DECEMBER 16

EXODUS DAY, DEC 16, 1971: Mizoram leh hnam zalenna suala an thawh meknaah a tir atangin MNFte chuan Sajek tlangdung Chitagong Hill Tracts (East Pakistan) ah tawmhimna (Base Hqrs) tha tak an nei a. Heta tang hian trainingte neiin a tul angin Mizoramah hna han thawkin an kir leh thin a ni. Chutihlai chuan kum 1971 March 25ah Awami League President Sheikh Mujibur Rahman hovin Bangladesh Indendent an puang a. East Pakistan chu la hranga Bangladesh ram din an tum a ni. Chu chu Indiain Political and Military Support pein nasa takin a pui a. India chuan Dec. 1, 1971 Pakistan do a puang ta a. Awami League Sipai Mukti Bahini leh Pakistan Sipai te chu nasa takin an indo ta a.

Mukti Bahini te chu India Sipai ten an tanpui a, Pakistan sipai East Pakistana awm te chuan an do hneh ta lova. Dec 16, 1971ah chuan an Commdr. General A.K. Niazi chu India sipai kutah a inpe (Surrendered) ta a. India chuan Bangladesh chu a dinchhuak (Liberate) ta a ni. India sorkar chuan East Pakistan hneh bakah MNFte chu an tawmkuk Base Hqrs. te nen lam luhchhuah a, hmeh chimih vek an tum a ni. Lung pakhata Sava pahnih vawm thlak an tum a ni. Hetih lai hian MNF Sorkar hotu lian zawng zawngte leh Hnam Sipai tam tak chu Chittagong Hill District Hqrs. Rangamatiah hian nunau engemawzat te nen an awm a.

Rangamati hi khawthlang lam (Chitagong) ah chauh lo chuan Kaptai tuikhuah (Dam) tuipui li zau takin a hual vek a. Lawng lo chuan kal chhuah theih a ni lo. Pakistan a tlawm tak avang chuan India Sipaite chu Chittagong lam atangin Rangamati pan turin Helicopter in an rawn inthlak (dropped) mup mup a. Rangamati Tuipui ral lehlamah chuan India Sipai an khat tlat tawh bawk a. MNF hotute awmna (Rangamati) chu ruangchaicheh an rawn thlak hi a ni ber a. India sipaite chuan MNF te chu bel chhunga sa ah an ngai tawh a ni.

Tichuan Dec. ni 16, 1971 chawhnu lamah Rangamatia Pu Laldenga awmna Bungalow ah MNF hotute zawng zawng chu kalkhawmin thil tih dan tur ro an rel ta a. Kil tin atangin hmelmain an rawn hual tawh si a, hruaitute tan pawh rorel thiam a harsa tak zet a ni. Rawtna chi hrang hrang a awm a, thu tlukna nei thei lova lungngai taka an awm lai chuan President Pu Laldenga’n, “Hotute u, thu tha tak tak kan sawi a, thufing ber tur pawh hriat a harsa e, hei chen kan sawi a, thutlukna kan nei theilo a ni a. Hawh u kan vaiin tihtakzetin Pathian hnenah i tawngtai phawt mai teh ang,’ a ti ta a. Tichuan vawi thum zet an tawngtai hnu chuan Pakistan Major pakhat chuan, “Tatkawng lui dung lam atangin Speedboat-in ka lo tlan thleng thei a, chutah chuan in tlan chhuak ve thei ang,” a rawn tih veleh chu lama kal tur chuan an insiam ta a. A zan a zana launch lawnga kal chhuakin vawihnih inkahna tawkin Mizo Hnam Movement Headquarters chu him takin Pathianin a hruai chhuak leh ta a ni. Helai hmun a tanga Pathian hruai chhuahna hriatreng nan hemi ni hi Exodus Day vuah a ni ta a ni.