LAWNGTLAIAH VOTER 100 CHUANGIN MNF AN ZAWM

Mizo National Front

General Headquarters

Mizoram : Aizawl

Press Release

 

LAWNGTLAIAH VOTER 100 CHUANGIN MNF AN ZAWM

That loh theih lohna bawm an tih hi – That theih reng reng lohna bawm a ni zawk: MNF Vice President

Vawiin June ni 10, 2022 (Zirtawpni) hian Lawngtlai Hnam Runah MNF Vice President Pu Lalthlengliana chuan Lawngtlai Electric Venga Pu Lalnunsema, Lawngtlai Govt. HSS Lecturer voluntary-a pension, hun rei tak Central YLA Gen Secy-te, MSU President Shillong leh LSA President Shillong nihna lo chelh tawh leh a hnungzuitu chhungkaw 36 atangin voters 121 chu MNF-ah a lawmlut. Lawmluh zingah Hmunnuam atangin ZPM Vice President leh ZPM Asst. Secy te, Nghalimlui Congress Unit Vice President leh Chawnhu Congress Unit President-te an tel.

Lawmluhnaah hian Pu Lalthlengliana chuan a fing hmasa apiangte chu ‘Pathian leh kan ram tan’ titu party-ah an luh ruih ruih thu sawiin, zirlai pawl hruaitu leh political party hrang hrang hruaituten MNF an zawm zel chu lawmawm a ti a. Congress sorkarah khan kawngpui a chhiat thinzia a sawi a, kawng diakah thenkhat chuan buhte an phun a, mipui thimrimin kawngpui tuitlingah sanghate an chhuah hial a, kawngsirah kawng chhiat avanga motor tlu tam tak hmuh tur a awm thin. Mipui hnatlangin kawng an siamtha thin a ni. Mahse, Pu Zoramthanga kaihhruai MNF sorkar thar chuan hun reilote chhungin a chhe zualpui a siamtha hman deuh vek a, hmun thenkhata kawng chhe mek awmte pawh hi an siamthat mek vang a ni, a ti.

MNF Vice President chuan, “Congress hun laiin vawi tam tak Treasury an khar a, an hun hmasa lamah sum a harsa em em a. Finance Minister Pu J. Lalsangzuala (L) mangang pawh khan sorkar sum harsatzia a hriat khan, ‘Damocles-a ngunhnam ang maiin RBI ngunhnam chuan ka hrawkah min tin reng a, hei hi kan nawm chen luat vang a ni’ a tih kha mi tam tak chuan kan la hria a ni. An sorkar liam taah khan sum an harsat em em laiin, tuna an President Pu Sawta, Finance Minister a nih hun lai khan sum tam tak an ti lapse lawi si a ni. Sum harsat vangin kohhran leh mipui duh loh zu an zuar lui a, police leh civil mi tam tak an boral a, hmeithai leh fahrah an pun phah nasa a. Pu Zoramthanga kaihhruai chuan a sorkar tirhah zu zawrh kha kan intiam angin kan titawp nghal a ni. An sum siam duh luat vangin Truck thlawk theiin lungalhthei an phur nasa a, Meghalaya atangin Mizoramah ni khata vawi 6 phur thleng thei Truck, a motor number pawh a pangngai thlap ni si te,  Dihmunzawl-a in thiah man to uchuak takte kha tumahin kan la theihnghilh lo,” a ti.

‘That loh theih lohna bawm’ an tih hi an thusawi leh nihphung nen a inpersan lutuk a, ‘That theih reng reng lohna bawm’ tih zawk tur a ni. Congress hi an that thar thutna tur pakhat mah a awm lo tiin, Zoram mipui hnawl tawh hnu congress-ah beisei thar tur pakhat mah a awm loh thu a sawi a. Congress-a luh chu awmze awm lo, thlasik vur um laia ni tlak tawh hnua nilum ai tura insawm ang vel chauh a nih thu a sawi bawk.

