo mahse, kawngpui tha leh damdawiin tha kan neihte hi a zar kan zona a ni tho zel a, a nawlpui pawhin sorkar zar hi kan la zo ngei ang. Nakum inthlana sorkar tur chuan MNF mipui kan la tam ber a, Congress leh ZPM dinhmun chhiatzia hretute kan ni,” a ti.

Health Minister chuan Covid-19 in kum 2 leh a chanve vel min nuai a, khawvel sorkar ropui ber pawh a tibuai a, keini pawh min tibuai hle a ni. Covid 19 aia hlauhawm pawh hmachhawn thei kan ni a, Health department pawh kawng hrang hrangin kan inbuatsaih mek a ni, a ti bawk.

He hun hi Pu FJ.Lalmuanawma, President MNF Vengthar Unit Cherhlun chuan a kaihruai a, Rev.Lalhruaitluanga Chawngthu BCM Pastor bial chuan hunserh a hmang.

Health Minister Dr.R.Lalthanglianahian a bial chhung Cherhluna ’50KW Solar Power Plant’ a hawng nghal a. He hna hi ni 11.08.2019-a thawh tan a ni a, My project, my NEDP project atangin cheng nuai 100 chuang senga MiMIR (Mipui mamawh intawm ruahmanna) Committee Cherhlun-ten an thawh a ni. Minister chuan hawnna thusawiin, Vawiina kan hawn ang hi Mizoram pumah 8 chauh kan nei a, Lunglei District leh Hnahthial District-ah Cherhlun chauh hian kan nei a ni. Sum sen ngai lovin power awm loh changin min phuhruk tha hle dawn a, kan vannei hle a ni, a ti. Solar hi Cherhlun khuaa In 470 chuangin bulb pahnih theuh chhiin an hmang tangkai hle a ni. He hun hi Pu MC.Zohranga Cherhlun VCP chuan a kaihruai.

sd/-

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2023/415
Dt.13.05.2022

A LEHPEKAH SORKARNA SIAM LEHIN A VUR KUM KAN LA THLENG ANG

Mizo National Front
General Headquarters
Mizoram : Aizawl

Press Release

A LEHPEKAH SORKARNA SIAM LEHIN A VUR KUM KAN LA THLENG ANG

District tinah ranchaw siamna khawl din turin hma kan la mek – C.Lalrinsanga, Agriculture Minister

Dated Aizawl, 9th, May, 2022(Monday) :- Vawiin hian Mizo Hnam Runah Chhung Inkhawm neih a ni a. Hun hnihnaah MNF Adviser Pu C.Lalrinsanga chuan thusawiin, “Ro min rel sak ang che’ tih hi MNF chuan Hnam Hla angin kan nei a, tunah Pu Lalchhandama Ralte, Education Minister remruatna angin sikulah saktir an ni a, a lawmawm hle a ni. Pu Denga ho khan Hnam hla angin kan lo nei tawh bawk a. MNF hi Pathian behchhan tlattu ‘Pathian leh kan ram tan’ titu kan nihna angin he hla sak hi kan inhmeh bik a ni,” a ti.

Pu C.Lalrinsanga Agriculture Minister chuan, “Sorkarna term tawp lam kan lo hmang ve ta a, kan bul tanna leh tun dinhmun thlirin MNF hi kan vanduai hle a. Covid boruakin kum hnih vel min nem thu a, covid avangin khawi ram economy mah a thang bik lo a, heti chung hian kan hotuten theihtawp an chhuah a, mualpho leh harsa lutukin kan awm lo a. A lehpekah sorkarna siam lehin a vur kum kan la thleng ang. Agriculture leh department hrang hranga hma kan lak tawhna leh lak mekte hi Zoram tan chhinchhiah tlak tam tak a awm tawh a ni,” a ti.

