DR.R.LALTHANGLIANA’N AMC ELECTION CAMPAIGN VAWRTAWP HUN A HMANG

Mizo National Front
General Headquarters
Mizoram : Aizawl

Press Release

DR.R.LALTHANGLIANA’N AMC ELECTION CAMPAIGN VAWRTAWP HUN A HMANG

Nimin February ni 11, 2021 (Ningani) tlai khan Chief Minister bial, Aizawl East-1 MNF South Block huamchhung Zemabawk Kawnah, MNF AMC Election Campaign Committee huaihawtin Street Campaign huaihawt a ni a. He hunah hian Health Minister,
Dr.R.Lalthangliana chu khuallian a ni.

Khuallian Dr.Thangtea chuan thu a sawi a, “Tun tum hi tunkar chhunga Aizawl khawpuiah AMC Election Campaign-ah vawi 50 thu ka sawina chiah a ni ta a, naktuk Border Area, Silsuri lamah ka zin a ngaih dawn avangin tun hi AMC Election Campaign-a ka thusawi tawpna tur a ni rih ang. AMC kan inthlan turah hian Ward vawi hnih vawi thum tlawh chhuahte pawh ka nei nual tawh bawk. Kan AMC Inthlan turah hian ka rilrua awm lian taka awm a awm, MNF Party hi vawi khat mah Party hming la thlak ve ngai lo, a dintute pawh mi ropui lutuk ni bik lo, 1961-ah Pu Denga hovin Tuikhuahtlangah mi tlemte kalkhawmin an din kha a ni a. ‘Pathian leh kan ram tan’ titu Party a nih avangin harsatna hrang hrang karah pawh Pathianin a hruai chhuak zel a ni tih hi a ni,” a ti.

Dr.R.Lalthangliana chuan, helai Zemabawk Area-ah hian Mizoram pum tan leh hmarchhak State dang tan pawha pawimawh em em tur, MNF sorkarin hma a lo lak tawhnate, thawh mek leh hmachhawpte chu a sawi bawk a. “Zemabawkah hian India ramah pawh a tha berte zinga mi ni thei tur ‘Super Speciality Cancer Hospital’ dinna tur chu MNF sorkar chuan kan peih fel tawh a. He sum hi hmuh a harsa hle a, mahse, Japan International Cooperation Agency (JICA) Funding, Japan-in 80% tumin State-in 20% chauh a tum ve tur a ni dawn a. Cheng vaibelchhia hlir, vaibelchhe zanga senga sak tur a ni a; hei hian kentel tam tak a nei ang a, India ram hmun hrang hrang atangin Super Specialist Doctor an rawn fuankhawm nasa dawn a ni. Hei hi India hmarchhakah chuan a nei awmchhun kan ni dawnin ka hria a. Tuna cancer natna avanga phai lam Hospital tha kan pan ruih ruih ang hian hmun dang atangin an la rawn pan nasa viau ang. RIPANS pawh hi nasa takin upgrade kan tum a, Administrative Building te, Building hrang hrang leh Quarters hrang hrang sak belh tur a ni a, thawktu pawh mi 150 lak belh kan inbseisei a. Cheng vbc 480 hmanga sak tura tih a ni a, Mizoram ta bik ni chiah lo mahse, a awmna bial mipui chu engemaw chenah in thu khawpin ka ring,” a ti.

“Kan sawi fo tawh angin, tuna kan thlan tur AMC hi kum 2006-2008 inkar velah khan Pu Zoramthanga kaihhruai MNF sorkar din a ni a. AMC din hma pawh khan MNF ministry hmasa khan hna ropui tak tak a lo thawk tawh a ni. Nu chan changa AMC hnute petu tur UD & PA Department pawh MNF-in kan din bawk a ni. Amaherawh chu, AMC kum 10 kalta sorkar chhung khan a dintu MNF chu State-ah a la sorkar loh avangin, a dintu leh hringtu ni lo sorkarah chuan AMC khan hma a sawn thei tak tak lo. Tunah chuan AMC dintu MNF ngei State-ah a sorkar tawh a, Ward tina kan Official Candidate-te hi thlangtling ila, development chu a rawn par chhuak mai ang,” Dr.Thangtea chuan a ti bawk.

MNF AMC Councillor Candidate Pu Vanlalneia pawhin, “Pathian leh kan ram tan titu kan ni a. Pathian a hmasa zel tur a ni. Kan ward hi ka fang chhuak chipchiar ta hle a. Kan khawtlang leh Kan ward mamawh tam tak ka hmu a, theihtawp ka chhuah dawn a ni. State-a sorkar mek nghenchhan leh AMC chaknaa hmalak a chakawm tawh hle a. Ward chhung hmasawnna tur hrang hrang thawh tur tam takte hi Pathian leh mipui zarah Ward mawhphurhtu ka nih anga theihtawp chhuah ka chak tawh hle a. A bikin inkalpawhna kawngpui tha leh Step te, Tui leh kawlphetha (eng) lamah Ward chhung hmasawnna tura hmalak a phurawm tawh hlein ka hria a ni. Tin, UPSC leh MPSC level-a inziak tling thei Ward chhunga mi an awm chuan, Ward fund atangin an kal lehna tur puih ka inhuam a. HSLC leh HSSLC Top-ten tlingte pawh an kal zel nan hma ka lakpui ang,” a ti bawk.

(R.LALHMANGAIHA)
Secretary
Media & Publicity Dept.
Mizo National Front
Memo No.MNF/Media/02/2021/185
12.02.2021.

0