MIZO HNAM RUN KALKAWNG

MNF hi 22nd October, 1961 ah Pu Laldenga In Tuikhuahtlang ah din a ni.  Office neia a thawh (Function) chu kum 1962 atang a ni a, Office a neih dan chu a kum leh hmunte tarlang ila :-

1962: Pu Zanenga Building, Dawrpui.

He Office an luah lai hian Mautam tam avanga Mizo mipui tawrhna leh  Assam Sawrkarin min ngaihsak lohna chuan  Hnam thinlung a chawk tho tan. Mizoram a vai dawrkai huatna leh Hindi flim chhuah thinin Mizo rilru a hruai dik lova hriatna lian tak a thlen avanga ngaimawhna Krishna Talkies  chu a helh hle. Khawvel zaithiam “The Beatles” thangthar ten an lakai (Imitate) nasa. Mizo hnam humhalh tum MNF tan chuan hrilhchian hna chu hna tul tak a ni.

1963-66: Pu R. Lalawia Building, Dawrpui.

Assam in Lushai District Council min ngaihsak lohna avanga inthlanna (MDC Election) a hnehna chang ngei tura beihna.  MDC bial 3-ah bial hnih la thei khawpin a thang chak a ni. Mizo hnam tundin tum tan chuan vai huatna chu vuak vun zel a tul bawk a, vai sumdawng leh sawrkar hnathawkte Mizo nula/hmeichhia ten an lawm deuh a hriat chuan thikthu a chhe thei hle a ni.

1966-86: Hemi chhung hian Mizoram Independent 1st March, 1966 a puan anih avangin, remti lotu India Sawrkar nen indo a ni a. Mizoram chhungah Office neih theih a nih loh avangin Bangladesh-ah leh Arakan ah a awm a, Mizoram zalenna turin chung hmun atang chuan ralrel a ni ta zawk a ni.

1985-86: Pu R. Lalawia Building, Upper Bazar.

India leh MNF inbiakna chuan hma a sawn ve hret hreta, thu inchuh lai a awm thin avangin a muang leh thin bawk a. Mizo mipui rilru a bikin Political Party leh NGO te duhdan leh tha tih zawng Capital lama hrilhhriat ve zung zung theih nan Emissary Office (Palai) chu Army Chief Brigadier Pu Tawnluia’n August, 1985 ah a rawn hawng a. Pu Aichhinga Emissary I, Pu H. Vanlalauva, Emissary II leh a ziaktu pawh hi a thawk bawk a. Inbiakna mutan- Governor Special Power – ‘Leilung hausakna Central in a hauh’ te chu nawr nem ve turin Mizoram tualto Party leh NGO te chu thawm nei a, kawngte zawh turin hrilh ruk an ni a. Aizawl Town Duty te pawh boruak thlithlai reng chungin an sahimna tur an zawng ve a. Capital leh Mizoram chanchin inhriat pawhna turin “Chhantlang” chanchinbu kan chhuah thin. Inrem a lo nih khan Emissary Office chu kan hmang tangkai hle, Hnam Sipai lo hawng hmuahnate, Programme hrang hrang kan duang thin.