Agriculture Minister chuan, “Vaimim leh bekang hralhna turin Ministry of Agriculture kan dawr a, price support pawh min pek theih tur thu tawngkamin min tiam a. Central-in 75% an tum dawn a, 25% state-in a tum ve thung ang. MAHFED Ltd. pawh a lei turin kan hmang thei ang. Tin, Vaimim hi Ar leh Sangha chawmna atante pawh a hman theih a ni. RKVY hnuaiah ranchaw siamna khawl Serchhipah kan din tawh a, District tinah ranchaw siamna khawl din turin hma kan la mek a ni. Vawk leh Bawng chawte pawh phai lam atanga ranchaw kan lakluh tam tak hi kan lo capture thei dawn a ni. Tunah hian bekang pawh engemaw zat thar chhuah kan inbeisei a, a herna khawl leina tur pawh kan peihfel tawh a ni. Bekang kg 6-ah hian a hriak 6 ltrs a chhuak thei a, a herna fu hi nutrela atan kan hmang zel dawn a ni,” a ti.

“Fu pawh SEDP-a thlangtuten a hmunah an inrem fel tawh a. Vai dailuah senchi pawh hi behliang dal-a thlak kan tum bawk a. Vai chawhmeh kan lei nasa lutuk hi engemaw zat chu keimahni thar chhuaha intodelh kan tum a, WRC-ah technology tharin nasa takin hma kan la mek bawk a ni. Pu Zoramthanga kaihhruai sorkar hnuaia kan lei tha hman tur hi a thain a danglam bik hle dawn a. OP.12 CSIR-te siam lei tha bik kan chawlut ang a. A powder-a siamin kan chul ram pawh ram chang thaah kan siam thei zel dawn a ni. Kan buh leh thlai eichhetu reng reng lo eihlumtu tur kan siam pung ang a, chumi atan chuan Lengpuiah bio-control laboratory kan sa mek a ni. Kan environment danglam nasa lutuk hian kan sik leh sa a tidanglam nasa a, agriculture/horticulture/sericulture kan tui mamawh phuhrukna turin Solar hmanga tui pump kan kalpui mek bawk a ni. Telhawng hi a hrechiang loten social media lamah an nuihzat a, Mizorama kan telhawngte hi chuan damdawi lam a kengtel a, nakinah a thatna hi nuihzattute hian an la hre chiang khawp ang. South East Asia lamah chuan telhawng hi thau chhe paih nan an hmang a, an zailep hnuah phorovin an her dip a, taksaa colestorol awm paih chhuah nan an hmang a ni. Kan sorkar chuan thil te tham pawh nise kan ram economy thatna turah chuan a ngai pawimawh zel dawn a ni,” Agriculture Minister chuan a ti bawk.

  1. Pi Vanlalrengpuii, Vice President, MNWF Headquarters chuan MADC inthlanah an zin report a pe bawk.

He hun hi Pu HB.Lianmunga, Adviser-in kaihruaiin, Col.Lalrawnliana, Ex-MLA, Adviser chuan hunserh a hmang.

Sd/-
(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/03/2022/414
Dt.09.05.2022.

ZU ZAWRH LAI AIIN ZU ZAWRH LOH HNUAH TAX REVENUE SUM SORKARIN A HMU TAM FE ZAWK – Robert Romawia Royte

Mizo National Front
General Headquarters
Mizoram : Aizawl

Press Release

ZU ZAWRH LAI AIIN ZU ZAWRH LOH HNUAH TAX REVENUE SUM SORKARIN A HMU TAM FE ZAWK

-Robert Romawia Royte
Adviser MNF & Minister

Vawiin May 7, 2022 (Zirtawpni) hian Mizo Hnam Runah Chhung Inkhawm neih a ni a. He hunah hian Pu Robert Romawia Royte, Adviser, MNF chuan thu a sawi.

Pu Robert-a chuan MADC inthlan zawh taka an chetchhuah dan report tawi pein, “A mala sawrkarna kan la neih ngai miah lohna MADC-ah hneh takin MNF-in sorkarna kan chan ka ring a ni. MNF Adviser Pu Robert Romawia chuan MNF a mala kan la sorkar lohna tho Lai leh Chakma Autonomous District Council-ah pawh MNF kan sorkar a, hmasawnna tam tak mipuiin an hmuh avangin MADC area-a mipuiten fing taka thutlukna siamin MNF sorkarna min pek ka ring tlat a ni,” a ti.

