History of the Party

MNF DIN CHHAN

Mizo National Front (MNF) nihphung leh dinchhan hi chhutchian dawl takin hawrawp hi rem a lo ni a.

Mizo: Kan pipute thlangtlain he ram an luah hian tlang hran leh mual hranah Sailo Lal ni lo pawh lal dang an tam mai. Lal ban a nih hnuah he ram luahtu hnam hrang hrangte chu phuarkhawm duhna Hnam rilru chu a piang a ni, chuvang chuan chi peng 46 (Sawmli leh paruk) lai phuarkhawmna chu Mizo a ni a, kan nakin hun zel tura an lo phuah chu a dikin a rem thlap a ni.

National: Saptawng a ni a, hnam mahnia ro inrel tawhte a kawk deuha kan hriat laiin, chi a sawi tham loh tlem te kan nih lai atanga a dintute hian mahnia ro inrel, hnam dang laka kun lo tura ‘National’ an han ti chu a ropuiin a huaisen rilru hle a ni. Hnam rilru  din ngil tir at a phuah a ni ngei tih a chiang.

Front: Saptawng a ni a, chipeng hrang hrang hruaikhawm/phuarkhawm na-ah a hmahruaitu, hnarkaitu niin Mizo hnam chuan mahnia ro inrel a, khawvela parchhuak tura beihna a ni.

A din hun pawh hi kum khata thla en ber thla, malsawmna dawng tura hunpui nuam lai ber ‘Khuangchawi thla’ a ni.  Pathian hun ruatsa-ah a hruai tur Hnam Movement hruai turte chu a kaltir mai a lo ni. 22nd October, 1961 ah Hnam thinlung pu mite chu Pu Laldenga In Tuikhuahtlangah kalkhawmin ‘Mizo National Front’ hi an lo din ta a ni.

MNF RINAWMNA THUTIAM
(OATH OF ALLEGIANCE)

Kei ………………………………… Pa Hming …………………………… hian

  1. Ka taksa, ka thinlung leh ka nihna zawng zawng hi engmah humhalh nei lovin, Mizoram zalenna atan ka pe a.
  2. A nuamah emaw, a hreawmah pawh ka chungah hotute thupek chu a tulna hmunah leh a tul dan ang zelin tuiah emaw, khawmualah emaw boruakah emaw phunnawina leh hnialna awm hauh lovin englai pawha zawm tlat turte.
  3. Harsatna tinreng leh tihina hial thleng thei khawp tihduhdahna hnuaiah pawh thurukte vawng tlat a, thiante phatsan hauh lo turte.
  4. Mizo tlawmngaihna diktak vawnga, ka tihtur apiangah chuan dawhthei tak chungin theitawp chhuah zel fo tur te.
  5. Mizo Hnamin zaalenna a hmuh hma loh chu rinawm taka PATHIAN LEH KAN RAM TAN bei zel turin

PATHIAN HMINGIN KA INTIAM TLAT E.

Signature

MNF HISTORY

Mizoram District Council in mipui riltam kawng a zawhpui avangin Pu Laldenga chuan vantlang hmaah District Council hotute a dem a, ban a ni nghe nghe a ni. Tun chinah District Council demna leh tihhmingchhiatna lam sawi tawh lo tura a intiam chuan a hna a ngaia zawm leh thei tura a chungthu relsak a ni. Nimahsela chu intiamna chu hnawlin sipai a tan laia Politics-a a piantharna kha a taka chantirna hun remchanga ngaiin Sawrkar hna bansanna chu April ni 15, 1961-ah a thehlut ta a ni.

Sawrkar hna a bansan hnu chuan Theatre Hall, tuna Vanapa Hall an tih takah hian vantlang inkhawm a ko thin a. India sawkarin Mizote riltam a ngaihsak lohzia te, Mizote hi India hnuaiah kan him tawh lohzia te chu a sawi tlang lawn ber a ni a, Mizo rilru a hneh hle a ni. Tichuan, October ni 24, 1961 zanah Pu Laldenga inah inhmuhkhawm zai an rel ta a ni. Mi pariat an lo kal thei a, tam tak nilo mahse an rel kim ta tho a ni. An thurel hmasa berah chuan Mizo National Famine Front chu Political Party a leh an titlu a. Tichuan Mizo National Famine Front ni tawh lovin Mizo National Front ni tawh se an ti ta a ni.