1986- 88: MNF chu Party thiang a nih tawh avangin Emissary Office a awm a rem tawh lova, September, 1986-ah chuan Pu R. Lalawia Building Upper Bazar atang chuan Pu H. Hrangdawla Building, Tuikual-ah chuan kan insawn phei a, kawrkam eng dawng tam lo hi a ni a. Thlasik rim a nam tan deuh tawh bawk a. Thutthleng leh dawhkan chu mi thilphal ten an rawn thehkhawm a, kan indaih thuai ve mai. Unit inthlan thuchhuah sam niin, Party hruaitute Headquarters atangin an fehchhuak a, Unit chu an din zawih zawih a ni ber mai. General Secretary chu Pu Lalrinchhana a ni a, Unit Approval form te kan siam thuai a, a approved nghal char char bawk a, MNF thli chu Pu Laldenga leh Pu Zoramthanga chuan an tleh tir nasa, an rim dun hle a ni.  Inbiak laia boruakte, a mutan lai te, Inremna thuthlung Mizo mipui tana hlutna leh thatna te, Politics ah fullstop ni lovin kan bultanna a nih thute an sawi a. Zoram dung leh vangah an fehchhuak a ni. Congress leh PC lah chuan MNF thlitleh chu helhin a chhe zawng hlir maiin min bei bawk a. Chu kan Office tharah chuan Thawtanni leh Zirtawpni ah chhung inkhawm kan nei thin a ni. January, 1987-ah MLA inthlan tur a ni a. Unit – 734, Group – 125, Block 48, District Headquarters – 3, General Headquarters -1 kan nei hman a. Inthlanah chuan MLA 24 la-in kan Sawrkar chiang hle. MNF thli tlangtin mualtin-ah a tleh a, Sawrkar thar lawmna ruai kan theh mup mup mai a ni. Assam Rifles leh Civil mi intibuai an awm. Kum khat leh a chanve kan sawrkar chuan MLA nihna a tuihal leh pamham ten MNF Sawrkar chu an tichhia a, Governor Saikia’n a namthlu a, MNF atanga chhuakin ‘MNF-D’ invuah party chu a ding ta bawk. Kan Office luahlai neitu Pu H. Hrangdawla pawh MNF Sawrkar tichhetu zinga mi a nih avangin Inthlan leh hma a chhuak tura min tih avangin in ruak remchang kan zawng ta a. Pu Khawtinkhuma building, Bazar Bungkawn-ah kum 1988 kumtawp lamah kan insawn phei ta a. Bungrua kan la ngah lutuk lem lo bawk a, Hnatlangin kan inthiar zo thuai a.

1988-92: Pu Khawtinkhuma Building, Bazar Bungkawn

 Vijaya Bank chung leh a sir deuh room a ni a, Pu Hrangdawla Building ai chuan a daihzai thei deuh a. President rules thlaruk chhunga inthlanna buatsaih leh tur a ni a. Kum 1989 January, Ni 21 ah Inthlang leh tur Nomination Committee chuan Candidate te a han siamfel a, Hqrs. atangin Campaign Directorate siamin Campaign tur detailment siam a ni a, khaw hrang hrangah thahnemngai takin an fehchhuak a. MNF Sawrkar, Governor in a namtluk luih dan chu Congress nen kan thu a inchuh a ni ber, Congress lam chuan ‘MNF an in surrender, India Danpui hnuaiah an  lo lut tawh alawm, engmah tih theih an nei tawh lo, an duh chuan ramhnuaiah kal lehse a ni mai alawm’ ti a tawng elhsen leh diriamna tawngkam dengkhawng tak takin an sawi khum a, khaw hrang hrangah Campaign boruak a sang hle. Kan Office pawh a lun khawp mai a, rorelna chang ngei tur pawhin CID, Chanchinbu lam, Neutral thlirzau chinte chuan min ring. Amaherawhchu, Meghalaya State atangte a kan thu dawn danin Assam ram atanga Congress uisathiam, Rigging Master an tih mai Santos Mohan Dev a rawn kal chuan a pawi dawn a, lo inveng uluk turin an ti a. Santos Mohan Dev an tih chu Police lal tak inven tirin khawpui hrang hrangah kal a, Aizawlah chuan Governor Office ah leh Hotel khawimaw laiah a khawsain hna a thawk thin tih kan hria a, mahse  a eng ber nge a tih chu kan hre thei lova, kan ngaih a tha vak lo. Inthlanna chu kan han nei a. MNF boruak pawh a tha ber, vote an han chhiar a rinhlelh ang ngei chuan Rigging (Tihchingpen) a ni tih a lo hriat ta a ni. Mizorama kan hriat ngai loh politics bawlhlawh chu Mizo Kristian ramah ngei chuan hman a ni a. Vote tihchingpen a nih avang chuan MNF chuan High Court ah kan khing a, mipui beidawng tur pawh a chelh ding rei hle. Party Office  Pu Khawtinkhuma Building pawh chu in neitu ten luah zel an remtih tak loh avangin In dang luah tur kan zawng leh ta a . Beidawn tawh lamah Pu Taimama’n a in luah min lo phalsak hlauh avangin  Zarkawt-a a in chhawng hnihna leh chhawng thumna chu luah turin kan in be fel ta a. Pu Khawtinkhuma Building kan luah chhung hian :