Tourism Minister ni bawk Pu Roberta chuan Tunhnaia CM aiawha NE CM leh Governor-te meeting-naa a tel chungchang report pein, “Union Budget Document 2022-23-a lang pha Rs 600 crs kan CM-in a nawrchhuak bik hi NE CM dangte mak tih a tling a ni tiin State dang CM-ten min thik hial a ni,” a ti.

Pu Robert-a chuan, “Covid hripui kara Mizoram sorkar Financial Management hi a duhawm mang e ka ti thin.Sorkar officer lian thenkhat leh thil inti hre ve tak takten ‘Zu zawrh inti tawp a, sorkar tax hmuh a tlem dawn sia in harsa ang a’ te min ti a. An hriatloh vanga ni. Sorkarin chhiah sum a dehchhuah (Tax revenue) hi sorkar hmasa zu zawrh hun aṭangin ka’n tarlang ang e.

*Zu zawrh lai:*
2015-16-ah vbc 249
2016-17-ah vbc 313
2017-18-ah vbc 424. 92
*Zu khap hnu*
2019-20 vbc 667
2020-21 ah vbc 677
2021-22 ah vbc 894.75

Congress sorkarin zu an zawrh laia chhiah sum an dekchhuak hnem nia kan hriat ai khan MNF Sorkarin zu khap chunga chhiah sum kan dehchhuah hi a tam zawk fe a ni.Kum 2017-18 aiin kum 2019-20-ah ringawt khan vbc 242 chuangin kan thawk chhuak hnem zawk a ni.

Zu hi kan mithiam ṭhenkhatin revenue ṭha a ni an ti fo a, hei hi a dik famkim lo, State danga Zu lakluh nan sum tam tak state dangah an luangchhuak a, state dangin tax leh thildangah a hlawkna an lo tel daih zawk. Kan ramah zu kan siam loh avangin zu zawrh hlawkpuitute chu state dangte leh zu zuarte an ni ber. Tax Revenue pung sang ta hian hmasawnna hnathawh a tam hle a ni tih pawh a tilang.

MNF sorkarin mipuite tawrhna, chhungkaw tam tak buaina zu zawrh kan titawp a. Zu lei nana sum tam tak luangchhuak thin leh zu lei nana hman ṭhin khan Cement te, Infrastructure dinna tur hmanrua te, motor te kan lei a. Chung atanga chhiah chu Mizoram chhungah a lut ta a ni. Mi tam tak pumpui leh thin tichhe tura Zu zawrh a nih lai ai khan MNF sorkar hnuah zu chhiah pawh la miah lo, Covid hripui tuar chunga MNF sorkar chhiah sum dehchhuah (tax revenue) chu kum 2021-22-ah chuan Zu zawrh hunlaia tax hmuh tam ber Rs. 424.92 aiin a letin a tam ta zawk, cheng vbc 894 chuang a ni ta. Kan CM zahawm tak
Pu Zoramthanga kaihhruai sorkarin zu zawrh kan titawp hi sum dehchhuah kawngah kan hlawkpui zawk a ni. Hei hian zu hi sorkar tan sum dehchhuahna ṭha ber a ni lo tih a tichiang.

Congress sorkar laia leiba an neih tlem ber lai (2018)-a Leiba-GSDP Ratio kha 38.9 % a ni. MNF sorkar hnu (2021) chuan kan leiba-GSDP Ratio chu 31.2 % a ni thung. Leiba-GSDP rate hniam chhan chu kawng tinrenga kan thawhchhuah tam vang leh sum dehchhuah (tax revenue) lama hmasawnna tam vangte a ni.

Kan manifesto tihhlawhtlin kawngah hma kan la char char a. Sorkar dang angin kan hlamchhiah ve nghal mai lo. Sports Policy kan puitlin ang kan ti a. Sport Policy mumal tak kan siama, hemi rah hi kan tel mek a ni. Kan Manifesto No.1-a mi Khawvel Zofate insuihkhawm kawngah hma kan la zel a. Covid lo thlen hmain hmun hnihah Zofate insuihkhawmna Zo Kutpui kan buatsaih hman a, rah ṭha a chhuah zel a ni. Zohnahthlak unau ram danga awmte pawh an inhawng hle a ni.