He pawl dinchhan pawh an sawi chiang nghal a. India, Burma leh East Pakistana Mizote ram luah chin chu rorelna pakhat hnuaia awm thei tura Mizote Sovereignty sual chhuah te, Kristian sakhaw humhalh te, Mizoram ei leh bara hnianghnar tura siam te a ni. Heng mite hi an mi ruatte chu an ni:-

President- Laldenga
Secretary- R. Vanlawma
Joint Secretary- A. Rohnuna
Treasurer- Vanlalliana

Committee member chu hengte hi an ni:-

  1. C. Hermana
  2. Lairokunga
  3. Zotâma
  4. Kailianchhunga

Tichuan General Assembly neih an rawt a, a hun a tan April ni 1 atanga ni 4 tih a ni a, a hmun ah Aizawl Cinema Hall awm chhun Krishna Talkies dil a ni a, a neitu Ganesh Das an a remti a ni. April ni 2-naa ro an han rel chu India atanga Independent dan tur thu hlir a nih avangin Cinema Hall neitupa Ganesh Das a ngaihthalo chuan insawnna remchang ngaihtuah turin a ti ta a. Tichuan a ni 3-naah chuan R.Vanlawma inah an in sawn ta a ni. April ni 4, 1962-ah Mizo National Front, General Headquarters hruaitu tur chu Secret Ballot hmangin an inthlang ta a, an mi thlan chhuahte chu:-

President – Laldenga
Vice President- John F. Manliana
Secretary- R. Vanlawma
Assistant Secretary- Isaac Zoliana
Treasurer- C. Rochhinga
Financial Secretary- Jessie D.H. Thanga

National Executive Member-te:-

  1. Vanlalliana – Venghlui, Aizawl
  2. Ngurbuaia – Dam Veng, Aizawl
  3. Jem. Challiana – Dawrpui, Aizawl.
  4. Zamanthanga – Venghnuai, Aizawl.
  5. Zirliana – Dam Veng, Aizawl.
  6. Zotama – Saron Veng, Aizawl.
  7. K. Rochhinga – Venghnuai, Aizawl.
  8. Zanenga -Dawrpui, Aizawl.
  9. Lalnundawta – Kulikawn, Aizawl.
  10. Thanglawra – Khatla, Aizawl.
  11. Duma – Tlangnuam, Aizawl.
  12. Vankunga – Mission Veng, Aizawl.
  13. Kapthanga – Dawrpui, Vengthar.
  14. Pachhunga – Hmuia Veng, Aizawl.

National Executuive Committee hi April ni 7, 1962 khan Treasurer C. Rochhinga inah an thukhawm a, hmalak dan tur an rel a, an thurel pawimawh zualte chu:-

  1. National Executive member Zangena inchhawng, Upper Bazar-a mi chu Mizo National Front General Headquarters Office atan man lova luah hawh phalsak an ni a. Office hi nileng a hawn nise, Office Bearer te phei chu nitin vawikhat tal tlawh tura ruat an ni. May ni 1.1962 atanga hawn tan ni se tih chu rel tluk a ni.
  2. Thla khatah vawikhat tal Theatre Hall-ah emaw, hmun remchang danah emaw Policy thehdarh nan vantlang inkhawm koh ziah ni se. Min sawmtu an awm apiangin an vengah kal ngei nise tih rel a ni bawk.
  3. Thingtlang khaw lamah pawh kan Policy thehdarhin a tam thei ang ber zin ni se. Heng senso atan Finance changtuten an thiam dan danin sum leh pai lo ngaihtuah se tih te.
  4. MNF Flag atan puan pawdala sakeibaknei ding, ang bai chu kan thlang bawk. Badge leh insignia te pawh thlan fel a ni bawk.

May ni 1, 1962 khan an thurel ang ngeiin Office chu hawn a ni a. Ni tin nilengin kan nghak a, Mizoram Political Party zingah nitin a office hawnga nghak ziah hmasaber kan ni. Tichuan, ni tin office-a leng lo hial mipui dawrtu kan nghah thin a, Mizote thinlungah chuan mahni kea din a, kan ram chhungah kan thu thua ro rel ve duhna thinlung a lian nasa hle a ni. Hetih hun lai hian Mizo hla phuah thiam lar tak Rokunga, Mission Veng Pa chuan Mizoram Independent hi a lo phurpui ve em em a. A rilruah Mizo Hnam hla a lo piang ta a. Chu hla chu, “Harh la, Harh la, Zoram i tlai a nge,” tih hi a ni. Mission Veng MNF thalaiten an thiam thuai a, khawlai fangin he hla hi an sa thin a, mite thinlung a hneh thin hle a ni. A sa thiam hmasa a phur zual thenkhatte chu- Tlangval Zaidarhzauva te, Tlangval Zailiana te, Tlangval (Dr) H.L. Malsawma leh MNF unit President Hmasa ber Chawngchhunga te an ni.

Hetianga ni tin Office kan hawn avang leh kan ram hian zalenna a lo duh em avangin kum 1962 leh 1963 chhung hian Mizoram Political Party lian ber a tling hman a. Kan tihdan hi a thatzia hriain Mizo Union te, Indian National Congress te, United Mizo Freedom Organisation te pawhin ni tin an Party Office chu an hawng ve a, mahse an pun phah chuang lo a ni.