  1. MLA inthlan 1989 kan hmachhawn, rigging vangin kan tling ta lo.
  2. Hnam Pa, Pu Laldenga kan sun.
  3. High Court in MNF Mipuite a awi nung.

1992–97: Pu Taimama Building, Zarkawt

MNF in Office nghet kan la neih theih loh avangin khuangruang ang maiin awmna kan sawn  lo ngai leh a. Pu Khawtinkhuma Buliding atang chuan August, 1992 ah Pu Taimama Building, Zarkawt chhawng hnihna leh chhawng thumna-ah chuan kan invawm lut  leh ta a, Building a len loh avangin room siamrem pawh a harsa phian a, engemaw ti ti chuan kan inrem leng a. Party mite pawh Opposition kan nih kum a lo liam deuh hnu chuan Office tlawh pawh kan tlem tial tial a, a khawhar thlak tan khawp mai. Mahse nakuma MLA inthlang tur kan nih avangin kan infuih tang sauh sauh zawk a ni. Kan innghahna ‘Pathian leh kan ram tan’ tih a ni a, chhung inkhawm pawh thawhtanni leh zirtawpni in kan nei ziah a ni. Pu Taimama Building kan luah laia, kan hmalak thenkhat langsar deuhte:

  1. 1993 MLA inthlan kan hmachhawn : MLA 16 kan nei a, Sawrkarna siamthei Party kan awm loh avangin Coalition Sawrkarna siam turin ngaihtuahna kan hmang nasa tlang hle. A tawpah Congress in PC MLA te thlemtlu theiin Sawrkarna an siam.
  2. E/Roll Intensive Revision 1995 :  Chakma, Tuikuk te E/Roll a an pung chak em a hriatna avangin, MNF chuan 1952 E/Roll base a an thlah kalzelte chauh thun turin hma kan la a. Western Belt ah detailment khauh leh kawng tak kan siam a, Lunglei Sub-Hqrs. in an District huamchhung khuate ah hma an la bawk a. Chakma umchhuah leh in hal pawh a awm nual a. Kan Workers mi 26 lai te chuan Case rip tak an awrh hial a ni. MNF in intensive Revision a theihtawp kan chhuah avangin rah tha a chhuah nasa hle a. Summary Revision-ah pawh Base year atan 1995 chu hman a ni ta zel a ni.
  3. Lawngtlai District huam chhung hmun tam takah lei tawlh/tla hniam chuan Mizoram Sawrkar a nghawng bakah Central atangin lei chanchin zir mite an rawn kal ngun hle.
  4. Party inthlan hautak : MNF ah pensioner mi thiam pui pui an lo lut a, hruaitu Pu Zoramthanga duhkhawp lohna avanga lo lut pawh an ni thei !!. Kan Danbul siamthat rawtna pawh a lut a, tun hma a kan kal dan buai lova kan hman thin chu ngaimawh a ni ta a.

(i) National Executive Committee in lungrual taka Candidate a  a siam chu harsatna awm lovin General Assembly pawhin a thlang mai thin. Amaherawh chu, MNF President nih tum Pu Lalduhoma chuan National Executive Member chhungah chuan duhtu tam zawk chan a National Executive- a Official Candidate nih chu a tum a ni a, a tum ang chuan Member tam zawk thlawpna chu a hmu a ni. Amaherawh chu, a tum hriatchian a ni.

