MIZORAM POLICE DEPARTMENT HMALAKNA

( JANUARY, 2019 – NOVEMBER, 2021)

 

  A hnuaiah tarlante hi Mizoram Police in January, 2019 atanga November, 2021 thlenga hna a thawh tlangpui leh hmasawnna a neih tlangpuite a ni:-

Kum 2019:

  1. Dan leh thupek kenkawh chungchang: Mizoram Police-te inpekna leh thawhrimna avangin kum 2019 chhungin dan leh thupek kenkawh kawngah Sawrkarin harsatna lian tak a tawk lo. Dan leh thupek kengkawh tulna hrang hrangah rang takin Mizoram Police-te an che chhuak vat zel thin a, hei vang hian buaina lian zawk thleng thei pumpelh fo a ni.
  2. Lok Sabha inthlan: April ni 4, 2019 a Parliament inthlan puiah Mizoram aiawh Member of Parliament (Lok Sabha) thlanna neih a ni a, he inthlanpui hi Mizoram Police te hmalakna zarah boruak muanawm tak hnuaiah zalen leh felfai takin zawh fel a ni. 
  1. Police Housing: Mizoram sawrkarin state sawrkar sum leh pai bakah central sawrkar atanga sum hmuhte tangkai taka hmangin office buildings, quarters, barrack sak mekte chhunzawm chhoh niin unit hrang hranga office building, quarters leh barrack siam that (repair) ngai engemaw zat siam that a ni. 
  1. ERSS Project: Khuarel chhiatna, harsatna leh chhiatna hrang hrang a thlen changa rang taka hnathawh a awlsam theihna tura din Emergency Response & Support System (ERSS) chu rikrum thila hmanraw famkim nena che chhuak nghal zung zung thei turin ni 13.08.2019 khan hawn a ni. Tanpuina mamawhten engtik lai pawha an biak pawh theihna tur telephone No. 112 bun tel a ni bawk. 
  1. CCTV Project: Lunglei khawpui chhung CCTV surveillance project chu 1.11.2019 khan hawn a ni. 
  1. District thar leh Outpost leh Beat Post hawnna: Mizoram sawrkarin district thar pathum a hawn Saitual, Khawzawl leh Hnahthialah te District SP office thar dah nghal vek a ni a. Heng bakah hian Police Outpost thar Chhingchhipah ni 28.05.2019 ah hawn a ni a, Police Beat Post pawh hmun thum: Salem Veng, Aizawl; Bethlehem Vengthlang, Aizawl leh Farkawn, Champhai District-ah hawn thar a ni bawk. Heng bakah hian Police Station leh Police Outpost thar district hrang hrangah hawn tura ruahmanna kalpui mek niin Police Outpost thenkhat pawh Police Station puitlinga hlan kai a nih theihna turin hmalak a ni.

 

POLICE DEPARTMENT HMALAKNA KIMCHANG