Sorkar awm tawh zawng zawngah Covid hripui leng mah se manifesto tihlawhtling chak ber sorkar kan ni. Kan CM lakah tlawmngai pawl te, kohhran leh mipuiin rinna an nghat mek a ni. Pathianin MNF sorkar a hruai a, kan CM nachang hriatna leh hruaina zarah tun thlengin kohhran leh tlawmngai pawlte nen thawhhona ṭha tak kan nei mek a ni. Ramria inkah a ngaih hunah sorkar force-in hma an hruai ta a nih hi! Sorkar hmasaa ramria zirlaite leh journalist hmeichhiaten vuak an tuar lai khan khawnge sorkar a awm. Pu Zoramthanga sorkar a pian hnuah chuan ramria buaina apiangah sorkar mi tirh, kan police-te an tlan thleng hmasa ber zel a. Chutah chuan awmhmun an khuar nghet nghal zel a ni.

MNF sorkar hi a ni lawm ni ramri venghimtu? Ramri zauh zeltu sorkar chu kan ni. Kan duhthusam ang erawh a la ni vek lo tih kan hria. Kan manifesto-a lang a nih ang ngeiin a hun mil zelin kan hotute an che a ni.

Tunah Raltlan singthum chuang kan mikhual mek a. Myanmar aṭanga kan unaute buaipui kawngah kan puin huaisen taka hma a la hi tunah chuan Sorkar laipui hotuten an fak letling tawh a ni.

Pathian leh mipui zarah Sorkar theihna zawng zawngah MNF kan sorkar vek ṭep tawh a ni. Central-ah NDA kan sorkar mek a. State, VC/LC,LADC,CADC, Sinlung Hills-ah kan sorkar tawh a. MADC-ah pawh kan sorkar ngei ka ring a ni,” Pu Robert Romawia chuan a ti.

Inkhawm hi Pu D. Thangliana, NCC, MNF chuan a kaihruai a. Pu Malsawma, President, MNSF Gen. Hqrs chuan hunserh a hmang a, Pu K. Laldinthara, General Secretary hnen aṭangin MADC inthlan campaign report ngaihnawm tak ngaihthlak a ni.

Sd/-
(LALLIANZUALA FANAI )
Joint Secretary
Media & Publicity Dept.
Mizo National Front
Memo No.MNF/Media/03/2022/413
Dt.06.05.2022.

PRESS STATEMENT OF MR. C. LALRAMZAUVA, SR. ADVOCATE, CHAIRMAN, LEGAL BOARD, MNF GEN. HQRS AT PRESS CLUB, SIAHA

PRESS STATEMENT OF MR. C. LALRAMZAUVA, SR. ADVOCATE,
CHAIRMAN, LEGAL BOARD, MNF GEN. HQRS
AT PRESS CLUB, SIAHA

Vawiin Dt.03.05.2022 hian Siaha khawpuiah Press Conference han neih ve hram tul nia kan hotute’n an hriat avangin hun chep tak karah he hun hi kan rawn hmang ve a ni a. MADC hnuaiah naktuk naktip mai (ni 05.05.2022) hian MDC thlang turin mipui kan inralring thawkhat hle tawh a, Election Campaign pawhin a vawrtawp a thleng chho mek a ni. He hun hi mipuite tana hun rangkachak, kum tam tak lokal leh zel tur atana kan inbuatsaihna leh mipuite tana tha ber tur fim taka ngaihtuah a, kan aiawha roreltu tur kan thlan dawn avangin chu’ng kan ngaihtuahnate kawng dika min hruai thei turin leh mipuiten kan hriat tur dik tak kan hriat a, he ram hian kawng dik a zawh theihna turin kan Vote hlu tak kan thlak theuh a ngai takzet dawn a ni.