(ii) Floor Candidate tih hi he Danbul Amended atang hian kan nei ta a, Pu Zoramthanga chu NEM a a tlang zawh tak loh avangin Mipui lam chuan Floor Candidate atan kan vawrh leh ta a. Party President inchuh tur chuan Pu Zoramthanga leh Pu Lalduhoma te chu MNF chhungah chuan Campaign a ngai ta a ni. Thlangthei tur siamsah  duhdan  a inang lova, a buaithlak kher mai. Inthlan a zawnga hautak ber kan tawng chhoh a. Vanapa Hall a, Ni 25. 2.1997 inthlanah chuan, Vote an chhiar a Pu Zoramthanga chu hneh takin a tling ta a ni. MNF in hliam nasa tak a tuar a, Inthlanna a tling  lo lam Pu Lalduhoma duhzawkte chuan MNF chhuhsanin MNF(N) an han din leh a, MNF ziding awm renga MNF(N) invuah chawp tha kan tih lova, ZNP an invuah ta a, inthlan nghawng chu na tak a ni. MNF a tangkai tak tak te pawh an chhuah nual avangin General Hqrs. a hruaitu/mawhphurtu te pawh ruatfel a nih hnuah chuan hma pawh chak zawkin a lak theih ta a, kan  phur tlang leh thei a ni.

(1997 – 2002) Pu K. Santhuama Building a in sakchawp tura Office kan siam tur hnatlang pawh kan phurin, thla khat chhungin kan sa zo hman der a. Kan Office hming tur pawh rawtna tha tak a awm karah, President Pu Zoramthanga phuah “Mizo Hnam Run” tih chu kan hmang ta a. Kawngpui atanga chhiar theihin kan tar ta a ni. Mizo Hnam Run hawnna pawh Ni 17th November, 1997 ah hlim takin Programme kan hmang a, MNF a beidawng tawhte leh chan chau tawhte chawhthawh nan kan hmang leh thei a, phur tak leh lun takin kan awm a ni.

Pu K. Sangthuama Building kan luah chhung hian MLA inthlan 1998  kan nei a, 1998-ah chuan MPC leh MDF te nen tang hoin hnehna sang tak MLA 32 kan nei a ni.

(i) Danbul siamthat a ni a, Party inthlanna, Candidate siam dan Bung leh chang chu a hma a Amendment rilru diklo te tlakzeh theihna chu kan paih leh vek a, re-write tluk deuhthawin Pu Khawpuithanga, Co-ordinator/GS hoin kan thu a, Amendment tha takin kan hmang ngar ngar a ni. Co-ordinator hoivin General Secretary 5 kan nei ta a.

(ii) MNF Sawrkar hmasawnna hnuiah Autonomous District Council lam pawhin hma a sawn hle a. CADC –ah chuan MDC  ah chak takin kan Sawrkar thei ta bawk.

Peace Bonus in Mizoram sum harsatna a sukiang nasa. Opposition Party te pawhin Pu Zoramthanga phuahchawp Peace Bonus chu sawisel ngaihna an hre lo a ni. Martar thlanmual mawi tak Luangmual-ah siam a ni a, Martar thlan 1563 chuang hming siam a ni a, tlawhtu an tam thei hle.

MIZO HNAM RUN 2003

Sawrkar lai kan ni a, kan President Pu Zoramthanga ngaihpawimawh Mizo Hnam Run Building neih thuai chu a vei hle a, Minister dangte leh Party hruaitute thahnemngaihna in Mizo Hnam Run nghet tur chu an dap a. Canteen Square a BN Battacharji Building chu lei a ni a, a hmun hma kawngpui bul mai a nih avangin, Party function lian buatsaih changin vantlang mipui kan tibuai fo thei dawn a kan hriat avangin  kan lung a dum zan lo deuh a ni. Vanneihthlak takin Pu J.Thankunga Building Vanapa Hall sir chiah a mi chu inthleng a phal hlauh mai a, lungsi takin kan inthleng ta a, Party mipui pawh an hlimin an phur hle. Pu J. Thankunga Building chu Mizo Hnam run siam tur chuan tihdanglam a siamthat fe a ngai a. Pu K. Sangthuama building a Mizo Hnam Run kan siamchawp senso pawh a luah man nen a intlak zo thawkhat a. Mizo Hnam Run nghet atana Room hrang hrang siam dan tur pawh rel-in mithiam kan ruai a, Pindan thiah, Toilet sawn, pipe line siamrem, Current line siam that, rawng hnawih thar thawh tur a tam hle. Mi inphal leh tlawmngaite avangin thlasik nimahse kum thara luah hman turin peih a ni ta. A hawnna Programme pawh 6th January, 2003-ah ropui tak leh tha takin hun kan hmang a ni.