Chief Minister Pu Zoramthanga chu Mizoram tan mai bakah Myanmar politics buai vanga kan unau raltlante tan pawh pa nih a tlinzia thu a sawi a. Chief Minister-in theihtawp a chhuah avanga hripui leng karah tha taka lo dawngsawnga tuam hlawm an ni chu lawmawm a tih thu a sawi bawk.

ZPM chungchang sawiin, “Kohhran behchhana party kalpui tumte hian a tirah Unit system kan nuaibo ang an ti a, tunah chuan Chakma ram thlengin Unit din tumin an hmanhlel a, an sawi loh ang zelin an awm a. Sorkar chhiatna lai dapchawpa ker ngar ngarte hi an men rei leh an phun rei a, an thawh hma leh an  phun hma a. Hei hi an kalphung thar chu a ni mai awm e. Kum 2018 inthlan kha chuan mipuiin an la hre chiang lo a, kha kha an party ropui leh len lai ber a ni a, nakum inthlanah chuan in thlan hmasaa an MLA neih kha nasa takin an phak tawh lo ang,” Pu Lalthlengliana chuan a ti. BJP chungchang sawiin a ngeih lohna hmuna thing phun, thang thei miah lo ang vel chauh an ni a ti.

Lawmluhte atanga thusawitu Pu Lalnunsema pawhin kan Chief Minister zahawm tak Pu Zoramthanga kaihruai MNF hi a danglam a ti a, kan hnam din chhuahna tura an lo beih nasatzia kha ropui a tih thu a sawi. Hripui len laia ramri buaiah silai thlah ngam an ni hi ropui ka ti em em a, Pu Zoramthanga kaihhruai sorkar hi belh tlak awm chhun a ni tiin, party dangte chu beih tlak leh sawi tlak an awm tawh lo, a ti.

He hun hi Pu Lalramliana Colney, President MNF Lawngtlai District Headquarters chuan a kaihruai a. Hnam Runa leng lo khawpa tam mipui an pungkhawm a ni.

Sd/-

R.LALHMANGAIHA

Secretary

Media & Publicity Dept.

Mizo National Front

Memo No MNF/Media/03/2022/439

Dt.10.06.2022

Grape chingtute leh buaipuitute hmaah MNF sorkar hi a ding zel dawn

Mizo National Front

General Headquarters

Mizoram : Aizawl

Press Release

“Grape chingtute leh buaipuitute hmaah MNF sorkar hi a ding zel dawn”

– Dr. Z.R Thiamsanga

Vawiin 10.06.2022 (Zirtawpni) hian Mizo Hnam Runah chhung inkhawm neih a ni a. Pu Dr. Z.R Thiamsanga,  Vice Chairman, Health & Family Welfare Board leh MNF Adviser ni bawk chuan thu a sawi a.

Pu Thiamsanga chuan Pathianin kan ram leh hnam hruai turin MNF a ruat tih sawiin Hmasawnna hna thawk turin bul ṭan chhoh laiin Covid vangin chet a harsa hle a ti. Tunah hian kawl a eng ṭan mek thu leh. hun khirh tak tak paltlang karah khan mipui beisei nih phak pawh a har a rinthu a sawi.

Chutiang a nih reng lai chuan sorkar chu a thu thluang mai lova, Mizoram hian Hripui leng karah hmasawnna hmel a hmuh zel thu a sawi. . District hrang hrangah Health Department lamin hmasawnna hmelthar langin, damdawi in ṭha zawk leh lian zawk din mek zel a ni. Cancer enkawlna chungchangah nise Gauhati lama in refer ngai tawh loin Cancer hemna khawl ṭha leh lian kan nei tawh a. Kan Chief Minister leh Health Minister inpekna zarah kan Zoram hian hriselna kawngah bungthar kan kai mêk a ni. Chuvangin Pathian leh mipuite zarah kum 2023 hian MNF bak sorkar tur kan awm lo.