1. Mara Autonomous District Council (MADC) hi kum 1972 (29.04.1972) atanga lo ding hrang leh mahnia inrelbawla lo awmin; tuna MDC ni mekte hi kum 2017 General Election-a mipuiin lungsi taka an aiawha rorel tura an thlanchhuahte an ni. MDC 25 thlanchhuahte zinga 17-te chu INC (Indian National Congress) Candidate-te niin MNF 6, MDF 1 leh Independent 1, an vaiin 25 an ni. Khatih lai khan Mizoram State-a sorkarna chelhtu pawh INC tho niin MADC mipuite’n Congress Party-ah rinna leh beiseina sang tak nen helai hmunah pawh hian Congress Party chu hneh takin a lo tling tawh a ni.

2. Mizoram State Legislative Assembly General Election, 2018-a neih a nih hnuah Congress Party chu mipuiin a lo hnawl ta a, MNF Party-in State sorkarah rorelna a lo chelh ve leh ta a ni. Chuti chung chuan, MADC hnuaia Congress sorkarna chu a kal pangngaia kalin CEM zahawm tak leh EM fel tak takte enkawlna hnuaiah hun engemaw chen a kal chho va. Amaherawhchu, mipuite’n anmahniah beiseina sang tak leh rinna nasa tak neia he Maraland mipuite hmakhua uluk taka ngaihtuahin ro an rel zel dawn nia kan hriat laiin; an chet dan leh hmalak danah thil fello tam tak a awm a ni tih hriain, chu’ng thil fel tawk lo nia langte enfiah turin Sorkarin ‘One Man Inquiry Commission’ atan Shri Bhupesh Chaudhary, IAS, chutih laia Siaha Deputy Commissioner chu a ruat a (vide No.F12013/8/2018-DC&MA/PT dt.20.06.2019). A tul anga inquiry lak anih hnuah Inquiry Report pawh chu ni 20.08.2019 khan Sorkarah a thehlut ta a ni. He Inquiry Report-ah hian thil fello leh dan bawhchhiatna tam tak tarlan ni mahse; Sorkarin mawhphurtute chunga zawldawh tak leh hriatthiamna thui tak nen kalpui a tum mek laiin, ‘Misual chu um lohvin an tlanchhe thin,’ tia kan pi leh pute’n an lo sawi thin tawh angin Congress Party MDC zawng zawngte chuan anmahni thlangtu mipuite phatsanin anmahni sahimna tur nia an ngaih BJP-ah an tlanchhiatsan ta vek mai a ni. Tichuan, Congress Party mipuite chu baihvai takin, arpuiin a note awp lai a tlanbosan ta vek ang maiin an lo vakvai ta a ni.

3. Hetianga Politics-a mahni sahimna ringawt ngaihtuah avanga mahni Party mipuite phatsan hi Democracy-ah chuan thil thiang lo, Dan kalh tlat a ni. India Danpui Tenth Schedule Para 2(1)(a) -ah chuan, ‘Mi tupawh Party Candidate anga thlantlin lo ni tawhin amah thlangtlingtu Party a kalsan chuan House-a member a nihna atanga bantir nghal tur a ni’ tih a ni a. Amaherawhchu, he ‘Tenth Schedule’ hi District Council Member-te chungchangah hman ve theih anga tarlan a nih loh avang chauhin heng Congress Party atanga Elected MDC-te hian BJP an zawm avang ngawt chuan ‘disqualified’ (ban) lohvin an term an hmang zo ve ta hram a ni. Chu’ng Congress Party MDC 17 – kan tarlan takte bawk kha vawiina BJP Party atanga ram leh mipui kaihhruai hna thawk tura BJP Party-ten candidate-a an rawn vawrh chhuah leh takte chu an ni leh ta si a ni.

4. A chunga sawi tawh anga Congress Party atanga BJP Party zawma, lalna leh thuneihna duha MDC nihzui leh tumtute hi, anmahni zawnah chuan mi fel tak leh belhfakawm tak takte pawh an lo ni mahna! Amaherawhchu, ram mipuiten an kutah thuneihna leh rorelna pek zui leh chi an nih leh nih loh chu an hnathawh leh an thiltih tlem azawng, a hnuaia kan han tarlan atang hian a chiang mai awm e :-