Mizo Hnam Run chu Sub-hqrs., District Hqrs., Block Hqrs. ah chuan a ding ta zel a ni.

2005  – Champhai-ah building lei a ni.
2006  – Chawngte ah buiding tha tak lei a ni a, luah nghal a ni.
2006  – Siaha-ah building lei a, sak chhunzawm a ni.
2006  – Lawngtlai-ah October thlaah lung phumin sak chhunzawm a ni.
2006  – Lunglei-ah sak chhunzawm a ni.
2007  – Tlabungah neih a ni.
2019  – Serchhip-ah a hmun neih a ni a, sak tum a ni.
2020  – West Phaileng-ah neih a ni.
2021  – Khawzawl-ah neih a ni.

Khaw hrang hrangah Mizo Hnam Run chu nei thei ngei turin ngaihtuahna an hmang mek  a ni.

Mizo Hnam Run kan luah tan atanga tun (Diamond Jubilee) thleng hi chuan Mizo Hnam Mipui tan thil tam tak rel chhuah leh ngaihtuahna hmun a ni a, Mizo hnahthlakte tan Inpui a ni a, lawikhawmna hmunpui  a ni bawk. Aizawl khawpui laili tak mai a kan nei hi Hnamte tana Pathian min ruat sak a ni a, a lawmawm hle.

Mizo Hnam Run kan luah hnu a thil pawimawh leh hun pawimawh kan tawnte :

(1). 1986 – 2004   : Bial 40 chu khaw hming chawia siam a ni a, hei hi dik tawk lo leh remchang tawk lova hriat avangin  Constituency Delimitation Commission chuan Delimitation Committee siamin an ngaihtuah a, Constituency hminga khaw hming awm chu Lui leh Tlang hming remchangin an thlak a, khua pawh a bial a awm turin an sawirem bawk a. Aizawl khawpui chhung bial erawh chu an siam tam ta a. Bial 11 lai a lo ni ta a ni. He Constituency Delimitation Committee rel hi 25th March, 2005 atanga hman turin Order chhuah a ni a, tun thlengin kan hmang ta zel a ni.

(2). Kum 50 dana lo thleng thin ‘Tampui’ do turin MNF Sawrkar a inbuatsaih a, mipui pawhin tampui lo thleng tur chu kan khel hle. A dona turin BAFFACOS (Bamboo Flowering And Famine Combat Scheme) chu Central Sawrkarin min tihsak a, tampui lo thleng pawh chu harsatna awm lovin, thla ruk chhung phei chu ration buhfai a thlawnin mipuiah sem a ni a, malsawm kum a nimah ta zawk a.

(3). Hmasawnna tur pawimawh ber chu inkalpawhna kawng hi a ni tih hria in MNF sawrkar chuan PMGSY hmangin  In 250 awmna khua pawh turin lamlian a sial a, Contractor te an indaih lo hle zawk a ni.

(4). Danbul siamthat (Amendment 7th ) kum 2010 ah neiin General Hqrs. hruaitute chu tih len a ni a, President, Senior Vice President, Vice President 2 (Pa hnih) leh Treasurer te an ni a, hman nghal a ni a. General Headquarters hruaitute chu :

President                : Pu Zoramthanga
Sr. Vice President : Pu Tawnluia
Vice President       : Pu R. Tlanghmingthanga
Dr. R. Lalthangliana
Treasurer              : Pu Vanlalzawma

General Secretary : 15

“NB : A tul anga mawhphurtu ruatbelh theihna President-in a nei a, Danbul in a sawi ang aia tam mawhphurtu General Secretary an awm a ni.”