Dr. Thiamsanga chuan nikuma NITI AAYOG in Health Index a buatsaihah India rama State te (small states)  zingah  Mizoram chu pakhatna a ni a. Infant Mortality Rate- tehfungah pawh Mizoram chu India rama a tiṭha ber  a nih thu sawiin, ‘Kan Infrastructure neih ṭhat loh ngaihtuahin India ram state a pakhatna kan ni thei hi a chhuanawma, chhuan tlak a ni tih i hre nawn ang u’ a ti.

Champhai leh Hnahlan lama Grape chingtuten an thawhhlawh an seng ngei theih nen MNF sorkar hian an hmakhua a ngai hle a. Tunah hian Grape chingtute tan ruahmanna ṭha tak kalpui mek tih tarlangin, ‘Grape chingtute thlaphang lo turin ka ngen a che u. Grape chingtute leh buaipuitute hmaah MNF sorkar hi a ding zel dawn a ni tih ka sawi duh’ a ti.

He hun hi Pu Sanghlira,Adviser, MNF General Headquarters in a kaihruai a, Pu Lalmuanawma Sailo, Jt. Secretary, MNF Gen. Hqrs. hnen aṭangin zin report ngaihthlak a ni bawk.

Sd/-

LALLIANZUALA FANAI

Joint Secretary

Media & Publicity Dept.

Mizo National Front

Memo No.MNF/Media/02/2021/440

Dt.10.06.2022.

PRESS STATEMENT OF PU LALRUATKIMA, ADVISER MNF GENERAL HQRS. On 2.5.2022@ Siaha Press Club

Kan hriat angin Mara Autonomous District Council inthlan chu May ni 5 hian a lo thleng dawn ta reng mai a. Theih tawka kan zir chiannaah MNF sorkar thar a piang ngei dawnin a lang a. A lawmawm kan ti tak zet a ni.

He inthlan lo awm turah hian Party hrang hrangte theih tawpin kan inbuatsaih a. Party hrang hrangte kan campaign-na kawngah mawi lo lutuka tha thawh kan awm lo niin a lang a, lawmawm kan ti hle a. Tin, inthlanna buatsaihtu State Election Commission lam zarah inthlanna felfai tak kan nei dawnin a lang a, a lawmawm tak zet a ni.

SEDP SEM TURA RUAHMAN MEK A NI

Pu Zoramthanga kaihhruai Sorkar Flagship programme SEDP hmangin Zoram tan hna nasa takin thawh a ni tawh a. Kawng siam nan te, kawngchhia thawm that nan te leh Infrastructure development atan nasa tak hman a ni tawh a. Tin, Manpower development atan hman ni bawkin Zirtirtu sang chuang SEDP hmangin lak an ni bawk a ni.

Hei bakah hian SEDP hi Health care lam atan te, Social Security lamah, de addiction leh rehabilitation centre siam nan te hman a ni. SEDP pilot project atan chhungkaw 2000 Sericuture leh Vety-ah kalpui a lo ni tawh bawk. Horticulture leh Agriculture-ah Pilot project atan lo kalpui a ni tawh bawk.

Tunah hian mamawhtute inchhungkhur thleng phak (family beneficiary oriented) turin inbuatsaihna kalpui mek a ni a. Covid hripui avanga duh ang a kan kalpui theih loh kha, kalpui tan turin ruahmanna kalpui mek a ni.

SIAHA DISTRICT-A MNF SORKAR HNATHAWH TAWH THENKHAT TE:

1. Siaha khawpui chhung internal road zawng zawng hi MNF sorkar chuan a thuam thain a chei tha.

2. Siaha Damdawi In thar hi tuna kan Minister nilai Dr K Beichhua opposition a nihlai atanga theih tawp chhuaha hma a lo lak tawhna zar a ni.

