TUNGE PU LALDENGA?

Pu Lianthlira leh Pi Darchhungi te fa palina niin 11.6.1927 khanLunglei bula Pukpui khuaah a lo piang a. Serkawn ah Lower Primary zirin Middle EnglishVernacular pawh Serkawn atangin a zo leh a. Meghalaya State-a Jowai-ah pawl 7 a zir chhunzawma, pawl 7 a zirlai hian Indopui 2-na a chhuah tak avangin a zirlai a chhunzawm thei ta lova ni. Bunghmun khuaah Lower Primary zirtirtuah kumkhat a tang a, chumi hnuah Indian ObserverCorps zawmin Havilder Clerk-ah dah a ni a. Kum 1948 khan a hna bansan in U.P State-a Rehabilatation Office-ah Accountant-cum-Clerk hna a thawk leh a, kum thum zet a thawh hnuin a hna atang chuan a bang a, 1953 kum tawp dawn ah Mizoram rawn chuangkai lehin Mizo District Council-ah Clerk-Cum-Cashier hna a thawk ta a ni.

Mipui rawngbawl turin Pu Denga a inpe: Kum 1958 bawr chho a Mizoram Mautam tamlo thleng khan Mizo mipuite nasa takin a nghawng a, eitur mumal pawh nei lovin an awm a. India sawrkar lah chuan Mizo mipuite a ngaihsak lo nasa mai a, Assam sawrkar atanga tam tanpuina Rs.1500/-chauh chu an inchan lovin a beitham hle a. Kum 1960 kum tirah chuan tam tuarte chhawmdawl tur leh an thlavang hauh turin β€˜Mizo National Famine Front’ (MNFF) din a ni ta a. President-ah Pu R.Dengthuama niin Pu Laldenga Secretary a ni. Pu Denga chu vantlang thila a inhman tam tak avangin District Council Office-ah a kal tam thei lova. Kawngzawh leh vantlanginkhawm MNFF-in an buatsaih tumte hian a hruaitu ber a ni si a, a tello thei lova. District Council hotute chuan a chet dan a lungawi thlak loh ti in explanation an called ta a. β€œRam leh mipui rawng ka bawlna a dip dawn ai chuan ka hna atangin ka bang mai ange” tiin April ni 15, 1961 khan a eibel ber sawrkar hna chu a bansan ta a ni. MNFF chuan tam tuar te chhawmdawl theih na tur dapin theihtawp an chhuah a, mipuite pawhin an lakah beiseina an nei sangin an thlamuanpui hle a ni.

Tichuan Mizo National Famine Front chuan mizo mipute theih ang tawk tawk a tanpui nan tiin hma an la ta a, mizo mipuiten an thlamuanpui thin hle a ni.

Tichuan tampui a lo reh hnuin Pathian leh kan ram tan tiin Mizo National Famine Front chu Pu Laldenga hoin Political Party ah an in letin Mizo National Front tiin an thlak a. Pu Laldenga hi founder President niin vawiin ni thleng Pathian kaihhruaina in Mizo National Front hian mipui rawngbawl hna a la thawk ta reng a ni.