  1. Congress Sawrkarna hnuaiah Mizo hnam vantlang nun tichhe thei a ‘Zu’ an zawrh dawn avanga ‘Duh lohna kawngzawh’ neih a ni a. Kohhranin a duh lova, NGO ten an duh lo bawk a, kawngzawh mipui tam ngaihtuah chuan sawrkar tan chuan zahthlak tak a ni. Central lam chuan Mizo hnam, kan sakhua hi hlawm tha lo se an duh a, chumi zawmpui Mizoram a INC Sawrkar chuan an ti zel a, Mipui lah kan harhchhuak har bawk a, an sawrkar ve leh thei zel hi a mak zawk a ni.
  2. Mizote sakhua a him theihna tura hmalakna hi MNF thiltum a nih avangin, Pu Lalthanhawla, CM te nupa in Hindu Tample Culcutta-a chal an hnawih sen leh Bati (Hmanraw pawimawh) an chhit avangin Mizo kristiante min ti mualpho hle a. Chuvang chuan kan sakhaw humhalh leh zahawm nan ‘MILEM BIAK DUH LOHNA KAWNGZAWH’ chu MNF bultumin Party hrang hrang pawhin min tawiawm a, kohhran lam pawhin mimal thahnemngaihna in min zawm bawk a. Chanmari atanga tanin Pu Hawla te nupa chal hnawih sen leh bati lang Banner lian tawk leh Placard te kengin 28th May, 2013 (Thawhtanni) chuan kawngpui khat phei vekin Vanapa Hall thleng kan nei a, Resolution points 3 siamin Pu Lalthanhawla te nupa lim Culcutta a Durga Puja 9th October, 2011 a bati hallai, Mumbai a 1st March, 2013 a malsawmna dawng tura chal an hnawih sen lai leh Coconut sawhkeh 9th January, 2009 te chu Vanapa Hall kawtah chuan hal a ni.
  3. MNF hi Mizo mipuite mihringin kan siam si loh harsat mangan kan tawh – Mautam, Thingtam, Hripui, khuarel chhiatna ah hian Mipui thlamuantu atan MNF Sawrkar Pathianin a hmang tlat mai hi a mak a ni. Mizo Hnam kalzelna leh din khawchhuahna tura “PATHIAN LEH KAN RAM TAN” a innghat ngam chu Pathianin hun harsa-ah pawh a kut chakin a hruaizel zawk a lo ni.

Khawvel pawh a inrinlawk thiam bik loh Covid-19 chu 2020 kum tirte atangin Mizoram pawhin kan hre tan a; lo do dan leh inven fimkhur dan pawh kan thiam lova, khawvel sawrkar liante pawh an lu a hai a ni.  Dam lo enkawlna tur hmanrua lah kan nei chau bawk a, hri do hneh tur chuan kan biak Pathiana inngah tawp a ni tih hriain MKHC kaihhruaiin ram pum huap tawngtai rual leh Crusade-te an buatsaih bawk a. Mizoram Sawrkar pawh a theih ang tawk leh a thiam ang angin hma a la char char a, amaherawh chu hripui ngang a ni a,  thawhkhatna bakah variant dang a lo awm zel thei bawk nen a mangan thlak takzet a ni.  Mizo hnam tana kan thawhpui duhtak te then phei chuan a hreawm thin hle.  Engtikah nge a kian ang tih a hriat theih si lova, MNF in a kum 60-na Diamond Jubilee (22nd October, 2021) a hmanna turah pawh programme, General Hqrs. leh Mizoram khaw hrang hranga an inbuatsaihna chu a sukuk vek a ni. He hripui do tur hian Hnam Party Sawrkar chu Pathianin a hmang tlat bawk si.