3. Siaha Vety Farm siamthatna zawng zawng hi Pu Zoramthanga kaihhruai sorkar hmalakna a ni.

4. Siaha Vety Hospital thar hawn a ni tawh.

5. Social Welfare Office, Meisavaih a mi nuai 200 chuang man sak mek a ni.

6. Siaha District Vety Officer quarter thar nuai 85 man sak a ni.

7. Siaha Police Station building hi Siaha bialtu MLA opposition a nih lai a nawrna anga chei that a ni.

8. Siaha tui lakna (gravity) nuai 800 man siam zawh a ni tawh.

9. Noaotla Eklavya Model Residential Schools (EMRS nuai 2400 sak mek a ni.

10. Lobo – Halkha kawng nuai 5000 man laih mek a ni.

11. Lunglei Mara Tribal girls hostel nuai 200 chuang man sak a ni.

12. Chhaolo fodder leh vaimim chinna leh herna khawl dah zawng zawng leh vety damdawi in bun a ni.

13. Noaotla Vety Damdawi In leh Ayush doctor dah a ni.

14. Chhaolo tlangdung Sericultural MUGA Development nuai 400 kalpui mek a ni, Chakhang tlangdung zawng zawng nen a tuam ang.

15. Tipa dawmdawi in thar sak zawh a ni.

16. Phura damdawi in thar sak zawh tawh a ni.

17. Tipa Higher Secondary school nuai 250 sak mek a ni.

18. Saikao Mission Heritage nuai 560 man tur bul man mek a ni.

19. Chapi-ah Vety damdawi in leh medical doctor dah a ni bawk.

20. Siaha – Noaotla bypass road nuai 250 siam a ni bawk.

21. Chhaolo – Beino lui kawng nuai 50 siam a ni bawk.

22. Siaha Taxation Office Meisatlaah nuai 350 man sak zawh tawh a ni.

23. Observation Home Meisatla hnuaiah nuai 100 chuang man sak mek a ni.

24. Phura thlen hma lui nuai 100 chuangin lei dawh mek a ni.

25. Tipi ferry – Phalhrang PMGSY Road chu PCC Pavement siam mek a nina, siam zawh lek lek tawh a ni.

26. Tipi ferry – Siaha PMGSY road PCC phah mek a ni.

27. Thosai field-a artificial turf nuai 420 bul man tura hmalak mek a ni bawk.

28. Siahatla – Tisopi nuai 1000 chuanga PMGSY road hi bialtu opposition a nih laia model village a nihna zara siam a ni.

29. Mawmatla Tourism Department amanga cheina tur nuai 230 chuang tunah hian NEC amangin sanction tawh a ni.

30. Siaha Vaihpi Community Hall nuai 500 man sak mek a ni.

31. Tunah hian Siaha tla – AR Circuit House – Meisatla, Meisatla – Thosai tuitlawk thleng kawng siammhat nan special central assistant amangin nuai 1000 hmalakna tur bul man mek a ni.

32. Hei lo hi project approve tawh sanction la nghah mek tam tak a la awm a ni.

Heng lo pawh hi hmalakna te neuh neuh sawi tur tam tak ala awm bawk a ni.

Covid hripui leng karah pawh heti tak maia MNF sorkar-in MADC area-a hma a la nasa hi a chhuanawm kan ti a. Nasa lehzual zawka MADC tana hna kan thawh theih nan, he inthlanah hian MNF Party hi hnathawh kawr min hak tir ngei turin MADC mipuite kan ngen a che u.

NGENNA:

Lai Autonomous District Council leh Chakma Autonomous District Council mipuite’n State-a sorkar lai Party ngei thlan thatna leh hlawkna an hria a. Tunah hian LADC leh CADC-ah MNF sorkar chak takin a ding mek a. Mara District Council mipuite pawhin State-a sorkar lai ngei hi an thlan tlin kan duhin kan beisei tlat a ni.

Mara District hmasawnna tur atan MNF sorkar Pu Zoramthanga kaihhruai hian nasa takin hma a lo la tawh a. MADC-a hmasawnna nasa lehzual zawk a thlen theih nan mipuite’n MNF Party sorkar an din ngei kan duh a. State sorkar nena zai khata luang za a, engkim tiho thei tur State-a sorkar lai, MNF party ngei hi Mara Autonomous District Council mipuiten thlang tling turin thinlung takin kan ngen a ni.