A. MADC hnuaia hnathawkte (employees) hlawh hi Budget pumpui atanga zaa sawmkua leh pathum (93%) vel zet a nih chhoh tawh laiin, thawk miah si lo, thawk anga ziahlan (ghost employees an tih mai) mi 4 zet chu Finance & Account Department (CEM) enkawlna hnuai ringawtah pawh an awm a, heng mi 4-te hi LDC anga thla tin cheng 38,109/- lai hlawh late an ni. (List enclosed)

B. Financial and Budgetary Control-ah pawh hian Mizoram Autonomous Fund Rules, 2010 hi nasa takin an bawhchhia a, Cash register leh Cash book-te pawh mumal taka vawn ni lovin, an duh ang angin mipui sum an rawk a ni ber. Development work hrang hrang an kalpui danah pawh hnathawh that a tlem hle a, a then phei chu hna zaa sawm (10%) chauh thawh zawh a nih laiin, bill erawh chu a vaiin (full)-a pek an ni.

C. Land Revenue Department hnuaiah pawh fel lo taka duhsak zawngte ram inpek a ni. Ram ruakte hi chu kan duhsak zawngte lo pe pawh nise mipui lam pawhin an hriatthiam viau laiin Sorkar ram(Deputy Commissioner, Siaha District Land Lease/ Donation Certificate) satthlain mi 17 zet hnenah ram pek a ni. Hei erawh hi chu mipuiin an hrethiam thei lo a ni. Original Land Donation Certificate for Deputy Commissioner’s Office & Quarters chu 36,013 sqm a nih laiin, Land Lease No.LL.02/150 dt.14.5.2019 leh Land Lease No.LL.02/151 dt.14.5.2019 DC Siaha hminga pek chhuah tura an han teh that leh meuh chuan 14,087 sqm lai hlepthlain mi 17 (chu’ng zingah chuan CEM ni lai fapate, EM ni lai te, MDC ni lai leh an chhungkhat hnai hote) hnenah pek a ni. (List enclosed)

5. Heng bak pawh hi Dan bawhchhiatna leh thuneihna hman sualna thil chi hrang hrang sawi tur a tam mai. Amaherawhchu, chu’ng thil zawng zawng sawina hun leh hmun a ni lova, tuna hun tepter tak kara Press Conference kaltlanga kan han sawi duh tak erawh chu, tuna MADC hnuaia Sorkarna chelh mektu BJP lemchangte hian BJP kalphung leh hmalaknate hi a tha an tih em avang ni lovin, anmahni sahimna zawnga Congress Party MDC ni tura party mipuiten an thlantlin ni chung si a, anmahni thlangtu mipuite an uiresan ta mai hi ram mipuite tan belhzui tlak an ni tawh love tih hi a ni.

6. Kan hma lawka inthlanpui kan neih turah hian MADC huam chhunga mipuite’n ngaihtuahna fim tak leh zau tak hmanga vote kan thlak a, Maraland hian kawng hrang hranga hma a sawn theihna turin theihtawp chhuaha tan kan lak a ngai a, Kristian ram kan nih ang ngeia kan hmasawnna ruhrel pawh Kristian nunphung (principle) nen inmila hma kan lak theih nan, mipuite’n ram leh hnam kaihruai tura Pathian mi ruatte thlang chhuak thei turin tan i la theuh ang u.

7. State Sorkar-ah MNF Party hmangin, hripui leng karah pawh Pathianin mipuite harsatna chhawk zangkhai tur leh hmasawnna kawng hrang hranga ke pen thei turin min la hruai zel hi, keimahni fel bik vang emaw ni lovin ‘Pathian leh kan ram tan’ tih thuthlung vuana, chumia innghat chunga kan hotuten ke an pen zel vang a ni tih hi phat rual a ni lo va. State Sorkar-a rorel mektu MNF Party-te hi Zoram puma Pathianin rorel tura a ruatte kan ni tih hi kan pawm tlat a, chuvangin he MADC area-ah pawh hian MNF Party-te bawk hi Pathianin rorel turin a ruat ngei ang tih hi mipuiten kan hriat a, chumi tihlawhtling tura tan la turin kan sawm a che u.
____________________
Issued by Media & Publicity Department, MNF General Headquarters.