MNF party chhinchhiahna ARSI-ah lo vote vek turin MADC mipuite kan ngen a ni.
_____________________
Issued by Media & Publicity Department, MNF General Hqrs.

NEUTRAL TAN MNF VOTE TLIN NAWN CHHAN TUR TAM TAK HNATHAWH A NEI: LALRUATKIMA

Mizo National Front
General Headquarters
Mizoram : Aizawl

Press Release

NEUTRAL TAN MNF VOTE TLIN NAWN CHHAN TUR TAM TAK HNATHAWH A NEI: LALRUATKIMA

Vawiin ni 29.4.2022 zirtawpni hian Pu Lalruatkima, Rural Development Minister, MNF Adviser ni bawk chuan Mara District Council inthlan campaign-in khaw hrang hrang a fang a. Amobyu Vaithei, Zyhno, N Laty leh Saiko te a tlawh. Heng hmunahte hian Minister chuan thusawiin, “Neutral tan MNF sorkar hi vote nawn chhan tlak a nihna tam tak hnathawh a nei a ni,” a ti.

Pu Ruatkima chuan, “Mara District Council inthlan atana MNF Party mipuite an phurzia ka hmuhin lawmawm ka ti a, he inthlan lo awm turah hian beiseina ka nei sang hle,” a ti a. “Kawngpui chhe em em ṭhin kha MNF sorkar-ah chuan kawngpui a ṭha ta hle a, Aizawl leh khawpui hrang hrang inkalpawhna kawng a pawh a lo ṭha ta hle,” a ti.

MNF Adviser chuan, “Congress sorkar khan zu an zuar a, hmeithai leh fahrah an pung nasa em em mai a ni. Sum harsatna phuhruk turin zu chhiah an it a ni. Keini MNF erawh chuan zu chhiah avanga hausak ai chuan zu chhiah tel lova retheih kan thlang a ni. Mi tam tak suattu zu zawrh hi ṭha kan ti lo a, kan titawp nghal a ni. Tin, Sikul ṭan hun tih tlai a ni a, kum 15 chhung lirthei chhiah pe lawk turin sorkar-in min ti a, tunah zangkhai takin tih a ni ta. Gas a harsa em em ṭhin a, chu pawh tunah chuan kan lo hnianghnar ta a, lak sen loh deuh thaw kan nei ta,” a ti bawk.

Pu Ruatkima chuan, “MZP-in Zofate Chawlbuk an sa a, Assam lamin silai nen an kap a ni. Kan zirlaite khan chhantu an nei lo a, an lainatawm takzet. Tunah erawh chuan a ṭul dang ang anga ramri humhalh ngam sorkar a lo ding ta a. Ram neitute kan sorkar takah chuan ramri humhalh kawngah awmze neiin huaisen takin kan kal ta mek a ni,” a ti a. “MNF sorkar hian mau tam ṭam leh Covid hripui a hmachhawn tawh a. Pathian leh kan ram tan titu sorkar hnuaiah hian chhuanchham an awm lo a. Chhiatna nasa lutuk thleng lovin heng hun harsate hi kan paltlang mek a ni,” a ti bawk.

Pu Ruatkima chuan, “Congress sorkar kha Zoram mipui tumah hian ngaizui an awm lo. Phai lamah nen Mizoram lamah nen an hniam telh telh a. An President an thlak avangin mipuiin kan hmuh dan a danglam lo. Tuihna awm lo tuikhur ang chiah a ni tawh, hnemhnanna awm lo an ni tawh,” a ti bawk.

Pu Lalruatkima chuan, “Tun dinhmunah chuan State-a sorkar mek MNF hi Mara mipuite tana malsawmna thlen theitu dik tak chu a ni,” a ti.

Pu Lalruatkima hian Zyhno khua aṭangin voter 147 MNF-ah a lawmlut a ni.

Sd/-
(LALLENMAWIA JONGTE)
Secretary
Media & Publicity Dept.
Mizo National Front
Memo No.MNF/Media/03/2022/409
Dt.29.04.2022.